Ẹñwu Che Ojanẹ Ọjọ?

Jura Abajọ-i Atu Ogbegbelẹ!—Ch’oluka K’ẹ La Kọchẹ Kwefu Baibul
- UKỌCHẸ 31
  
  Ẹñwu Che Ojanẹ Ọjọ?
  Oji ọla ki ch’ogbogaga tule efu Baibul ch’ọla lugbo Ojanẹ Ọjọ. Jihofa ad’Ojanẹ lẹ r’anẹ ilẹ-i da tu Paradais. Ẹñwu ch’Ojanẹ lẹ? Ẹñwu jẹñwu wa ma kaki ọfẹ Ojanẹ Ọjọ chanẹ mẹ? Amẹñwu Ojanẹ lẹ che mẹ? Ẹñwu i la na che ejọgba? Ukọchẹ-i kpai am’ukọchẹ meji ki rọno ana dohi am’ene-i.
  
  1. Ẹñwu ch’Ojanẹ Ọjọ, ẹnẹ la ch’Onu Ojanẹ lẹ?
  
  Ojanẹ lẹ ch’ọfẹ ki Jihofa Ọjọ du dago. Jisọs Kraist ch’Onu ojanẹ lẹ, ef’ojalẹ i la ach’ọda ọfẹ-wñ kwo. (Matiu 4:17; Jọn 18:36) Baibul k’ọla lugbo Jisọs kakini: “I ajonu . . . t’ogbegbelẹ.” (Luku 1:32, 33) Jisọs aj’ọfẹ oji ọgbọ amonẹ duu ki d’ilẹ, todu owñ ch’Onu Ojanẹ Ọjọ.
  
  2. Abo aj’ọfẹ kpai Jisọs?
  
  I che Jisọs kate aj’ọfẹ Ojanẹ lẹ n. Amonẹ kwefu “ọlọpu kp’alichi kp’amonẹ kp’abo uchẹichi du . . . aj’onu anẹ ilẹ.” (Ọla Ebitẹ 5:9, 10) Amonẹ monu aj’onu kpai Jisọs? Kwẹgba ki Jisọs kw’ilẹ-i, amonẹ wewe mu d’amakọchẹ-wñ mẹ. Ama, amonẹ icham ny’ọgwọkọ ugbo ọgbọ mebie nyoke mẹlẹ (144,000) efu ma ana j’ọfẹ kpai Jisọs ef’ojale. (Gba Ọla Ebitẹ 14:1-4.) Abo Kraist ki bọ anẹ ilẹ-i ach’amọma Ojanẹ lẹ.—Eli Ekọ D’Ọjọ 37:29.
  
  3. Ẹñwu jẹñwu Ojanẹ Ọjọ nyọ t’ọfẹ abo ilẹ-i le?
  
  Dagba k’abo ku ma j’ọfẹ ilẹ-i ki na ja ku ma ch’ẹñwu ẹnyọ ñwu amonẹ ma n’ukpahiu ech’amẹñwu du ku ma tene che n. Abo ki ana ch’ọfẹ ubi ma neke ch’abo ki ch’ọlama kate ma ma, ku ma ma la tene ech’atẹko amonẹ n. Ama, ẹnẹ du ana koji Jisọs ki ch’Onu Ojanẹ Ọjọ n. Ọjọ “d’ojanẹ dago ki ma la ñ’akpabiẹ ogbegbelẹ n.” (Daniẹl 2:44) Jisọs aj’ọfẹ oji ọgbọ ilẹ-i duu, i la na ch’ejuma n. Jisọs afẹdọ, i amọla ñwu omunẹ, i ch’ejuma n, i ana k’amonẹ k’ama onugo ku ma na fẹdọ abomunẹ gẹ, ku ma na mọla ñwu omunẹ, ku ma la ch’ejuma n.—Gba Aizaya 11:9.
  N’UMA NYỌGBA
  
  Kọchẹ ẹñwu ki jeñwu Ojanẹ Ọjọ nyọ t’ọfẹ anẹ ilẹ-i duu le.
  
  4. Ojanẹ ka ki n’ukpahiu an’ọda ọgbọ ilẹ-i
  
  Kwefu ọhiala abo duu ku ma aj’ọfẹ, Jisọs n’ukpahiu tule. Gba Matiu 28:18, ubilẹ mẹ ch’oluka oji ene-i:
  
  Ẹñwu ch’ojoji ki dagbade ukpahiu ọda ọfẹ Jisọs kpai e-abo ilẹ-i?
  
