UKỌCHẸ 55
Ch’atẹko Ef’ujeju Abudọ Ugbo K’ẹ Dẹ
Efu ọgbọ ilẹ-i, amonẹ wewe ajọdama ku ma rẹ Jihofa kp’uyọ ef’ujeju ma. Ẹdọ ma chẹ bọ oji am’ukọ ku ma adu nẹ ma le. Ma la ach’alu du ku ma neke ku ma chẹñwu ki ach’atẹko ujeju abudọ lọna wewe. Abalẹ ẹdọ wẹ dẹ lugbo ujeju abudọ ugbo k’ẹ dẹ?
1. Ẹñwu ch’amọna k’ẹ neke d’iko kpai ukpahiu wẹ ch’atẹko ujeju abudọ?
Ọgbọ wa neke ch’atẹko ef’ujeju abudọ. Dabu ujiwe, i n’amogijo abẹki abo ki ach’ọga ki ma neke kw’unyi n ef’ujeju abudọ ugbo k’ẹ dẹ? Ẹ neke ch’atẹko ma ku ma neke w’ujeju? Ẹ neke ch’atẹko ma kp’ẹñwu omunẹ, dabu elo t’aja ñwu ma abẹki ebuma ch’ukọlọ unyi? (Gba Jemis 1:27.) A neke g’ẹdọ ọla wa k’a ch’atẹko efu eñw’Unyi Ujeju wa che. Ẹnẹ du fuwa atiti tak ach’amẹñwu-i n. A ‘g’ẹdọ ọla wa akọla wa’ w’efu ukọlọ ef’ujeju abudọ todu ufẹdọ k’a nẹ ñwu Jihofa kpai amọmaye wa.—Eli Ekọ D’Ọjọ 110:3.
Abo ku ma che baptism ñọ neke ch’atẹko ujeju abudọ lef’ọna wewe. Amọmaye ẹnẹkẹlẹ neke ch’achẹñwu ñw’onẹ ichẹñwu ku ma bọjọ dabalu ki Baibul ka, ejọgba ma ñọ neke defu abogijo gẹ. Amọmaye ẹnẹkẹle kp’onobulẹ neke jẹñwu uchẹnyọ nyọgba lefu ech’ukọlọ ẹnugbọgba. Amọmaye ka ach’atẹko ef’ukọlọ unyi ujeju ekọ abẹk elo t’ujeju abudọ ugbo ku ma atene atẹko ọna omunẹ.
2. Abu a neke d’ọkọ wa abẹki ẹñwu omunẹ k’a nẹ ch’atẹko ujeju abudọ?
A neke ‘n’amẹñwu akoko k’a nẹ d’ojima ñwu Jihofa.’ (Ita Ita 3:9) Ẹñwu ojima i che ñwu wa k’a d’ọkọ kpai amẹñwu akoko k’a nẹ ch’atẹko ujeju abudọ kpai ukọlọ uchẹnyọ ejẹ ef’ọgbọ ilẹ-i. (Gba 2 Abo Kọrint 9:7.) Ma ñọ neke d’amọkọ k’a adu ch’ele ch’atẹko efu ukọlọ ubọla. Amonẹ wewe “ad’ẹñwu ne” iko t’iko ku ma du chẹñwu ele. (Gba 1 Kọrint 16:2.) A neke d’ẹñwu ele t’efu akpati ọkọ ki d’ujeju abudọ abẹk eche oji donate.jw.org. Jihofa d’uña ñwu wa k’a d’ufẹdọ k’a nẹ ñwu ña lefu ọna k’a ad’amẹñwu k’a nẹ chekwu le.
N’UMA NYỌGBA
Kọchẹ lugbo am’ọna ojoji ojoji k’ẹ neke ch’atẹko ujeju abudọ.
3. A neke d’amẹñwu akoko k’a nẹ ch’ele
Ẹdọ Jihofa kpai Jisọs abọ r’abo ku ma añeju ed’ẹñwu ch’ele kp’ẹdẹbọ. Dabu ujiwe, Jisọs jẹnyu ñwu ọya ukwu ọkọ ki ch’ẹnale ki muda dẹñwu ele t’efu akpati. Gba Luku 21:1-4, ubilẹ mẹ ch’oluka oji am’ene-i:
Otila i che k’ẹ d’ọkọ nana ch’ele tak ẹdọ Jihofa ki bọ?
Abu ẹdọ Jihofa kpai Jisọs adẹ ichẹñwu k’a d’ẹñwu ch’ele kwefu ẹdọ wa?
