UKỌCHẸ 13

Ọna Ọjọ Egwa Ọlemi Ajẹñwu Amonẹ Kpibe Ẹbiẹnẹ Lugbo Ọjọ

E-ku Ma Kọ Dufu

Ọjọ ch’ufẹdọ. Ama, am’ọna Ọjọ egwa ku ma kaki ma chẹñwu ki d’Ọjọ ẹdọ che n’ọwọ efu amẹñwu ẹbiẹnẹ. Ẹñwu chi ki dabalẹ? Am’ọna Ọjọ egwa ki dẹ ch’ọlemi, todu ẹñwu ku ma ka kpai ẹñwu ku ma che ajẹñwu am’onẹ kẹdọno ọlemi lugbo Ọjọ. Abu ma ch’e-lẹ le? Abu ẹdọ Ọjọ dẹ lugbo ẹñwu-i? Ẹñwu i ana che oji-wñ?

**1. Abu ọna Ọjọ egwa ọlemi ajẹñwu amonẹ kẹdọno ọlemi lugbo Ọjọ lefu ukọ-ọlemi ma?**

Ọna Ọjọ egwa ọlemi “m’ochochi Ọjọ du kpailọ ọlemi.” (Abo Rom 1:25) K’a g’ujiwe, ojile am’ọna Ọjọ egwa kọ abo ma ẹñwu ki ch’odu Ọjọ n. Tabalẹ, Baibul kaki otila i che k’a d’odu Ọjọ chekwu. (Abo Rom 10:13, 14) Am’agboji ọna Ọjọ egwa ọlemi ka akakini unekwu Ọjọ i che ichẹñwu k’ẹñwu ẹbiẹnẹ akẹrẹb’amonẹ. Ama, e-lẹ muda ch’ọlemi i che. I ch’Ọjọ ch’ẹtẹ ẹbiẹnẹ ki ache n. (Gba Jemis 1:13.) Ichẹñwu iwọ, todu am’ọna Ọjọ egwa ọlemi ajẹñwu am’onẹ ki le jiji b’Ọjọ tẹ.

2. Abu ọna Ọjọ egwa ọlemi ajẹñwu amonẹ kẹdọno ọlemi lugbo Ọjọ lefu amẹñwu ku ma ache?

Am’ọna Ọjọ egwa ọlemi kwula ñwu onẹ ọna k’Ọjọ akwula ñwu onẹ n. Baibul kọla lugbo ọna Ọjọ egwa ọlemi kaki ‘adure-wñ tẹ gbogbo kad efojale.’ (Ọla Ebitẹ 18:5) Kw’ọdọ wewe, am’ọna Ọjọ egwa-i an’ọwọ nẹ efu ujabe kpai ogwu. Ma la ñọ ch’ẹtẹ ukwu am’onẹ wewe abẹki ejẹ t’abo ku ma akp’amonẹ ubi. Am’agboji ọna Ọjọ egwa ka añeju ekp’ọkọbiẹ nyọnyọ ma la ñọ n’ugbeju b’ọkọ tanẹ ñwu abo ma ku ma ra. Amẹñwu ku ma che-i du tejugede kaki ma m’Ọjọ n, ma la neke k’amonẹ ẹñwu du ki lugbo Ọjọ n.—Gba 1 Jọn 4:8.

3. Abu ẹdọ Ọjọ dẹ lugbo am’ọna Ọjọ egwa ọlemi?

Ichẹñwu k’uche ọna Ọjọ egwa ọlemi akp’ẹ ẹdọ biẹ, abu ẹ neju kaki ẹdọ Ọjọ adẹ? Ọjọ afẹdọ amonẹ, ama ẹdọ-wñ chẹ kpabiẹ r’amagboji ọna Ọjọ egwa ki ak’amonẹ ọlemi lugbo-wñ, ku ma ma la n’ufẹdọ chẹñwu kp’abo ma n. I gbalu kaki i ana d’ukpoji wa ñwu am’ọna Ọjọ egwa ọlemi, “i la nugbo ku ma ñ’ali gẹ n.” (Ọla Ebitẹ 18:21) I dẹ pẹẹ, Ọjọ ad’ukpoji wa ñwu am’ọna Ọjọ egwa ọlemi.—Ọla Ebitẹ 18:8.

