Jehovah Baratụa Wo Pịrịwẹrị Wo Múdẹ Yọsẹ Pọwẹị Nanamị

Bei taa mọ yei mọ otubo 1979 Gilead School amúmị, bá á “fịrịmọ biin ibe-ama ka mú egberigbaa fịrị wẹnịmị,” gbaamaba, Iran, Mauritius, Myanmar, Tanzania, Uganda, bá Zaire. Jack Redford kị Gilead School mị a tolumọ owei. Ámịnị Jehovah ogbo duo aya wẹnị fịrị nanadẹ ifiesẹ, Jack gbaa egberi kị baratụa á pịrịwẹrị á laadẹ fịrịsẹ wẹnịmị. Ámịnị wẹrị paabara gbaa wo pịrị.

Mats, ị́ mịẹ timi gesii nimi bara ma tuugbaa wo pịrị.

Mats: World War II omịnị Poland ibe ka inyenrin timimi, Catholic Church mị ekpe egberiama kị gbaamịnị bara ị daụ mọ ẹrịmị. Mọabịkpọ, “gesii kọkọ yọ emi bara ómịnị mọ gbaa timimi!” Ifie bụọbị, Ịmịnị kọkọ gesii mị ẹrịmị. Ịmịnị kịmịotu goo bụọmọdẹ fun-ama fẹị goo timimị. Kẹnị fun, akpakpamị blue color ka kị mịẹ wẹrịemi, ẹrẹmị The Truth That Leads to Eternal Life. Bei funmị ị dịsẹ kụrọmọmị, ịmịnị fun fẹị baị dein kị ụ goosiinmị. Pekei laamị, Ịmịnị gesii dọụ ẹrịdẹ bara nimimị!

April 1972 duobosẹ, Ịmịnị Jehovah Iseriotu funbo biin yaị kị goodẹ bá bịsẹ funbo Bible gbelemọ bịibịbịama parụ ị pịrịdẹ. Ịmịnị Jesus gbaa tubo tụaowei kabụma emi owei bara kị paamị, ómịnị yelaa yebi ẹrị ifiemị, wó nana wẹrịemi yebo yẹrịwẹrị ụ fẹịmị. Ịmịnị opu school amú wẹrị dọọnzụọ owei a paamọ iroro “yẹrịwẹrị”, ine dọụ ẹrịdẹ “yelaa” gesii kị fẹịmị. (Matt. 13:​45, 46) Ịmịnị December 10, 1972 kọọ benibilemị.

Bịsẹ kụraị ovurumị, ị daụ mọ ine tuuyaịbo mọ gesii kẹrịakịwẹrị benibilemị. July 1973, ịmịnị beinmọ beinmọ ụwọụpẹlẹ fịrị wẹnịmị. Bịsẹ ifiemị angọtụa egberigbaa bá tẹmẹ-anga yeama dịsẹ nana wẹrịemi bịnaraụ wo itu ma timimi, ánị ẹrẹmị Ann-Catrin. Omịnị zọzọ tarị kụrọmọ duonị 1975 kụraịmị zọzọ nanamị, omịnị barịị nia kụraịbo kọn Sweden ibe mị Strömsund timimịnị ebi ama nẹ, kịmịotu egberi bọọ dịsẹ nana wẹrịemi ama ka egberigbaa fịrị wẹnịmị.

Ann-Catrin: Ị daụ Stockholm university amú timi famụ ifie kị gesii tolumọmị. Bịsẹ ifiemị ị ziiwẹrị tara agọnọwei kụmọ baịdẹ kpọ, ómịnị ị kọn ye tolumọyọ bá egberigbaayọ kpọ amú timimị. Bịsẹ ifiemị ị yin gesii tarịgha duonị Jehovah Iseriotu gbaaseimọ timimị. Anịa timi kẹnị ifie laamị a kpọ benibilemị. Ịmịnị 13 years ka timi benibilemị, bá timi 16 years laamị, Ịmịnị ụwọụpẹlẹ fịrịwẹnịmị. Omịnị Umeå, egberigbaa otu dọụ wẹrịemi yọ amú egberi gbaamịnị ifie kị, Ịmịnị special pioneer a paamị.

