Jehovah gbaa Moses pịrịmị: ‘Uwou ogun agọnọ bọọ ị dọụbo. Ịmịnị okuta-apara akị ine olokobo gẹẹ ị́ pịrị mịnị.’ Moses ogun agọnọ bị uwou wẹrị ogun agọnọ bọọ timi 40 erein-ama mọ 40 dein-ama mọ baịmị. Moses bịsẹ yọ bọọ timi ifiemị, Jehovah maa okuta-apara akị Oia Olokobo gẹẹwẹrị, kọn Moses pịrịmị.

Timi kẹnị ifie laamị, Moses á gbeinmọ-koromọdẹ bara Israel-otubo mọ iroromị. Ámịnị gbaa Aaron pịrịmị: ‘Omịnị wo bọlọụdaamụ ụbọ dọụwẹrịemi. Wo karịmụ ye mịẹ wo pịrị!’ Aaron gbaamị: ‘Ánị goldbo akị ị pịrị.’ Aaron goldbo sanị wẹrị akị ivin tẹmẹmị. Ámịnị gbaamị: ‘Bei ivin kị wo kọn Egypt duo paabo Ọkpọnanaowei mị!’ Ámịnị ugé tei gold akị tẹmẹ-tịẹmọdẹ yebị pịrịmị. Ánị mịẹ yemị kịrịị ma? Kịrịịgha, tuumị ámịnị Jehovah bẹtịbị kị karịmụ bara gbaa Jehovah pịrịdẹ wẹrịmị. Anịa mị tịẹkirimị, ámịnị ánị gbaa wẹrị bara bị mịẹgha.

Jehovah paamịnị yebo ẹrịwẹrị gbaa Moses pịrịmị: ‘Mú Israel-otubo laa. Ámịnị ine gbaa egberi peigha timi oru-ama kị karịmịnị.’ Moses maa okuta-aparabo sibe wẹrị ogun agọnọ duo iyeri mú á laamị.

Moses mú ánị bẹnịị-emi yọ mọ naịn ifiebị kịmịbo duma tuunmịnị bara Moses mọ naamị. Ámịnị sẹị tịbị-oboimọ ivin pịrịtimi bara Moses mọ ẹrịmị, ómịnị boloukọn kụrọmọmị. Moses maa okuta-aparabo akị kiri bọọ gbein-koromọ wẹrị asẹẹ pẹịsiinmị. Moses kirimọ-kirimọ Israel-otubo tẹmẹ wẹrị ye seimọmị. Ómịnị Aaron biimị: ‘Bei kịmịbo kpọ tebara ka kị iné ịkịọụ gbaa deimọ wẹrị ị́ pịrị bei sei fịrị wẹnị ma o?’ Aaron gbaamị: ‘Boloukọn kụmọ. Ị́mịnị kpọ mị kịmịbo emibara nimi wẹrịemi. Ámịnị ánị karịmụ ye dọụmị, anịduonị ịmịnị ánị goldubo akị fẹnị bọọ tụa wẹrị, mị ivin mịẹpaamọmị!’ Aaron bịsẹ bara mịẹ agbẹịgha wẹrịmị. Moses waị ogun agọnọ bọọ mú wẹrị kịmịbo bụọmọ bara akị Jehovah tẹẹmị.

Jehovah wó gbaa bara mịẹ otubo bụọmọmị. Israel-otubo Moses gbaa bara dimịẹmụ yọmị yelaa-emi bara bị ị́ mọ ẹrị ma?

Moses Sinai Ogun agọnọ bọọ timi ifiebị, Jehovah Moses fịrịmọ tabernacle tịịnmịnị tapolin-karịwarị kẹrịmị. Bịsẹ warị bị zịnị tapolin-warịbo mọ bẹbẹ paaemi. Israel-otu bịsẹ yọ ka timi Jehovah karị mịnị. Ámịnị tapolin-karịwarị sibe wẹrị ánị múdẹ yọsẹ a mú a paaemị.

