1925—Kụraị Kẹnị Ọdọzị Bụọdẹ Ifie Paa Yeama

TỌNWẸRỊ BARA PAAGHA

Biin Bible Student-ama kụraị 1925 laadaba kiriogbosẹ Paradise a paamụ bara kị iroro wẹrịmị. Tetuu a o? Bịnaowei Albert Schroeder, tuu ifiemị omịnị Governing Body owei a paamị, ụ gbaamị: “tọnwẹrị barasẹ sẹlẹ akịdẹ otubo bịsẹ ifie laadaba agọnọ amú Christ sụọmọ wẹrị Daabụọ bị daamụ bara kị tọn wẹrịmị. Bịsẹyọ bụọmọ kpọ oruseri ifiema timi peibolou nana otubo, gbaamaba Abraham, David bá zịnị otuama, waị fịyọ duo seriwẹrị bo mị kiriogbomị Pẹrẹ-ama paamụ bara kị iroro timimị.” Anịa kụraịbo bụọmịnị bị ánị iroro wẹrị bara paagha, anịduonị zụa kịmịama bá bolouịmbẹlẹgha.—Prov. 13:12.

Ánị tọnwẹrị bara kị paagha kị gbaa kpọ, biin Bible Student-ama angọtụa egberigbaa fịrị wẹnị bọlọụ amúmị bá ámịnị iseritịẹ Jehovah pịrị agbẹị-emi bara kpọ kọn angọ nimimị. Egberigbaa fịrị wẹnị akpọsẹ laamụ yọ duonị ánị wẹnị fịrịbo wo mọ diitụa.

RADIO KỌN EGBERIGBAA YỌBỊ BỌLỌỤ BỤỌMỊ

Bụọdẹ kụraịbo WBBR radio station mị kịmịama gbele bara wo mọ ẹrị yọ duonị, Bible Studentbo zịnị radio station akị, Chicago, Illinois naịn-emi yọ a mịẹ paamọmị. Ámịnị mị aya radio station mị akị WORD kị tịịnmị. Anịa Ralph Leffler, ómịnị kpọ bei radio station warị kẹrị fịrị wẹnịmị, ụ gbaa amọ “edidi koroemi deinbo” kịmịotu “a laayọ kpọ timi WORD radio station pei timimị.” Gbaamaba, kẹnị warịbolou otu 5,000 kilometers (3,000 mi) Pilot Station, Alaska, ka timi radio kọn mị radio station pei timimị. Ámịnị peisiin ifiemị, ámịnị fun gẹẹ radio station yarịmị, radio station mị tẹmẹ-anga yeama akị á kụrọmọ yọ duonị ámịnị kulebịbị saị radio station yarịmị.

December 1, 1925, Lewarị funmị, radio station fie biin yọama laamịnị bara gbaamị, bịsẹ lewari funmị mọ kị gbaamị: “United States dụbadẹịn radio stationbo WORD kpọ kẹnị, 5,000 watts laaemi bara ka kị mịẹ wẹrịemi. Mị station mị United States ụraụ duo paamịnị anga duo mú sụọfamịnị anga bọọ emi otubosẹ laa pei a paaemi, Cuba mọ bá Alaska tụbụrụ anga bọọ emi otubosẹ laa pei a paaemi. Biin kịmịama radio station duo naamịnị egberibo duonị gesii ma dịsẹ nanamị.”

Bịsẹ ifiemị, Bible Studentbo radio kọn ebiegberi gbaa mú Canada ibe kpọ laa dọụmị. Bo 1924 laa ifiemị CHUC tịịnmịnị radio station akị Saskatoon, Saskatchewan tịịnmịnị ama bọọ kẹrịmị. Canada ibemị, bọlọụ karịbụọ gbelemọ egberiama gbaa timi radio stationbo, bịsẹ ye kpọ kẹnị. Kụraị 1925 laamị, radio station mị seri zịnịyọ amú dọụmị. Bịsẹ ifie kị Watch Tower Society CHUC radio station fẹị wẹrị ụ kọn Regent Building tịịnmịnị yọ amúmị, ámịnị Saskatoon warị fẹịwẹrị waị warị mịẹ ebimọ wẹrị radio station tụamị.

Radio station mị, biin kịmịama mịẹ Saskatchewan ama bọọ bọlọụ ebiegberi naa yọmị omịnị á kule kamị. Gbaamaba kẹnị alaaemi ama, Mrs. Graham radio ma gbaamịnị egberibo peisiin bị, amịnị Jehovah Iseriotu funbo dọụmịnị bara gẹẹmị. Bịnaowei George Naish gbaamị, “Erema wo funbo a dịsẹnana yọbị wo gbelemị, anịduonị omịnị Studies in the Scriptures” funsẹ kọn a pịrịmị. Bịsẹ yọ bụọ alaagha mị, Mrs. Graham ifie famọgha bara Daabụọ egberi gbaa mú alaa ete-ama laamị.

