UKỌCHẸ 17
Ọl’ẹnẹ Jisọs Che?
Alu k’a kọchẹ amẹñwu ki Jisọs ka iko ki d’efu ilẹ-i kpai amẹñwu ki che, e-lẹ ajẹñwu wa k’a m’amali ẹnyọ ki nẹ ki ajẹñwu wa tẹmẹru owñ kpai Ata-wñ, Jihofa. Ẹñwu ch’amali ẹnyọ lẹ? Abu a neke ch’awọli Jisọs efu ọlai wa?
1. Am’ọna ẹñwu Jisọs dab’Ata-wñ?
Jisọs d’efu ojale kpai Ata-wñ ọdọ wewe. I d’eju t’amẹñwu k’Ata-wñ ache, i la kọchẹ kwugbo-wñ. Todu e-lẹ Jisọs ach’ẹñwu dab’Ata-wñ, i n’amali-wñ, i la ñọ kpibe dab’Ata-wñ gẹ. (Gba Jọn 5:19.) Jisọs ach’awọli am’ali Ata-wñ nyọnyọ, e-lẹ jẹñwu ki kakini: “Ẹnẹ ki f’umi li f’Ata li mẹ.” (Jọn 14:9) Alu k’ẹ na kọchẹ am’ali ki Jisọs nẹ e-lẹ ajẹñwu ẹ k’ẹ ma Jihofa nyọnyọ. G’ujiwe, ọna ki Jisọs akwula ñwu amonẹ adu tejugede ọna ki Jihofa akwula ñwu wa.
2. Abu Jisọs du ña kaki i afẹdọ Jihofa?
Jisọs kakini: “Todu k’ilẹ ki ma ka k’omi afẹdọ Ata, alu k’Ata tukọ ñwu mi, abẹlẹ nache.” (Jọn 14:31) Iko ki d’efu ilẹ-i, Jisọs du tejugede kaki i afẹdọ Ata-wñ nyọnyọ. Todu e-lẹ Jisọs alebọ amẹñwu k’Ata-wñ ka dagba ki we lọla-wñ. I la ñọ ñeju ekọla lugbo Ata-wñ nyọnyọ manyu ech’atẹko amonẹ ku ma neke ch’onukwu kp’Ata-wñ.—Jọn 14:23.
3. Abu Jisọs du ña kaki i afẹdọ amonẹ?
Baibul kaki Jisọs afẹdọ amonẹ nyọnyọ. I d’ufẹdọ lẹ ña lefu ed’ugbẹdọ ñwu amonẹ kpai ed’ẹdọ-wñ chaka ch’atẹko ma. Am’ukọlo awuwu ki Jisọs che du ña kaki i ch’ukpahiu kate Jisọs nẹ n, i añọ fẹdọ amonẹ gẹ. (Mark 1:40-42) I ach’ẹnyọ nwu amonẹ, i la ch’ejuma n. Ọla-wñ any’amonẹ ẹdọ, i la ñọ d’ukibeno ñwu abo ku ma netiru kp’ẹdọ ka. Jisọs jẹ ki ch’ọbata, ki la ñọ kwu todu ufẹdọ ki nẹ ñwu amonẹ. Ama i afẹdọ abo ku ma lebọ am’ukọ-wñ tule.—Gba Jọn 15:13, 14.
N’UMA NYỌGBA
Kọchẹ manyu lugbo ọl’ẹnẹ ki Jisọs che. Ñọ g’ọna k’a neke d’ufẹdọ kpai ele eche ña dabu Jisọs.
4. Jisọs afẹdọ Ata-wñ
Ujiwe Jisọs kọ wa ọna k’a neke d’ufẹdọ k’a nẹ ñw’Ọjọ tejugede. Gba Luku 6:12 kpai Jọn 15:10; 17:26. Ubi k’ẹ f’amoji Baibul-i gba, mẹ ch’oluka oji ene-i:
Lefu ech’awọli Jisọs, abu a neke du ña kaki a fẹdọ Jihofa?
