Itukosuotu Tarị Mọ Dieneni Mọ Mịẹ Akị Sei Mịẹdẹ Otubo Dịamịnị Baramị

1. Kịmị kụrọsei mịẹdaba teeki paa a paaemi a o?

WO TOLUMỌ bụọmọdẹ egberitịbị mị, fịrịmọpaaowei Paul Corinth itu bọọ kẹnị kụrọsei mịẹ inyenrinbụọ kẹrị-tịẹmọ baramị wo mọ tolumọmị. Sei mịẹ ụbọmị boloudeigha anịduonị ámịnị ụbọ kọn itu duo serimị. Mọabịkpọ, mị egberitịbị duo akị wẹrịemi Bible yọmị wo mọ didaba, zụa kụrọsei mịẹdẹ otu mọkpọ boloudei a paaemi bara mịẹgaan wẹrịemi. Ọkpọnanaowei baratụa á pịrịwẹrị boloudei a paaemi. (Rom. 2:4) Itukosuotubo tebara ka kị baratụa kụrọsei mịẹdẹ otu pịrịwẹrị boloudei a paaemi a o?

2-3. Wo mọ Jehovah karịmịnị ụbọ kụrọsei mịẹdẹ bara wo mọ nimidaba omịnị teeki mịẹ agbẹị-emi a o, bá tetuu a?

² Itukosuotubo ụbọ mịẹ sei nimighaba, ámịnị laa baratụa ụbọ pịrịgha fa. Anịduonị, wo mọ Jehovah karịmịnị ụbọ kụrọsei mịẹwẹrị itu duo kọnsiin a paaemi bara wo mọ nimidaba omịnị teeki mịẹ agbẹị-emi a o? Ụbọmị mú itukosuotubo baratụapịrịye bii bara omịnị mọ kọn ụbọ kụrọmọ.—Isa. 1:18; Acts 20:28; 1Pet. 5:2.

³ Sei mịẹ ụbọmị, mú gbaa itukosuotubo pịrị dọụghaba, omịnị teeki mịẹ agbẹị-emi a o? Bịsẹ bara paadaba, ụbọbị baratụa-pịrịye nanamụ yọ duonị omịnị mú gbaa akị itukosuotubo pịrị. Bịsẹ bara wo mọ mịẹdaba omịnị wo bịna-ụbọ tarị wẹrịemi bara kị mịẹdịamịnị. Ụbọmị boloudeighaba, ụbọbị ụ mọ Jehovah mọ ikie kị seimọmịnị. Bịsẹ ụbọbị mọkpọ weribịbị akị Jehovah ẹrị mọ bá itu mọ kị pịrịmịnị. Bịsẹ bara mịẹmụ yọbị bọụbọụgha kị gbaa kpọ, omịnị Jehovah tarị bá wo bịnaotubo tarị wẹrịemi duonị omịnị mú gbaa Itukosuotubo pịrịmịnị.—Ps. 27:14.

ITUKOSUOTUBO BARATỤA KỤRỌSEI MỊẸDẸ OTU PỊRỊMỊNỊ BARAMỊ

4. Itukosuotubo kụrọsei mịẹ ụbọ mọ gbeleidaba te ka kị ịkịọụ a wẹrịmịnị a o?

⁴ Itu bọọ emi kịmị kụrọsei mịẹdaba, itukosuotubo ánị ovuru bọọ agbẹị-emi tara itukosuotuama sẹlẹwẹrị mú ụbọ mọ ẹrịmịnị.a Mị tara itukosuotubo ánị mịẹmụ ḍụụ agbẹị-emi yọ nimi bá angọ-iyerimọ. Ámịnị baratụa sei mịẹ ụbọ pịrịmịnị ifiemị, ámịnị ụbọ penimọwẹrị deiyọ mịẹ a paagha fa bara nimi wẹrịemi. (Deut. 30:19) Sei mịẹ kịmịmọsẹ Pẹrẹowei David boloudei bara deigha fa bara itukosuotubo mọ nimi wẹrịemi. (2Sam. 12:13) Zụa sei mịẹ otuama Jehovah tolumọbịbịbo kẹrịakịgha fa. (Gen. 4:​6-8) Mọabịkpọ, sei mịẹ ụbọmị boloudeimụ yọ kị itukosuotubo mọ dọụ wẹrịemi. Anịa itukosuotubo kụrọsei mịẹ ụbọ mọ gbeleidaba ámịnị teeki ukie agbẹị-emi a o?