  Ọfẹ e-amonẹ arida kw’ọwọ ẹnẹ ka t’ọwọ ẹnẹ omunẹ, ẹnẹ ki aj’ọfẹ la ch’ọwọ ka ukpahiu ọfẹ-wñ akade. Abalẹ i dẹ kp’Ojanẹ Ọjọ? Gba Daniẹl 7:14, ubilẹ mẹ ch’oluka oji am’ene-i:
  
  Ẹñwu chi ki nyọ k’Ojanẹ Ọjọ “ch’e-ku ma ma akpabiẹ n”?
  
  Ẹñwu chi ki nyọ ki ch’ọgbọ ilẹ-i i aj’ọfẹ oji-wñ?
  
  5. Otila i che k’ọfẹ e-abo ilẹ-i ki w’ukpoji
  
  Ẹñwu chi ki ch’otila k‘Ojanẹ Ọjọ ki koji ọfẹ e-abo ilẹ-i? G’IFIDIO-i, ubilẹ mẹ ch’oluka oji ene-i.
  
  IFIDIO: Ẹñwu Ch’Ojanẹ Ọjọ?—E-Ka Du Kwefu-Wñ (1:41)
  
  Ẹñwu t’ache kw’iko k’abo ilẹ-i tet’ajọfẹ?
  
  Gba Akọla ñw Ujeju 8:9, ubilẹ mẹ ch’oluka oji am’ene-i:
  
  Ẹ neju kaki i dukpẹ k’Ojanẹ Ọjọ ki koji ọfẹ e-abo ilẹ-i? Ẹñwu chi k’ẹ kabalẹ?
  
  6. Jisọs kpai abo ku ma ab’ọ j’ọfẹ che mọla ẹnẹ k’a che
  
  Onu wa Jisọs dodo anẹ ilẹ-i mama mẹ. Todulẹ, i “neke kwaliwo ñwu wa ef ẹgbo-wa.” (Abo Hibru 4:15) Jihofa tu abokẹlẹ kp’abobulẹ ọkpakpa icham ny’ọgwọkọ ugbo ọgbọ mebie nyoke mẹlẹ (144,000) ku ma ana j’ọfẹ kpai Jisọs ef’ojale “kwef ọlọpu kp’alichi kp’amonẹ kp’abo uchẹichi du.”—Ọla Ebitẹ 5:9.
  
  I ad’ugbẹdọ ñwẹ alu k’ẹ ma kaki Jisọs kpai abo ki aj’ọfẹ kp’own mọla ẹnẹ k’a che ku ma la m’amakanya k’a ale gwefu-wñ du? Ẹñwu chi k’ẹ kabalẹ?
  
  Jihofa f’abokẹlẹ kpai abobulẹ chi kwefu ichi ojoji ojoji ku ma j’ọfẹ kpai Jisọs mẹ
  
  7. Ojanẹ Ọjọ che n’amọda ki nyọ t’amọda e-abo ilẹ-i le
  
  Abo gọmẹti ad’ọda ku ma neju kaki i aneke chekwu ñwu abo ma kpai e-ki adide abo ku ma aj’ọfẹ oji ma. Ojanẹ Ọjọ onugo che n’amọda k’abo ku ma defu-wñ dukpẹ ku ma na lebọ. Gba 1 Abo Kọrint 6:9-11, ubilẹ mẹ ch’oluka oji am’ene-i:
  
  Abu ẹ neju kaki ọgbọ ilẹ-i adẹ ichẹñwu k’amonẹ aleb’ọda Ọjọ?a
  
  Ẹ neju kaki i che nyọ alu ki Jihofa atene k’abo ku ma ch’amọma anẹ ojanẹ-wñ ki na leb’ọda ọfẹ-wñ? Ẹñwu chi k’ẹ kabalẹ?
  
  Ẹñwu du ña kaki abo ku ma ma lebọ am’ọda-i n, neke r’ibe da?—G’ọgba 11.
  
  Abo gọmẹti ad’ọda ku ma neju kaki i an’ile kpai edide abo ma. Ama ọda e-ojanẹ Ọjọ che nyọ t’e-abo gọmẹti ilẹ-i le amonẹ la jile nana kwefu-wñ
  
  ABO KA NEKE N’ENE: “Ẹñwu ch’Ojanẹ Ọjọ?”
  
