Adu Ka Ki Gb’omu Ọjọ Gbọ

Josẹf ch’ọma Jekọp kekele ka. Am’achọgba-wñ li kaki Josẹf ch’ọma k’ata-ma afẹdọ tule. Abu ẹ neju kaki ẹdọ-ma dẹ lugbo ẹñwu-i? Ma aliẹna Josẹf, ma la ach’ulaka-wñ. Iko ki Josẹf n’ọna ka ki chẹ gwuji ru eju, i ka ñwu am’achọgba-wñ. Ofe ọna lẹ che ka ki ma anya dojikanẹ ñwu Josẹf ọjọ ka. E-lẹ la jẹñwu ma chanẹ ech’ulaka-wñ nyọgba!

Ọjọ ka amọmaye Josẹf na deju t’amẹñwọrẹ amẹru ewo ka ku ma dọ Shẹkẹm. Jekọp kpẹ Josẹf t’ugbo ma ki l’ọlafia amọmaye-wñ. Kw’ọnajiji ku ma la li Josẹf ki awa, ma chanẹ eka ñwu ọlama kakini: ‘Anọna lẹ awa-i. Alo k’a mu du kpa!’ Ma gwọnyu ma la mu du rọ t’efu ura. Amaa, ọmaye-wñ ka ku ma adọ Juda kakini: ‘A ki du kpa n! Gbake-lẹ ka mu du ta.’ Taku ma mu du ta ẹyọ ọkọ ajifa ogwu ñwu abo Midian ku ma ch’amanyaja ku ma alo t’Ijipt.

Ubilẹ, amọmaye Josẹf m’afẹ-wñ du tunyu ef’ẹbiẹ ewo, ma la mu du kpuchẹ r’ata-ma kakini: ‘I neke ch’afẹ ọma wẹ dẹ abẹki ch’e-wñ dẹ-i ni ke?’ Ele jẹñwu Jekọp neju kakini ẹla bibi ka m’ọma-wñ Josẹf du kpa mẹ. Jekọp na ch’ẹdọ dudu, i la n’ẹnẹ duu ki d’unyẹdọ ñwu ki jẹ gba n.

Ojanẹ Ijipt, ma du Josẹf ta ñwu ọnẹkẹlẹ ka ki ch’agboji abo ide k’odu-wñ kọ Pọtifẹr. Ama Jihofa dẹ kpai Josẹf. Pọtifẹr li kaki Josẹf ach’ukọlọ-wñ nyọnyọ, i la ch’ẹnẹ ku ma akẹdọno. I gbanẹ n, Pọtifẹr mu Josẹf du ch’agboji amẹñwu duu ki nẹ.

Ọya Pọtifẹr li kaki Josẹf che gb’okolobia nyọnyọ ki la ñọ che gbiti. Ọjọ duu oñ i aka ñwu Josẹf ki dachi kp’owñ-i. Ẹñwu Josẹf ache? Josẹf kọ i kakini: ‘ehee! Ẹñwu-i nyọ n. Ọnẹnyi-mi che kẹdọno mi uwẹ la ch’ọya-wñ. Ichẹñwu ku dachi kp’uwẹ, na tadure ny’Ọjọ!’

Ọjọ ka, ọya Pọtifẹr atene jẹñwu Josẹf ki dachi kp’owñ kp’atiti, i kpaka ny’afẹ Josẹf ama Josẹf ra le. Alu ki Pọtifẹr w’unyi ọya-wñ ka ñwu kakini Josẹf atene ki b’owñ dachi kp’atiti. Emi owñ i muda rọ-i. Ẹdọ Pọtifẹr mu kpabiẹ gbiti gbiti tak i mu Josẹf du rọ t’unyidudu. Ama, Jihofa gbenyọ Josẹf n.