N’UMA NYỌGBA

Kọchẹ manyu lugbo alu k’Ọjọ ali ọna Ọjọ egwa ọlemi. G’amẹñwu ẹbiẹnẹ ku ma ache kpai ẹñwu ki chi ki dukpẹ k’ẹ we jẹñwu am’uche ma ki kpọna ny’ẹ etẹmẹr’Ọjọ.

4. I ch’ọna Ọjọ egwa chaka Ọjọ ajẹ kp’ama n

Amonẹ wewe kaki am’ọna Ọjọ egwa dab’ọna ojoji ojoji ki neke d’onẹ t’ọna Ọjọ. Ama, ọgẹcha i che? Gba Matiu 7:13, 14, ubilẹ mẹ ch’oluka oji ene-i:

Ẹñwu Baibul ka lugbo ọna ki lo tef iñmi?

G’IFIDIO-i, ubilẹ mẹ ch’oluka oji ene-i.

IFIDIO: Am’ọna Ọjọ Egwa Chaka Ọjọ Ajẹ Kp’ama?—E-ka Du Kwefu-Wñ (3:22)

Baibul kaki ọna Ọjọ egwa chaka ab’Ọjọ ẹdọ?

5. Ọna Ọjọ egwa ọlemi d’ufẹdọ Ọjọ tejugede n

Am’ọna Ọjọ egwa ọlemi ajẹñwu amonẹ kẹdọno ọlemi lugbo Ọjọ. Oka efu e-ki biẹnẹ tule che en’ọwọ ef’ogwu eja. K’a g’ujiwe ka, g’IFIDIO-i. Ubilẹ, mẹ ch’oluka oji am’ene-i.

IFIDIO: Ọwọ K’abo Chọchi Nẹ Efu Ogwu Ọgbọ-ilẹ Ẹkeji (2:22)

Ẹñwu ch’ukpẹ k’abo chọchi wewe nẹ efu Ogwu Ọgbọ-ilẹ Ẹkeji?
Ichẹñwu k’ẹ kpibe oji ukpẹ ku ma nẹ ef’ogwu lẹ, abu e-lẹ dẹ ọla wẹ?

Gba Jọn 13:34, 35 kpai 17:16. Ubilẹ, mẹ ch’oluka oji am’ene-i:

Abu ẹdọ Jihofa dẹ alu k’amọna Ọjọ egwa an’ọwọ ef’ogwu eja?
Ọna Ọjọ egwa ọlemi ch’ẹtẹ ẹbiẹnẹ wewe ki ache-i. Am’ọna ẹñwu ẹ li k’amọna Ọjọ egwa ọlemi ma d’ufẹdọ Ọjọ ña n?

Am’ifoto: Am’ifoto ki du ña kaki ọna Ọjọ egwa ọlemi n’ọwọ nẹ efu am’ogwu eja kw’ọdọ wewe. 1. Ẹnẹ chọchi ka ajuja todu ọna Ọjọ egwa-wñ. 2. Ogwu Ọgbọ-ilẹ Ejodudu (World War I). 3. Agboji chọchi ka ach’adua ñwu isoja ka . 4. Pasitọ chọchi ka ojanẹ Africa ad’amonẹ ẹdọ kwanẹ ku ma j’ogwu . 5. Am’isoja ojanẹ Japan ar’ọnu lile ma. — Ọna Ọjọ egwa ọlemi d’ufẹdọ Ọjọ ña n

6. Ọjọ atene ki ch’atẹko amonẹ ku ma kwefu ọna Ọjọ egwa ọlemi

Gba Ọla Ebitẹ 18:4,a ubilẹ mẹ ch’oluka oji ene-i:

Abu i dẹ efu ẹdọ wẹ alu k’ẹ ma kaki Jihofa atene ch’atẹko ẹnẹnẹnẹnẹ k’ọna Ọjọ egwa ọlemi fu chila b’ọna Ọjọ tẹ?