  Abu ẹ na d’ohi?
  ẸY’ỌLA UKỌ-I
  
  Ojanẹ Ọjọ che gọmẹti ochochi ki defu ojale ki ana j’ọfẹ oji ọgbọ ilẹ-i duu.
  
  Ẹñwu ẹ kọchẹ?
  
  Abo ana j’onu kpai Jisọs efu ojanẹ Ọjọ?
  
  Ẹñwu jẹñwu ọda Ojanẹ Ọjọ t’e-abo ilẹ-i le?
  
  Ẹñwu che uchẹ ka efu amẹñwu ki Jihofa atene kwugbo abo ku ma ch’amọma anẹ Ojanẹ-wñ?
  
  Ọjọ ku kpoji ukọchẹ-i:
  
  Ẹñwu k’ẹ neke che
  Gba lugbo ọda ọfẹ Jisọs kwefu Aizaya 11:1-10, ubile k’ẹ g’ojoji ki dagbade e-abo ilẹ-i kpai e-Jisọs.
  
  Ẹñwu omunẹ ki d’ẹ ẹdọ k’ẹ che:
  Ẹñwu omunẹ ki d’ẹ ẹdọ k’ẹ che
  
  KỌCHẸ MANYU
  
  Kọchẹ ẹñwu ki Jisọs ka lugbo ugbo k’Ojanẹ lẹ dẹ.
  
  “Ọjanẹ Ọjọ Chẹñwu Ki Defu Ẹdọ Wẹ?” (I dẹ jw.org)
  
  Ẹñwu chi k’Amẹnibenu Jihofa gwọnyu Ọjanẹ Ọjọ kpaka, ki ma ch’ọfẹ abo ilẹ-i ma t’ọ ubi n?
  
  Ma T’Ojanẹ Ọjọ Ubi (1:43)
  
  G’ẹñwu ki Jihofa du tejugede lugbo amonẹ icham ny’ọgwọkọ ugbo ọgbọ mebie nyoke mẹlẹ (144,000) ki Jihofa tu ku ma j’ọfẹ kpai Jisọs.
  
  “Abo Alo Tefu Ojale?” (I dẹ jw.org)
  
  Ẹñwu jẹñwu onobulẹ ka ki defu unyi uga ki ma jali kaki Ọjọ kate neke d’ejuma eche kwefu ilẹ-i?
  
  “Alu Ku Li Ohi Am’ene Mi Lugbo Ajọ Uji” (Awake!, November 2011)
  a Ana ch’oluka uchẹ ka efu am’ọda-i efu Ukpẹ 3.

Ọfẹ Ojanẹ Ọjọ Chanẹ Mẹ!

Jura Abajọ-i Atu Ogbegbelẹ!—Ch’oluka K’ẹ La Kọchẹ Kwefu Baibul
- UKỌCHẸ 32
  
  Ọfẹ Ojanẹ Ọjọ Chanẹ Mẹ!
  Ọfẹ Ojanẹ Ọjọ chanẹ ef’ojale kw’ọdọ 1914. Ọdọ lẹ, ọjọ otitala ọfẹ e-amonẹ onugo chanẹ kwo. Ẹñwu jẹñwu wa ma? K’a g’amachẹ ki Baibul ka tanẹ lugbo amẹñwu ki ache ef’ilẹ abajọ-i kpai am’ali amonẹ kw’ọdọ 1914.
  
  1. Ẹñwu am’achẹ Baibul jẹñwu wa ma?
  
  Ọtakada Daniẹl du ña kaki ọfẹ ojanẹ Ọjọ achanẹ ubi ọkpanachi ka ki Baibul dọ “iko iko mebie.” (Daniẹl 4:16, 17) Ubi ọdọ wewe, Jisọs dọ ọkpanachi lẹ “iko iko abo uchẹichi,” i la kakini iko lẹ w’ukpoji ta n. (Luku 21:24) Dabalu k’a na li, iko iko mebie lẹ w’ukpoji ọdọ 1914.
  
  2. Ẹñwu ache ef’ilẹ-i, ẹñwu uche amonẹ la adu tejugede kw’ọdọ 1914?
  
