UKỌCHẸ 26

Ẹñwu Chi K’ẹñwu Ẹbiẹnẹ Ache Ki Ajẹñwu Wa Ch’ọbata?

E-ku Ma Kọ Dufu

Ichẹñwu k’ẹñwu ebiẹnẹ che, amonẹ a ñeju et’ene kakini: “Ẹñwu chi k’ẹñwu ẹgẹnẹ-i ache?” Ẹdọ wa chẹ bọ nyọnyọ todu ki Baibul dohi ene ki dẹ!

1. Ẹñwu Setan che ki jẹñwu ẹbiẹnẹ chanẹ ef’ilẹ-i?

Setan r’ẹrẹ ubi ñwu Ọjọ. Setan atene ki ch’owñ an’ọda oji amonẹ chaka. Todulẹ, i jẹñwu abo k’Ọjọ nyi ejodudu, Adam kpai If, ku ma lebọ efu ejẹñwu ma kọ egbomu Ọjọ gbọ. Setan ch’e-ki dẹ lefu er’ọlemi ñwu If. (Abakwanẹ 3:1-5) I jẹñwu ki chanẹ ekp’ibe kakini Jihofa ad’ẹñwu ẹnyọ maja ñwu owñ. Ẹñwu ki Setan an’ugbeju ka che kakini i ch’egbomu Ọjọ gbọ ajẹñwu onẹ n’uyọ n. Setan r’ọlemi ejodudu ñwu If kaki i na kwu n. Todulẹ, Baibul dọ Setan kaki i ‘ch’ẹnọlemi, ata ọlemi i la che.’—Jọn 8:44.

2. Ẹñwu Adam kpai If tu ku ma che?

Jihofa d’ọgbọ du ẹñwu ki dukpẹ ki Adam kpai If ki nẹ ñwu ma. I kakini ma neke jẹ kwefu am’ẹro oli du ki def’uchẹ Idẹn. I muda n’okate ki ka ku ma ki jẹ n. (Abakwanẹ 2:15-17) Ama, ma f’ẹro oli lẹ k’Ojọ ka ku ma jẹ ni lẹ jẹ. If “m’ẹro-wñ ka i la mudu jẹ.” Ubilẹ, Adam “lañọ jẹ gẹ.” (Abakwanẹ 3:6) Ama meji f’Ọjọ dure. Adam kpai If chẹ jọkpa. Todulẹ, i lọla ñwu ma ech’ẹñwu ọkpakpa. Ama, ma gbejugede kọ chẹñwu k’Ọjọ tene. Ma dure, ma la kọ eleb’ọda Ọjọ lugbo ẹñwu ki dukpẹ ku ma che kpai e-ki dukpẹ ku ma we che. Ẹñwu ku ma tu lẹ jẹñwu ma ch’ọbata nana.—Abakwanẹ 3:16-19.

3. Akobọ ẹñwu oñ ẹñwu ki Adam kpai If tu du kẹrẹbu wa?

Adam kpai If dure taku ma mud’ẹnẹ ki ma jọkpa n. E-lẹ jẹñwu ugbẹ ma chaka mu d’ẹnẹ adure abẹki ẹnẹ ki ma jọkpa n. Baibul kọla lugbo Adam kakini: “Alu k’adure gudu lef ẹnẹ kate w’ef ilẹ, k’ukwu lañọ lef adure wa, abẹlẹ tak ukwu legudu ny’ugbo amonẹ.”—Abo Rom 5:12.

Amẹñwu ojoji ojoji ch’ẹtẹ am’ọbata k’a che. Iko ẹbọ, a ch’ọbata todu amẹñwu k’a tu ki ma nyọ n. Ẹgba omunẹ, a ch’ọbata todu ẹñwu ki ma nyọ n k’amonẹ che. I la ñọ n’iko k’a ch’ọbata ichẹñwu k’a dugbo ki ma ch’ukpẹ k’a dẹ n.—Gba Akọla ñw Ujeju 9:11.

N’UMA NYỌGBA

G’ẹñwu ki jẹñwu wa ma kaki i ch’Ọjọ ch’ẹtẹ ẹbiẹnẹ kpai ọbata k’a dejudo ef’ilẹ-i eñini n, manyu alu ki dẹ ọla Ọjọ ichẹñwu k’a ch’ọbata.

4. Ẹnẹ ki ch’ẹtẹ ọbata wa

Amonẹ wewe neju kaki Ọjọ an’ọgbọ ilẹ-i le. Ochochi i che? G’IFIDIO-i.

IFIDIO: Ẹnẹ An’ọgbọ Ilẹ-i Le? (1:24)

Gba Jemis 1:13 kpai 1 Jọn 5:19, ubilẹ mẹ ch’oluka oji ene-i:

Ọjọ ch’ẹtẹ ẹbiẹnẹ kpai ọbata k’a che?