7. Na kọchẹ lugbo Ọjọ ochochi alo wa

I dukpẹ k’ẹñwu ẹbienẹ k’ọna Ọjọ egwa ọlemi ache kpai ẹñwu ku ma ka ki jẹñwu ẹ na d’eju ẹbiẹnẹ g’Ọjọ? Kpibe oji ujiwe ọma ki kọ elebọ ibe ọmẹmẹlẹ k’ata-wñ du ñwu. Ọma lẹ kw’unyi, i la na f’ẹñwu ẹbiẹnẹ che. Ata-wñ la jẹ kpai ẹñwu ki che n. Ẹñwu chi ki ma ch’eju-wñ ekp’ata lẹ abi todu amẹñwu k’ọma-wñ ache n?

Abalẹ gẹ, i ach’eju-wñ ekpi Jihofa abi k’a la f’ọwọ no ech’ukọchẹ lugbo-wñ todu ẹñwu k’ọna Ọjọ egwa ọlemi aka abẹki ẹñwu ku ma ache?

ABO KA KAKINI: “U tene kọchẹ ẹñwu du lugbo Ọjọ n todu ọna Ọjọ egwa ọlemi ch’ẹtẹ am’ihianyi wewe k’a dejudo.”

Ẹ kpibe abalẹ?
Ẹñwu chi ki ma dukpẹ k’a jẹñwu amẹñwu k’ọna Ọjọ egwa ọlemi ache abẹki ẹñwu ku ma ka ki jẹñwu wa we tẹmẹru Ọjọ n?

ẸY’ỌLA UKỌ-I

Ọna Ọjọ egwa ọlemi ajẹñwu amonẹ kpibe ẹbiẹnẹ lugbo Ọjọ lefu amẹñwu ẹbiẹnẹ ku ma ache kpai am’ọlemi ku ma ak’amonẹ. Ọjọ ad’ọna Ọjọ egwa ọlemi w’ukpoji.

Ẹñwu ẹ kọchẹ?

Abu ẹdọ wẹ dẹ lugbo amẹñwu k’ọna Ọjọ egwa ọlemi ak’amonẹ kpai amẹñwu ẹbiẹnẹ ku ma ache?
Abu ẹdọ Jihofa dẹ lugbo ọna Ọjọ egwa ọlemi?
Ẹñwu Ọjọ ana che kpai ọna Ọjọ egwa ọlemi?

Ọjọ ku kpoji ukọchẹ-i:

Ẹñwu k’ẹ neke che

Efu ujeju ki awa, t’ẹnẹ ka ene kakini, “Ẹñwu chi k’ẹ tu k’ẹ ch’Ẹnibenu Jihofa?”

Ẹñwu omunẹ ki d’ẹ ẹdọ k’ẹ che:

Ẹñwu omunẹ ki d’ẹ ẹdọ k’ẹ che

KỌCHẸ MANYU

G’ọna meji k’ọna Ọjọ egwa ọlemi akp’Ọjọ ẹdọ biẹ.

“Ọgbọ Ọna Ọjọ Egwa Ch’oka? Ọgbọ Ma Achẹñwu K’Ọjọ Tene?” (I dẹ jw.org)

Ẹñwu chi ki Jihofa atene k’a r’owñ kp’abomunẹ?

“I chẹñwu Ogbogaga K’onẹ Ki Na Ch’ujeju Dama Kpai Ọna Ọjọ Egwa Ka?” (I dẹ jw.org)

Ẹñwu k’agboji ọna Ọjọ egwa ka ali efu ọna Ọjọ egwa-wñ ad’ihianyi-wñ. Ama, e-lẹ kpọna nyu ekọchẹ ochochi lugbo Ọjọ n.

“Ẹñwu Ki Chi K’atama Ka Kwefu Chọchi-wñ” (Awake!, February 2015)

Kw’ọdọ wewe, ọna Ọjọ egwa ak’amonẹ ọlemi lugbo Ọjọ ki ajẹñwu amonẹ kpibe kaki Ọjọ kwula ñwu wa n, kaki ẹnẹ ẹbiẹnẹ Ọjọ che. G’ochochi mẹta lugbo am’ọlemi lẹ.

“Am’ọlemi Ki Jẹñwu Dabẹnẹ Kaki Ọjọ Fẹdọ Wa N” (Ọdọgọ Ide, November 1, 2013)

a K’ẹ neke ma ẹñwu ki chi k’ọtakada Ọla Ebitẹ kaki ọna Ọjọ egwa ọlemi ch’onobulẹ e-ku ma dọ Babilọn E-lile, go Akanẹreju 1 Ki D’ukpoji Ọtakada-i.