UKỌCHẸ 59
Ẹ Neke Dago Kpaka Ichẹñwu Ku Ma Ach’ẹ Ọbata
Abajọ-i abẹk ej’ọgba, Abo Kraist ochochi ana dejudo akọbọ abẹki adoli kpai ọbata. E-lẹ dukpẹ ki nyu wa okpo?
1. Ẹñwu chi ki ma che wa awuwu kaki ma ache wa ọbata n?
Baibul ka pee kakini: ‘Ma ach’ẹnẹ du ki d’owñ ẹdọ ki deju achẹñwu akpẹdọr’Ọjọ efu Kraist ọbata.’ (2 Timoti 3:12) Ma che Jisọs ọbata todu ki ma n’ọwọ efu ẹñwu ilẹ-i n. Abalẹ gẹ, todu k’awa onugo ma n’ọwọ nẹ efu ẹñwu ilẹ-i n, ichẹñwu k’abo gọmẹti ilẹ-i kpai abo ọna-Ọjọ-egwa ọlemi ache wa ọbata, i che wa awuwu n.—Jọn 15:18, 19.
2. Abu a neke mọla tanẹ ñwu ọbata ku ma neke che wa?
I dukpẹ k’a jẹñwu agbade wa kpai Jihofa ki lonyanẹ nyọnyọ kw’abajọ-i. D’iko tanẹ ọjọ duu k’ẹ na du ch’adua ru Jihofa k’ẹ la na gb’Ọtakada Ọla-wñ. Na ny’ujeju abudọ iko duu. Amẹñwu-i gbaa ajẹñwu ẹ n’ẹdẹgbo kp’ukpahiu ki ach’atẹko wẹ k’ẹ neke legwu efu am’ọbata-i du dagba ki ch’ugbo abo akwọra unyi wẹ i kwo. Ẹnukpuchẹ Pọl ku ma ch’o ọbata nyọnyọ kakini: “Jihofa ch’ẹnatẹko-mi; na railo n.”—Abo Hibru 13:6.
A ñọ neke jẹñwu ẹdẹgbo wa ki lonyanẹ ichẹñwu k’a lo t’oko uchẹnyọ ejẹ iko duu. Ej’uchẹnyọ iko duu ach’atẹko wa k’ukẹdọno wa ñwu Jihofa ki gbiti k’a la we ch’okpo onẹ. (Ita Ita 29:25) Ichẹñwu k’a jẹñwu ẹdẹgbo wa ef’uchẹnyọ ejẹ ki lonyanẹ abajọ-i, e-lẹ ajẹñwu ọla wa ki chẹ mu k’a na j’uchẹnyọ alo dagba k’abo gọmẹti ki d’ọwọ n’ukọlọ wa.—1 Abo Tẹsẹlonaika 2:2.
3. Ile ẹñwu a anẹ ichẹñwu k’a gwọnyu Jihofa kpaka ichẹñwu ku ma ache wa ọbata?
Ọgẹcha i che kaki ẹdọ wa cha bọ ichẹñwu ku ma ache wa ọbata n, ama ichẹñwu k’a legwu ef’ajama du, e-lẹ ajẹñwu ukẹdọno wa ki lonyanẹ. A tẹmẹru Jihofa nyọnyọ ichẹñwu k’a li ọwọ atẹko-wñ iko k’ọla wa chẹ da. (Gba Jemis 1:2-4.) Ẹdọ Jihofa akpabiẹ ẹgba duu ki ali ọbata wa, ama ẹdọ-wñ abọ nyọnyọ ichẹñwu k’a n’ẹdọ elichi. Baibul kakini: ‘I muda chẹñwu k’amẹ ch’ẹnyọ ku mẹ la fẹdọlichi ugbo uwa ku mẹ li todu e-lẹ, mak e-lẹ chẹñwu ẹnyọ ugbo Ọjọ.’ (1 Pita 2:20) Urọmẹ ki Jihofa adu ñwu abo duu ku ma f’ẹdọlichi t’ukpoji ch’iñmi ogbegbelẹ ef’ilẹ etitọ ki ma n’ẹnẹ du ki akobọ ma gẹ n.—Matiu 24:13.
N’UMA NYỌGBA
G’ẹñwu ki ajẹñwu ẹ ma jali kaki ẹ neke gwọnyu Jihofa kpaka dagba k’amonẹ ki akob’ẹ, k’ẹ la li alu ki Jihofa ad’ẹnyọ ñwẹ.
4. N’ẹdọ elichi ichẹñwu k’abo akwọra unyi wẹ akob’ẹ
Jisọs che ma jali kaki i ch’ọgbọ du abo akwọra unyi wa ana jẹ k’a rẹ Jihofa n. Gba Matiu 10: 34-36, ubilẹ mẹ ch’oluka oji ene-i:
Ẹñwu abo akwọra unyi neke che abẹki eka ichẹñwu k’ẹnẹ ka atene rẹ Jihofa?
