KỊMỊSẸ LAA BII A PAAEMI KẸSỊ BIIBỊBỊ

Mary mọ á yei, John mọ,a Philippine ibe duo booemi kịmịama biin emi yọ ka egberigbaa fịrị wẹnịmịnị. COVID-19 dọọn paa ifiemị, Mary Bible egberigbaa akị ánị ibe ma emi kịmịbo bẹtịbị pịrịgha anịa ámịnị egberigbaa zịnị ibe emi otu kpọ pịrịmị. Ámịnị tebara ka kị bịsẹ bara mịẹ ma o?

Mary ánị Bible tolumọmịnị otubo biimịnị, “Bible tolumọ dịsẹnana wẹrịemi kịmị á mọ nimi wẹrịemi a?” Emi gbaadaba, ámịnị bịsẹ kịmịbo mọ ẹrẹ dọụmịnị bara gbaamịnị. Mị biibịbịbo biimịnị yọmị ebi arereama mịẹpaamịnị. Tetuu a o? Tuubị Ọkpọnanaowei egberi tolumọdẹ kịmịbo ánị tolumodẹ yebo gbaa ánị warịbolou otu mọ bá ikie-otu mọ pịrịmịnị. Mị biibịbị biimịnị yọmị te arereama kị mịẹpaamọdẹ a o?

Mary mọ Bible tolumọ timi araụ Jasmin zịnị nia Bible tolumọ dọụmịnị otuama kpọ tịịn bo Mary mọ Bible tolumọmị. Kẹnị-ụbọ, Kristine, ámịnị tolumọ yemị dịsẹnana kụrọmọ duonị, Mary week bị maá seri kọn á mọ mó Bible tolumọ bara gbaamị. Zịnị Bible tolumọ dịsẹnana wẹrịemi kịmị ị́ mọ nimi wẹrịemi a bara Mary mọ kọn Kristine biimị, “Á gbaa amọ emi, Ịmịnị ine ikie-otubo kọn ị́ dịamịnị.” Zụa weekama bụọmị, Kristine ánị nia Bible tolumọ dịsẹnana wẹrịemi ikie-otubo kọn Mary dịamị. Tuu ifiemị, Kristine zịnị ikie-otuama tịịn, bịsẹ ikie-otubo kpọ zịnị tolumọ dịsẹnana wẹrịemi ikie-otuama tịịn bọmị.

Kristine ánị Philippine emi bịnaotubo kpọ Bible tolumọmụ bara dọụmị,anịduonị amịnị ánị tọbọụma Andrea biimị. Bọlọụ ifiebị, Andrea, ‘Jehovah Iseriotu sei-ogbo emi otuama, peibolou kpọ kọn Jesus a nanagha, bá Old Testament Bible gbaa egberi bẹtịbị kị peimịnị bara kị iroro timimị.’ Kẹnị ifie bẹtịbị kị á mọ akị Bible tolumọ wẹrị, ánị iroro timi yebosẹ deimị. A tolumọ timi ifiebị, ámịnị angọ duosụọ bara gbaamịnị, “Bible kị gbaa wẹrịemisẹ, kịrịị emi!”

Ifie dọlọ bụọbị, Andrea á mọ mọ́ kẹnịyọ fịrị wẹnịmịnị maá otuama kpọ tịịn bo Mary dịawẹrị Bible tolumọmị. Mary Andrea mọ Bible tolumọmịnị ifiesẹ, Andrea daụ tu-araụ Angela kpọ á peimịnị bara Mary mọ nimigha. Angel tọrụbaan emi. Kẹnị erein Angela, Mary á mọ mọ́ laa Bible tolumọ a paaemi a bara akị Andrea biimị. Angela ánị tolumọmịnị yebo dịsẹ kụrọmọmị. Kẹnị agonowei ovurumị ámịnị biin Bible yọama akị anị tibimị atụadẹ bá nia ifie akị week bolouma tolumọ dọụmị! Andrea baratụa á pịrịwẹrị koro zoom duo yetolumọyọ ma egberi peimịnị.

Mary Kristine tolumọmịnị ifiesẹ, Kristine yei Joshua kpọ naịnyọ a tịtẹ timi peimịnị, ị́ tolumọ dịsẹ-emi a bara Mary mọ akị ụ biimị. Joshua parụmị, “Ị́ timi á peimịnị, anịa biibịbị akị ị bii kụmọ; ye ị biibada, ịmịnị wẹnị serimịnị.” Sọnran minute bẹtịbị tolumọbị, ómiṇị kị biibịbị bii Kristine kpọ dẹịnmị bá tolumọ bọlọụ amú dịsẹ kpọ nanamị.

Mary biibịbị mị biin Bible tolumọ otuama mịẹpaamọmị. Mary a mọ mọ́ Bible tolumọmịnị otubo dịẹ zịnị bịna-otuama kpọ pịrịwẹrị tolumọ bọlọụ amúmị. Mary, nia ibe-ama 28 kịmịama mọ Bible tolumọmị.

Jasmin, bọlọụ Mary mọ Bible tolumọ araụma, April 2021 ka benibilemị. Kristine May 2022 benibile wẹrị waị Philippines amúmị. Kristine tịịn bo Mary mọ Bible tolumọ maá kịmịama kpọ benibiledẹ. Zụa agọnọwei-ama bụọbị Angela benibile wẹrị beinmọ beinmọ beinmọ ụwọụpẹlẹ fịrị kị wẹnịmịnị. Kristine yei Joshua mọ bá ánị tọbọụma Andrea mọ, bá zịnị otuama mọ tẹmẹanga bọọ bọlọụ bụọmịnị.

Bọlọụ kụraị sọransii ifiemị, ebiegberi naádẹ kịmịbo ánị naá egberibo gbaa ánị warị-otu bá ikie-otubo mọ pịrị timimị. (John 1:41, 42a; Acts 10:24, 27, 48; 16:25-33) Ị́mịnị kpọ “Zịnị Bible tolumọ dịsẹnana wẹrịemi kịmị ị́ mọ nimi wẹrịemi a?” biibịbị akị ị́ mọ mọ́ Bible tolumọmịnị kịmị bá zịnị dịsẹnana wẹrịemi kịmịama bii a paaemi. Mị biibịbịmị ị́ mọ biidaba kaanghaba baratụa ị́ pịrịwẹrị biin Bible tolumọ dịsẹnana wẹrịemi kịmịama ẹrịwẹrị á mọ mọ́ Bịble tolumọ a paaemi.