  Amakọchẹ Jisọs t’ọ ene kakini: “Ẹwñ la ch’ujiwe ewa-wẹ, kpai e-ukpoji ọkpanachi-i?” (Matiu 24:3) Jisọs ka ñwu ma amẹñwu ojoji ojoji ki achanẹ eche ubi ki mu d’Onu ki la chanẹ ech’ọfẹ Ojanẹ Ọjọ. Amẹñwu ka efu amẹñwu lẹ ch’ogwu, ukpọta kpai anẹ emiejo. (Gba Matiu 24:7.) Baibul ñọ kakini uche amonẹ “iko ọjọ otitala” ana jẹñwu “ẹñwu agbiti.” (2 Timoti 3:1-5, NWT) Amẹñwu-i ki ache ef’ilẹ-i kpai amuche amonẹ kwo tejugede jali kw’ọdọ 1914.
  
  3. Ẹñwu chi k’ẹñwu gbiti ef’ilẹ-i kw’iko k’ọfẹ Ojanẹ Ọjọ chanẹ?
  
  Iko ree ubi ki Jisọs mud’Onu Ọjanẹ Ọjọ, i k’ogwu bọ Setan kpai amebili ef’ojale. Ma fu Setan du ef’uja lẹ. Baibul kakini “ma mu [Setan] du rikpolo tef anẹ ilẹ, ma ñọ m’amonuchẹ-wñ ko rọ janẹ.” (Ọla Ebitẹ 12:9, 10, 12) Ẹdọfulu Setan chẹ nana abu ki ma kaki ma ad’ọwñ kpa. Todu e-lẹ, i ajẹñwu amonẹ duu ef’ile-i ach’ọbata. E-lẹ jẹñwu wa ma jali ẹñwu ki chi k’a ach’ọbata! Ojanẹ Ọjọ ajẹñwu am’ọbata-i duu w’ukpoji.
  N’UMA NYỌGBA
  
  Gẹñwu ki jẹñwu wa ma kak’Ojanẹ Ọjọ chanẹ ej’ọfẹ kw’ọdọ 1914 kpai ẹñwu k’e-lẹ ajẹñwu wa che.
  
  4. Iko ku ma lu kpai amachẹ Baibul du ña kaki ọfẹ Ojanẹ Ọjọ chanẹ ọdọ 1914
  
  G’IFIDIO-i.
  
  IFIDIO: Ọfẹ Ojanẹ Ọjọ Chanẹ Ọdọ 1914 (5:02)
  
  Ọjọ jẹñwu Onu Nebiukadnẹza ki n’ọna lugbo ẹñwu ki ana che ejọgba. Ọna lẹ kpai ọfe-wñ ki Daniẹl ka du tejugede kaki i che n’ọwọ kp’ọfẹ Nebiukadnẹza manyu ọfẹ Ọjanẹ Ọjọ.—Gba Daniẹl 4:17.a
  
  Gba Daniẹl 4:20-26, ubilẹ d’ichati-i chekwu iko k’ẹ dohi am’ene-i:
  
  (A) Ẹñwu Nebiukadnẹza li ef’ọna-wñ?—G’ọgba 20 kpai 21.
  
  (B) Ẹñwu ana ch’oli lẹ?—G’ọgba 23.
  
  (CH) Ẹñwu ana che ukpoji “iko iko mebie”?—G’ọgba 26.
  
  Alu K’ọna Lugbo Oli lẹ N’ọwọ kp’Ọfẹ Ojanẹ Ọjọ
  
  ACHẸ LẸ (Daniẹl 4:20-36)
  
  Am’Onu aj’Ọfẹ
  
  (A) Oli ki nana ka
  
  Ọfẹ am’Onu lẹ w’ukpoji
  
  (B) “F’oli lẹ lọ wanẹ,” jẹñwu “iko iko mebie ki l’owñ oji”
  
  Ọfẹ lẹ mu dabi w’ẹgwu
  
  (CH) “Ojanẹ-wẹ ach’e-wẹ chuu”
  
  Ẹgba ejodudu k’achẹ lẹ wa chẹ . . .
  
  (D) Ẹnẹ oli lẹ ach’ujiwe-wñ?—G’ọgba 22.
  
  (E) Ẹgba ọda ọfẹ-wñ w’ukpoji?—Gba Daniẹl 4:29-33.
  
  (Ẹ) Ẹñwu kẹrẹbọ Nebiukadnẹza ẹgba ki “iko iko mebie” w’ukpoji?—Gba Daniẹl 4:34-36.
  
