UKỌCHẸ 39
Ọna K’ẹbiẹ Dẹ Eju Ọjọ
Ẹbiẹ chẹñwu ogbogaga. I ma che todu ẹbiẹ n, ẹnẹ du wa neke deju n. Todu ki che Jihofa nyi wa, owñ n’ọda ki ka ñwu wa ọna ki dukpẹ k’a d’ẹbiẹ chekwu le. Ẹñwu Jihofa ka lugbo ẹbiẹ? A neke jẹ ẹbiẹ abẹki egba? Abu ẹ neke tu ẹñwu ọmẹmẹlẹ oji ọla-i?
1. Abu ẹbiẹ dẹ eju Jihofa?
Jihofa ka ñwu abo-wñ kakini: “I ch’e-iñmi ọrẹla du, ẹbiẹ-wñ ch’iñmi-wñ.” (Abo Lifai 17:14) Eju Jihofa, ẹbiẹ dago ñwu iñmi. Dabalu k’iñmi ch’ele ogbogaga ki kw’ugbo Ọjọ, abalẹ ẹbiẹ ch’ogbogaga gẹ.
2. Ọda ẹñwu Ọjọ du tanẹ lugbo ẹbiẹ?
Jihofa ka ñwu abo-wñ ku ma ki jẹ ẹbiẹ n. (Gba Abakwanẹ 9:4 kpai Abo Lifai 17:10.) Jihofa ñọ jẹñwu uchẹ adejutukọlọ ka ñwu Abo Kraist ejodudu kaki ma “ki himama . . . ẹbiẹ.”—Gba Ẹwñ 15:28, 29.
Ẹñwu ch’ofe k’onẹ ki himama ẹbiẹ? Ichẹñwu ki dọktọ ka ñwẹ kaki ẹ we m’ọtẹ, ẹ lebọ ẹñwu ki ka. Ama, ẹ j’ujẹñwu k’ọtẹ defu ñwu abẹki egb’ọtẹ ny’ọla dabu omi-ọla? Ọda! Ẹ na ch’abalẹ n. Abalẹ gẹ, ọda ki Jihofa du ñwu wa lugbo ehimama ẹbiẹ jẹñwu wa ma kaki a ki ñm’ẹbiẹ n, a ki la j’ẹla ku ma kpa okutulu n. A ki ñọ j’ujẹñwu k’ẹbiẹ defu-wñ n.
Ẹñwu ch’ibe wẹ lugbo ed’ẹbiẹ chekwu ichẹñwu ku ma ch’ọga onẹ kpa? I che n’amọna ku ma du chekwu ki ma jẹ kpai ọda Ọjọ n. Dabu egb’odukulu ẹbiẹ abẹki am’ukpẹ ẹbiẹ mẹlẹ ki che isẹl ekpikpa, isẹl efufu, isẹl ad’ẹbiẹ dago kpai isẹl omi ẹbiẹ. I n’amọna omunẹ ku ma neke ch’ọga onẹ kpa k’ọda Ojọ ma kọla oji-wñ n. K’a g’ujiwe, i n’amọna ku ma ch’ọga amonẹ kpa ku ma d’amukpẹ kekele kwefu am’ukpẹru ẹbiẹ chekwu. I n’amọna omunẹ ku ma neke d’onugo ẹbiẹ ẹnẹ lẹ chekwu. Ichẹñwu k’a defu uña ki dẹ, ẹnẹnẹnẹnẹ wa atu ẹñwu ki ache kp’ọla-wñ.a—Abo Galatia 6:5.
N’UMA NYỌGBA
G’alu k’ẹ neke tu ẹñwu ọmẹmẹlẹ k’ẹ che lugbo ed’ẹbiẹ chekwu iko k’ẹ ch’ọga.
3. Tu ẹñwu ọmẹmẹlẹ ki ajẹñwu ẹdọ Jihofa bọ lugbo ogwu ọga egba
Abu a neke tu ẹñwu ọmẹmẹlẹ lugbo ogwu egba ki ajẹ kpai ọna k’ẹbiẹ dẹ eju Ọjọ? G’IFIDIO-i, ubilẹ g’ẹñwu ki chi ki chẹñwu ogbogaga k’ẹ ch’amẹñwu ki d’ọganẹ-i.
Ch’adua ki Jihofa ki d’ibe ñwẹ.—Jemis 1:5.
Gw’ẹtẹ am’ọla-ukọ kpai ọna k’ẹ neke du chekwu le.—Ita Ita 13:16.
Tejanẹ am’ọna ojoji ojoji ku ma d’ogwu ñwu ẹnẹ ki ach’ọga ogbegbele wẹ.
Ja k’ẹ m’ọla ogwu ọga k’ẹ ma na gba n.
Tu ẹñwu ki ma jẹñwu akonẹ-ọla wẹ ki kp’ẹ abi n.—Ẹwñ 24:16.b
K’ẹ ma kakini i n’ẹnẹ du ki neke ka ñwẹ ẹñwu ki dukpẹ k’ẹ tu n ichẹñwu ki lugbo akonẹ-ọla wẹ, dagba ki ch’ọkọ abẹki ọya wẹ, abogijo abẹki ẹnẹ ki ach’ukọchẹ Baibul kp’uwẹ. Ma neke ka ñwẹ ẹñwu k’ẹ che n.—Abo Rom 14:12.
F’ẹñwu k’ẹ tu kọ tanẹ todu k’abomunẹ ki neke n’uma-wñ.
4. Amẹnibenu Jihofa añeju ọna ọga eche kpa ki nyọ tule
I jẹ che k’a leb’ọda Jihofa lugbo ẹbiẹ, k’a la ñọ gb’ogwu ọmẹmẹlẹ ku ma ma na d’ẹbiẹ ñwu wa n. G’IFIDIO-i.