5. Itukosuotubo sei mịẹ ụbọ mọ gbeleidaba te tolumọbịbị ka kị ịkịọụ a wẹrị agbẹị-emi a o? (2Timothy 2:​24-26) (Foto kpọ dii.)

⁵ Itukosuotubo sei mịẹ ụbọ kọn faemi yelaa, anịna kị dimọ wẹrịemi. (Luke 15:​4, 6) Anịduonị, ámịnị ụbọ mọ gbeleidaba, ámịnị gịa, angọserimọ bá agbẹịgha bara akị ụbọ mọ mịẹgha fa, ámịnị biibịbịama biiwẹrị ebibara paaye bọọ sụọtuunimi-daba fadẹ bara mịẹgha fa. Anịa ámịnị 2Timothy 2:​24-26. (Goo.) bọọ gbaa wẹrịemi inyenrinbụọbo kị dimịẹmịnị. Ámịnị sei mịẹdẹ ụbọ mọ gbeleidẹ ifiesẹ, baratụa ụbọ pịrị dọụmịnị duonị, bọụbọụ, dọọ bá ebi ịkịọụ nana wẹrịemi bara ka kị ye mịẹmịnị.

6. Itukosuotubo tebara ka kị ánị angọbo tọlọmọdẹ kị mú sei mịẹ ụbọ mọ gbeleimịnị a? (Romans 2:4)

⁶ Itukosuotubo ánị angọbo tọlọmọmịnị. Ámịnị angọtụa wẹrị Jehovah akị sei mịẹ ụbọ dimọ wẹrịemi bara ka kị ụbọ dimọmịnị, Paul gbaa egberibị ámịnị mọ kẹrị ukiemịnị: “Ọkpọnanaowei ebimịẹmịnị kị duonị Baratụa ị́ pịrịwẹrị boloudei dọụmịnị.” (Romans 2:4 goo.) Itukusuotubo ifiebosẹ ukịẹ, ámịnị anịna gbalị otu fịrị kị wẹnịmịnị, ámịnị Jesus Christ gbaa bara kị dimịẹ agbẹị-emi. (Isa. 11:​3, 4; Matt. 18:​18-20) Baratụa sei mịẹdẹ ụbọ pịrịwẹrị waị boloudẹịmụ yọ duonị, ámịnị tẹẹdẹ kị ụbọ mọ gbeleimịnị. Ámịnị Bible mọ wo funbo mọ a tuudọụ, bá kịlịkịlị-nimiye nanamụ yọ kpọ tẹẹmịnị. Ámịnị ụbọmị emibara bọọ sụọtuunimi, bá ụ dịnẹmọ wẹrị bịsẹ sei mịẹ tuu kpọ kẹrị iroromịnị.—Prov. 20:5.

7-8. Itukosuotubo sei mịẹ ụbọ mọ gbeleidaba tebara ka kị Jehovah etipou inyenrinbụọ dimịẹ a paaemi a o?

⁷ Itukosuotubo Jehovah etipou inyenrinbụọ dimịẹmịnị. Jehovah akị bụọdẹ ifie bọọ sei mịẹ otubo barịtimi baramị ámịnị mọ kẹrị ukiemịnị. Gbaamaba, Jehovah etipou bara ka kị Cain zezemọmị, Cain boloudeighaba ụ paamọmụ ye mọ bá deidaba wó nanamụ tarịbo kpọ gbaa ụ pịrịmị. (Gen. 4:​6, 7) Jehovah bụrụowei Nathan fịrịmọ mú David zezemọmị, ómịnị ye akị tọnmọ gbaa David pịrịmị, wó tọnmọdịa yebị baratụa pẹrẹowei David pịrịwẹrị boloudeimị. (2Sam. 12:​1-7) Jehovah “ifiebosẹ” wó bụrụotubo fịrịmọ mú “barịị barịị” berifaanye akị Israel otubo pịrị timimị. (Jer. 7:​24, 25) Jehovah korutimi Israel otubo boloudeidẹ kị baratụa á pịrị bara mịẹgha. Anịa, Jehovah ifiebosẹ ámịnị boloudei bara kọn á kụrọmọtimimị.

