Israel-otubo Sinai Ogun bọọ barasin wẹrị Paran bou duo wẹnị mú Kadesh laamị. Jehovah bịsẹ yọ bọọ gbaa Moses pịrịmị: ‘Oi-maamụfịnị oweiama sẹlẹ, ziitubosẹ kẹnị-ụbọ sẹlẹdá, á fịrịmọ mú Ịmịnị akị Israel-otubo pịrịmụ Canaan ogbo bọọ tuudọụ.’ Anịduonị Moses oi-maamụfịnị owei-ama sẹlẹwẹrị gbaa á pịrịmị: ‘Canaan ama bọọ múdá ogbo bị ye-gboro a ebi-emi bara dii. Ama bọọ emi kịmịbo kụrọ-emi anịghakpọ suu-emi bara dọụ ẹrị. Bá ámịnị tapolin-warịama anịghakpọ fanụ akpakpa-ama tụa wẹrịemi ama ka inyenrinmịnị kpọ tuudọụ.’ Oi-maamụfịnị ye a tuudọụ otubo, Joshua mọ Caleb mọ kpọ sụọ-emi. Asẹẹ Canaan a múmị.

Maasii erein-ama bụọdẹmị, ye a tuudọụ otubo waịbomị, ámịnị fig-ama mọ pomegranate-ama mọ bá grape-ama mọ kọn tụamọ bomị. Ye a tuudọụ otubo gbaamị: ‘Ogbo mị ebi-emi, anịa ama bọọ emi otubo kụrọemi bá fanụ akpakpabo kpọ serii kụrọmọ-emi.’ Caleb gbaamị: ‘Omịnị á dẹịnmọ mịnị. Boda wo mú!’ Caleb bịsẹ bara gbaa tuumị ị́ mọ nimimị? ‘Tuumị, ómịnị mọ Joshua mọ eti akị Jehovah á tụa wẹrịemi. Anịa kọọ oia kịmịbo gbaamị: ‘Wo mú kụmọ! Kịmịbo oguanraụn anịghakpọ agụẹrẹn-ama bara kị dụba kụrọmọ-emi! Omịnị ánị tọrụyọ bọọ ịkpaịkpaị-ama bara k’emi.’

Egberimị Israel-otubo mịẹ suusụọmị. Ámịnị mọnọmọnọ ẹrẹ zọzọ pịrịmị: ‘Wo zịnị kịmị sẹlẹ dá wo daa waị Egypt a mú. Tetuu kị duonị, omịnị bịsẹ yọ bọọ mú á pịrị baa mịnị a o?’ Joshua mọ Caleb mọ gbaamị: ‘Jehovah diiseimọ kụmọ, malafakụmọ. Jehovah wo kekere mịnị.’ Anịa Israel-otubo peigha. Ámịnị Joshua mọ Caleb mọ baa dọụmị!

Jehovah teeki mịẹ ma o? Ómịnị gbaa Moses pịrịmị: ‘Ịmịnị mịẹ Israel-otubo pịrịdẹ yebosẹ, ámịnị mọkpọ ine gbaaye peigha. Anịduonị ámịnị ogbo-abadị bọọ timi 40 kụraịama baị mịnị, bá bịsẹ yọ ka timi fịị mịnị. Ánị awọụbo mọ, Joshua mọ bá Caleb mọ bẹtịbị kị, ị́mịnị akị á pịrịmụ ogbo bọọ inyenrin mịnị.’

Israel-otubo bou bọọ timi kẹnị ifie laamị, Korah, Dathan, Abiram, bá 250 kịmịama mọ tịbịkụrọ Moses pịrịmị. Ámịnị gbaa ụ pịrịmị: ‘Ị́ kpọ mịẹ bụọdẹ! Tetuu kị duonị, ị́mịnị wo tịbị-owei bá Aaron tịbị ịkịan-kụn owei a paaemi a o? Jehovah wosẹ mọ kị emi, ị́ mọ Aaron mọ bẹtịbịgha.’ Jehovah boloukọọnmị. Ámịnị tịbịkụrọ ómịnị kị pịrịmịnị bara kị Jehovah mọ kọn yebị diimọmị!

Moses gbaa Korah mọ bá Korah anga bọọ emi kịmịbo mọ pịrịmị: ‘Baị laadaba incense akị ánị fẹnị-tọnịyebo a tụa dá tapolin-karịwarị bọọ bo. Jehovah wó sẹlẹdẹ ụbọ bị mịẹgaan wo dịa mịnị.’

Barịị ereinmị Korah mọ 250 oweibo mọ mú tapolin-karịwarị bọọ Moses laamị. Ámịnị ịkịan-kụn otuama bara akị angọ mịẹwẹrị bịsẹ yọ bọọ incense ịyọụnmọmị. Jehovah gbaa Moses mọ Aaron mọ pịrịmị: ‘Korah mọ wó kịmịbo mọ emiyọ duoserii.’

Korah tapolin-karịwarị bọọ Moses dọụ múmị, Dathan, Abiram, mọ bá ánị ziitubo mọ múgha. Israel-otubo Korah, Dathan, bá Abiram tapolin-warịbo emi yọ duo serii bara Jehovah mọ gbaa á pịrịmị. Israel-otubo ifie famọgha bara yọ duo seriimị. Dathan, Abiram, bá ánị ziitubo mọ ánị tapolin-warị bọlọụ bọọ tịẹmị. Ámịnị ịkịọụ kpọ a tọngha bara kirimị finiiwẹrị amẹnịmị! Ámịnị tapolin-karịwarị bọọ emi ifie mị fẹnị koro bo Korah mọ wó 250 kịmịbo mọ ịyọụnmọ báamị.

Bịsẹ yọ bụọdẹmị, Jehovah gbaa Moses pịrịmị: ‘Ziitubosẹ a bọlọụdaamịnị otu akọlọbo akịdá ánị ẹrẹbo kọn akọlọbo a gẹẹ. Anịa Aaron ẹrẹ ka kị Levi ziituu akọlọ bọọ gẹẹ. Akọlọbo akị tapolin-karịwarị bọọ tụa, Ine sẹlẹmụ ụbọ akọlọbị odedeama sọụ mịnị.’

Barịị ereinmị, Moses akọlọbosẹ kọn paamọbowẹrị, akị warị tịbị-otubosẹ dịamị. Aaron akọlọmị odedeama sọụmị, bá pịna-emi almond tịn-beinyaịama kpọ akọlọ bọọ timimị. Bịsẹ baramị, Jehovah Aaron kị sẹlẹ akị tịbị ịkịan-kụn owei a tụadẹ bara mịẹdịamị.