K’ẹ neke li ujiwe ka, g’IFIDIO-i, ubilẹ mẹ ch’oluka oji ene-i.
Ẹñwu ẹ che ichẹñwu k’onukwu abẹki abo akwọra unyi wẹ atene kpọna ny’ẹ k’ẹ we rẹ Jihofa?
Gba Eli Ekọ D’Ọjọ 27:10 kpai Mark 10:29, 30. Ubi ku mẹ f’okoke am’ọgba Baibul-i gba, mẹ ch’oluka oji ene-i:
Abu ugbalutanẹ-i neke ch’atẹko wẹ ichẹñwu k’abo akwọra unyi wẹ abẹki amonukwu wẹ atene kpọna ny’ẹ k’ẹ we rẹ Jihofa?
5. Gwọnyu Jihofa kpaka dagba k’amonẹ ki akob’ẹ
I dukpẹ k’a n’ẹdẹgbo ichẹñwu k’amonẹ atene kpọna nyu wa k’a we rẹ Jihofa. G’IFIDIO-i, ubilẹ mẹ ch’oluka oji ene-i.
Abu am’ujiwe efu ifidio-i neke d’ẹdẹgbo ñwẹ?
Gba Ẹwñ 5:27-29 kpai Abo Hibru 10:24, 25. Ubi ku mẹ f’okoke am’ọgba Baibul-i gba, mẹ ch’oluka oji ene-i:
Ẹñwu chi ki nyọ k’a na rẹ Jihofa alo dagba k’abo gọmẹti ki f’ọwọ n’ukọlọ uchẹnyọ ejẹ kpai ujeju wa?
6. Jihofa ach’atẹko wẹ k’ẹ neke dago kpaka
Amẹnibenu Jihofa k’ọdọ ma ch’ojoji ñwu ọlama ku ma la kwugbo ojoji ojoji dọmọ arẹ Jihofa alo dagba ku ma ache ma ọbata. K’ẹ neke li ẹñwu ki ch’atẹko ma, g’IFIDIO-i. Ubilẹ, mẹ ch’oluka oji ene-i.
Efu ifidio-i, ẹñwu ch’atẹko amọmaye ẹnẹkẹlẹ kp’onubulẹ lẹ ku ma neke n’ẹdọ elichi?
Gba Abo Rom 8:35, 37-39 kpai Abo Filipai 4:13. Ubi ku mẹ f’okoke am’ọgba Baibul-i gba, mẹ ch’oluka oji ene-i:
Abu am’ọgba Baibul-i jẹñwu ẹ ma jali kaki ẹ neke n’ẹdọ elichi efu ajama?
Gba Matiu 5:10-12, ubilẹ mẹ ch’oluka oji ene-i:
Abu ẹ neke n’ẹdẹbọ dagba ku ma ach’ẹ ọbata?
Amonẹ wewe ku ma arẹ Jihofa na gwọnyu-wñ kpaka dagba ku ma akobọ ma. Uwẹ onugo neke gwọnyu Jihofa kpaka!
ABO KA KAKINI: “U neke jẹdọ ọbata n.”
Ọgba Baibul ẹñwu neke d’ukpahiu ñwu ma ku ma neke n’ẹdọ elichi?
ẸY’ỌLA UKỌ-I
Ẹdọ Jihofa abọ nyọnyọ ichẹñwu k’a gwọnyu arẹ-wñ kpaka dagba k’amonẹ ache wa ọbata. Jihofa ad’ukpahiu ñwu wa k’a neke n’ẹdọ elichi!
Ẹñwu ẹ kọchẹ?
Ẹñwu chi ki ma che wa awuwu kaki ma ache wa ọbata n?
Ẹñwu ẹ neke che abajọ-i k’ẹ neke mọla tanẹ ñwu ọbata ku ma neke che wa?
Ẹñwu neke jẹñwu ẹ ma jali kaki ẹ neke gwọnyu Jihofa kpaka dagba k’amonẹ ki akob’ẹ?
KỌCHẸ MANYU
G’ifidio-i k’ẹ li alu k’ọmaye ẹnẹkẹlẹ ka akọla lugbo atẹko ki Jihofa che ñwu ki neke f’ẹdọlichi iko ku ma du t’unyi uga todu ki ch’Ojanẹ Ọjọ kate i at’ọ ubi.
G’ẹñwu ki ch’abunẹ ọkọ kp’ọya ka ku ma gwọnyu Jihofa kpaka ọdọ wewe dagba ku ma akobọ ma.
Kọchẹ alu k’ẹ neke n’ẹdẹgbo ichẹñwu ku ma ach’ẹ ọbata.
Ẹñwu dukpẹ k’a du t’ibe ichẹñwu k’abo akwọra unyi wa akobọ wa, ẹñwu la neke ch’atẹko wa k’a gwọnyu Jihofa kpaka?
“Ochochi ‘D’urẹdọ Wa N, Chai Ugbada’ ” (Ọdọgọ Ide, October 2017)