Jesus “Angọ-Iyerimọ Bara Tolumọmị”

Jesus ifiebosẹ angọ-iyerimọ Jehovah pịrịmịnị. (John 8:29) Tetuu kị duonị Bible mị “Ómịnị wó fị ụyabo kị duo angọ-iyerimọ tolumọ” bara gbaa ma o?—Heb. 5:8.

Jesus agọnọ bọọ timi ifiemị, ụ paamọgha yeama kị mị kiri ma ụ paamọmị. Yalịgha daụ mọ yin mọ kị ụ gbalị paamọmị. (Luke 2:51) Jesus ekpe karịbụọ tịbị otuama mọ, bá kịrịịgha ụgụlapẹlẹmịnị ibe-daa otuama mọ pịrị ụyamọmị. (Matt. 26:59; Mark 15:15) Mọabịkpọ ómịnị “gbaayọ peimịnị duonị angọ-iyerimọ timi,” dọọn naa fịị kị pịrị baamị.—Phil. 2:8.

Jesus agọnọ ma timi ifiemị, angọ-iyerimọ inyenrinbụọ nana wẹrị kpọ, ómịnị kiriogboma bomị angọ-iyerimọ gbelemọ yọbị aya yeama tolumọmị. Ómịnị dieneni nana yalịyalị Pẹrẹ bá Seri Ịkịankụn owei ka paa wo pịrị-emi. (Heb. 4:15; 5:9) Jesus wó fịị ụyabo duo angọ-iyerimọ bara tolumọ yọ duonị, Jehovah tọrụyọ ma yelaa kịmị ka paamị. Omịnị bụụdọọnyeama kị laamịnị kị gbaa kpọ, angọ-iyerimọ bara Jehovah kọn wo pịrị wẹrịemi fịrị wẹnịdaba, omịnị kpọ Jehovah tọrụyọ bọọ yelaa kịmịama a paamịnị.—Jas. 1:4.