Jihofa Gbenyọ Josẹf N

Iko ki Josẹf d’unyidudu Fero onu Ijipt n’ọna k’ẹnẹ duu ma neke ka ẹñwu ki ch’ẹtẹ-wñ n. Adu Fero ka ka ñwu Fero kaki Josẹf neke k’oji ọna lẹ ñwu. Taki Fero kp’uchẹ ku ma mu Josẹf du wa.

Fero ti Josẹf ene kakini: ‘Ẹ neke k’oji ọna mi?’ Josẹf ka ñwu Fero kakini: ‘Ojanẹ Ijipt chakaa ana n’ujẹñwu nana ọdọ mebie, ama anubi lẹ ọdọ mebie omunẹ awa, ọdọ ukpọta i ache. Ẹ ki f’ẹnẹ ka ki n’ibe ki che gbeju chi abajọ-i ku ma neke k’ujẹñwu maja todu k’abo wẹ ki we kwu ñwu ebi.’ Fero kakini: ‘Uwẹ u chi! Uwẹ ach’agboji ekeji ki n’ukpahiu tule ojanẹ Ijipt!’ Abu i le ki Josẹf m’ẹñwu ki ch’ofe ọna ki Fero na? Jihofa ch’atẹko Josẹf ki neke m’oji ọna Fero lẹ.

Ọdọ mebie lẹ Josẹf na k’ujẹñwu maja. Ubilẹ, ukpọta lewa ef’ọgbọ ilẹ dabalu ki Josẹf ka. Amonẹ awa kwugbo duu ef’ilẹ awa l’ujẹñwu kwugbo Josẹf. Jekọp ata Josẹf gbọ kaki ujẹñwu d’ojanẹ Ijipt, tak i kpẹ amọma-wñ ọnẹkẹlẹ mẹgwa lo ku ma na l’ujẹñwu kw’ojanẹ Ijipt.

Amọma Jekọp ọnẹkẹlẹ lo t’ugbo Josẹf, i la fu ma ma ẹrẹrẹ. Ama, amọmaye-wñ muda ma kaki Josẹf i che n. Ma d’ojikanẹ ñwu dabalu ki li ef’ọna iko ki ch’imọtọ. Josẹf atene ma ichẹñwu k’amọmaye-wñ che n’ibe ulaka efu ta. Tak i ka ñwu ma kakini: ‘Amatu-anẹ mẹ che. Ugbo k’ukpahiu ojanẹ-i bulọ oñ mẹ wa ku mẹ li-i.’ Taku ma kakini: ‘Ọda [ehee]! Amọmaye mẹgweji ache kw’ojanẹ Kenan, okekele wa ka lekwu mẹ, okekele wa chakaa la d’unyi ugbo ata-wa.’ Taki Josẹf kakini: ‘Mẹ m’okekele mẹ lẹ du w’emi, e-lẹ owñ na du m’ọgẹcha mẹ.’ Taku ma le t’unyi ugbo ata-ma.

Alu k’ujẹñwu akwọra unyi lẹ ñọ takpa, Jekọp dabi kp’amọma-wñ ọnẹkẹlẹ lo t’Ijipt. Alu ku ma na lo, ma mu Bẹnjamin okekele ma chakaa du mọla lo t’Ijipt. Taki Josẹf m’ago-wñ ki adu ñm’omi e-ajifa du t’efu akpulu ujẹñwu e-Bẹnjamin, owñ i kakini eji oñ ma ji todu ki jama ma. Alu ki adu Josẹf li ago e-ajifa lẹ ef’ikpa Bẹnjamin, awuwu f’amọmaye-wñ mu. Ma ch’ologwu bọ Josẹf ki d’olefi ñwu ma k’oji ọmaye-ma Bẹnjamin.

Abajọ-i alu ki Josẹf li kaki amọmaye-wñ mu rida mẹ, Josẹf ñọ neke gwọnyu ọla-wñ gẹ n, tak i chanẹ erakwu owñ i kakini: ‘Omi ọmaye-mẹ Josẹf dẹ, ata-mi deju taa?’ Awuwu f’amọmaye-wñ mu, tak i ka ñwu ma kakini: ‘Mẹ ki kpẹdọbiẹ todu ẹñwu ku mẹ che mi n, Ọjọ kpẹ mi w’emi todu ku neke m’oji-mẹ gbatanẹ. Mẹ hianẹ t’ugbo ata-mi ku mẹ mudu w’emi.’

Ma le t’unyi na ka ñwu ata-ma lugbo inabali ọmẹmẹlẹ ki dẹ-i, ma la mudu w’ojanẹ Ijipt, Ubi ọdọ wewe Josẹf kp’ata-wñ dabi kpo jọ dama.