Maa Aya Governing Body Otu

OCTOBER 5, 2024 kụraịbị, annual meeting mị kịmị mịẹ pọwẹịmọ egberi koromị: Bịnaowei Jody Jedele mọ Jacob Rumph mọ Jehovah Iseriotu Governing Body otu a paadẹ bara gbaamị. Mị maa bịnaotubo peibolou nana bara biin kụraịama kọn Jehovah karịdẹ.

Jehovah Iseriotu kị Missouri, U.S.A Bịnaowei Jedele ziimị. Ómịnị Jehovah Iseriotu biingha ama ka inyenrintimi. Ómịnị, bẹbẹ yọama duobo egberigbaa timi bịnaotuama mọ gbeleimị. Ánị nana wẹrịemi tarịbị ụ gbele kụrọmọmị. Ómịnị October 15, 1983 naa sia kụraị laagha timi benibilemị. Ómịnị pọwẹị pọwẹị bara ka kị egberigbaa fịrị wẹnị timimị, ómịnị opu school duo paamị, September 1989 koro ụwọụpẹlẹ fịrị wẹnịmị.

Bịnaowei Jedele zaụtimi ifiemị, ụ daụ mọ yin mọ, ụ mọ wó bịnaraụma mọ kọn Bethel amú timimị. Mị Bethel amúmịnị yọkị á dịnẹmọ wẹrị Bethel a mú fịrị wẹnị dịsẹ nanamị—tuumị ámịnị kọkọ Bethel ka mú fịrị wẹnịmị. Bịnaowei Jedele September 1990 kụraị kị Wallkill Bethel amú fịrịwẹnị fomuun nanamị. Ómịnị bọlọụ Cleaning Department ka fịrị wẹnịtimi tuu ifie laamị Medical Services kọọ fịrị wẹnịmị.

Bịsẹ ifiemị, Spanish bẹẹlị fiemịnị ituama bịnaowei-ama dọụ wẹrịemi bara gbaamị. Bịnaowei Jedele kẹnị itu a sọụwẹrị koro Spanish bẹẹlị tolumọmị. Bịsẹ ifie bụọmọ alaghatimi ómịnị Damaris mọ gbelemị, amịnị ụwọụpẹlẹ fịrị kị wẹnịmịnị. Ámịnị zọzọ nanamị, amịnị kpọ ụ sụọmọ Bethel amú fịrị wẹnịmị.

Kụraị 2005 mị ámịnị baratụa á daụ mọ yin mọ otubo pịrịmụ yọ duonị Bethel a barasiinmị. Ámịnị Bethel duo seridẹ kpọ, beinmọ beinmọ ụwọụpẹlẹ fịrị wẹnịmị. Bịnaowei Jedele Pioneer Service School tolumọ, bá local Hospital Liaison Committee mọ Regional Building Committee fịrị kpọ wẹnịmị.

Timi kụraị 2013 laamị, ogbomị waị Bịnaowei Jedele mọ ụ taa mọ tịịn Bethel amú wẹrị Warwick warị kẹrị fịrịwẹnị yọ amúmị. Bịsẹ ifie duobosẹ ámịnị Patterson mọ Wallkill bethel ka timi fịrị wẹnịtimi. Bịnaowei Jedele Local Design/Construction Department mọ bá Hospital Information Services ka fịrị wẹnị timimị. March 2023 Kụraịmị, baratụa Governing Body Service Committee pịrị fịrịwẹnị fomuun ụ laamị. Ómịnị waị wó wẹnị bụọmọdẹ fịrịbo ukie ifiemị, ụ gbaamị: “zụa ifieama aya fịrịwẹnị fomuun ị́ laadaba, ị́ mịẹ malafamịnị. Bịsẹ ifiemị ị́mịnị Jehovah ka sẹsẹrẹ agbẹịemi bara ukiemịnị, tuubị ómịnị kị ye mịẹpaamọmịnị.”

California, U.S.A ka Bịnaowei Rumph ziimị. Wo zaụtimi ifiemị, ụ yin yetolumọ yọ bá egberigbaayọ amúgha, mọabịkpọ amịnị Bible kọn ụ tolumọ timimị. Bịsẹyọ bụọmọ kpọ, ómịnị kụraịbosẹ wó peibolou nana okosu yin yọ amú timimị. Amịnị baratụa ụ pịrịwẹrị gesii bọọ dịsẹnana yọ duonị, ómịnị 13 years ka timi Bible tolumọ dọụmị. Ómịnị September 27, 1992 ka benibilemị. Kịmị mịẹ bolouịmbẹlẹmọ yọbị, wo yin waị yetolumọyọ mọ bá egberigbaayọ mo amúmị, bá bịsẹ yọ bụọmọ kpọ wó daụ mọ wó bịnaotubo mọ Bible tolumọ timi benibilemị.

Bịnaowei Rumph asịyaịpesi a timi ifiemị ụwọụpẹlẹ fịrị wẹnịmịnị otubo egberigbaa fịrị wẹnịmịnị bị pọwẹịmịnị bara ẹrịmị. Anịduonị ómịnị secondary school duopaabị, September 1995 ka koro ụwọụpẹlẹ fịrị wẹnịmị. Kụraị 2000 mị, ómịnị Ecuador ibemị egberigbaa otu dọụ wẹrịemị yọ ka egberigbaa fịrị wẹnịmị. Bịsẹyọ kị ómịnị Canada ụwọụpẹlẹ fịrịmịnị bịnaraụ Inga mọ gbelemị, ámịnị zọzọ nanamị. Ámịnị zọzọ nana bụọmọ dẹbị, Ecuador ibemị biingha egberigbaa otuama emị kala itu ka mú egberigbaa fịrị wẹnịmị. Bei tịẹkirimị itumị biin egberigbaa otuama kị paadẹ.

Timi kẹnị ifie laamị, bịnaowei Rumph mọ ụ taa mọ special pioneer fịrị wẹnị bá tuu ifie laamị, itu dii fịrị kpọ wẹnịmị. Kụraị 2011 mị, 132nd class of Gilead School amú mụ fun á laamị. Gilead duopaabị, ámịnị bẹbẹbẹbẹ fịrịama ka kị Jehovah ogboma wẹnịdẹ, gbaamaba Bethel service, missionary fịrị, bá itu dii fịrị kpọ wẹnịmị. School For Kingdom Evangelizers school tolumọ fomuun kpọ bịnaowei Rumph laamị.

COVID-19 dọọn duonị, Bịnaowei Rumph mọ ụ taa mọ waị United States amúmị. Bịsẹ ifie kị Jehovah ogbomị á tịịn Wallkill Bethel amú wẹrị Service department a timi fịrị wẹnịmụ bara akị Bịnaowei Rumph tolumọmị. Bịsẹ ifie bụọmị, ogbomị á fịrịmọ waị Ecuador branch ka múmị. Bịnaowei Rumph bịsẹ yọ ka Branch Committee owei a paamị. Kụraị 2023 bị ogbomị á fịrịmọ Warwick ka múmị. January 2024 kụraịmị, bịnaowei Rumph baratụa Governing Body Service Committee pịrị fịrị kị wẹnịmị. Ómịnị waị wó wẹnị bụọmọdẹ fịrịbo ukie ifiemị, ụ gbaamị, “Iné fịrị wẹnị pịrịmịnị kịmịbo yelaa iné wẹnịmịnị fịrị dẹịn-emi.”

Bei bịnaotubo wẹnịmịnị fịrịbo wo tọrụkẹrị-emi, bá omịnị á “didụbamọ wẹrịemi.”—Phil. 2:29.