  ẸGBA EJODUDU K’ACHẸ LẸ CHẸ
  
  Am’Onu aj’Ọfẹ
  
  (D) Nebiukadnẹza, Onu Babilọn
  
  Ọfẹ am’Onu lẹ w’ukpoji
  
  (E) Ubi 606 T.I.K.W., oji Nebiukadnẹza chanẹ erida, i la neke ch’ọfẹ gẹ n gbogbo ọdọ mebie
  
  Ọfẹ lẹ mu dabi w’ẹgwu
  
  (Ẹ) Nebiukadnẹza dabi w’ẹgwu, i la dabi chanẹ ech’ọfẹ
  
  Ẹgba ẹkeji k’achẹ lẹ wa chẹ . . .
  
  (F) Ẹnẹ oli lẹ ach’ujiwe-wñ?—Gba 1 Iko Iko Ẹwñ 29:23.
  
  (G) Iko ọda ọfẹ ma w’ukpoji? Ẹñwu jẹñwu wa ma kaki ma doji ọfẹ iko ki Jisọs d’efilẹ-i n?—Gba Luku 21:24.
  
  (GB) Iko ọda ọfẹ lẹ dabi chanẹ? Ugbo i la chanẹ?
  
  ẸGBA ẸKEJI K’ACHẸ LẸ CHẸ
  
  Am’Onu aj’Ọfẹ
  
  (F) Am’onu abo Israẹl ki koji ọfẹ ọda Ọjọ
  
  Ọfẹ am’Onu lẹ w’ukpoji
  
  (G) Ma fu Jerusalẹm liẹ, ọda ọfẹ am’onu lẹ le w’ukpoji gbogbo ọdọ 2,520 le gwudu
  
  Ọfẹ lẹ mu dabi w’ẹgwu
  
  (GB) Jisọs chanẹ ech’ọda ọfẹ Ojanẹ Ọjọ efojale
  
  Abu iko iko mebie lẹ jiji kade?
  
  Am’ọgba Baibul ka ach’atẹko wa k’amọgba omunẹ efu-wñ ki nẹru wa eju. G’ujiwe-i, Ọla Ebitẹ ka ñwu wa kak iko ka kp’iko meji kp’ukpeji iko che ọjọ ichamu ny’ulọkọ ny’ọgbọ mẹta (1,260). (Ọla Ebitẹ 12:6, 14) Ugbo meji iko’ka kp’iko meji kp’ukpeji iko ch’iko iko mebie abẹki ọjọ ichamu ny’ọgwọkọ ugbo meji kp’oli mẹgwa ny’ọgbọ ka (2,520). Ẹgba ẹbọ, efu Baibul ọjọ ka akoji ọdọ ka. (Izikiẹl 4:6) Abalẹ i dẹ ñwu iko iko mebie ki def ọtakada Daniẹl—ma koji ọdọ icham ny’ọgwọkọ ugbo meji kp’oli mẹgwa ny’ọgbọ ka.
  5. Ilẹ mu rida nyọnyọ kw’ọdọ 1914
  
  G’IFIDIO-i.
  
  IFIDIO: Ilẹ-i Mu Rida Nyọnyọ Kw’ọdọ 1914 (1:10)
  
  Jisọs che ka amẹñwu ki ana chanẹ eche ef’ilẹ ubi ki mu d’Onu. Gba Luku 21:9-11, ubilẹ mẹ ch’oluka oji ene-i:
  
  Efu amẹñwu ki Jisọs ka-i, e-nya ẹ li abẹk ẹ gbọ kwefu-wñ?
  
  Ẹnukpuchẹ Pọl che ka alu k’ali amonẹ ana dẹ iko ọjọ otitala e-ọfẹ amonẹ. Gba 2 Timoti 3:1-5, ubilẹ mẹ ch’oluka oji ene-i:
  
  Ẹ li k’amonẹ ach’abalẹ ef’ilẹ eñini?
  
  6. Na chẹñwu ki adu ña kaki ẹ kẹdọno kaki ọfẹ Ojanẹ Ọjọ chanẹ mẹ
  
  Gba Matiu 24:3, 14, ubilẹ mẹ ch’oluka oji am’ene-i:
  
  Ukọlọ ogbogaga ẹñwu du tejugede kaki ọfẹ Ojanẹ Ọjọ chanẹ mẹ?
  
  Abu ẹ neke n’ukpẹ efu ukọlọ ki dẹ?
  
