UKỌCHẸ 36

Na K’ochochi Efu Ẹñwu Duu

E-ku Ma Kọ Dufu

Ẹnẹ duu atene onukwu ki ak’ochochi. Jihofa onugo atene k’amonukwu-wñ ki na k’ochochi. Ama, i lọla n todu k’amonẹ wewe ef’ilẹ ma ch’ak ochochi n. Am’ile ẹñwu defu ek’ochochi efu ẹñwu duu?

1. Ẹñwu chi ki dukpẹ k’a na k’ochochi?

Ichẹñwu k’a k’ochochi kp’amonẹ, a du ña kakini a fẹdọ Jihofa, a la ad’ojima ñwu. Rewa kakini Jihofa che m’ẹñwu duu k’a kpibe oji-wñ kpai ẹñwu duu k’a che. (Abo Hibru 4:13) Jihofa ali wa ẹgba du k’a k’ochochi, e-lẹ la ajẹñwu ẹdọ-wñ ki bọ. Baibul kakini: “ẹnujulu chʼẹwñ ihiẹnẹ ugbo Jihofa, alu kʼofʼọla-wñ dẹ muda dʼugbo abo ku ma chẹwñ tʼeju-wñ.”—Ita Ita 3:32.

2. Am’ọna ẹñwu a neke na k’ochochi efu ẹñwu duu k’a che ọjo duu?

Jihofa atene ki “ẹnẹnẹnẹnẹ-wa ki na kʼochochi kpʼekeji-wñ.” (Zẹkaraya 8:16, 17) Ẹñwu ch’ofe ọla-i? Dagba k’a kọla kpai abo akwọra unyi wa, abo ukọlọ wa, amọmaye wa efu Ọndu abẹki abo gọmẹti, i dukpẹ k’a na r’ọlemi n abẹki ed’inabali ki ad’onẹ la n. Abo ki ak’ochochi ch’ajoji ẹñwu amonẹ n, ma la agb’ẹñwu onẹ jẹ ef’ugbeju n. (Gba Ita Ita 24:28 kpai Ẹfẹsọs 4:28.) Ma ñọ r’ọmẹ ọkọ udu ku ma dukpẹ era. (Abo Rom 13:5-7) Ichẹñwu k’a ch’amẹñwu-i k’a la ñọ k’ochochi efu amẹñwu omunẹ, e-lẹ du ña “k’a j’ach’ẹwñ ọmẹmẹlẹ du”, a la ak’ochochi efu ẹñwu duu.—Hibru 13:18.

3. Am’ile ẹñwu a nẹ ichẹñwu k’a k’ochochi iko duu?

Ichẹñwu k’amonẹ ma wa r’ẹnẹ ki ak’ochochi, a n’ojima eju amonẹ, ma la añọ kẹdọno wa. A jẹñwu urẹdọ ki dẹ efu ujeju abudọ dabu akwọra unyi ki ch’okate. Akonẹ ọla wa onugo agwunyu wa n. Ichẹñwu k’a k’ochochi, a du ña kakini a “ch’ọñwẹ ny’ukọ-ọla Ọjọ, Ẹnajadu wa,” a la atene k’amonẹ ku ma rẹ Jihofa.—Taitọs 2:10.

N’UMA NYỌGBA

K’a g’ẹñwu ki chi ki Jihofa atene k’ẹ na k’ochochi kpai am’ile k’ẹ nẹ ichẹñwu k’ẹ k’ochochi efu ẹñwu duu k’ẹ che.

4. Ek’ochochi ajẹñwu ẹdọ Jihofa bọ

Gba Eli Ekọ D’Ọjọ 44:21 kpai Malakai 3:16, ubilẹ mẹ ch’oluka oji am’ene-i:

Ẹñwu chi k’ekpibe kaki a neke d’ochochi maja ñw’Ọjọ ma nyọ n?
Abu ẹ neju kaki ẹdọ Ọjọ adẹ ichẹñwu k’a k’ochochi dagba ki chẹ gbiti ñwu wa?

Ọma kekele ka akọla kpai ata-wñ ki dọgba-wñ. Ọbiọlọ ki defu ikọpu ki d’oji tebulu mu dajanẹ iba-wñ. — Ichẹñwu k’amọma ak’ochochi, e-lẹ ajẹñwu ẹdọ ata kpai iye ma ki bọ. Ichẹñwu k’a k’ochochi, e-lẹ ajẹñwu ẹdọ Jihofa bọ

5. Na k’ochochi efu ẹñwu duu

Amonẹ wewe kakini i jẹ che k’onẹ ki na k’ochochi iko duu n. Ama, kọchẹ ẹñwu ki chi ki dukpẹ k’a na k’ochochi iko duu. G’IFIDIO-i.

IFIDIO: Ẹñwu Ajẹñwu Onẹ Ki N’uyọ?—Akonẹ Ọla Ọmẹmẹlẹ (2:32)

Ifoto kwefu ifidio ‘Ẹñwu Ajẹñwu Onẹ Ki N’uyọ?—Akonẹ Ọla Ọmẹmẹlẹ.’ Ubi ki Bẹn ka ñwu ẹnẹnyi-wñ kaki i kp’ẹñwu biẹ, ma d’ọwọ ñwu ọlama.

Gba Hibru 13:18, ubilẹ mẹ ch’oluka oji ọna k’a neke na k’ochochi . . .

kp’abo akwọra unyi wa.
ugbo k’a ch’ukọlọ abẹk iskul.
efu am’uña omunẹ.

6. A jile ichẹñwu k’a k’ochochi

Ikọ ka, i neke dab’ẹnẹ kaki ek’ochochi iko duu adu wa tefu akanya. Ama, i dẹ pẹẹ, a li kaki i n’ẹñwu duu ki nyọ t’ekochochi le n. Gba Eli Ekọ D’Ọjọ 34:12-16, ubilẹ mẹ ch’oluka oji ene-i:

Abu ek’ochochi ajẹñwu ẹ n’ọlai ọmẹmẹlẹ?

A. Ọkọ kp’ọya ka na ch’oluka iko ku ma añm’ọbiọlọ.

B. Ẹnẹnyi ukọlọ ka ajẹnyu ñwu ọma ukọlọ-wñ ugbo ku ma ach’ukọlọ.

A. Ichẹñwu k’ọkọ kp’ọya ak’ochochi ñw’ọlama, e-lẹ ajẹñwu agbade ma ki chẹ lonyanẹ
B. Ichẹñwu k’amonẹ ak’ochochi ugbo ku ma ach’ukọlọ, e-lẹ ajẹñwu ẹnẹnyi ma ki kẹdọno ma
CH. Ochochi eka ajẹñwu amọma anẹ n’odu ọmẹmẹlẹ ugbo abo gọmẹti

ABO KA KAKINI: “I biẹnẹ er’ọlemi ree n.”