Jericho ama bọọ tuudọụyọ a mú Israel-otubo, Rahab warị ka timimị. Israel-otubo Rahab warị ka emi bara Jericho pẹrẹ mọ naa ifiebị, ómịnị soldier-otu fịrịmọ Rahab warị bọọ múmị. Rahab bịsẹ maa Israel-otubo akị anị warị agọnọ bọọ sọwẹị wẹrị, Israel-otubo zịnị anga duo múdẹ bara gbaa soldier-otubo pịrịmị. Rahab gbaa tuudọụyọ abo otubo pịrịmị: ‘Jehovah á mọ mọ́ emi bá á barịwẹrị Jericho dẹịnmọ mụ bara ị mọ nimi wẹrịemi duonị, ịmịnị á barị mịnị. Sisei mịẹ barabosẹ ámịnị ine warị-otubo zụọbụọmọ mụ bara gbaa ị pịrị.’

Tuudọụyọ a bo otubo gbaa Rahab pịrịmị: ‘Kẹnịye kpọ ine warị-otubo laagha fa.’ Ámịnị mọkpọ gbaamị: ‘Kwekwe ịgba anịghakpọ díi akị ine window bọọ kịkaị daba, kẹnịye kpọ ine warị-otubo laagha fa.’

Rahab ịgba anịghakpọ díi akị window bọọ kịkaị wẹrị ye a tuudọụyọ abo otubo window duo paamị. Ámịnị ogunbo emi yọ bọọ sọwẹịtimi tara dein bụọdẹ kị waị mú Joshua laamị. Ámịnị Jordan Tọrụ bẹịn ifiemị, ámịnị ogbo bị akịmụ bara akị angọtọlọmọmị. Ámịnị bọlọụ Jericho ama kị dẹịnmọmị. Ámịnị sondia erein akị ama wẹnị yọrọ bara Jehovah mọ gbaa á pịrịmị. Bịsẹ sondia ereinbo, ámịnị erein kẹnị ifie ka kị ama wẹnị yọrọ mịnị. Sọnọma-karamọ erein bị ámịnị sọnọma ifie ka kị ama wẹnị yọrọmị. Bịsẹbara á mọ mịẹsiindẹ mị, ịkịan-kụn otubo ánị egbelegbelebo binemị, soldier-otubo bá gịyakụrọmọ bị, Jericho fanụ-akpakpabo koromị! Anịa Rahab warị bị korogha. Rahab warị bị Jericho fanụ-akpakpa agọnọ ka timimị. Rahab eti akị Jehovah a tụa duonị, kẹnịye kpọ, a mọ ánị warị-otubo mọ laagha.

Canaan ibe bọọ emi amabosẹ Jericho ama bọọ paa yebị naamị. Ánị pẹrẹbo gbeleiwẹrị Israel-otubo mọ sụụmụ bara tọnmị. Anịa Gibeon-otubo á mọ mọ́ sụọ sụụ dọụgha duonị, mịẹmụye ámịnị mọ tọnpẹlẹmị. Ámịnị kaịn-kaịn bịdẹama tụawẹrị mú Joshua laawẹrị gbaamị: ‘Omịnị alayọ kị duobo-emi. Omịnị Jehovah ẹrẹ naadẹ, bá Jehovah Egypt mọ Moab mọ gbelemọ yọ bọọ mịẹ á pịrị yebo kpọ naadẹ. Ámịnị wo kẹrị-sụụgha fa bara gbaadaba, omịnị mị bọlọụ bọọ omoni-sụọ á pịrịmịnị.’

Joshua Gibeon-otubo gbaa egberi peiwẹrị á mọ mọ́ sụụgha fa bara gbaamị. Tara dein bụọmị, Gibeon-otubo duo bo yọmị alagha bara Joshua mọ nimimị. Ámịnị Canaan kị duobomị. Joshua Gibeon-otubo biimị: ‘Tetuu kị duonị, ámịnị ikpe wo pịrị ma o?’ Ámịnị parụmị: ‘Omịnị malafa kị duonị, bịsẹbara mịẹmị! Ánị Ọkpọnanaowei Jehovah kị sụụ á pịrịmịnị bara wo mọ nimi wẹrịemi. Sisei wo báa kụmọ.’ Joshua á báagha fa bara gbaa á pịrịdẹ wẹrịmị, anịduonị Joshua á báagha.

Bịsẹ ifie bụọwẹrị alaghamị, sọnran Canaan pẹrẹama mọ bá ánị sụụ-otubo mọ Gibeon-otubo mọ sụụmụ bara gbaamị. Joshua mọ wó sụụ-otubo mọ Gibeon-otubo zụọbụọmọ mụ duonị, ebebu deinsẹ akị wẹnịmị. Barịị pekei mị, ámịnị koro sụụmị. Canaan-otubo baịn bẹbẹyọ bẹbẹyọ a múmị. Ánị múdẹ yọsẹ Jehovah osuo-kutuama mịẹ koromọmị. Bịsẹ yọ bụọdẹmị, ụraụ bị viinkụmọ bara Joshua mọ kọn Jehovah tẹẹmị. Bịsẹ timitimi ye naa paagha wẹrịmị. Anịa tetuu kị duonị, ụraụ bị viinkụmọ bara Joshua mọ gbaa Jehovah pịrị ma o? Joshua eti akị Jehovah a tụa wẹrịemi kị duonị, bịsẹ bara gbaamị. Ụraụmị viinghatimi Israel-otubo Canaan pẹrẹbo mọ bá ánị sụụ-otubo mọ dẹịnmọmị. Ụraụmị viinghatimi bịsẹ erein famị.