  Ọfẹ Ojanẹ Ọjọ chanẹ mẹ, iko ki ana n’ọda ọgbọ ilẹ-i chẹ mẹr’ọwọ mẹ. Gba Abo Hibru 10:24, 25, ubilẹ mẹ ch’oluka oji ene-i:
  
  Ẹñwu dukpẹ k’ẹnẹnẹnẹnẹ wa ki che alu k’a “li ka k’ọjọ lẹ mẹru awa mẹ”?
  
  Ichẹñwu k’ẹ m’ẹñwu ki neke jadu ọlai amonẹ abẹki ech’atẹko ma, ẹñwu ẹ che?
  
  ABO KA NEKE N’ENE: “Ẹñwu chi k’Amẹnibenu Jihofa kakini ọdọ 1914 ch’ọdọ ogbogaga i che?”
  
  Abu ẹ na dohi?
  ẸY’ỌLA UKỌ-I
  
  Am’achẹ Baibul kpai alu ku ma chẹ le manyu amẹñwu ki ache ef’ilẹ eñini-i du tejugede kaki ọfẹ Ojanẹ Ọjọ chanẹ mẹ. Ichẹñwu k’a j’uchẹnyọ lugbo Ojanẹ Ọjọ k’a la alo t’amujeju e-abudọ, e-lẹ adu ña kaki a kẹdọno kaki ọfẹ Ojanẹ Ọjọ chanẹ mẹ.
  
  Ẹñwu ẹ kọchẹ?
  
  Ẹñwu wa che ukpoji iko iko mebie ki Baibul ka efu ọtakada Daniẹl?
  
  Ẹñwu jẹñwu ẹ ma kaki ọfẹ Ojanẹ Ọjọ chanẹ ef’ọdọ 1914?
  
  Abu ẹ neke du ña kaki ẹ kẹdọno kaki ọfẹ Ojanẹ Ọjọ chanẹ mẹ?
  
  Ọjọ ku kpoji ukọchẹ-i:
  
  Ẹñwu k’ẹ neke che
  Ch’alu du k’ẹ neke che k’ẹ neke defu am’ajuchẹnyọ.
  
  Ẹñwu omunẹ ki d’ẹ ẹdọ k’ẹ che:
  Ẹñwu omunẹ ki d’ẹ ẹdọ k’ẹ che
  
  KỌCHẸ MANYU
  
  G’ẹñwu k’abo ku ma ak’ọhiala igbele kpai abomunẹ ka lugbo ọna k’amẹñwu arida kw’ọdọ 1914.
  
  “Iko K’ali Ọmẹmẹlẹ Chanẹ Ebulọ” (Awake!, April 2007)
  
  G’alu k’achẹ ki defu Matiu 24:14 r’ọlai ẹnẹkẹlẹ ka da.
  
  “Na Ñeju Baseball Nyọnyọ T’eñwu Du Le!” (Ọdọgọ Ide No. 3 2017)
  
  Ẹñwu jẹñwu wa ma kaki achẹ ki defu ọtakada Daniẹl oji 4 akọla lugbo Ojanẹ Ọjọ?
  
  “Ẹgba Ọfẹ Ọda Ojanẹ Ọjọ Chanẹ? (Ukpẹ 1)” (Ọdọgọ Ide, October 1, 2014)
  
  Ẹñwu du ña kaki “iko iko mebie” ki defu ọtakada Daniẹl oji 4 w’ukpoji ef’ọdọ 1914?
  
  “Ẹgba Ọfẹ Ọda Ojanẹ Ọjọ Chanẹ? (Ukpẹ 2)” (Ọdọgọ Ide, November 1, 2014)
  a G’amoji-ọla meji ki d’otitala Kọchẹ Manyu efu ukọche-i.

Amẹñwu k’Ojanẹ Ọjọ Ana Che

Jura Abajọ-i Atu Ogbegbelẹ!—Ch’oluka K’ẹ La Kọchẹ Kwefu Baibul

UKỌCHẸ 33

Amẹñwu k’Ojanẹ Ọjọ Ana Che

Ọfẹ Ojanẹ Ọjọ chanẹ abajọ-i mẹ. I dẹ pẹẹ, i ana r’amẹñwu da ef’ilẹ-i. K’a g’amẹñwu ọmẹmẹlẹ k’a na j’olobo-wñ iko k’ọda ọfẹ Ojanẹ Ọjọ chanẹ ef’ilẹ-i.