Jisọs fẹdọ Ata-wñ nyọnyọ i la ch’oluka kp’owñ iko duu lefu adua
5. Jisọs akwula ñwu abo k’ekwu akwu ma
Jisọs akwula ñwu amonẹ t’ọla-wñ le. Dagba k’ọla-wñ ki chẹ kpa Jisọs ad’iko-wñ kpai ukpahiu-wñ ch’atẹko amonẹ. Gba Mark 6:30-44, ubilẹ mẹ ch’oluka oji am’ene-i:
Efu am’ọgba Baibul-i, am’ọna ẹñwu Jisọs du tejugede kaki i akwula ñwu amonẹ?—G’amọgba 31, 34, 41, kpai 42.
Ẹñwu du Jisọs ẹdọ kwanẹ ki ch’atẹko amonẹ?—G’ọgba 34.
Alu ki Jisọs du am’ali ki Jihofa nẹ ña, ẹñwu e-lẹ ak’uwẹ lugbo Jihofa?
Am’ọna ẹñwu a neke du tejugede kaki a kwula ñwu amonẹ dabu Jisọs?
6. Jisọs ch’ẹnẹ ki ach’ọwọ
Jisọs ch’ẹnẹ ki ach’ọwọ ñwu amonẹ dagba ki ma n’amẹñwu ekwu wewe n. I d’ibe ñwu wa k’a na ch’ọwọ ñw’amonẹ. Gba Ẹwñ 20:35, ubilẹ mẹ ch’oluka oji ene-i:
Dabalu ki Jisọs ka, abu a neke n’ẹdẹbọ?
G’IFIDIO-i, ubilẹ mẹ ch’oluka oji ene-i.
Ẹñwu ch’ọna k’a neke na d’ẹñwu ele ñwu amonẹ dagba k’a we n’ẹñwu ekwu wewe?
Ẹ che ma?
Baibul kọ wa k’a na ch’adua ru Jihofa lefu odu Jisọs. (Gba Jọn 16:23, 24.) Ichẹñwu k’a ch’adua abalẹ, e-lẹ adu ña kaki ẹñwu ki Jisọs che todu k’a wa kpai Jihofa ki neke ch’onukwu che wuwa eju.
ABO KA KAKINI: “Ọjọ kwula ñwu wa n.”
Alu ki Jisọs ad’amali Jihofa ña, abu amuche-wñ du tejugede kaki Jihofa akwula ñwu wa?
ẸY’ỌLA UKỌ-I
Jisọs afẹdọ Jihofa kpai amonẹ. Todu ki Jisọs n’amali Jihofa, alu k’ẹ na m’ọla ẹnẹ ki Jisọs che abalẹ owñ ẹ na m’ọla ẹnẹ ki Jihofa che gẹ.
Ẹñwu ẹ kọchẹ?
Abu a neke d’ufẹdọ ña ñwu Jihofa dabalu ki Jisọs che?
Abu a neke d’ufẹdọ ñ’amonẹ dabalu ki Jisọs che?
Ẹñwu ch’ali ki Jisọs nẹ k’ẹ ñeju tule?
KỌCHẸ MANYU
Deju go am’ali Jisọs k’a neke ch’awọli-wñ.
“K’ẹ Neke Ch’awọli Jisọs, I Dukpẹ K’ẹ . . . ” (Jesus—The Way, the Truth, the Life, page 317)
Kọchẹ ẹñwu ki chi ki ch’ogbogaga k’a na ch’adua lefu odu Jisọs.
“Ẹñwu Chi Ki Dukpẹ K’a Na Ch’adua Lefu Odu Jisọs?” (Ọdọgọ Ide, February 1, 2008)
Baibul che k’ẹñwu duu lugbo alu k’eju kpai añọla Jisọs dẹ?
Ẹñwu a neke kọchẹ kwefu ọna ki Jisọs chẹñwu kp’abobulẹ?
“Ọjọ Atene K’a Na D’ojima Ñwu Abobulẹ” (Ọdọgọ Ide, September 1, 2012)