⁸ Itukosuotubo baratụa kụrọsei mịẹ ụbọ pịrịmịnị ifiesẹ, ámịnị Jehovah mịẹdịaye kị dimịẹ agbẹị-emi. 2Timothy 4:2 gbaa baramị, ámịnị “etipou” bara ka kị bụụdọọnye laaemi Christtuuduo-otubo mọ inyenrinmịnị. Itukosuotubo gbelemọ yọmị, bịsẹ Bible yọ bọọ tuugbaa wẹrịemi study note bara kị gbaamị: “Ómịnị ifiebosẹ angọkẹrị, bá baratụa sei mịẹ ụbọ pịrịwẹrị kịrịịye mịẹmụ yọ duonị ómịnị etipoumịnị. Itukosuoweimị boloukọn bá dẹịnsụọ bara ka kị mịẹdaba, ómịnị sei mịẹ ụbọ mịẹ kịmịotu mọ ba naịngha anịghakpọ ụ mịẹ adalaịmọ a paaemi.”

9-10. Itukosuotubo tebara ka kị baratụa sei mịẹdẹ ụbọ pịrịwẹrị wó mịẹdẹ sei kẹrị-iroro a paaemi a o?

⁹ Itukosuotubo ụbọ dịnẹmọ wẹrị bịsẹ sei mịẹ yebo kẹrị iroromịnị. Gbaamaba, ụbọmi bẹtịbị yetolumọ angọ pịrịgha anịghakpọ egberigbaayọ a múgha kị duonị dọlọdọlọ suusụọmịnị a? Ụbọmị ba ifiebosẹ anịghakpọ adụdụ duo bo bara akị tẹẹ Jehovah pịrịgha? Ụbọmị seiye mịẹ dịsẹ inyenrinbụọ datịẹmọmụ yọbị suusụọdẹ a? Ụbọmị sei ikie-ama kị kẹrị anịghakpọ sei yeama ka kị angọmịẹ ganaganamịnị a? Wó bịsẹ sẹlẹ angọ pịrịdẹ yebo tebara ka kị wó ye-iroro bá ye-mịẹmịnị bara gbeledẹ a o? Wó mịẹdẹ seibị wó Daụ, Jehovah gbele-emi bara ụbọ mọ nimi wẹrịemi a o?

¹⁰ Itukosuotubo ụbọ ụndụ gbelemọ biibịbịama biigha fa, anịa ụbọ mịẹ suusụọwẹrị bịsẹ sei mịẹ yelaa biibịbịama kị ámịnị mọ biimịnị. (Prov. 20:5) Ámịnị Nathan akị David mọ mịẹ bara dimịẹ a paaemi, ámịnị tọnmọdịayeama kọn baratụa ụbọ pịrị a paaemi. Ụbọ mọ waị gbeleimịnị ifiemị, ụbọmị wó mịẹ sei kọn angọ a nimi a paaemi. Ómịnị boloudei kpọ paaemi.

11. Jesus tebara ka kị sei mịẹdẹ otu mọ inyenrin ma o?

¹¹ Itukosuotubo angọtụa Jesus dimịẹmịnị. Jesus fịịyọ duo seribodẹmị ómịnị Tarsus duo paaemi Saul mọ ẹrẹtimi ifiemị Jesus kẹnị yelaa biibịbị akị Saul biimị: “Saul, Saul, tetuu kị duonị ị́mịnị ine ụyamọmịnị a o?” Jesus bịsẹ biibịbị kọn baratụa ụ pịrịwẹrị wó mịẹ sei kẹrị iroromị. (Acts 9:​3-6) Bá “Jezebel tịịnmịnị erema,” gbelemọ yọbị, Jesus gbaamị: “Ịmịnị ánị boloudeimụ ifie akị a pịrịmị.”—Rev. 2:​20, 21.

12-13. Itukosuotubo tebara ka kị ifie kọn sei mịẹ ụbọ pịrịwẹrị waị boloudei a paaemi a o? (Foto kpọ dii.)

¹² Itukosuotubo Jesus damịẹmịnị duonị, ámịnị kịalị sei mịẹdẹ ụbọmị deigha fa bara irorogha. Zụa otu bọlọụ Itukosuotubo mọ gbeleimịnị ifie ka deimịnị, zụa otu ba bịsẹ bara fa. Anịduonị itukosuotubo kẹnị ifie dẹịn bara ka kị ụbọ mọ gbelei a paaemi. Bọlọụ gbelei ifie bụọdaba, sei mịẹ ụbọmị kaanghaba itukosuotubo gbaa ụ pịrị egberibo kẹrị-iroro a paaemi. Ómịnị angọ-iyerimọ bara Jehovah wó mịẹ seibị akị ụ bụọmọ bara tẹẹ a paaemi. (Ps. 32:5; 38:18) Anịduonị, waị zịnị ifie a gbeleidaba, ụbọmị bọlọụ ifie bọọ nanawẹrị inyenrinbụọ nanagha kpọ paaemi.