5. Ẹñwu t’ache kw’iko ki Setan an’ọgbọ ilẹ-i le?

G’IFIDIO-i.

IFIDIO: Todu Ẹñwu Ọjọ T’uwanọ K’a Ch’ọbata?—E-Ka Du Kwefu-Wñ (3:07)

Gba Abakwanẹ 3:1-6, ubilẹ mẹ ch’oluka oji am’ene-i:

Emi ẹñwu Setan rọ?—G’ọgba 4 kpai 5.
Ọna ẹñwu Setan ajẹñwu amonẹ neju kaki Ọjọ ad’ẹñwu ọmẹmẹlẹ maja ñwu ma?
Setan kaki amonẹ dukpẹ ku ma lebọ ẹñwu ki Jihofa ka taku ma neke n’uyọ n. Ochochi i che?

Gba Akọla ñw Ujeju 8:9, ubilẹ mẹ ch’oluka oji ene-i:

Amẹñwu t’ache todu ki ma che Jihofa an’ọgbọ ilẹ-i le n?

Am’ifoto: Am’ifoto ki adu ña ọna k’ilẹ-i dẹ kw’ẹgba k’Ọjọ nyi ilẹ-i ejodudu at’ẹgba ki ana rida tu Paradais ejọgba. A. Paradais anẹ ilẹ-i k’egbe emimi ki ach’utọ j’efu-wñ. B. Am’igọmẹti e-amonẹ kw’ọdọ wewe jẹñwu ilẹ-i chẹkọ ñwu ọna Ọjọ egwa ọlemi, udaru, ogwu kpai ekp’ilẹ biẹ. Am’igọmẹti ki n’ukpahiu ku ma du ña emi che Ijipti, China, Gris, Rom, Britain, kpai Amẹrika. CH. Amonẹ aj’ura anẹ ilẹ-i iko k’Ọjọ dabi f’u rida tu Paradais.

Adam kpai If ch’efu Paradais ma jọ, ma la chẹ jọkpa. Ama, ma lebọ Setan taku ma r’ẹrẹ ubi ñwu Ọjọ
Ubi ku ma kọ egbomu Ọjọ gbọ, adure, ọbata manyu ukwu lewa b’ọgbọ ilẹ-i ma
Jihofa ak’adure, ọbata kpai ukwu w’ukpoji. Dabalu ki dẹ kwobi, amonẹ ana jọkpa, ma la adodo efu Paradais

6. Jihofa tene k’a na ch’ọbata n

Ọjọ akwula ñwu wa ichẹñwu k’a ch’ọbata? G’ẹñwu k’Onu Defid kpai ẹnukpuchẹ Pita kọ. Gba Eli Ekọ D’Ọjọ 31:7 kpai 1 Pita 5:7, ubilẹ mẹ ch’oluka oji ene-i:

Abu i dẹ ef’ẹdọ wẹ alu k’ẹ ma kaki Jihofa ali wa, i la ach’iwọ alu k’a ch’ọbata?

7. Ọjọ ak’amọbata amonẹ chaka w’ukpoji

Gba Aizaya 65:17 kpai Ọla Ebitẹ 21:3, 4, ubilẹ mẹ ch’oluka oji ene-i:

Abu i dẹ ef’ẹdọ wẹ alu k’ẹ ma kaki Jihofa ana d’ọbata k’amonẹ ache kpai ẹbiẹnẹ du w’ukpoji? Ẹñwu chi k’ẹ kabalẹ?

Ẹ che ma?

Iko ki Setan r’ọlemi ejodudu, i kp’odu Jihofa biẹ. Ọlemi ki Setan rọ lẹ jẹñwu amonẹ chanẹ ekpibe ẹbiẹnẹ lugbo ọla ẹnẹ ki Jihofa che. Ma akpibe kaki i d’ọda-wñ chekwu lọna ufẹdọ n, ki la n’amonẹ le ọna ẹnyọ n. Iko ki Jihofa ana k’ọbata chaka du w’ukpoji, i ajẹñwu odu ẹnyọ ki nẹ kwobi lẹ ki dabi w’ẹgwu-wñ. Jihofa adu tejugede jali kaki ọda ọfẹ-wñ nyọ tule. K’odu Jihofa ki fọ chẹñwu ki ch’ogbogaga tule ef’ojale kpai anẹ ile-i.—Matiu 6:9, 10.

ABO KA KAKINI: “Ọbata defu ẹñwu k’Ọjọ ñwa ñwu wa.”

Ẹñwu ẹ na ka?

ẸY’ỌLA UKỌ-I

Setan Abulumonẹ lẹ manyu Adam kpai If ch’ẹtẹ ẹbiẹnẹ kpai ọbata ki d’anẹ ilẹ-i. Jihofa ach’iwọ nyọnyọ lugbo ọbata k’a che, i la na du w’ukpoji ichẹñwu ki dẹ pẹẹ.