Gba Taitọs 3:2, ubilẹ mẹ ch’oluka oji ene-i:
I dukpẹ k’a na k’ọla yẹẹ ka la ñọ d’ojima ñwu am’idọktọ ichẹñwu k’a k’ọla ñwu ma? Ẹñwu chi k’ẹ kabalẹ?
E-ki ma dukpẹ k’a gba n |
E-k’ẹnẹnẹnẹnẹ wa atu ichẹñwu ki agba |
|---|---|
A. Isẹl omi ẹbiẹ. |
Am’ukpẹ kekele kwefu isẹl omi ẹbiẹ |
B. Isẹl efufu. |
Am’ukpẹ kekele kwefu isẹl efufu |
CH. Isẹl ad’ẹbiẹ dago. |
Am’ukpẹ kekele kwefu isẹl ad’ẹbiẹ dago |
D. Isẹl ekpikpa. |
Am’ukpẹ kekele kwefu isẹl ekpikpa |
5. Ẹñwu ki dukpẹ k’ẹ che ichẹñwu k’ẹ tene ku ma d’amukpẹ ẹbiẹ kekele ch’ọga wẹ kpa
Ukpẹ ẹbiẹ ch’ẹlẹ i che—isẹl ekpikpa, isẹl efufu, isẹl ad’ẹbiẹ dago kpai isẹl omi ẹbiẹ. Am’ukpẹ ẹbiẹ mẹlẹ-i che n’amukpẹ omunẹ ku ma dọ k’amukpẹ ẹbiẹ kekele.c Ma ad’amukpẹ ẹbiẹ kekele omunẹ ch’amogwu k’a du chekwu kpai e-ki ajẹñwu agbe ki agb’ẹbiẹ ki dago.
Ichẹñwu ki ch’amukpẹ ẹbiẹ kekele, Ẹnẹ Kraist duu atu ẹñwu ki ache kp’ọla-wñ dabalu ki du Baibul kọ akonẹ-ọla-wñ le. Abo ka neke kakini ma gba ogwu ọga du ki n’ọwọ kpai ukpẹ ẹbiẹ kekele n. Abomunẹ neke kakini akonẹ-ọla ma chẹ jẹ ku ma gb’amukpẹ ẹbiẹ kekele.
Ichẹñwu k’ẹ tu ẹñwu du k’ẹ che, kpibe oji ene-i:
Abu u neke kanẹreju ñwu dọktọ ẹñwu ki chi ku na gba abẹki e-kọ gba am’ukpẹ ẹbiẹ kekele?
ABO KA NEKE N’ENE: “Ẹñwu biẹnẹ efu ẹbiẹ egba?”
Ẹñwu ch’ibe wẹ?
ẸY’ỌLA UKỌ-I
Jihofa atene k’a li ẹbiẹ dabu ẹñwu ki afọ.
Ẹñwu ẹ kọchẹ?
Ẹñwu chi k’ẹbiẹ chẹñwu ogbogaga eju Jihofa?
Ẹñwu jẹñwu wa ma kaki ọda ki Jihofa du ñwu wa k’a ki himama ẹbiẹ akọla lugbo ẹbiẹ egba onugo?
Abu ẹ neke tu ẹñwu ọmẹmẹlẹ lugbo ogwu ki n’ọwọ kpai ẹbiẹ?
KỌCHẸ MANYU
Ẹñwu i dukpẹ k’ẹ kpibe oji-wñ tak’ẹ tu ichẹñwu k’ẹ gb’ogwu ọga ki n’ọwọ kpai ẹbiẹ onugo wẹ abẹki ichẹñwu k’ẹ ma gba n?
“Ene Kwugbo Abo Ku Ma Agb’ọtakada Wa” (Ọdọgọ Ide, October 15, 2000)
Ẹñwu i dukpẹ k’ẹ kpibe oji-wñ iko k’ẹ tu ichẹñwu k’ẹ gb’amukpẹ ẹbiẹ kekele abẹki ẹ gba n?
“Ene Kwugbo Abo Ku Ma Agb’ọtakada Wa” (Ọdọgọ Ide, June 15, 2004)
Ẹñwu jẹñwu dọktọ ka ki jẹ kakini ẹñwu ki Jihofa ka lugbo ẹbiẹ ch’ochochi?
“U Jẹ kpai Ẹñwu K’Ọjọ Ka Lugbo Ẹbiẹ” (Awake!, December 8, 2003)
Kọchẹ ọna k’abojigo ku ma defu Ikọmiti Akpalo Kp’Achibiti (HLC) ach’atẹko amọmaye ma ẹnẹkẹlẹ kpai onobulẹ.
a G’ukọchẹ 35, “Ọna K’a Neke Tu Ẹñwu Ọmẹmẹlẹ K’a Che.”
b G’ọgba 5, “Ẹñwu ki dukpẹ k’ẹ che ichẹñwu k’ẹ tene ku ma d’amukpẹ ẹbiẹ kekele ch’ọga wẹ kpa,” kpai Akanẹreju 3 Ki D’ukpoji Ọtakada-i, “Ọna Ọga Eche Kpa Ku Ma D’ẹbiẹ Chekwu.”
c Uchẹ ka ef’abo dọktọ ag’amukpẹ ẹbiẹ dabu am’ukpẹ ẹbiẹ kekele kekele. Todulẹ jẹñwu dọktọ wẹ ki m’ibe wẹ lugbo ẹñwu k’ẹ tu kaki ẹ gb’odukulu ẹbiẹ n abẹki am’ukpẹ ẹbiẹ ki che isẹl ekpikpa, isẹl efufu, isẹl ad’ẹbiẹ dago abẹki isẹl omi ẹbiẹ.