Na Chẹñwu Ki Ajẹñwu Udama Ki Dẹ Ef’Ujeju Abudọ

Iko duu k’a dẹ kp’amọmaye wa, ẹdọ wa abọ dabalu ki dẹ ñwu Onu Defid ki kakini: “Abu ki chenyọ, abu ki abọla k’amọmaye ki jọ kp’ọlama tọkọọ!” (Eli Ekọ D’Ọjọ 133:1) Udama wa ch’achigili i che n. Ẹnẹnẹnẹnẹ wa n’ẹñwu k’a che k’a neke n’udama-i.

1. Ẹñwu ach’awuwu agbade abo Ọjọ?

Ichẹñwu k’ẹ w’ujeju abudọ ojanẹ omunẹ, ẹ neke ma gb’ichi ma n, ama ẹdọ wẹ achẹ bọ dabẹnẹ kaki unyi wẹ ẹ dẹ. Ẹñwu chi ki dabalẹ? Todu ki ch’amọtakada kate a du ch’ukọchẹ Baibul ugbo duu. A la ach’alu du k’a neke che k’a na fẹdọ amọmaye wa. Dagba k’a dodo ugbo duu efu ilẹ-i, ọchaka wa “akwa d’odu Jihofa, [k’a] n’ojika okate ar’ọ.”​—Zẹfanaya 3:9.

2. Ẹñwu ẹ neke che k’udama ki dẹ?

“Mẹ ki fẹdọ omunẹ kp’ẹdọ mẹ gbali.” (1 Pita 1:​22) Abu ẹ neke d’ukọ ọla-i chekwu le? We na kpibe oji am’ali k’abomunẹ nẹ k’ẹ ma ñeju n. Ama na kpibe oji am’ali ọmẹmẹlẹ ku ma nẹ. I ch’abo k’uwẹ kp’ama añeju ẹñwu kate i dukpẹ k’ẹ na dẹ kp’ama iko duu n. Ama ẹ neke ch’onukwu kp’amọmaye ki ch’ojoji ñwẹ, ku ma la kwugbo omunẹ. A ñọ neke ch’alu duu k’a neke che k’a we na ch’ulaka abo ku ma kwugbo omunẹ k’ichi ma ch’ojoji ñwu e-wa.​—Gba 1 Pita 2:​17.a

3. Ẹñwu ẹ neke che ichẹñwu k’ọla chi ñwu uwẹ kp’ọmaye ka?

Ochochi, a che n’udama. Ama, a muda jọ kpa n. Iko ka, a chẹñwu ki akp’abomunẹ ẹdọ biẹ abẹki ek’uma ọwọ banẹ ma. Todulẹ Baibul ka ñwu wa kakini ‘mẹ na . . . du ba ñwu ọla mẹ.’ I ñọ kakini: ‘Dabalu ki Jihofa adu ba ñwu mẹ kp’ẹdọ-wñ chaka, amẹ ki ñọ che abalẹ gẹ.’ (Gba Abo Kọlọse 3:​13.) A chẹ chẹñwu ki ajẹñwu ẹdọ Jihofa kpabiẹ nyọnyọ mẹ, ama i du ba ñwu wa. Jihofa atene k’a du ba ñwu amọmaye wa gẹ. Ichẹñwu k’ẹ ma kaki ẹ chẹ chẹñwu ki kp’onẹ ẹdọ biẹ, hika ch’alu duu k’ẹ neke che ku mẹ kp’ọla lẹ oji.​—Gba Matiu 5:​23, 24.b

N’UMA NYỌGBA

4. Ẹ ch’ulaka abomunẹ n

A tene k’a fẹdọ amọmaye wa chaka. Ama i neke gbiti ñwu wa k’a fẹdọ abomunẹ k’ichi ma abẹki ugbo ku ma kwo ch’ojoji ñwu e-wa. Ẹñwu neke ch’atẹko wa? Gba Ẹwñ 10:​34, 35, ubilẹ mẹ ch’oluka oji am’ene-i:

• Jihofa ad’uña ñwu amonẹ ojoji ojoji ku ma ch’Amẹnibenu-wñ. Abu ẹ neke ch’awọli-wñ lefu ọna k’ẹ li abomunẹ ku ma ch’ojoji ñwẹ?

• Ugbo k’ẹ dẹ, am’ọna ẹñwu amonẹ ach’ulaka abomunẹ k’ichi ma abẹki ugbo ku ma kwo ch’ojoji ñwu e-ma? Ẹñwu chi ki ma dukpẹ k’ẹ ch’abalẹ n?

Gba 2 Abo Kọrint 6:​11-​13, ubilẹ mẹ ch’oluka oji ene-i:

• Am’ọna ẹñwu ẹ kpibe kaki ẹ neke tẹmẹru amọmaye ẹnẹkẹlẹ kp’onobulẹ ki kw’ugbo ki ch’ojoji ñwẹ?

