UKỌCHẸ 20
Ọna K’ujọ Wa Dẹ Arọne Arọne
Jihofa ch’Ọjọ ẹñwu bulubulu n. (1 Abo Kọrint 14:33) Todulẹ, a neju k’abo-wñ ki na chẹñwu aleju-wñ. Abu ujeju Abudọ Kraist dẹ arọne arọne? Ẹñwu a neke che todu ki na dabalẹ alo?
1. Ẹnẹ ch’oji ujeju Abudọ?
“Kraist ch’oji ujeju abudọ.” (Abo Ẹfẹsọs 5:23) Jisọs adeju t’ukọlọ abo Jihofa chaka ọgbọ ilẹ-i kwefu ojale. Jisọs chi “adu k’i ch’achubi ondu-wñ kpai an’ibe” ki ch’uchẹ kẹkẹ abogijo ki gbọkonẹ ku ma ñọ dọ Uchẹ Adejutukọlọ. (Gba Matiu 24:45-47.) Dabu amẹnukpuchẹ kpai abogijo ki dẹ Jerusalẹm iko Abo Kraist ejodudu, Uchẹ Adejutukọlọ ad’ukọ ñwu ujeju abudọ ọgbọ ilẹ-i. (Ẹwñ 15:2) Ama, abo ki dẹ muda ch’amagboji ujọ wa n. Ma ajẹñwu Jihofa kpai Ọla-wñ ki na nẹ ma le, ma la alebọ ukọ ki kwugbo Jisọs ki ch’oji ujeju abudọ.
2. Ẹñwu ch’ukọlọ abogijo?
Abogijo ch’Abo Kraist ki gbọkonẹ ku ma ak’onẹ kwefu Baibul kpai edejutẹ abudọ, ma ach’atẹko ma, ma la ñọ d’ugbẹdọ ñwu ma. Ma r’ọkọ ñwu ma oji ukọlọ ku ma ache n. Chai, ma che ‘alu ki d’Ọjọ ẹdọ, i la ch’utodu ẹñọ ọkọ ki ache ma n, chai kp’ibe kokolo.’ (1 Pita 5:1, 2) Am’achẹwñ ñwonẹ ch’abokẹlẹ ki ach’atẹko abogijo. Ejọgba, ama onugo neke defu abogijo.
Uchẹ Adejutukọlọ achi abogijo ka ku ma ch’adejutẹ ujeju abudọ. Ma ad’ejudo am’ujeju ojoji ojoji ku ma nẹ ma le ku ma la d’ugbẹdọ ñwu amọmaye. Ma achi abo ki b’ukọlọ abogijo kpai am’achẹwñ ñwonẹ jọ dabalu ki Baibul ka.—1 Timoti 3:1-10, 12; Taitọs 1:5-9.
3. Ukọlọ ẹñwu ẹnẹnẹnẹnẹ Amẹnibenu Jihofa nẹ?
Amonẹ duu efu ujeju abudọ ‘ajẹnyu ñwu odu Jihofa’ lefu ohi ku ma du, ukọ-ọla ki kwefu baibul, eli ekọ kpai ej’uchẹnyọ r’amonẹ alu k’ukpahiu ma bọjọ.—Gba Eli Ekọ D’Ọjọ 148:12, 13.
N’UMA NYỌGBA
Kọchẹ lugbo ọla agboji ki Jisọs che, ọna k’abogijo ach’awọli-wñ manyu alu k’a neke lebọ ukọ Jisọs kpai ujiwe abogijo.
4. Jisọs ch’agboji ki akwula ñwu amonẹ
Jisọs adọ wa kp’ufẹdọ k’a w’ugbo-wñ. Gba Matiu 11:28-30, ubilẹ mẹ ch’oluka oji ene-i:
Ọla agboji ẹñwu Jisọs che, ile ẹñwu i atene k’a nẹ kwugbo-wñ?
Abu abogijo ach’awọli ujiwe Jisọs? G’IFIDIO-i.
Baibul d’ọna k’abogijo dukpẹ ku ma ch’ukọlọ ma tanẹ.
