UKỌCHẸ 51

Abu Ẹ Neke Jẹñwu Ẹdọ Jihofa Bọ Lefu Ọla K’ẹ Ka Kp’amonẹ?

E-ku Ma Kọ Dufu

Ẹgba ki Jihofa nyi wa, i d’ele ọmẹmẹlẹ ka ñwu wa. Ele lẹ ch’ọna k’a neke na kọla. Ọna k’a d’ele-i chekwu le chẹñwu ogbogaga ñwu Jihofa? Eee, i chẹñwu ogbogaga ñwu! (Gba Jemis 1:26.) Todulẹ, abu a neke d’ele-i chekwu l’ọna ki ajẹñwu ẹdọ Jihofa bọ?

1. Abu a neke d’ele ọla eka chekwu le?

Baibul ka ñwu wa kakini: “Mẹ ki d’ugbẹdọ ñwu omunẹ, ku mẹ ne omunẹ nyọgba.” (1 Abo Tẹsẹlonaika 5:11) Ẹ neke kpibe lugbo abo ka k’ẹ neke d’ugbẹdọ ñwu? Ẹñwu ẹ neke che todu k’ẹdọ ẹnẹ lẹ ki wanẹ? Jẹñwu ma ma kaki ẹ kwula ñwu ma. Ẹ neke ka ñwu ma ẹñwu k’ẹ ñeju lugbo ma. Ẹ neke kpibe lugbo ọgba Baibul ka k’ẹ neke du d’ugbẹdọ ñwu ma? Am’ọgba k’ẹ neke du chekwu che wewe. Rewa kaki ọna k’ẹ kọla le neke ñọ d’ugbẹdọ ñw’onẹ. Todulẹ, na ch’alu du k’ẹ neke che k’ẹ na kọla yọọ ñwu abomunẹ.—Ita Ita 15:1.

2. Ọla am’ọla ẹñwu ma dukpẹ k’a na ka n?

Baibul kakini: “Ọla ẹfulẹfu du ki na we edufu alu-mẹ.” (Gba Abo Ẹfẹsọs 4:29.) E-lẹ che kaki a kọla ẹbiẹnẹ n, a kọla gwunyu onẹ n abẹki eg’onẹ ẹbọ n. A ch’ẹkpabiẹ onẹ n, a la ñọ bulumọnẹ n.—Gba Ita Ita 16:28.

3. Ẹñwu ach’atẹko wa k’a na kọla lọna ki ad’ugbẹdọ ñwu onẹ?

Ojile amẹñwu k’a ka ad’ẹñwu ki d’ẹdọ wa ña kpai ọna kọla dẹ ọla wa. (Luku 6:45) Todulẹ, i dukpẹ k’a kọ ọla wa k’a neke na kpibe ọmẹmẹlẹ iko duu dabu ẹñwu du ki ch’ọkpakpa, ẹñwu ki dẹ yala, ẹñwu du ki ch’alifia kpai ẹñwu du ku ma ñwulọ-wñ. (Abo Filipai 4:8) K’a neke d’ibe t’amẹñwu-i, i dukpẹ k’a d’ibe tu amẹñwu k’a du yaju kpai amonukwu wa nyọnyọ. (Ita Ita 13:20) I añọ ch’atẹko wa k’a neke kpibe lugbo ẹñwu k’a ka kpai ọna k’a ka le taki a kọla. Todulẹ, idukpẹ k’a kpibe alu kọla wa adẹ ọla abomunẹ. Baibul kakini: “I n’ẹnẹ ki at’ọfa alu ki dabẹnẹ k’ọkwọchageli ki agwunyu onẹ, ukpalu anibe muda an’ọlafia wa.”—Ita Ita 12:18.

N’UMA NYỌGBA

Kọchẹ ọna k’ẹ neke na kọla ki ajẹñwu ẹdọ Jihofa bọ kpai ọna ki ad’ugbẹdọ ñwu abomunẹ.

4. Na kpibe tak ẹ kọla

Ọgbọ wa n’iko k’a kọla k’a dabi kp’ọla wa abi todu ẹñwu k’a ka. (Jemis 3:2) Gba Abo Galatia 5:22, 23, ubilẹ mẹ ch’oluka oji am’ene-i:

Efu am’ali ki dẹ-i, ali ẹñwu ẹ neke ch’adua r’Ọjọ ki du ñwẹ todu k’ẹ neke na d’ibe kọla? Abu am’ali ki dẹ-i neke ch’atẹko wẹ le?

Gba 1 Abo Kọrint 15:33, ubilẹ mẹ ch’oluka oji ene-i:

Abu amẹñwu k’a du yaju kpai abo k’a dẹ kp’ama iko duu neke jẹñwu ọla k’a ka ki dẹ?

Am’ifoto: Amẹñwu ki ajẹñwu ọkọ ki na kọla kp’ẹdọfulu ñwu ọya-wñ. 1. I agb’eli olo. 2. I na g’ifidio uja kpai onukwu-wñ. — Ẹñwu neke jẹñwu am’ọla wa k’a ka ki nyọ abẹki ki biẹnẹ?

Am’ifoto: Amẹñwu ki ajẹñwu ọkọ lẹ ki na kọla yọọ kp’ọya-wñ. 1. I agba Baibul. 2. Owñ lẹ kp’ọya-wñ ach’oluka kpai onukwu ma ka ef’Unyi Ujeju. — Ẹñwu neke jẹñwu am’ọla wa k’a ka ki nyọ abẹki ki biẹnẹ?