Ịmọ Mats mọ zọzọ nanabị, omịnị baratụa biin kịmịama pịrịwẹrị bo gesii nimi yọbị wo mịẹ pọweị nanamị. Maivor kpọ kẹnị ụbọ ẹrẹ, amịnị kala eretọbọụ, sports tarị faa k’emi, amịnị bịsẹ tarị wẹrịemi sports ma barasiin wẹrị ine tuu-araụ mọ ụwọụpẹlẹ fịrịwẹnịmị. Ánị maa kịmị 1984 mị Gilead school duo paa wẹrị Ecuador ibe bọọ missionary fịrịwẹnịmị.

Iné missionary fịrịmị, ị́mịnị tebara ka kị “ị́ gboro wẹrịemi yọma sọụpaa” tolumọye dimịẹ ma o?

Mats: Jehovah ogbomị biin ifieama wo fịrịmọ aya yọ amú egberigbaa fịrị wẹnịmị. Anịa omịnị angọtụa Jesus angọ-iyerimọ inyenrinbụọ mọ, bá zịnị ebi inyenrinbụọ-ama mọ dimịẹ yọ kpọ baratụa wo pịrịmị. (Col. 2:​6, 7) Gbaamaba, omịnị itu bọọ emi bịnaotubo dịnẹmọ wẹrị wo dọụbara mịẹmụ yọ dii a, omịnị kị á duo zụa yeama mịẹmịnị tuu tolumọmị. Omịnị ánị ye iroromịnị bara mọ, ama bọọ ye mịẹmịnị bara mọ sụọtuu nimi dọụmị. Omịnị Jesus dimịẹmịnị bị, omịnị bo “beni-aka gboro wẹrịemi tịn bara k’emi” múdẹ yọsẹ sọụpaamịnị.—Ps. 1:​2, 3.

Ann-Catrin: Ị́mịnị waị tịn gboro wẹrị sọụ dọụmịnị aba, ụraụ kpọ dọụ wẹrịemi. Jehovah ifiebosẹ “ụraụ” ka paa wo pịrịmị. (Ps. 84:11) Jehovah tarịnana zụzụ bịnaowei-ama mọ bá bịnaere-ama mịẹpaamọ wo pịrịmị. Gbaamaba, Iran ibemị wo emi Tehran tịịnmịnị kala itumị, Bible ma gbaa wẹrịemi igeni kẹrịakị inyenrinbụọ mị wo mọ ẹrịmị. Omịnị Iran a timi dịsẹmị, anịa timi July 1980 laabị, Jehovah Iseriotu baa bịsẹ yọ ma egberigbaa kụmọ oloko ámọ tụamị, omịnị ama duo seri bara gbaamị, ámịnị 48 hours bẹtịbị ka kị wo pịrịmị. Ogbomị wo fịrịmọ Zaire, Africa k’emi ibe amúmị (Mị tịẹkirimị Congo ka kị ibe tịịnmịnị).

Ịmịnị bọlọụ omịnị Africa ka múmịnị bara naa ifiemị, youmị. Africa sei yeama, bá dọọn-ama kpọ emibara ịmọ naamịnị duonị ịmịnị malafamị. Anịa Africa ma timi egberigbaa timi a laadẹ maa bịnaotu gbaamị: “Ị́mịnị naa yọ kpọ laagha! Wẹrị mú dii a, Africa ibemị ị́ dịsẹmịnị.” Kọkọ bịsẹbara kị paamị! Wo mú yọ laamị bịnaotubo zụzụ bara tarị mịẹ wo dịamị. Omịnị sọndịa kụrai ka kị Zaire bọọ egberigbaamị. Daabụọ otubo, Jehovah Iseriotu ba ibe ma egberigbaa kụmọ oloko tụạ duonị omịnị serimị. Jehovah “sisei wo bụọmọ Africa ibe ma timi e” tẹẹbịbị ịmọ mịẹ ifiemị, ịmịnị dẹrịmị.

Te pọwẹị-ama kị ị́mọ nanadẹ a o?

