UKỌCHẸ 45
Abu A Neke Du Ña Kaki Ọfẹ Ojanẹ Jihofa Kate Owñ A T’ọ Ubi?
Jisọs kọ amakọchẹ-wñ kakini ‘ẹtẹ ma ch’ilẹ-i n.’ (Jọn 15:19) E-lẹ che kakini Ojanẹ Ọjọ kate a tọ ubi-i, a n’ọwọ kpai ujabe manyu ogwu ef’ilẹ-i n. Ochochi i che kaki, i lọla k’onẹ ki we n’ọwọ ef’ujabe abẹki ogwu ef’ilẹ-i n. Amonẹ neke na k’alu nyu wa ọla todu k’a ma n’ọwọ efu amẹñwu-i n. Ọna ẹñwu a neke we n’ọwọ efu ujabe manyu ogwu, k’a la gwọnyu Jihofa kpaka?
1. Abu gọmẹti e-amonẹ dẹ eju Abo Kraist ochochi?
Abo Kraist ochochi a d’ojima ñwu abo gọmẹti. A ch’alu ki Jisọs ka, a la “k’ẹñwu e-Sisa ñwu Sisa”. E-lẹ che kakini a lebọ ọda ojanẹ dabu e-ki kọla lugbo ọkọ udu era. (Mark 12:17) Baibul kọ wa kaki Jihofa d’uña ñwu gọmẹti e-amonẹ todu ku ma n’ọda. (Abo Rom 13:1) E-lẹ du ña kaki i n’ugbo k’abo gọmẹti e-amonẹ n’ukpahiu abẹki ọda kade. Ojanẹ Ọjọ kate a kẹdọno kaki i neke d’amihianyi ka nẹ w’ukpoji.
2. Abu a neke du ña kaki Ojanẹ Ọjọ kate a t’ọ ubi?
Dabu Jisọs, a n’ọwọ kp’ujabe n. Ubi k’amonẹ li oka efu am’ukọlọ awuwu ki Jisọs che, ma che todu ku ma du j’onu ilẹ-i, ama Jisọs muda kọ. (Jọn 6:15) Ẹñwu chi ki Jisọs ma jẹ n? I kakini, “Ẹtẹ ọda Ojanẹ e-mi ch’ilẹ kidẹ n.” (Jọn 18:36) Todu k’a ch’abo Kraist ochochi, am’ọna wewe a neke du ña kaki Ojanẹ Ọjọ kate owñ at’ọ ubi. Dabu ujiwe, a cha lo t’oko ogwu n. (Gba Maika 4:3.) A d’ojima ñwu ẹñwu ki dago ñwu ojanẹ dabu agaliga, ama a muda rẹ ma n. (1 Jọn 5:21) A jẹ tu ẹnẹ du abẹki ipati duu ubi efu ujabe n, a la ch’ulaka ma n. Ef’amọna ki dẹ-i kpai am’ọna omunẹ, a du ña kakini a gwọnyu Ojanẹ Ọjọ kpaka.
N’UMA NYỌGBA
Kọchẹ lugbo am’uña ki neke jẹñwu gbiti ñwu wa k’a we n’ọwọ ef’ujabe kpai ogwu, k’ẹ la kọchẹ alu k’ẹ neke tu amẹñwu ki ajẹñwu ẹdọ Jihofa bọ.
3. Abo Kraist ochochi ch’ojoji ñwu abo ilẹ-i
Jisọs kpai amakọchẹ-wñ d’ujiwe tanẹ ñwu wa. Gba Abo Rom 13:5, 7 kpai 1 Pita 2:13, 14. Ubilẹ, g’IFIDIO-i ku mẹ ch’oluka oji am’ene-i.
Ẹñwu chi ki dukpẹ k’a d’ojima ñwu gọmẹti e-amonẹ?
Ẹñwu ch’amọna k’a neke du ña kaki a f’ọla wa kamuhitẹ ñwu abo gọmẹti?
Iko ku ma aj’ogwu ugbo ka, am’ojanẹ ka neke na ka kaki ma t’ọjanẹ duu ubi n, ama ma neke na d’ọkọ kp’amanẹ ogwu kpuchẹ r’abo ku ma j’ogwu lẹ. Abu a neke du ña kaki ochochi, a jẹ t’abo duu ubi n iko ogwu abẹki ujabe? Gba Jọn 17:16. Ubilẹ, g’IFIDIO-i ku mẹ ch’oluka oji ene-i.
