Ẹñwu Ch’ibe k’Ọjọ Nẹ Ñwu Wa?

Baibul kakini ọlai awa onẹ ‘kpọkpẹ n, i la chẹkọ ñw akanya’. (Job 14:1) Abu Ọjọ atene k’ẹñwu ki dẹ ñwu wa dẹ-i? Ichẹñwu ki ma ch’abalẹ i tene n, ẹñwu la ch’ibe ki nẹ ñwu wa? I neke dabi dẹ alu k’Ọjọ tene? G’amohi ki ad’ugbẹdọ ñwu onẹ ki Baibul du ñwu wa.

1. Ọla ọlai ẹñwu Ọjọ atene ñwu wa?

Jihofa atene k’a jura ọmẹmẹlẹ ef’ọlai wa. Iko ki nyi Adam kpai If, i ko ma j’ugbo ọmẹmẹlẹ ki ach’utọ ku ma dọ ki ef’uchẹ Idẹn. Ubilẹ, “Ọjọ dẹnyọ ñw ma, Ọjọ la ka ñwu ma kakini: ‘Amẹ ki bi ọma, ku mẹ ki wewe nyọgba ku mẹ chẹkọ anẹ-ilẹ-i ku mẹ f’u dolo tẹ.’ ” (Abakwanẹ 1:​28) Jihofa atene ku ma bi am’ọma, ku ma jẹñwu ọgbọ ilẹ-i du ki mu di Paradais, ku ma la deju t’amẹla. I atene k’awa onẹ ki n’añọla ki chẹ jọkpa, k’a la deju ogbegbelẹ.

Ochochi, i che kaki a jura ki dẹ-i ef’ọlai wa abajọ-i n,a ama ibe k’Ọjọ nẹ ñwu wa rida ta n. (Aizaya 46:​10, 11) I atene k’abo ọkpakpa ki jura ef’ilẹ ogbegbelẹ ki ma n’ihianyi duu n.​—Gba Ọla Ebitẹ 21:​3, 4.

2. Abu a neke jura ọlai ọmẹmẹlẹ abajọ-i?

Jihofa nyi wa ọna ki ch’owñ anẹ wa le, todu lẹ oñ a tene k’a f’u ma k’a la r’ọ. (Gba Matiu 5:​3-6.) Jihofa atene k’ade awa kp’owñ ki chẹ loyanẹ, k’a na “lulẹ ej ọna-wñ du kpai efẹdọ-wñ,” kpai “en’ẹdọ-[wa] chaka” r’owñ. (Ọlọda Eduwa Onukeji 10:12; Eli Ekọ D’Ọjọ 25:14) Ichẹñwu k’a ch’abalẹ, a neke n’ẹdẹbọ ochochi dagba k’a dejudo am’akanya. Ichẹñwu k’a rẹ Jihofa, ọlai wa ana ch’ọmẹmẹlẹ todu k’a chẹñwu ki atene.

3. Jihofa atene k’a jura ọlai wa

G’IFIDIO-i, ubilẹ mẹ ch’oluka oji ene-i.

IFIDIO: Ẹñwu Chi K’Ọjọ Nyi Ilẹ-i?​—E-Ka Du Kwefu-Wñ (1:​41)

• Ẹñwu chi k’Ọjọ nyi ilẹ-i?

Gba Akọla ñw Ujeju 3:​11, ubilẹ mẹ ch’oluka oji ene-i:

• Ẹñwu e-i k’uwẹ lugbo Jihofa?

4. Ibe ki Jihofa nẹ ñwu wa rida ta n

Gba Eli Ekọ D’Ọjọ 37:​11, 29 kpai Isaiah 55:​11, ubilẹ mẹ ch’oluka oji ene-i:

• Ẹñwu jẹñwu wa ma kaki ibe k’Ọjọ nẹ ñwu wa rida ta n?

5. Ichẹñwu k’a rẹ Jihofa a n’ọlai ọmẹmẹlẹ

IFIDIO: U Kọchẹ Ẹñwu Ki Chi K’a D’Ilẹ-i (5:​03)

• Abu Terumi jile alu ki kọchẹ ẹñwu ki chi k’a d’ilẹ-i?

Gba Akọla ñw Ujeju 12:​13, ubilẹ mẹ ch’oluka oji ene-i:

• Ichẹñwu k’a kpibe lugbo amẹñwu ki Jihofa che ñwu wa, ẹñwu a dukpẹ k’a che k’a du ña kaki ẹñwu ki che ñwu wa che wuwa eju?

ẸY’ỌLA UKỌ-I

Jihofa atene k’a jura ọlai ogbegbelẹ ef’ilẹ k’akanya ma dẹ n. Ichẹñwu k’a rẹ Jihofa kp’ẹdọ wa chaka ọlai wa ana ch’ọmẹmẹlẹ abajọ-i.​

Ẹñwu ẹ kọchẹ?

• Ẹñwu ch’ibe k’Ọjọ nẹ ñwu Adam kpai If kw’abakwanẹ?

• Abile k’a ma kaki ibe k’Ọjọ nẹ ñwu amonẹ rida ta n?

• Ẹñwu a neke che k’ọlai wa ki ch’e-ọmẹmẹlẹ?

KỌCHẸ MANYU

Kọchẹ ẹñwu ki jẹñwu wa ma kaki ef’uchẹ Idẹn dẹ ochochi.

“Ef’uchẹ Idẹn Dẹ Ochochi Abẹki Ọhiala Ọlemi I Che?” (Ọdọgọ Ide, January 1, 2011)

Kọchẹ ẹñwu ki chi k’a kẹdọno kaki ilẹ-i adọmọ ogbegbelẹ.

“Ma Ana Kp’Anẹ Ilẹ-i Biẹ?” (I dẹ jw.org)

Kọchẹ ẹñwu ki Baibul ka lugbo ọna k’ẹ neke n’ọlai ọmẹmẹlẹ.

“Ẹñwu Chi K’Ọjọ Nyi Wa?” (I dẹ jw.org)

Ẹnẹkẹlẹ ka neju kak owñ n’ẹñwu duu. G’alu ki wa li kaki i n’ẹñwu ki alenyọ ef’ọlai-wñ.

Abajọ-i, Ẹñwu Ọmẹmẹlẹ Na D’ọlai Mi Che (3:55)