Ọna-Ọjọ-Egwa Abo Kraist Le T’ojanẹ Wewe

Amẹnukpuchẹ Jisọs leb’ọda ki Jisọs du ñwu ma ku ma takoya uchẹnyọ laale ugbo duu anẹ ilẹ-i. Ef’ọdọ 47 I.K., amọmaye ki dẹ Antiọk kpẹ Pọl kpai Banabas ku ma takoya uchẹnyọ laale. Am’ajuchẹnyọ meji ki dẹ-i d’ẹdọ chacha j’uchẹnyọ ef’amewo ki d’Esia dabu Dẹrbi, Listra kpai Aikoniọm.

Pọl kpai Banabas j’uchẹnyọ r’abo duu ku ma li, t‘anana t’ẹnale, t’imọtọ t’ogijo. Ojile amonẹ la kẹdọno ochochi lugbo Kraist. Ẹgba ki Pọl kpai Banabas aj’uchẹnyo ru igọbina abo Saiprọs k’odu-wñ kọ Sẹgiọs Pọlọs, ach’ifamu ka atene ki kpọna nyu ma. Taki Pọl ka ñwu ach’ifamu lẹ kakini: ‘Ọwọ Jihofa ach’agwunyu-wẹ.’ Ẹrẹrẹ lẹ, eju ach’ifamu lẹ mu kpọfọ. Alu k’Igọbina lẹ f’u li, i f’ẹdọ kono Jisọs.

Pọl kpai Banabas j’uchẹnyọ unyi t’unyi, ef’aja, ej’ọna kpai ef’unyi Ọjọ. I n’ẹgba ku ma ch’ukọlọ awuwu ka Listria ku ma jẹñwu ẹnọlọ ka chanẹ elulẹ. Alu k’amonẹ li ukọlo awuwu-i, ma neju kaki ọjọ oñ Pọl kpai Banabas che-i, ma la atene ku ma chanẹ erẹ ma. Amaa, Pọl kpai Banabas kọ nyu ma ọwọ, oñ ma ka ñwu abo lẹ kakini: ‘Ọjọ kate oñ mẹ arẹ! Onẹ ofofo oñ a che.’ Ubilẹ, uchẹ ka ef’amiJu lewa chanẹ er’abo Listra ibe da gwunyu Pọl. Tak abo lẹ chanẹ er’ikpolo do Pọl, ma la f’u fa t’ọdọda ewo lẹ alu ku ma neju kak i lekwu mẹ. Amaa, Pọl kwu ta n! Tak amọmaye hika wa mi Pọl du kw’ugbo ku ma f’ọ atẹ, ma la mu du dabi t’efewo. Ubilẹ, Pọl mu dabi ti Antiọk.

Ef’ọdọ 49 I.K., Pọl dabi lulẹ uchẹnyọ ejẹ dufu. Ubi ki nya li amọmaye ki d’Esia, Pọl ñọ d’uchẹnyọ lo t’ugbo ki jiji nyọnyọ gbogbo ati Yuropu. I lo ti Atẹns, Ẹfẹsọs, Filipai, Tẹsalonaika kpai ugbo ojoji ojoji omunẹ. Sailas kpai Luku manyu agbadufu ka k’odu-wñ kọ Timoti la lebọ Pọl ef’ulẹ-i. Ma ch’ukọlọ dama ku ma chanẹ am’ujeju abudọ, ku ma la jẹñwu ki lonyanẹ. Pọl gwugwu Kọrint ad’ugbẹdọ ñwu amọmaye ọdọ ka ny’ukpẹru. Pọl na takoya uchẹnyọ, i na kọ amonẹ, i ñọ k’ilẹta ru am’ujeju abudọ wewe. Pọl ñọ na ch’ukọlọ unyiabo eta ki neke n’ọkọ ki adu dejut’ọla-wñ. Alu ki dẹ pẹẹ, Pọl mu dabi ti Antiọk.

Ef’ọdọ 52 I.K., Pọl dabi lulẹ uchẹnyọ ejẹ dufu onukẹta, i la chanẹ kw’Esia. I lulẹ lẹ t’ọnajiji ọwọ ọpata atẹ ki che Filipai, ubilẹ i le ti Kọrint. Pọl gwugwu Ẹfẹsọs ọdọ mebie, i na kọ amonẹ, i na ch’ukọlọ awuwu, i la na ch’atẹko ujeju abudọ. I ch’e-lẹ kate n, Pọl ñọ na kọla ef’ọja ñwu ma ọjọ duu ki ñwa ef’iskulu Tairanọs. Amonẹ wewe la aneti, ma la ach’arida kwefu amali ma. Otitala-wñ, alu ki Pọl f’uchẹnyọ jẹ ñwu amonẹ ef’ewo wewe, I mu dabi ti Jerusalẹm.