Mats: Omịnị zịnị bẹbẹẹ yọama duo boemi missionary fịrịwẹnịmịnị bịnaotuama mọ ebị ikie kẹrịdẹ. Zụa yọama omịnị biin kịmịama mọ Bible tolumomị—bẹtịbị ụbọ 20 laaemi kịmịama mọ Bible tolumọmịnị! Africa bịnaotubo igeni kẹrịakị inyenrinbụọmị wo tọrụkẹrịmị. Omịnị Tanzania ibe ma itu diiyọ amúmịnị ifiemị, omịnị wo motor kọn ánị warị bọlọụma pẹlẹdaba motor bolou kị bụnụmịnị, anịa bịnaotubo sịlị nanagha kị gbaa kpọ, ámịnị wo dọụ wẹriemi yebo mịẹ wo pịrịmịnị. (2Cor. 8:3) Omịnị kẹnị yelaa ye mịẹtimi ifie nana wẹrịmị, omịnị bịsẹ ifie kọn dụụ gbaa ifie kị tịịntimi mị. Bịsẹ ifie laadaba, ịmọ Ann-Catrin mọ kẹnịyọ a tịtẹ wẹrị egberigbaa yọma paa egberibo kẹrị ẹrẹteimịnị, bá Jehovah wo kekere bara kpọ kọn ụ kulemịnị.

Ann-Catrin: Ịmịnị akpọyọrẹị bịnawarị mọ kẹnịsụọmọ inyenrin yọbị, ị mịẹ pọwẹị kụrọmọmị. Omịnị aya bẹẹlịama tolumọmị—gbaamaba Farsi, French, Luganda, bá Swahili bẹẹlị kpọ tolumọmị. Bịsẹ yọ bụọmọ kpọ, omịnị á kọn ye mịẹmịnị barabo kpọ ẹrịmị. Omịnị aya tuuduo-otuama tolumọ, aya ikie-ama kẹrị, bá ámọ mọ́ “kẹnịsụọmọ” Jehovah fịrị kpọ wẹnịmị.—Zeph. 3:9.

Omịnị Jehovah tẹmẹ wẹrịemi ebi yebo kpọ ẹrịmị. Jehovah aya fịrị kọn wo pịrịdẹ ifiesẹ, ómịnị mịẹmụ bara kọn wo dịamịnị, benebene wo gbeinmọ-koromọgha. Wo bẹtịbị laa nimigha fa yeama Jehovah mọ kọn wo tolumọdẹ.

Te bụụdọọnyeama kị ị́ laadẹ a, bá ị́mịnị tebara kị mịẹtimi á dẹịnmọ ma?

Mats: Biin dọọn-ama kị bei kụraị ovurubo wo laadẹ, gbaamaba malaria dọọn kpọ. Ann-Catrin vurudu dọọnzụọ warị amú angọ puu ifieama kpọ paadẹ. Wo kosudẹ daụ mọ yin mọ otubo kpọ tụa iroromịnị; anịa wo tuuyaịbo baratụa á pịrịmịnị yọbị wo tọrụkẹrịmị. Ámịnị etipou, pọwẹị, bá tarịnana bara ka kị tọrụtụa á dimịnị. (1Tim. 5:4) Mọabịkpọ, zụa ifieama agbẹịgha iroro yeama wo ịkịọụbo a sụọmịnị, omịnị ámọ mọ́ kẹnịyọ a timi baratụa á pịrịmụ yọkị yelaadẹịn-emi bara iroromịnị.

Ann-Catrin: Kụraị 1983, omịnị Zaire a timi egberigbaa fịrị wẹnịtimi ifiemị, cholera dọọn ị kẹrịmị. Dọọnzụọ-owei gbaa Mats pịrị amọ, “Á kọn mị ibe duo seridẹ kị dein koro!” Barịị ereinmị, omịnị plane ka leiwẹrị Sweden amúmị.

Mats: Wo missionary fịrịmị dụụdẹ bara kị omịnị mọ iroro duonị, omịnị youmị. Dọọnzụọ-owei gbaa bara paagha, Ann-Catrin angọ ebimị. Kẹnị kụraị bụọbị, omịnị waị Zaire a bo wẹrị Lubumbashi, Swahili fịẹmịnị itu ka sụọmị.

