UKỌCHẸ 22
Abu Ẹ Neke Takooya Uchẹñyọ R’amonẹ?
Alu k’ẹ na kọchẹ ochochi ki defu Baibul, ẹ neke na kpibe kakini, ‘Amonẹ dukpẹ ku ma m’eñwu-i!’ Ọgẹcha, i dukpẹ k’amonẹ duu ki n’uma-wñ! Tabalẹ, ẹdọ wẹ neke na ga ichẹñwu k’ẹ kpibẹ alu k’ẹ neke ka ñwu onẹ ẹñwu k’ẹ kọchẹ. K’a ch’oluka ẹñwu k’ẹ neke che k’ẹdọ wẹ ki we ga, k’ẹ la chanẹ ej’uchẹnyọ r’amonẹ kp’uyọ.
1. Abu ẹ neke kpukpẹ ẹñwu k’ẹ kọchẹ kpai amonẹ?
Amakọchẹ Jisọs kakini: “Ẹwñ k’a li kp’ẹwñ k’a gbọ a neke we eka n.” (Ẹwñ 4:20) Ma añeju ochochi ku ma kọchẹ kwugbo Jisọs nyọnyọ. Todulẹ, ma atene ka ñwu amonẹ duu k’ọwọ ma tu. Abalẹ i dẹ ọla wẹ? Ichẹñwu ki dabalẹ, tene uña k’ẹ neke ka ñwu abo akwọra unyi wẹ kpai am’onukwu wẹ ẹñwu k’ẹ kọchẹ.—Gba Abo Kọlọse 4:6.
Am’ọna k’ẹ neke chanẹ
Ichẹñwu k’ẹ kọla kpai abo akwọra unyi wẹ, ẹ neke chanẹ kpai oji ọla ki defu Baibul lefu ekakini: “I che n’ẹñwu ka ku kọchẹ efu aladi-i”
Ichẹñwu k’onukwu wẹ ach’ọga abẹki i adejiji, ẹ neke gba ọgba Baibul ki ad’ugbẹdọ ñwu.
Ichẹñwu k’ẹnẹ k’uwẹ kp’owñ ach’ukọlọ t’ẹ ene kaki abu aladi wẹ dẹ, ka ñwu ẹñwu k’ẹ kọchẹ kwefu ukọchẹ Baibul wẹ abẹki kwefu ujeju abudọ ef’aladi lẹ.
D’amẹñwu ka oji jw.org ñ’onukwu wẹ.
Ka ñwu abomunẹ ku ma dugbo wẹ alu k’ẹ ch’ukọchẹ Baibul, abẹk ẹ du ña ma alu ku ma neke lo tu jw.org ku ma kaki ma tene ch’ukọchẹ Baibul.
2. Ẹñwu chi ki chẹñwu ogbogaga ej’uchẹnyọ kpai abudọ?
I ch’abo ku ma ma kate amakọchẹ Jisọs j’uchẹnyọ ru n. Jisọs “f’uma kpẹ eji eji ọgba-wñ, tef ewo du” ku ma j’uchẹnyọ. (Luku 10:1) Alu ku ma ch’ọna ukọlọ uchẹnyọ ejẹ iko lẹ, i jẹñwu amonẹ wewe ku ma neke gb’ọla uchẹnyọ. Ej’uchẹnyọ dama jẹñwu ma n’uyọ gbọgba. (Luku 10:17) Uwẹ onugo neke f’ọtaru k’ẹ j’uchẹnyọ kpai abudọ?
N’UMA NYỌGBA
Kọchẹ ẹñwu k’ẹ neke che k’ẹdọ wẹ ki we ga, k’ẹ la li ọna k’ẹ neke na n’uyọ kwefu ej’uchẹnyọ.
3. Jihofa adugbo wẹ
Abo ka atene j’uchẹnyọ, ama ẹdọ ma aga todu eju k’amonẹ adu go ma kpai ẹñwu k’amonẹ aka abẹki ẹñwu k’amonẹ neke che.
Ẹdọ wẹ aga k’ẹ ka ñwu amonẹ ẹñwu k’ẹ kọchẹ? Ẹñwu chi k’ẹ kabalẹ?
G’IFIDIO-i, ubilẹ mẹ ch’oluka oji ene-i.
Ẹñwu ch’atẹko amagbadufu-i ku ma ch’okpo gẹ n, ku ma neke k’ẹñwu ku ma kẹdọno?
Gba Aizaya 41:10, ubilẹ mẹ ch’oluka oji ene-i:
Ichẹñwu k’ẹdọ wẹ aga ej’uchẹnyọ, abu adua neke ch’atẹko wẹ?
Ẹ che ma?
Amẹnibenu Jihofa wewe chẹ kpibe mama mẹ kaki ma neke j’uchẹnyọ r’amonẹ n. K’a g’ujiwe Sergey. I lọla ñwu ki k’ọla kp’abomunẹ n todu ki ach’okpo. Tabalẹ, i ch’ukọchẹ Baibul. I kakini: “Dagba ku na ch’okpo-i, u chanẹ ek’ọla kp’amonẹ lugbo ẹñwu ku na kọchẹ. Ẹñwu ki che mi awuwu tule che kakini, ech’oluka kp’amonẹ lugbo ẹñwu ku na kọchẹ kwefu Baibul jẹñwu mi n’ẹdọ ẹgbo nyọgba. I la ñọ jẹñwu ukẹdọno mi lugbo amẹñwu ku na kọchẹ ki chẹ lonyanẹ efu ẹdọ mi.”