1. Abu Ojanẹ Ọjọ adabi jẹñwu urẹdọ kpai ọkpakpa w’efu ilẹ?

Jisọs onu Ojanẹ Ọjọ af’abo ẹbiẹnẹ kpa rinyọ, i la ana f’ojanẹ duu liẹ ef’ogwu Harmagẹdọn. (Ọla Ebitẹ 16:14, 16) Iko lẹ, ugbalutanẹ Baibul ki dẹ ana chẹ: “I bọ re ta, tak ẹnẹbibi lẹ ma ñ’adọmọ gẹ n.” (Eli Ekọ D’Ọjọ 37:10) Lefu Ojanẹ lẹ, Jisọs ajẹñwu urẹdọ kpai ọkpakpa ki b’ojanẹ ilẹ-i ma.—Gba Aizaya 11:4.

2. Abu ilẹ-i ana dẹ ichẹñwu k’unekwu Ọjọ wa che ef’ilẹ-i?

Ef’ọda ọfẹ Ojanẹ Ọjọ, “abo ọkpakpa ajẹ anẹ-i ẹwñ ogu, ma la adodo ọmọ gbogbo alo.” (Eli Ekọ D’Ọjọ 37:29) Kpibe kaki ẹ def’ilẹ k’amonẹ duu ch’ẹnẹ ọkpakpa ma la afẹdọ Jihofa kpai abomunẹ! Ẹnẹ du ana ch’ọga gẹ n, ma la ad’efu ilẹ ogbegbelẹ.

3. Ẹñwu Ojanẹ Ọjọ ana che ubi ki f’amẹnẹbibi kpa rinyọ?

Ubi ku ma f’amẹnẹbibi kpa rinyọ, Jisọs ana j’ọfẹ ọdọ ichamu ny’ọgwọkọ (1,000). Ad’iko lẹ, Jisọs kpai amonẹ ichamu ny’ọgwọkọ ugbo ọgbọ mebie nyoke mẹlẹ (144,000) ki aj’ọfẹ kp’owñ ach’atẹko amonẹ ku ma adodo anẹ ilẹ-i. E-lẹ ana jẹñwu ma jọkpa. Ubi k’ọdọ ichamu ny’ọgwọkọ lẹ kpoji, ọgbọ ilẹ-i duu arida tu paradias, i la akọ ñwu amonẹ ku ma n’ẹdẹbọ todu ku ma aleb’ọda Jihofa. Ubilẹ, Jisọs ana d’ọda ọfẹ Ojanẹ lẹ dabi ñwu Ata-wñ, Jihofa. Iko lẹ, ‘odu Jihofa ana fọ’ t’ẹgba akwobi le. (Matiu 6:9, 10) Iko lẹ, i ana tejugede pee kaki Jihofa ch’Onu ọmẹmẹlẹ, i la afẹdọ amonẹ. Iko lẹ, Jihofa ana du Setan kpai amebili kpa. Abo duu ki ma tene eleb’ọda ọfẹ-wñ n, Jihofa añọ ko ma kpa gẹ. (Ọla Ebitẹ 20:7-10) Amẹñwu ọmẹmẹlẹ k’Ojanẹ Ọjọ ana che ñwu wa adẹ ogbegbelẹ.

N’UMA NYỌGBA

Kọchẹ ẹñwu ki chi k’a neke kẹdọno kaki Ọjọ ad’Ojanẹ-wñ ch’amẹñwu duu ki gbalutanẹ efu Baibul lugbo ejọgba wa.

4. Ojanẹ Ọjọ ad’Ọfẹ e-amonẹ w’ukpoji

“Onẹ an’ọda ẹnẹ omunẹ ki abiẹnẹ ñw u.” (Akọla ñw Ujeju 8:9) Jihofa ana d’ejuma kpai ajọ uji kwefu ilẹ-i lef Ojanẹ-wñ.

Gba Daniẹl 2:44 kpai 2 Abo Tẹsẹlonaika 1:6-8, ubilẹ mẹ ch’oluka oji am’ene-i:

Ẹñwu Jihofa kpai Ọma-wñ Jisọs ache kp’ọfẹ amonẹ kpai abo ku ma at’ọfẹ amonẹ ubi?
Abu ẹñwu k’ẹ kọchẹ lugbo Jihofa kpai Jisọs jẹñwu ẹ kẹdọno kaki ma ana chẹñwu ki ch’eju-wñ kpai ẹñwu ki dukpẹ ñwu ọgbọ amonẹ?