YELAA GESIIAMA NIMIMỊ

March 1, 1925, Lewarị funmị, kẹnị yelaa egberitịbị mịẹ paamọmị, egberitịbịbị “Birth of the Nation.” Tetuu kị duonị bị egbertịbịbị yelaa ma o? Tuubị, Bible Studentbo Satan ogboama mịẹ paamọ wẹrịemi bara nimimị, anị kịmị ẹrịgha bolousei tẹmẹ-ama, ekpe karịbụọ, fọụyọụ ogboama, bá akpọ daakụrọama mịẹpaamọdẹ bara nimimị. Anịa, lewarị funmị, “peibolou nana kịlịkịlị odubo oweimị” baratụa bịnawarị pịrịwẹrị Jehovah kpọ ogbo nana wẹrịemi bara mịegaan akpọyọrẹị bịnawarịsẹ pịrị nimimị, bá Jehovah ogbomị Satan ogbo mọ benebene kẹnị-sụọmọgha bara kpọ mịẹgaan paamọmị. (Matt. 24:45) Kụraị 1914 Ọkpọnanaowei Daabụọmị kọn agọnọ bọọ mịẹ tịẹmọdẹ bá bịsẹ kụraị ma agọnọ bọọ paa suu duonị Satan mọ wó sei tẹmẹbo mọ duo kiriogboma bodẹ bara kpọ peibolou nana kịlịkịlị odubo oweimị mọ mịẹgaan paamọmị.—Rev. 12:7-9.

Bei aya nimiye kẹrịakịmụ yọbị kụrọ zụa kịmịama pịrị kpọ paaemi bara nimi yọ duonị, Lewarị funmị gbaamị: “Bei egberi kẹrịakịmụ yọbị kụrọ ị́ pịrịemiaba, peibolou nana, bá kịlịkịlị bara dọọtimi nanaowei karị bọlọụ amú.”

Tom Eyre, Britain emi owei colporteur fịrị wẹnị timimị (bei tịẹkiribị ụwọụpẹlẹ fịrị kị tịịnmịnị.) Ómịnị bei egberitịbị gbelemọ yọmị Bible studentbo gbaatimi biin egberiama gbaamị: “Revelation 12 ma tuugbaa wẹrịemi baramị bịnaotubo mọ nimibị, ámịnị bolouịmbẹlẹ kụrọmọmị. Bá daabụọ mị akị agọnọ ma mịẹtịẹmọdẹ bara nimibị, ámịnị pọwẹị angọtụa ebiegberi gbaa zịnịotu pịrịmị.”

ISERITỊẸ JEHOVAH PỊRỊMỊNỊ

Bei ereinmị, Jehovah Iseriotubo Isaiah 43:10 bọọ gbaa wẹrịemi egberi nimi ebimọmị, yọmị: “Jehovah gbaamị ‘Ámịnị ine Iseriotuama, Iin, Ine sẹlẹ akịdẹ odubo otuama.’” Anịa, naa 1925 laagha ifiemị, mị Bible yọmị naa wo funbo biingha timimị. Deiyọ paadẹ. Kụraị 1925, Lewarị funmị, Isaiah 43:10,12 akị oi-kẹnị fịnị lewarị fun-ama a gẹẹtụamị!

August 1925 kunumọ dọụmịnị ifiemị, Bible Studentbo Indianapolis, Indiana timimịnị yọ opubẹnịị mịẹmị. Joseph F. Rutherford opubẹnịị bọọ gbaamị: “Omịnị mị bẹnịị mị, . . . Nanaowei bara bọọ kụrọ akị yọ ka boemi, anịkị omịnị waị warị amúdaba, angọtụa egberigbaa fịrị wẹnị bọlọụ amú a paadẹ.” Bịnaowei Joseph F. Rutherford mị ningina erein bẹnịịma bo paa otubosẹ kụrọmọwẹrị, ánị nanadẹ fomuunsẹ akị iseritịẹ Jehovah ẹrẹ tokoni bara gbaa bịnaotubo pịrịmị.

