Jihofa D’afu Ki Afọ Ñwu Kọniliọs

I n’agboji am’isọja abo Rom ka ki di Sẹsiria k’odu-wñ kọ Kọniliọs. AmiJu la abojima m’ọ nyọnyọ dagba ki ma ch’ẹnẹJu i che n. I ch’ẹnẹ ki ali ejumomi amẹnale, i la ach’atẹko abo ku ma ma nẹ n. Kọniliọs che kẹdọno Jihofa, i la ch’achadua ru Jihofa iko t’iko. Ọjọ ka, onuchẹ ka m’ọla-wñ du tejugede ñwu Kọniliọs, i la ka ñwu kakini: ‘Ọjọ f’adua wẹ gbọ mẹ. Abajọ-i, f’abokẹlẹ ka kpẹ nyi Jopa ugbo ki Pita gwugwu, ku ma ka ñwu ki lewa ugbo wẹ.’ Ẹrẹrẹ lẹ, Kọniliọs f’abokẹlẹ mẹta kpẹ nyi Jọpa k’ulẹ-wñ jiji dabu imale ogwuẹgwa [30] t’ọwọ ọpata ọganẹ.

Adiko lẹ, Pita onugo li anẹ-ego ka alu ki de Jọpa. I li amẹla ki ch’elifọ ñwu amiJu ku ma ma ch’ajẹ n, i la gb’omukọla ka ki ka ñwu ki jẹ ẹla elifọ lẹ. Pita mu da kọ ej’ẹla lẹ kakini: ‘U j’ẹñwu elifọ duu abẹk ẹñwu ki ma fẹ n mama ef’ọlai-mi ta n.’ Tak omukọla lẹ ka ñwu kakini: ‘Ẹ d’amẹla-i k’ẹñwu ki ma fẹ ni n. Ọjọ fu che ki fẹ mẹ.’ Tak omukọla lẹ ñọ ka ñwu Pita kakini: ‘Abokẹlẹ mẹta ka d’alugbọna wẹ. Le b’uma.’ Pita le t’alugbọna, i la t’abokẹlẹ lẹ ene ẹñwu ki chi ku ma wa. Tak abokẹlẹ lẹ dohi ñwu kakini: ‘Kọniliọs agboji am’isọja abo Rom ka, kpẹ wa wa-i. I la ka k’ẹ w’unyi-wñ Sẹsiria.’ Taki Pita jẹñwu ma mu gwudu w’ejefu, i la m’uma gba nyi. Ọjọ ẹkeji, Pita kpai amọmaye ọnẹkẹlẹ ka kpo t’uma ubi le ti Sẹsiria.

Alu ki Kọniliọs fi Pita li, i kpo danyekwu ẹrẹ-wñ. Amaa, Pita ka ñwu kakini: ‘Kwanẹ! Onẹ ofofo ẹgẹnẹ e-wẹ oñ omi onugo che-i. Ọjọ ka ñwu mi ku w’unyi-wẹ dagba k’awa amiJu ma ch’agwudu t’ejefu abo ku ma ma ch’amiJu n. Agba ka ñwu mi, ẹñwu ki chi k’ẹ kpuchẹ ru mi.’

Taki Kọniliọs ka ñwu Pita kakini: ‘Enyi-kẹlẹ alu ku na ach’adua r’Ọjọ, oñ onuchẹ Ọjọ ka ñwu mi k’u kpuchẹ r’ẹ. Agba kọ wa lugbo ọla Jihofa.’ Oñ Pita kakini: ‘U f’u li mẹ kak Ọjọ ch’ẹnẹ ejuma n. I jẹ ki gb’ẹnẹ duu ki atene ki r’ọ.’ Taki Pita kọ ma ẹñwu wewe lugbo Jisọs. Ubilẹ, afu ki afọ lewa bi Kọniliọs kpai abo ku ma dẹ kp’owñ ma, tak ọgbọ ma la fu baptism che.