5. Jisọs ch’Onu ọmẹmẹlẹ ki nyọ ñwu wa tule

Jisọs ach’atẹko amonẹ l’ọna ọmẹmẹlẹ ojoji ojoji todu owñ ch’Onu Ojanẹ Ọjọ. G’IFIDIO-i k’ẹ neke li alu ki Jisọs du ña kaki i añeju ki ch’atẹko amonẹ kp’ukpahiu k’Ọjọ du-wñ.

IFIDIO: Jisọs D’amẹñwu k’Ojanẹ Lẹ Ana Che Ña (1:13)

Amẹñwu ki Jisọs che iko ki d’efu ilẹ-i d’ujiwe ẹñwu k’Ojanẹ Ọjọ ana che ña. Efu amugbalutanẹ ki jọ-i, ugbo e-k’ẹ ñeju ki wa che tule dẹ? Gba am’ọgba Baibul ki ajẹñwu wa kọchẹ manyu lugbo amugbalutanẹ lẹ.

IKO KI D’ILẸ, JISỌS . . .	KWEFU OJALE, JISỌS ANA . . .
jẹñwu afu lile dago.—Mark 4:36-41.	jẹñwu anẹ ilẹ-i ki ch’utọ ki la ch’ugbo ki anyọ edodo.—Aizaya 35:1, 2.
d’ujẹñwu ñwu amonẹ wewe jẹ lọna awuwu.—Matiu 14:17-21.	d’okpọta w’ukpoji.—Eli Ekọ D’Ọjọ 72:16.
ch’ọga amonẹ wewe kpa.—Luku 18:35-43.	jẹñwu ọgbọ amonẹ ki n’añọla ki chẹ jọkpa.—Aizaya 33:24.
d’amonẹ daji kwanẹ.—Luku 8:49-55.	d’amonẹ daji kwanẹ, ukwu la ña dẹ gẹ n—Ọla Ebitẹ 21:3, 4.

6. Ojanẹ Ọjọ ana d’ejọgba ọmẹmẹlẹ wa

Ojanẹ Ọjọ ach’amẹñwu ki d’Ọjọ ẹdọ ñwu amonẹ kw’abakwanẹ. Ma la adodo efu Paradais anẹ ilẹ-i ogbegbelẹ. G’IFIDIO-i k’ẹ neke li alu ki Jihofa adu Jisọs ch’amẹñwu ki d’ẹdọ-wñ ñwu amonẹ.

IFIDIO: G’amẹñwu Awuwu Ki Ana Che Ejọgba (4:38)

Gba Eli Ekọ D’Ọjọ 145:16, ubilẹ mẹ ch’oluka oji ene-i:

Abu i dẹ efu ẹdọ wẹ alu k’ẹ ma kaki Jihofa ana che “k’ẹwñ du ki deju ki n’ẹwñ ki r’uma eju”?

ABO KA KAKINI: “Ichẹñwu k’a k’ọwọ dama a neke d’amihianyi duu ki def’ilẹ-i w’ukpoji.”

Am’ihianyi ẹñwu Ojanẹ Ọjọ ana du w’ukpoji k’ọfẹ e-amonẹ ma neke che n?

ẸY’ỌLA UKỌ-I

Ojanẹ Ọjọ ach’ẹñwu k’Ọjọ atene ki che. I ana d’ilẹ-i rida tu paradais ki chẹ kọ ñwu abo ọkpakpa ku ma arẹ Jihofa ogbegbelẹ.

Ẹñwu ẹ kọchẹ?

Abu Ojanẹ Ọjọ ajẹñwu odu Jihofa ki nafọ?
Ẹñwu jẹñwu wa kẹdọno kaki Ojanẹ Ọjọ ana ch’amẹñwu k’Ọjọ gbalutanẹ ñwu wa efu Baibul?
Efu amugbalutanẹ ẹnyọ k’Ojanẹ Ọjọ ana che ñwu wa, ẹñwu che e-k’ẹ ñeju ki wa che tule?

Ọjọ ku kpoji ukpẹ-i:

Ẹñwu k’ẹ neke che

D’ọtakada pẹtẹkẹ ki che Ẹñwu ch’Ojanẹ Ọjọ? chanẹ oluka kpai amonẹ.

Ẹñwu omunẹ ki d’ẹ ẹdọ k’ẹ che:

Ẹñwu omunẹ ki d’ẹ ẹdọ k’ẹ che