K’ẹ neke m’ọna ku ma ad’ẹñwu ele wa chekwu le, g’IFIDIO-i. Ubilẹ, mẹ ch’oluka oji ene-i.
Abu ma ad’amẹñwu ele-i ch’atẹko ujeju abudọ efu ọgbọ ilẹ-i?
4. A neke g’ẹdọ ọla wa ch’atẹko
Iko igbele, abo Israẹl ach’alu du ku ma neke che ku ma ñw’unyi Ọjọ che. Ama, e-lẹ muda t’edọkọ ch’ele le. Gba 2 Iko Iko Ẹwñ 34: 9-11, ubilẹ mẹ ch’oluka oji ene-i:
Abu ọgbọ abo Israẹl ch’atẹko efu eñw’unyi Ọjọ che?
K’ẹ neke li ọna k’Amẹnibenu Jihofa alebọ ujiwe abo Israẹl, g’IFIDIO-i. Ubilẹ, mẹ ch’oluka oji am’ene-i.
Ẹñwu chi ki dukpẹ k’a d’eju t’Unyi Ujeju wa k’a la na ñwọche?
Ẹñwu ch’amọna k’ẹ neke ch’atẹko?
5. Amọmaye ẹnẹkẹlẹ neke bọjọ ech’ukọlọ nyọgba ef’ujeju
Baibul d’ugbẹdọ ñwu amọmaye ẹnẹkẹlẹ ku ma ch’alu du ku ma neke che ku ma ch’atẹko ef’ujeju abudọ. K’a g’ujiwe ka, g’IFIDIO-i. Ubilẹ, mẹ ch’oluka oji ene-i.
Efu ifidio-i, ẹñwu Ryan che ki neke ch’atẹko ujeju abudọ nyọgba?
Baibul che k’ẹñwu ki ajẹñwu amọmaye ẹnẹkẹlẹ ku ma neke b’ukọlọ achẹñwu ñw’onẹ kpai ukọlọ abogijo jọ. Gba 1 Timoti 3:1-13, ubilẹ mẹ ch’oluka oji am’ene-i:
Ẹñwu dukpẹ k’amọmaye ẹnẹkẹlẹ ki che ichẹñwu ku ma atene ch’ukọlọ achẹñwu ñw’onẹ abẹki ed’efu abogijo dabalu ki Baibul ka?
Ẹñwu dukpẹ k’abo akwọra unyi ma ki che?—G’ọgba 4 kpai 11.
Ile ẹñwu ujeju abudọ anẹ ichẹñwu k’amọmaye ẹnẹkẹlẹ ach’alu du ku ma neke che ku ma b’ukọlọ-i jọ?
ABO KA NEKE N’ENE: “Ugbo Amẹnibenu Jihofa ali ọkọ ku ma adu ch’ukọlọ ma kwo?”
Abu ẹ dohi?
ẸY’ỌLA UKỌ-I
Ẹdọ Jihofa abọ nyọnyọ alu ki ali ọna k’a d’iko, ukpahiu kpai amẹñwu k’a nẹ ch’atẹko ujeju abudọ.
Ẹñwu ẹ kọchẹ?
Abu a neke d’iko kpai ukpahiu wa ch’atẹko ujeju abudọ?
Abu a neke d’amẹñwu k’a nẹ ch’atẹko ujeju abudọ?
Am’ọna ẹñwu ẹ ñeju k’ẹ ch’atẹko ujeju abudọ?
KỌCHẸ MANYU
Kọchẹ ẹñwu ki chi k’Ọjọ ma jẹñwu abo-wñ ku ma r’ukpẹkẹgwa gẹ n.
Baibul dʼamukọlọ ka ñwʼabokẹlẹ ku ma che baptism mẹ ku ma che. Ama, ichẹñwu kʼamuña ka jẹñwu onobulẹ ki che baptism ki deju tʼukọlọ lẹ, abu i ache le?
“Anẹreju Lugbo Uña Echʼoji Efʼujeju Abudọ” (Odọgọ Ide, February 2021)
G’alu k’amọmaye ki n’ẹdẹgbo ach’alu du ku ma neke che ku ma neke k’ọtakada lo t’ugbo amọmaye ki d’ugbo omunẹ.
G’ẹñwu ki jẹñwu ọna k’a li ọkọ k’adu ch’ukọlọ wa ch’ojoji ñwu ọna k’amọna-Ọjọ-egwa omunẹ ache le.
“Abu Amẹnibenu Jihofa Ali Ọkọ Ku Ma Adu Ch’ukọlọ Ma Le?” (I dẹ jw.org)