Abu a neke du ña kaki ochochi, a jẹ t’abo duu ubi n iko ogwu abẹki ujabe?
Ichẹñwu k’abo gọmẹti ka ñwẹ k’ẹ chẹñwu ki ma jẹ kpai ẹñwu k’Ọjọ ka n, ẹñwu ẹ che? Gba Ẹwñ 5:28, 29. Ubilẹ, g’IFIDIO-i ku mẹ ch’oluka oji am’ene-i.
Ichẹñwu k’abo gọmẹti ka ñwu wa k’a chẹñwu ki ma jẹ kpai ọda Ọjọ n, ọda ẹnẹ i dukpẹ k’a lebọ?
Ẹ neke kpibe oji uña ki neke jẹñwu Ẹnẹ Kraist ki kọ elebọ ọda e-abo gọmẹti?
4. Na t’Ojanẹ Ọjọ ubi ef’ibe we kpai kp’ẹñwu duu k’ẹ che
Gba 1 Jọn 5:21. Ubilẹ, g’IFIDIO-i ku mẹ ch’oluka oji am’ene-i.
Efu ifidio-i, ẹñwu jẹñwu Ayenge kọ n’ọwọ ef’ujabe eche abẹki ed’ọwọ kad’oji ñwu agaliga?
Ẹ neju kaki ẹñwu k’Ayenge che-i che nyọ?
Ẹñwu ch’amuña omunẹ ki neke jẹñwu gbiti ñw’onẹ ki we n’ọwọ ef’ujabe? G’IFIDIO-i, ubilẹ mẹ ch’oluka oji am’ene-i.
Ichẹñwu k’a g’ispọtu k’amonẹ kw’ojanẹ ojoji ojoji abẹki ugbo ojoji ojoji ache, ẹñwu a neke che k’a we t’ojanẹ duu ubi?
Abu a neke du ña kaki a t’abo ujabe duu ubi n dagba k’a jile kwefu ẹñwu ku ma che abẹki i ad’ihianyi ñwu wa?
Abu am’inabali k’a gbọ kpai amonukwu wa neke jẹñwu ki gbiti ñwu wa k’a we n’ọwọ efu ọla ujabe?
Efu am’ọna ẹñwu i dukpẹ k’Ẹnẹ Kraist ki du ña kaki Ojanẹ Ọjọ kate i at’ọ ubi efu ẹdọ-wñ kp’ẹñwu ki ache?
ABO KA NEKE N’ENE: “Ẹñwu chi k’ẹ ma d’ọwọ kad’oji ñwu agaliga, k’ẹ ma la k’eli ojanẹ n?”
Abu ẹ dohi?
ẸY’ỌLA UKỌ-I
Abo Kraist ach’alu duu ku ma neke che ku ma we t’abo ujabe duu ubi ef’ẹdọ ma, ef’ẹñwu ku ma ka kpai am’uche ma.
Ẹñwu ẹ kọchẹ?
Ẹñwu i dukpẹ k’a du ñwu abo gọmẹti?
Ẹñwu chi k’a ma n’ọwọ ef’ujabe eche n?
Am’uña ẹñwu neke jẹñwu ki gbiti ñwu wa et’Ojanẹ Ọjọ kate ubi?
KỌCHẸ MANYU
Ẹñwu ch’amẹñwu ki dukpẹ k’a t’ọnọ tanẹ k’a we n’ọwọ ef’ọla ujabe kp’ogwu?
Ẹñwu abo akwọra unyi neke che ku ma mọla tanẹ ñwu ẹñwu ki neke jẹñwu gbiti ñwu ma et’Ojanẹ Ọjọ kate ubi?
Ẹñwu chi k’ejẹ t’ojanẹ ubi ma chẹñwu kate k’onẹ neke du dojima ñwu ojanẹ-wñ n?
Kọchẹ alu k’ẹ neke t’Ojanẹ Ọjọ kate ubi ichẹñwu k’ẹ tene tu ukọlọ k’ẹ che.