¹³ Baratụa sei mịẹ ụbọ pịrịwẹrị bo boloudeimụ yọbị, Itukosuotubo ụbọ laaemi ye ma ebibara sụọtuunimi bá ebimịẹdịa. Jehovah baratụa ụbọ pịrịwẹrị boloudei bara ámịnị mọ tẹẹmịnị, bá sei mịẹdẹ ụbọmị waị boloudeimụ ukiemọye kpọ ámịnị mọ nana wẹrịemi.—2Tim. 2:​25, 26.

14. Sei mịẹmịnị ụbọ boloudeidaba, te ụbọ kị tokonị bị akị agbẹị-emi a o, má tetuu a?

¹⁴ Sei mịẹmịnị ụbọmị boloudeidaba, wo mịẹ pọwẹị kụrọmọmịnị! (Luke 15:​7, 10) Te ụbọ kị kọkọ seimịẹ ụbọ mịẹ boloudei ma o? Itukosuotubo a? Paul sei mịẹ otu gbelemọ yọ bọọ gẹẹ egberimị dii: “Kaanghaba Ọkpọnanaowei á mịẹ boloudei kpọ paaemi.” (2Tim. 2:25) Paul gẹẹ egberi gbelemọ yọmị, kẹnị study note gbaa bara dii: “Bịsẹ ụbọbị wó iroroyebo mọ wó inyenrinbụọ mọ deidaba, omịnị kịmịawọụ tokonigha fa, omịnị Jehovah kị tokonimịnị, ómịnị kị baratụa bịsẹ ụbọ pịrịwẹrị boloudeimị. Paul mọkpọ kịmị boloudeidaba bịsẹ bolou duo paamịnị ebi yebo gbaamị. Boloudeidẹ kịmị bị bọ ebibara gesii tolumọyebo nimi dẹịnmịnị, baratụa ụ pịrịwẹrị waị ebibara ye-iroromịnị, bá Satan pịdẹyebo kpọ duo ụ zụọmịnị.—2Ti 2:26.”

15. Itukosuotubo tebara ka kị mọkpọ baratụa boloudeidẹ ụbọ pịrị a paaemi a o?

¹⁵ Sei mịẹmịnị ụbọ boloudeidaba, itukosuotubo mọkpọ barịị barịị mú ụbọ laa wẹrị kurọmọye kọn ụbọ pịrịmịnị anịkị ubọbị ba Satan pịdẹyebo a sụọgha fa bá baratụa ụbọ pịrịwẹrị ebibara Jehovah karị a paadẹ. (Heb. 12:​12, 13) Itukosuotubo sei mịẹ ụbọ gbaa á pịrị egberibo gbaa kẹnị kịmị kpọ pịrịgha. Anịa itukosuotubo teeki gbaa itu pịrị agbẹị-emi a o?

“KỊMỊSẸ-TỌRỤYỌ KA ỤBỌ ZEZEMỌ”

16. Paul 1Timothy 5:​20, bọọ “kịmịsẹ-tọrụyọ” gbaamị, ómịnị te otu kị gbaamịnị a?

¹⁶ Wo wẹrị 1Timothy 5:20 goo. Paul kọn “sei mịẹmịnị otu” zezemọmụ bara gbaa akị itukosuowei Timothy pịrịmị. Paul teeki gbaamịnị a? “Kịmịsẹ-tọrụyọ” Paul mọ gbaa yọmị kọn itu bọọ emi kịmịbosẹ bẹmọgha. Kọn ụbọ mịẹ sei bọọ sụọtuunimi wẹrịemi kịmịbo kị gbaamịnị. Gbaamaba tọrụ akị yebị ẹrị otubo, anịghakpọ sei mịẹdẹ ụbọmị gbaa pịrị wẹrịemi kịmịbo. Itukosuotubo kịlịkịlị bara kọn egberi kẹrị ẹrẹdẹ, bá sei mịẹ ụbọ zezemọdẹ bara gbaa akị bịsẹ sei nimi wẹrịemi kịmịbo pịrịmịnị.

17. Biin kịmịama itu bọọ kịmị kụrọsei mịẹdẹ bara nimidẹ anịghakpọ nimi mịnịaba, itukosuotubo teeki mịẹmịnị a o, bá tetuu a?

¹⁷ Zụa ifieama, itubị biin kịmịama ụbọ mịẹ sei nimidẹ anịghakpọ nimi-mịnị. Bịsẹ bara paadaba, itusẹ kị bo “kịmịsẹ-tọrụyọ” a paadẹ. Anịduonị bịna ụbọmị zezemọdẹ bara kẹnị itukosuowei mọ mịẹ itusẹ nimimọmịnị. Tetuu a? Paul parụmị: “Berifaanye ka paa kọọ otubo” pịrịwẹrị sei bolou a korosụọgha fa.