Gba Akọla ñw Ujeju 3:1, 7, ubilẹ mẹ ch’oluka oji ene-i:

Iko ẹñwu i neke nyọ k’a we kọla abẹki enede iko ọmẹmẹlẹ tak a kọla?

5. Na kọla ẹnyọ lugbo abomunẹ

Abu a neke dide ọla wa k’a we na b’amonẹ ina abẹki ekọla ki ma nyọ n? G’IFIDIO-i, ubilẹ mẹ ch’oluka oji am’ene-i.

IFIDIO: Na Kọla “Ki Nyọ Ki An’onẹ Nyọgba” (4:07)

Efu ifidio-i, ẹñwu chi k’ọmaye ẹnẹkẹlẹ-i atene ki ch’arida ọna ki akọla lugbo abomunẹ?
Ẹñwu i che todu ki neke rida?

Gba Akọla ñw Ujeju 7:16, ubilẹ mẹ ch’oluka oji ene-i:

Ẹñwu dukpẹ k’a rewa ichẹñwu ki w’ibe wa k’a kọla ẹbiẹnẹ lugbo abomunẹ?

Gba Akọla ñw Ujeju 7:21, 22, ubilẹ mẹ ch’oluka oji ene-i:

Abu ọgba Baibul-i neke ch’atẹko wẹ k’ẹ we w’ẹdọ ololo ichẹñwu k’onẹ kọla ẹbiẹnẹ lugbo wẹ?

6. Na hiẹdọ wanẹ ichẹñwu k’ẹ kọla kp’abo akwọra unyi wẹ

Jihofa atene k’a na hiẹdọ wanẹ, k’a la na kọla kp’ufẹdọ ichẹñwu k’a kọla kp’abo akwọra unyi wa. G’IFIDIO-i, ubilẹ mẹ ch’oluka oji ene-i.

IFIDIO: Ufẹdọ Kpai Ojima Ajẹñwu Abo Akwọra Unyi Ki Ch’oka (3:08)

Ẹñwu neke ch’atẹko wẹ k’ẹ na hiẹdọ wanẹ ichẹñwu k’ẹ kọla kp’abo akwọra unyi wẹ?

Gba Abo Ẹfẹsọs 4:31, 32, ubilẹ mẹ ch’oluka oji ene-i:

Abu ẹ neke kọla ọmẹmẹlẹ ki ajẹñwu ẹdọ abo akwọra unyi wẹ ki bọ?

Jihofa k’alu k’ẹdọ-wñ dẹ lugbo ọma-wñ Jisọs. Gba Matiu 17:5, ubilẹ mẹ ch’oluka oji ene-i:

Abu ẹ neke ch’awọli Jihofa ichẹñwu k’ẹ kọla kp’abo akwọra unyi wẹ?

Iye ka ajẹnyu ñw’ọma-wñ ubi ki da amẹñwu tanẹ ef’ọtakada. — Tene uña k’ẹ neke ka ñwu amonẹ ẹñwu k’ẹ ñeju lugbo ma

ABO KA KAKINI: “Alu kọla dẹ ibe mi na ka. Ọwọ mi dọ ñwu ẹñwu k’abomunẹ aka n.”

Ẹ neju kaki abalẹ i dukpẹ ki dẹ? Ẹñwu chi k’ẹ kabalẹ?

ẸY’ỌLA UKỌ-I

Am’ọla k’a ka che n’ukpahiu, i neke ch’atẹko amonẹ abẹki ekp’amonẹ ẹdọ biẹ. Todulẹ, i dukpẹ k’a na kpibe nyọnyọ lugbo ẹñwu k’a tene ka, iko ki dukpẹ k’a ka kpai alu k’a ka le.

Ẹñwu ẹ kọchẹ?

Ẹñwu ch’amọna k’ẹ neke d’ukọla wẹ ch’atẹko abomunẹ?
Ọla am’ọla ẹñwu ma dukpẹ k’ẹ na ka n?
Ẹñwu neke ch’atẹko wa k’a na hiẹdọ wanẹ kọla, k’a la na kọla ki ad’ugbẹdọ ñwu abomunẹ iko duu?

Ọjọ ku kpoji ukọchẹ-i:

Ẹñwu k’ẹ neke che

Efu aladi-i, ch’alu du k’ẹ neke che k’ẹ ka ñwu ẹnẹ ka efu akwọra unyi wẹ abẹki ef’ujeju abudọ ẹñwu k’ẹ ñeju lugbo-wñ.

Ẹñwu omunẹ ki d’ẹ ẹdọ k’ẹ che:

Ẹñwu omunẹ ki d’ẹ ẹdọ k’ẹ che

KỌCHẸ MANYU

Ẹñwu neke ch’atẹko wa k’a kọla ki ad’ugbẹdọ ñwu abomunẹ?

Ch’alu Du K’ẹ Neke Che K’ẹ N’ukpalu Anibe (8:04)

Kọchẹ ẹñwu ki neke ch’atẹko wẹ k’ẹ we na kọla ẹbiẹnẹ.

“Ẹbọ Egọ Chẹñwu Ẹbiẹnẹ?” (I dẹ jw.org)

G’ẹñwu ki neke ch’atẹko wẹ k’ẹ we ñwa tefu ọlọ ẹbiẹnẹ erọ lugbo abomunẹ.

Abu U Neke Che Ku We Ech’ukpalu? (2:36)

G’alu ki Jihofa ch’atẹko ẹnẹkẹlẹ ka ki añeju ki na g’amonẹ ẹbọ nyọnyọ todu ki f’ọwọ no.

“U Chanẹ Ekpibe Nyonyo Alu K’ọlai Mi Ana Dẹ Ejọgba” (Ọdọgọ Ide, August 1, 2013)