Ann-Catrin: Omịnị Lubumbashi a timi ifiemị, ịmịnị ofuro wẹrị biri koromị. Omịnị naa awọụ ziimọ bara tọnpẹlẹgha wẹrị kpọ, ofurobiri koro yọmị ị dọọn kụrọmọmị. Bịsẹ ifiemị, Jehovah wo tọngha ebi dịẹpịrịye kọn wo pịrịmị. Omịnị biin kụrọmọ kịmịama mọ Bible tolumọmị. Kẹnị kụraị ovurumị, itumị egberigbaa otubo biin 35 duomú 70 laamị, yetolumọyọ bomịnị otubo 40 duomú 220 laamị. Omịnị ifiebosẹ egberigbaa fịrị kị wẹnịmịnị, Jehovah mịẹpaamọ tarịbọ ị kụrọmọmị. Mọabịkpọ, omịnị biribolou duo fịị tọbọụmị baragha. Omịnị wo adụdụbosẹ akị timi Jehovah beinmọ beinmọ bara fịị kọnsiinmụ ifie korumịnị.

Mats: Timi kẹnị ifie laabị, Ann-Catrin angọ dẹịn kụrọmọmị. Ịmịnị stage-four colon cancer ị kẹrị wẹrị biin ifieama angọ puumị. Mị tịẹkirimị, ịmịnị angọ kụrọdẹ, Ann-Catrin kpọ ánị kụrọyọsẹ kọn Jehovah karịmịnị.

Wo bẹtịbị kị, dọọn bụụdọọnye nanagha bara wo mọ ẹrịdẹ. Kụraị 1994 Rwanda sụụ bụọbị, omịnị sụụ duonị ama duo seri wẹrị gbene-ama ka inyenrinmịnị bịnaotu diiyọ amúmị. Ámịnị bụụdọọnye bolou k’emi kpọ, peibolou nana, ye-ine, bá igeni kẹrịakị inyenrinbụọ nana wẹrịemi yọbị, Jehovah kọkọ wó kịmịbo, bụụdọọnye a sụọdaba baratụa á pịrịmịnị bara mịẹgaan paamọ wo pịrịmị.—Ps. 55:22.

Ann-Catrin: Kụraị 2007 Uganda branch mị office dịẹpaamọ Jehovah pịrịmị. Bịsẹ ereinmị omịnị bịsẹ yọma múmị. Bịsẹ ifie kị zịnị kụrọ bụụdọọnye paamị. Program fabị, 25 missionary otu bá Bethel a fịrị wẹnịmịnị otu motor a leiwẹrị yọụ Nairobị Kenya amú timimị. Wo yọụ mú Kenya ifinmọ naịn ifiemị, zịnị motor yọụ bo wo egbemị. Wo motor driver mọ bá sọnran bịnaotu mọ tịẹkiri ka fịịmị; kẹnị bịnaraụ hospital laadẹ kị fịịmị. Omịnị timi waị wo bịnaotubo ẹrịmụ ifie kị korumịnị!—Job 14:​13-15.

Ine angọma timi ịnọụbo bụbamị. Ịmọ Mats mọ bá motor ma timi bịnaotubo mọ, paa yemị ukiemịnị ifiesẹ malafamịnị. Dein ka bịsẹ malafa yọmị ị́ mịẹmịnị, ine sịyaịn kpọ seimọmịnị, bá ine adụdụmị pẹlẹ dọụmịnị bara ka kị ị mịẹmịnị. Omịnị malafa kụrọmọmị. Anịa ifiebosẹ tẹẹbịbị mịẹ Jehovah yarị bá wo dịsẹ kụrọmọ Bible yọama goomịnị yọbị baratụa wo pịrịwẹrị bịsẹ bụụdọọnye dẹịnmọmị. Malafa dọọn zụọmịnị owei kpọ baratụa wo pịrịmị. Bịsẹ malafatimi yọbị dọlọ ịyeridẹ, Jehovah baratụa zịnị malafamịnị otu pịrị bara omịnị mọ tẹẹmị.