Saturday, August 29, Bịnaowei Rutherford kẹnị ẹrẹbịbị pịrịmị, egberitịbịbị “A Call to Action.” Wó ẹrẹtimi ifiemị, egberigbaa fịrịmị yelaa kụrọmọ-emi bara ómịnị mọ gbaamị: “Jehovah gbaa wó kịmịbo pịrịmị . . . : ‘Ámịnị ine Iseriotuama . . . Ịmịnị ánị Okpọnanaowei.’ Ómịnị kịmị laa leleigha kụrọ okolo akị gbaa paamọmị: ‘Kịmịbo mịẹ agbẹị-emi ye kọn á dịa.’ Jehovah wó yalịyalị tẹmẹ kọn pịrịdẹ [kịmịbo] kị iseritịẹ wó ẹrẹ pịrị a paaemi, tuumị ámịnị wó Iseriotuama.”—Isa. 43:12; 62:10.

Bịnaowei Rutherford egberigbaa siinbị, ọ́mịnị “Message of Hope,” tịịnmịnị fun goo paamọmị. Kịmịsẹ Ọkpọnanaowei Daabụọ kị “dọọ, bọlọụ bụọyọ, dọọn fa ụndụ nana, peree nana bá fagha fagha pọwẹị” mịẹpaamọmụ bara peimị. Bei egberịmị akị waị biin bẹẹlịama gẹẹ paamọmị bá tract kpọ a printi paamọmị. Dịẹpaamọ yaịbo 40 million laaemi.

Bịsẹ bara kị gbaa kpọ, Bible Studentbo naa Jehovah Iseriotu ẹrẹ kọn angọ tịịngha. Mọabịkpọ, mịẹtimi bo Jehovah iserikịmị a paamụ bolou bọọ emi fịrịbo ámịnị mọ nimi wẹrịemi.

WAỊ MÚ DỊSẸNANA WẸRỊEMI OTU LAAMỊNỊ IFIE

Akpọmị Bible Studentbo biinmịnị bara kị, omịnị kpọ waị mú ebiegberi ma dịsẹnana wẹrịemi otubo laamụ yọbị yelaaemi. Message of Hope fun kọn ekpekpe gbeletimi ifiemị, Bulletina mị: “Omịnị mú kịmịotu laamịnị bị zịnị fun-ama kị koromọgha kpọ, Message of Hope fun koromọ wẹrịemi yọsẹ waị mú á laa bara kọn Bible studentbo kụrọmọ” bara gbaamị.

January 1925 Bulletin gbaamị, Plano, Texas emi Bible student gbaa baramị: “Omịnị waị mú dịsẹnana wẹrịemi ete ma mú egberi gbaamịnị yọbị, ebi paa aya ete dẹịn-emi. Bụọdẹ oia kụraị ovurumị, omịnị sọnran ifie akị wo egberigbaa ete bọọ emi kala ama mú egberigbaa fịrị wẹnịdẹ. . . . Anịa naa alaagha ifiemị, Bịnaraụ Hendrix mọ ị yin mọ bịsẹ ama bị amú wẹrị wo bọlọụ ifie paamọ funbo [dẹịn] fun-ama paamọmị.”

Panama ibemị, kẹnị colporteur owei gbaamị: “Biin kịmịama ịmịnị bọlọụ egberigbaa á pịrị ifiemị egberi kẹrị akịgha, anịa ịmịnị maa anịghakpọ tarụkaramụ ifie mú á laabị ámịnị deiyọ nanamị. Mị bụọdẹ kụraịbo, ịmịnị waị mú bụọdẹ ifie ịmọ mọ́ Bible tolumọdẹ kịmịama mọ kị Bible tolumọmị; Paa arerebo ị mịẹ pọwẹị nanamị.”

BỌLỌỤ A PAAMỤ BARA KẸRỊ IROROMỊ

Kụraịbọsẹ gẹẹ egberigbaa otubo pịrịmịnị Letter mị, Bịnaowei Rutherford egberigbaa kụraị ma paa yebo mọ bá bomịnị egberigbaa kụraịbị mịẹmịnị yebo akị tụa gẹẹtimimị. Ụ gbaamị: “Bụọdẹ kụraịbo ámịnị biin bolouịmbẹlẹgha kịmịama kụrọmọ fomuun nanamị. Bịsẹ yọbị á mịẹ pọwẹị nanamị . . . Anịa bomịnị kụraịmị omịnị fomuun nanawẹrị iseritịẹ wo Ọkpọnanaowei bá wó daabụọ mọ pịrịmịnị bá kịmịbo mịẹ agbẹị-emi ye kpọ gbaa á pịrịmịnị. . . . Wosẹ kẹnị sụọmọdá wo okolobo serimọ duma tuun wo Ọkpọnanaowei bá wo Pẹrẹ mọ pịrị.”

Kụraị 1925 kunumọ dọụmịnị ifiemị, bịnaotubo Brooklyn bọọ emi fịrịwẹnị yọ mịẹ dụbamọmụ iroro tọnmị. Jehovah ogbomị 1926 kụraị kị dụba-dẹịn warị kẹrị fịrị wẹnịmị.