5. Du ba kp’ẹdọ wẹ chaka k’ẹ la jẹñwu urẹdọ ki dẹ

Jihofa du ba ñwu wa kp’ẹdọ-wñ chaka dagba ki ma neju adu ba kwugbo wa n. Gba Eli Ekọ D’Ọjọ 86:​5, ubilẹ mẹ ch’oluka oji am’ene-i:

• Abu adu ba Jihofa nana kade?

• Ẹ ñeju ọna ki Jihofa adu ba ñwu onẹ? Ẹñwu chi k’ẹ kabalẹ?

• Am’uña ẹñwu neke jẹñwu gbiti ñwu wa k’a n’urẹdọ kp’abomunẹ?

Abu a neke ch’awọli Jihofa k’a n’udama kpai amọmaye wa? Gba Ita Ita 19:​11, ubilẹ mẹ ch’oluka oji ene-i:

• Ichẹñwu k’onẹ kp’ẹ ẹdọ biẹ, ẹñwu ẹ neke che ku mẹ neke f’ọla lẹ kpoji?

Iko ka, a chẹñwu ki akp’abomunẹ ẹdọ biẹ. Ichẹñwu ki dabalẹ, ẹñwu i dukpẹ k’a che? G’IFIDIO-i, ubilẹ mẹ ch’oluka oji ene-i.

IFIDIO: Ejẹñwu Urẹdọ Dẹ An’ẹnyọ Wa (6:​01)

• Efu ifidio-i, ẹñwu ọmaye onobulẹ lẹ che k’urẹdọ ki dẹ?

6. Na g’amali ẹnyọ amọmaye wẹ

Ichẹnwu k’a tẹmẹru amọmaye wa nyọnyọ, a li am’ali ọmẹmẹlẹ ku ma nẹ kpai ẹgbo ma. Abu a neke kpeju r’amali ọmẹmẹlẹ ku ma nẹ? G’IFIDIO-i, ubile mẹ ch’oluka oji ene-i.

IFIDIO: Na Mud’ẹnẹ Ki Gbọkonẹ, Ẹ Ki Hika W’ẹdọ R’amonẹ N! (5:​10)

• Ẹñwu neke ch’atẹko wẹ k’ẹ neke na kpeju r’amali ọmẹmẹlẹ k’amọmaye wẹ nẹ?

Am’ali ọmẹmẹlẹ k’a nẹ Jihofa ago-i. Gba 2  Iko Iko Ẹwñ 16:9a, ubilẹ mẹ ch’oluka oji ene-i:

• Abu ẹdọ wẹ dẹ alu k’ẹ ma kaki am’ali ọmẹmẹlẹ k’ẹ nẹ Jihofa ago-i?

ẸY’ỌLA UKỌ-I

Ichẹñwu k’ẹ du ba ñwu amọmaye wẹ k’ẹ la ad’ufẹdọ ña ma, e-lẹ ajẹñwu urẹdọ kp’udama ki d’ujeju abudọ.

Ẹñwu ẹ kọchẹ?

• Ẹñwu neke ch’atẹko wẹ k’ẹ we na ch’ulaka abomunẹ k’ichi ma abẹki ugbo ku ma kwo ch’ojoji ñwẹ?

• Ichẹñwu k’onẹ kp’ẹ ẹdọ biẹ, ẹñwu ẹ neke che ku mẹ neke f’ọla lẹ kpoji?

• Ẹ ñeju k’ẹ ch’awọli ọna ki Jihofa adu ba ñwu onẹ? Ẹñwu chi k’ẹ kabalẹ?

KỌCHẸ MANYU

Kọchẹ alu k’ujiwe Jisọs ka neke ch’atẹko wa k’a we na k’ajọ abomunẹ.

M’igboli Lẹ Du Tinyọ (6:​56)

I dukpẹ k’a ch’ologwu dagba k’a ma kaki ach’ẹbiẹnẹ du n?

“Ologwu Eche Ch’ọna Ọmẹmẹlẹ Ka Ki Neke Jẹñwu Urẹdọ Ki Dẹ” (Ọdọgọ Ide, November 1, 2002)

G’alu k’abokẹlẹ meji ku ma nẹ-gba ojanẹ ugbo ku ma ch’ulaka abo k’añọla ma ch’ojoji kọchẹ alu ku ma neke d’ufẹdọ ñ’ọlama.

Johnny kpai Gideon: Ma Ch’ẹnọla Kwobi, Abajọ-i Ma Ch’onukwu (6:​42)

Kọchẹ ọna k’ẹ neke d’ọla ki d’agbade uwẹ kpai ẹnẹ omunẹ w’ukpoji ki we n’ọla wa ef’ujeju abudọ.

“Na D’ufẹdọ Kpoji Ọla” (Ọdọgọ Ide, May 2016)