Ị́mịnị bụụdọọn yebo andamịnị ifiemị, Jehovah “owọụ anga bara” ka kị ị́ sibemi gbaa yọbị. Teeki ị́mọ bịmọ wẹrịemi a o?

Mats:“Tumebebwa kama mayai mabichi” ẹrẹbịbịmị, Swahili bẹẹlị kị duo bomị, kọn “owọụ anga bara ka kị wo sibemị” kị bịmọ wẹrịemi. Kịmị, pẹịgha fa bara akị owọụ anga sibemịnị bara kị, Jehovah kpọ bịsẹbara ka kị wo wẹnịdẹ fịrịbosẹ baratụa wo pịrịmịnị. Ómịnị ifiebose dụba wo dọụ wẹrịemi bara dẹịn-emi yeama mịẹ wo pịrịmịnị. Jehovah Governing Body otubo duo baratụa wo pịrịmịnị yọ kpọ kẹnị ụwọụ.

Ann-Catrin: Jehovah kọkọ baratụa wo pịrịmịnị bara mịẹgaan wo pịrịye ịmọ gbaa á dịa. Kẹnị erein kịmị Sweden ibe duo phone akị ị tịịnmị, ị daụ dọọnzụọ warị k’emi, anịduonị tọrụtụa ụ dimọ kịmị dọụ wẹrịemi bara gbaamị. Anịa Mats malaria dọọnzụọtimi angọ ebimị naa alagha duonị, omịnị Sweden amúmụ ticket feimụ sịlị nanagha. Anịduonị, omịnị wo motor yeriwẹrị múmụ bara tọnpẹlemị. Maa kịmị bẹbẹ ifieama phone duo wo tịịnmị; kẹnị taa mọ yei mọ otu kẹnị ticket fẹị wo pịrịmụ bara gbaamị. Kẹnị kosudẹ bịnaraụ ekpedi ka sịlị gbaịnmịnị, bịsẹ ekpedimị amịnị gẹẹ wẹrịemị “Baratụa-pịrịye dọụ wẹrịemi kịmị kị pịrịmịnị” amịnị kpọ kẹnị ticket fẹị wo pịrịmịnị bara gbaamị. Jehovah kẹnị miniti ovurumị tamama bara kọn baratụa wo pịrịmị!—Heb. 13:6.

Ámịnị beinmọ beinmọ bara egberigbaa fịrị wẹnịtimi 50 years dẹịndẹ, teeki ámọ tolumọ akịdẹ a o?

Ann-Catrin: Omịnị “gbeintimi ma eti nana yọkị kụrọ akị á pịrịmịnị” gbaa egberimị kọkọ gesii egberi bara nimimị. Omịnị eti kọn Jehovah a tụadaba, ómịnị wo barịị biin sụụama dẹịnmọmịnị. (Isa. 30:15; 2Chron. 20:​15, 17) Omịnị wo adụdụsẹ kọn Jehovah wo pịrị wẹrịemi fịrị wẹnịmịnị yọ duonị, biin tarịama kị Jehovah mọ kọn wo pịrịdẹ. Omịnị zịnị yọ duo bịsẹ tarịbo nanagha paagha.

Mats: Paaye paaye, ịmịnị Jehovah ka sẹsẹrẹmịnị, bá Jehovah baratụa ị pịrịmịnị eti ịmọ nanadẹ. (Ps. 37:5) Ómịnị wó kikoromọ wẹrịemi yebosẹ mịẹ beinmọmịnị. Myanmar wo tịẹkiri wẹnịmịnị Bethel fịrị kpọ, Jehovah baratụa wo pịrịmịnị bara wo mọ ẹrịmịnị.

Jehovah mịẹ wo dịadẹ kpẹkpẹrẹ tarịmị, mịẹ angọtụa egberigbaa fịrị kọn bọlọụ dịamịnị asịyaịpesibọ kpọ dịamịnị ukiemọye wo mọ nana wẹrịemi. Ámịnị Jehovah bụọmọ á gboro wẹrịemi yọma sọụdaba, Jehovah á barịịmụ eti omịnị mọ nana wẹrịemi.