Ọtakada Ki Kwugbo Uchẹ Amẹnutọgba

Amọmaye wa Ẹnẹkẹlẹ kp’Onobulẹ ka fẹdọ:

Ufẹdọ ka nẹ n̄wu Ọjọ kpai amonẹ ajẹn̄wu wa ka ‘ny’af’abo uchẹichi uchẹichi du ch’amakọchẹ, ka nache ma baptism.’ (Mat. 28:19, 20; Mark 12:28-31) Ufẹdọ ochochi che n’ukpahiu. I neke tunyu ẹdọ “aluka onẹ du ku ma chi jọ n̄w in̄mi ogbegbelẹ.”—Ẹwn̄ 13:48.

Akwobi, a d’ibe tọ akatoji alu ka j’uchẹnyọ kpai ọna ka d’ọtakada tanẹ. Abajọ-i, i dukpẹ ka ch’ukọlọ oji ọna ka nyọgba efu alu ka ch’oluka kp’amonẹ. A tene d’ufẹdọ wa n̄’abomunẹ lefu ek’ọla lugbo am’oji-ọla kuma an̄eju. E-lẹ che kaki a na r’ọwọ da manyu en’ibe k’ọla lugbo ẹn̄wu ki ch’ihianyi ma kpai ẹn̄wu ku ma an̄eju. Abu ọtakada-i ach’atẹko wa ka neke ch’abalẹ taa?

Ọtakada-i n’ukọchẹ mẹgweji [12] ki kọla lugbo am’ali ki dukpẹ ka nẹ todu ka neke d’ufẹdọ n̄’amonẹ kpai ef’uma ch’amakọchẹ. Okeke ukọchẹ-wn̄ akọla lugbo am’ali ki Baibul kaki Jisọs kpai am’ajuchẹnyọ efu ọdọ ogwu mẹlu ejodudu du n̄a efu uchẹnyọ ejẹ. Ẹn̄wu ki chi ka ch’ọtakada-i che todu ka we k’akatoji alu ka aj’uchẹnyọ, ama ka neke li am’ọna ka neke d’ufẹdọ n̄’amonẹ. Ochochi am’ali du ka akọla lugbo-wn̄ efu ọtakada-i ch’ogbogaga efu uchẹnyọ ejẹ, ama a na kọla lugbo ọna k’okeke-wn̄ neke ch’atẹko wa ichẹn̄wu ka chanẹ uchẹnyọ ejẹ kpai amonẹ, edabi dejudo ma, abeki ech’ukọchẹ Baibul kp’ama.

Ẹgba du kẹ ch’ukọchẹ am’ali ojoji ojoji-i, kpibe nyọnyọ alu kẹ neke du n̄a ichẹn̄wu k’ẹ kọla kp’amonẹ ki d’ogbegbele wẹ. Ch’ẹn̄wu du kẹ neke che k’ufẹdọ kẹ nẹ n̄wu Jihofa kpai amonẹ ki lonyanẹ. Ufẹdọ lẹ ach’atẹko wa ka neke fu ma ch’amakọchẹ. E-lẹ ch’ogbogaga tule efu am’ọna ka neke nẹ kọla kia tunyu onẹ ẹdọ.

A fẹdọ ọna k’a ch’ukọlọ dama kp’amẹ. (Zẹf. 3:9) Jihofa ki d’ẹnyọ n̄wu mẹ nana alu ku mẹ fẹdọ amonẹ, ku mẹ n̄ọ fu ma ch’amakọchẹ!