Ọjọ F’ẹdọ-ekono Ebraham Jama

Ebraham kọ ọma-wñ Aijik ki fẹdọ Jihofa, ki la n’ukẹdọno ef’amugbalutanẹ-wñ. Iko ki Aijik ch’ọmọdọ ogwu nyoke mẹlu [25] Jihofa ka ñwu Ebraham ki chẹñwu ka ki gbiti eche. Ẹñwu chẹñwu lẹ?

Ọjọ ka ñwu Ebraham kakini: ‘Agba, m’ọma okpono wẹ lẹ du k’ẹ lo t’ojuwo ki d’ojanẹ Moraya, k’ẹ mudu ch’ichẹbọ ñwu mi.’ Ebraham m’ẹñwu ki chi ki Jihofa ka ñwu ki ch’abẹlẹ n. Ama, i gb’omu Jihofa gbọ.

Ọjọ ẹkeji, Ebraham takpa kwanẹ odudu, i m’ọma-wñ Aijik kpai am’onuchẹ-wñ meji ko lo ti moraya. Ubi ọjọ ẹkẹta-wñ ma chanẹ eli ojuwo lẹ kw’ọnajiji. Ebraham ka ñwu amonuchẹ-wñ ku ma dede ma k’owñ kpai Aijik ọma-wñ ku ma lo nya ch’ichẹbọ lẹ. Ebraham m’iji ku ma gwuchẹ lẹ du n’ọma-wñ Aijik oji. Ebraham la m’ọbẹ du n’ọwọ. Aijik n’ata-wñ ene kakini: ‘Ugbo ọmala k’a du ch’ichẹbọ dẹ?’ Ebraham dohi kakini: ‘Ọma-mi, Jihofa adu wa .’

Alu ku ma lewa ojuwo lẹ, ma f’ubọ ichẹbọ che ọmọ. Ubilẹ, i f’ọwọ Aijik kp’ẹrẹ-wñ ji, i la mu du dachi oji ubọ ichẹbọ lẹ.

Ebraham la m’ọbẹ du. Ẹrẹrẹ lẹ, onuchẹ Jihofa kwad’ọ kwefu ojale kakini: ‘Ebraham! Ẹ ki d’ọwọ wẹ kad’ọma lẹ n! Abajọ-i, u che ma kak’uwẹ kẹdọn’Ojọ, alu k’ẹ jẹ k’ẹ d’ọma okpono wẹ ch’ichẹbọ ñwu mi.’ Taki Ebraham li okolo ka ki dago. Ẹrẹrẹ lẹ, i mu Aijik tu tanẹ, i la m’okolo lẹ du ch’ichẹbọ lẹ.

Akw’ọjọ lẹ alo, Jihofa dọ Ebraham k’onukwu-wñ. Ẹñwu chi ki dabalẹ? Ebraham chẹñwu du ki Jihofa atene ki che, dagba ki ma nẹreju ẹñwu ki chi ki Jihofa atene ki ch’abẹlẹ n.

Jihofa dabi gbalutanẹ ñwu Ebraham kakini: ‘na dẹnyọ ñw’ẹ, na jẹñwu ugbẹ-wẹ ki wewe nyọgba.’ E-i du ña kaki Jihofa ad’ẹnyọ ñwu abo ku ma ach’ẹñwu ẹnyọ kwefu ugbẹ Ebraham.