Jehovah gbaamị: ‘Gbaa Israel-otubo pịrịdá, ámịnị ánị nana wẹrịemi yesẹ paamọbodá akịtụamọ tapolin-karịwarị kẹrị.’ Israel-otubo gold, silver, copper, precious stones, bá jewelry paamọ bomị. Ámịnị wool, linen, nama-ozunama, bá zịnị biin yeama kpọ paamọ bomị. Ámịnị bara finimọ kụrọmọ duonị, ámịnị yebo kọnbotimi kẹnị ifie laamị, Moses gbaa á pịrịmị: ‘Ánị kọn bodẹ yebo ebidẹ! Bá kọnbo kụmọ.’

Bara-fịrị dịị wẹrịemi ereama mọ owei-ama mọ baratụa tapolin-karịwarị kẹrịmị. Jehovah nimiye akị warị kẹrịmụ otubo pịrịwẹrị fịrị wẹnịmị. Zụa otu eri-ama mịẹmị, zụa bá bịdẹ gbeinmị. Zụa otu okuta-ama bẹnịmọmị, zụa bá gold kọn fịrị wẹnịmị, zụa bá tịn-ama karamị.

Jehovah gbaa á pịrị bara kị ámịnị mọ kọn warị kẹrịmị. Ámịnị kẹnị ebi curtain mịẹ wẹrị tapolin-karịwarị bị akị maa-anga dịẹmọmị, Yalịyalị yọ mọ bá Yalịyalị Dẹịn yọ mọ. Acacia tịn mọ gold mọ kị kọn avụọ ekpedi mịẹ wẹrịmị, avụọ ekpedi mị akị Yalịyalị Dẹịn yọ ka tụa wẹrịmị. Gold akị mịẹwẹrị tụkpa mọ table mọ bá incense ịyọụnmọ mụ tana mọ Yalịyalị yọ ka timimị. Copper akị mịẹ wẹrịemi basin mị tapolin-karịwarị tiri-anga ka timimị. Avụọ ekpedi bị, Israel-otubo Jehovah dọụbara mịẹmụ bara kikoromọdẹ bara akị ánị ukiemọ timimị. Ị́mịnị kpọ avụọ tịịnmịnị ye nimi wẹrịemi? Anị kẹnị sẹkpẹnẹẹ kikoromọye.

Jehovah Aaron mọ wó owei-awọụbo mọ kị sẹlẹwẹrị tapolin-karịwarị bọọ ịkịan-kụn fịrị wẹnịtimimị. Ámịnị ebibara tapolin-karịwarị tọlọmọ bá bịsẹ yọ bọọ timi ịkịan-kụn Jehovah pịrịtimimị. Tịbị ịkịan-kụn owei, Aaron bẹtịbị kị Yalịyalị Dẹịn yọ duo sụọ timimị. Wó seibo mọ, wó warịbolou-otu seibo mọ bá Israel-otu seibo bụọmọmụ yọ duonị, ómịnị kụraị kẹnị ifie ka Yalịyalị Dẹịn yọ duo sụọwẹrị ịkịan-kụn timimị.

Israel-otubo Egypt a barasin wẹrị kẹnị kụraị bụọdẹ kị ámịnị tapolin-karịwarị kẹrịsinmị. Kẹrịsiindẹmị, ámịnị Jehovah karịmụ yọ nanamị.

Israel-otubo mịẹ yebị Jehovah a tọrụkẹrị duonị, ómịnị obudou mịẹ tapolin-karịwarị agọnọ bọọ paamọmị. Obudou bị tapolin-karịwarị agọnọ bọọ emi ifiesẹ, Israel-otubo mọkpọ ánị timi yọ ka timimị. Obudou bị serii daba, wẹnịmụ ifie laadẹ bara Israel-otubo mọ nimidẹ duonị, ámịnị tapolin-karịwarị gbọụnwẹrị obudou bọọ tuuduotimimị.