18. Naa 18 kụraị laaghatimi benibiledẹ tọbọụ sei mịẹdaba, itukosuotubo tebara kị mịẹmịnị a o? (Foto kpọ dii.)

¹⁸ Naa 18 kụraị laaghatimi benibiledẹ awọụbo ba? Itukosuotubo maa itukosuotu-ama fịrịmọ mú tọbọụ mọ wó daụ mọ yin mọ otubo mọ laawẹrị egberi kẹrị ẹrẹteimịnị.b Daụ mọ yin mọ otubo teeki mịẹwẹrị baratụa ánị tọbọụ pịrịwẹrị boloudeidẹ bara itukosuotubo mọ akị á biimịnị. Itukosuotubo tọbọụ daụ mọ yin mọ otubo baratụa tọbọụ pịrịdẹ bara kọn á biimịnị. Tọbọụmị kọkọ tolumọbịbị peiwẹrị ebi inyenrinbụọ mịẹ paamọmịnịsẹ, maa Itukosuotubo egberi bị akị bịsẹ yọ tịẹmọ a paaemi. Daụ mọ yin mọ otubo kị mọkpọ baratụa tọbọụ pịrịtimimu bara tọnpẹlẹ a paaemi. Tarị nana bara akị ánị awọụbo zezemọmụ fịrịmị Jehovah mọ kọn daụ mọ yịn mọ otu kị pịrị wẹrịemi bara itukosuotubo mọ nimi wẹrịemi. (Deut. 6:​6, 7; Prov. 6:20; 22:6; Eph. 6:​2-4) Bịsẹ ifie bụọdaba, itukosuotubo zụa ifieama waị mú daụ mọ yin mọ otubo baratụa ánị tọbọụ pịrịmịnị bara diimịnị. Anịa tọbọụmị dei bụọgha ifiesẹ, itukosuotubo teeki mịẹmịnị a o? Bịsẹ bara paadaba, bịsẹ tọbọụ daụ mọ yin mọ otubo Jehovah Iseriotu aba, itukosuotubo mọ á mọ mó bá bịsẹ tọbọụ mọ gbeleiwẹrị egberi kẹrị ẹrẹteimịnị.

“JEHOVAH DIENENI NANA MÁ OLOMU BARA TARỊ NANA EMI”

19. Itukosuotubo kụrọsei mịẹ ụbọ mọ gbeleidaba, ámịnị tebara ka kị Jehovah dimịẹmịnị a o?

¹⁹ Jehovah itu mịẹ yalịyalịmụ fịrị akị committee bọọ emi itukosuotubo pịrị wẹrịemi. (1Cor. 5:7) Mịẹ a paaemi aba, sei mịẹ ụbọmị boloudei kị ámịnị mọ dọụmịnị. Ámịnị baratụa ụbọ pịrịmịnịmị, ụbọ dei a paaemi eti ámịnị mọ nana wẹrịemi. Tetuu a? Jehovah “Jehovah dieneni nana má olomu bara tarị nana emi” Daụ duonị, ámịnị Jehovah dimịẹ kị dọụmịnị. (Jas. 5:11) Fịrịmọpaaowei John owadẹ kpọ bei inyenrinbụọ mịẹdịamị. Ómịnị gẹẹmị: “Ine kala awọụama, ámịnị sei mịẹ ị mọ dọụgha kị duonị ịmịnị bei yebo kọn á gẹẹmịnị. Anịa kịmị sei mịẹdaba, baratụa wo pịrịmụ ụbọ bị Daụ mọ emi, anị kịrịịye mịẹ owei, Jesus Christ.”—1John 2:1.

20. Bei tịnẹ wẹrịemi egberibo kunumọ yebị omịnị teeki kẹrị ẹrẹmịnị a?

²⁰ Kịmị mịẹ pọwẹịgha yọbị, zụa ifieama sei mịẹ ụbọmị boloudei bụọgha. Bịsẹ bara paadaba, ụbọ kọn itu kọnsiinmịnị. Kịmị sei mịẹ wẹrị boloudei bụọgha ifiesẹ itukosuotubo tebara ka kị egberi kẹrịpẹlẹmịnị a o? Bei tịnẹ wẹrịemi egberibo omịnị kunumọ yebị bei egberi kẹrị ẹrẹmịnị.