Gba Aizaya 32:2 kpai 1 Pita 5:1-3, ubilẹ, mẹ ch’oluka oji am’ene-i:
Abu ẹdọ wẹ dẹ alu k’ẹ ma kaki abogijo ach’alu du ku ma neke che ku ma d’ugbẹdọ ñwu wa dabu Jisọs?
Ẹñwu ch’amọna omunẹ k’abogijo ach’awọli Jisọs?
5. Abogijo ad’ujiwe ma k’amonẹ
Ibe ẹñwu Jisọs atene k’abogijo ki na kpẹ lugbo ukọlọ ma? G’IFIDIO-i.
Jisọs d’ujiwe-wñ tanẹ ñwu abogijo alu ki dukpẹ ku ma na kwula ñwu ujeju abudọ. Gba Matiu 23:8-12, ubilẹ mẹ ch’oluka oji ene-i:
Ẹñwu ẹ ñeju lugbo ojoji ki d’agbade ẹñwu ki Baibul ka lugbo ọna ki dukpẹ k’abogijo ki na che kpai ẹñwu k’ẹ li k’amagboji ọna Ọjọ egwa ọlemi ache?
A. Abogijo ajẹñwu agbade ma kpai Jihofa ki chẹ lonyanẹ, ma la ach’atẹko abo akwọra unyi ma ku ma ch’abalẹ gẹ
B. Abogijo akwula ñwu ọgbọ du amonẹ efu ujeju abudọ
CH. Abogijo aj’uchẹnyọ iko duu
D. Abogijo ch’ama k’onẹ ẹñwu. Ma ñọ ch’atẹko efu ukọlọ anẹ e-li kpai am’ukọlọ omunẹ efu unyi ujeju
6. Mẹ nagb’ọla abogijo gbọ
Baibul k’ẹñwu ogbogaga ki chi ki dukpẹ k’a nagb’ọla abogijo gbọ. Gba Abo Hibru 13:17, ubilẹ mẹ ch’oluka oji am’ene-i:
Ẹ neju kaki i dukpẹ k’a na lebọ ibe ki Baibul du ñwu wa k’a na gb’ọla abogijo gbọ? Ẹñwu chi k’ẹ kabalẹ?
Gba Luku 16:10, ubilẹ mẹ ch’oluka oji ene-i:
Ẹñwu chi ki dukpẹ k’a na gb’ọla abogijo gbọ, dagba ki chẹñwu k’a dọ k’ẹñwu kẹkẹ?
ABO KA KAKINI: “I dukpẹ k’ẹ defu ujọ ọna Ọjọ egwa du n.”
Am’ile ẹñwu ẹ neju kaki onẹ anẹ ichẹñwu ki ar’Ọjọ efu ujeju abudọ?
ẸY’ỌLA UKỌ-I
Jisọs ch’oji ujeju abudọ. A na lebọ ukọ abogijo efu unyi Ọjọ todu ku ma ad’ugbẹdọ ñwu wa, ma la ñọ kọ wa lefu ujiwe ma.
Ẹñwu ẹ kọchẹ?
Ẹnẹ ch’oji ujeju abudọ?
Abu abogijo ach’atẹko ujeju abudọ?
Ukọlọ ẹñwu ẹnẹnẹnẹnẹ Amẹnibenu Jihofa nẹ?
KỌCHẸ MANYU
G’ẹñwu ki du ña kaki Uchẹ Adejutukọlọ kpai abogijo akwula nyọnyọ ñwu Abo Kraist eñini-i.
Kọchẹ manyu lugbo ukọlọ am’adejutẹ ujeju abudọ.
Kọchẹ lugbo ukọlọ abobulẹ efu ujeju abudọ.
“Amẹnibenu Jihofa N’abobulẹ Ku ma J’uchẹnyọ?” (Ọdọgọ Ide, September 1, 2012)
G’alu k’abogijo ach’alu du ku ma neke che ku ma d’ugbẹdọ ñwu amọmaye.
“Abogijo Ujeju Abo Kraist ‘Ch’abo Ki Abu Wa Ch’ukọlọ Kp’uyọ’ ” (Ọdọgọ Ide, January 15, 2013)