4. Na d’ojima ñwu amonẹ
Ichẹñwu k’ẹ j’uchẹnyọ, ẹ kpibe oji ẹñwu k’ẹ ka kate n, ama i dukpẹ k’ẹ kpibe alu k’ẹ ka le. Gba 2 Timoti 2:24 kpai 1 Pita 3:15, ubilẹ mẹ ch’oluka oji am’ene-i:
Abu ẹ neke leb’ibe ki d’amọgba Baibul-i ichẹñwu k’ẹ k’ọla kp’amonẹ lugbo Baibul?
Abo akwọra unyi wẹ abẹki am’onukwu wẹ neke kọ jẹ kp’uwẹ. Ẹñwu ẹ neke che? Ẹñwu ẹ ma dukpẹ k’ẹ che n?
Ẹñwu chi ki dukpẹ k’a d’ibe t’amonẹ ene, k’a we ka ñwu ma ẹñwu ki dukpẹ ku ma kẹdọnọ?
5. Ej’uchẹnyọ ajẹñwu onẹ n’uyọ
Jihofa d’ukọlọ uchẹnyọ ejẹ ñwu Jisọs. Abu ukọlọ lẹ dẹ eju Jisọs? Gba Jọn 4:34, ubilẹ mẹ ch’oluka oji am’ene-i:
Ichẹñwu k’a j’ujẹñwu ọmẹmẹlẹ, i-ajẹñwu añọla wa ki gbiti, ẹdọ wa la añọ bọ gẹ. Ẹñwu chi ki Jisọs d’echẹñwu k’Ọjọ tene, dabu uchẹñyọ ejẹ, wawe kp’ujẹñwu ejẹ?
Uyọ ẹñwu ẹ neju kaki ẹ neke nẹ kwefu uchẹnyọ ejẹ?
Amẹñwu k’ẹ neke che
Ef’ujeju ef’aladi, kọchẹ ọna k’ẹ neke chanẹ ukọla kp’onẹ.
T’ẹnẹ ki ach’ukọchẹ Baibul kp’uwẹ ene ọna k’ẹ neke defu abo ki ach’ujiwe uchẹnyọ ejẹ efu ujeju. Ichẹñwu k’ẹ ch’ujiwe uchẹnyọ ejẹ efu ujeju, e-lẹ ach’atẹko wẹ k’ẹ neke mọla tanẹ eka ñwu amonẹ ẹñwu k’ẹ kọchẹ.
D’amukpẹ “Abo Ka Kakini” abẹki “Onẹ Neke N’ene” efu ọtakada-i kọchẹ alu k’ẹ neke dohi am’ene k’amonẹ at’ẹ abẹki ẹñwu k’ẹ neke che ichẹñwu k’onẹ ma tene netiru ukọla wẹ n.
ONẸ NEKE N’ENE: “Eju ke o! Abu ẹñwu dẹ ke?”
Abu ẹ neke d’uña-i ka ñwu ẹnẹ lẹ lugbo ẹñwu k’ẹ kọchẹ kwefu ukọchẹ Baibul wẹ?
ẸY’ỌLA UKỌ-I
Ej’uchẹnyọ r’abomunẹ ajẹñwu onẹ n’ẹdẹbọ. I la neke lọla t’alu k’ẹ neju le.
Ẹñwu ẹ kọchẹ?
Ẹñwu chi ki nyọ k’ẹ j’uchẹnyọ r’amonẹ?
Abu ẹ neke j’uchẹnyọ kpai ojima?
Ẹñwu ẹ neke che k’ẹdọ wẹ ki we ga efu uchẹnyọ ejẹ?
KỌCHẸ MANYU
G’ọna mẹlẹ k’ẹ neke j’uchẹnyọ lefu ed’ikadi k’a du dejudo jw.org chekwu.
Ujiwe Ọna K’a Neke D’ikadi K’a Du Dejudo JW.ORG Ñwu Onẹ (1:43)
Kọchẹ am’ali mẹlẹ ki ach’atẹko wẹ k’ẹ neke j’uchẹnyọ r’amonẹ.
“Ẹ Chẹ Mọla K’ẹ J’uchẹnyọ K’ẹ La F’amonẹ Ch’amakọchẹ Mẹ?” (Ọdọgọ Ide, September 2020)
G’alu k’ujiwe ẹnẹ ka efu Baibul neke ch’atẹko wẹ k’ẹ n’ẹdọ ẹgbo dagba k’ẹ ch’imọtọ abẹki ogijo.
G’alu k’ẹ neke ch’oluka Baibul kp’abo akwọra unyi wẹ ku ma ma kọchẹ lugbo Jihofa n.
“Ona K’a Neke Kọla Ki Atunyu Ẹdọ Am’efu Wa Ki Ma Ch’Amẹnibenu Jihofa N” (Ọdọgọ Ide, March 15, 2014)