Ẹzra K’abo Israẹl Ọlọda Ọjọ

I dab’ọdọ ọgbọ mẹta ny’ẹgwa [70] mẹ k’abo Israẹl dabi ti Jerusalẹm, amaa abomunẹ efu-ma adodo ugbo ojoji ojanẹ ki Pẹrsia n’ọda-wñ. Ẹnẹ ka efu ma ch’atama ki ak’abo Israẹl ọlọda Jihofa, k’odu-wñ kọ Ẹzra. Ẹzra gbọ kakini abo Jerusalẹm leb’ọda Jihofa n, i la atene elo ki nya ch’atẹko ma. Ataksẹksis ki ch’onu abo Pẹrsia ka ñwu kakini: ‘Ọjọ jẹñwu k’ẹ n’ibe todu k’ẹ neke k’amonẹ ọlọda-wñ. Lo, k’ẹ d’ẹnẹ duu ki atene ki leb’ẹ dabi ti Jerusalẹm.’ Ẹzra jeju kp’amonẹ chakaa ku ma atene dabi tu Jerusalẹm. Ma ch’adua ki Jihofa ki nẹ ma le ef’ulẹ ma. Ubilẹ ma kwanẹ ulẹ.

Ubi ochu mẹlẹ, ma lewa Jerusalẹm. Amagboji ka ñwu Ẹzra kakini: ‘Abo Israẹl jọ ach’amẹñwu ihiẹnẹ eju Jihofa, ma la ad’abobulẹ ki ar’amọjọ ọlemi ch’ọya.’ Ẹñwu Ẹzra che lugbo ọla-i? Ẹzra danyekwu ọgba amonẹ lẹ chakaa, oñ i ch’adua ru Jihofa kakini: ‘Jihofa, ẹ chẹ chẹñwu wewe ñwu wa mẹ, amaa a muda f’adure ta ny’ẹ mẹ.’ Amonẹ lẹ m’ibe rida, amaa ma dọmọ ach’amẹñwu ẹbiẹnẹ kpọ. Ẹzra chi abogijo kpai amakajọ ku ma na d’eju g’alu k’ọla dẹ. Agbade ochu mẹta, ma f’amọya-ma ku ma ma rẹ Jihofa ni no kwefu ewo lẹ.

Ọdọ mẹgweji legwudu. Agbagba iko lẹ, ma f’ọdọ ewo Jerusalẹm kọ dabi. Ẹzra d’amonẹ lẹ chakaa jeju ọgbagada ki gba ọlọda Ọjọ ñwu ma. Alu ki Ẹzra bi ọtakada lẹ, amonẹ lẹ chakaa kwanẹ dago. Taki Ẹzra jẹñyu ñwu Jihofa, amonẹ lẹ la k’ọwọ ma nyatẹ efu ejẹdama. Ubilẹ, Ẹzra f’ọtakada ọlọda Ọjọ gba ñwu ma, i la na k’anẹreju ọlọda lẹ ñwu ma, amonẹ lẹ chakaa la jọ yẹẹ na netir’u. Ma jẹ ka ku ma dabi m’ọna Jihofa du tanẹ mẹ, ma la rakwu efu ech’ẹdọdudu. Ọjọñwa-wñ, Ẹzra ñọ dabi gba ọlọda lẹ ñwu ma. Oñ amonẹ lẹ f’u ma kak i dukpẹ ku ma ch’uche Uyọ ef Ebu. Ẹrẹrẹ lẹ, ma la chanẹ emọla uche uyọ lẹ.

Amonẹ lẹ na yọ, ma la na d’ugwa ñwu Jihofa ọjọ mebie ku ma ch’ucholo lẹ. Ma ch’ucholo Uyọ ef Ebu abalẹ mama kw’iko Joshua ta n. Ubi ku ma ch’uche lẹ kpa, amonẹ lẹ jeju dama, ma la ch’adua ru Jihofa kakini: ‘Jihofa, ẹ gba wa kwefu adu eche, ẹ dejutẹ wa ef egbili, ẹ la d’anẹ ọmẹmelẹ ki ar’ọjẹ ñwu wa. Amaa, iko t’iko a akọ eleb’ukọ wẹ, a chẹñwu ki biẹnẹ eju wẹ. Ẹ kpẹ amakachẹ ru wa, amaa a netiru ma n. Tabalẹ, ẹ muda jẹdọ kp’awa. Ẹ f’alo k’ẹ kpẹ kpai Ebraham de. Abajọ-i, a gbalu kaki a leb’ọda wẹ.’ Ma kọ alo ku ma kpẹ lẹ tanẹ, amagboji ma, kp’abo Lifai manyu amatama m’odu ma du ch’uhiukọ t’ọla ọtakada.