Timi kẹnị ifie laamị, Israel-otubo waị Jehovah a barasinwẹrị oruama karịmị. Midian-otubo sọnọma kụraị akị Israel-otu namabo furu bá ánị gboroyebo kpọ seimọmị. Midian-otu bara duo tẹị dọụmịnị duonị, Israel-otubo ogun-ama mọ bá ogun-opoloama ka sọwẹịmị. Jehovah á zụọbụọmọ bara ámịnị mọ tẹẹmị. Anịduonị Jehovah angel-owei fịrịmọ mú Gideon tịịnmịnị owei laamị. Angel-owei mị gbaamị: ‘Jehovah ị́ sẹlẹ akị sụụ olotu-owei mịẹdẹ.’ Gideon biimị: ‘Ịmịnị kẹnịye kpọ a paagha kịmị. Ịmịnị tebara kị mịẹtimi laa Israel-otu zụọbụọmọmịnị a o?’

Gideon tebara kị mịẹtimi Jehovah ụ sẹlẹdẹ bara nimi mịnị a o? Ómịnị wool kọn kiri bọọ koromọwẹrị gbaa Jehovah pịrịmị: ‘Pekei laadẹ nị, kiri mị ịkparịemi bá atọnlọ wool mị bosumọ wẹrịemisẹ, ịmịnị Israel-otubo zụọbụọmọ ị́mịnị mọ dọụ wẹrịemi bara ị mọ nimimịnị.’ Barịị pekei bị, wool mị bosuemi, kirimị bá ịkparịtimimị! Kọọ baị pekei mị, wool mị ịkparịdá kiri kị bosu bara Gideon mọ gbaamị. Bịsẹbara paadẹmị Gideon Jehovah ụ sẹlẹdẹ bara nimimị. Ómịnị bá tamanaịnyọ fa. Ómịnị wó sụụ-otubo bẹnịmọwẹrị mú Midian-otubo mọ sụụmị.

Jehovah gbaa Gideon pịrịmị: ‘Ịmịnị Israel-otubo barịwẹrị á dẹịnmọmịnị. Anịa ị́mịnị biin sụụ-otuama kị nanawẹrịemi duonị, ị́mịnị iné bẹtịbị kụrọ ka kị sụụ dẹịnmọ bara iroro a paaemi. Malafamịnị otubo fịrịmọ waị warị a mú.’ Anịduonị 22,000 sụụ-otuama waị warị a múmị, 10,000 kị kọọmị. Jehovah gbaamị: ‘Sụụ-otubo mọkpọ biin bụọemi. Sụụ-otubo kọn ụba bọọ bo benibou. Ámịnị beni boumịnị ifiebị, igiren-otu bomịnị bara diimịnị otubo bẹtịbị kị kọn.’ Tara ọdọzọ kịmịama bẹtịbị kị igiren-otu bomịnị bara diimị. Mị dọlaị kịmịbo kị 135,000 Midian sụụ-otubo dẹịnmọmịnị bara Jehovah mọ gbaamị.

Bịsẹ deinmị, Jehovah gbaa Gideon pịrịmị: ‘Midian-otubo mọ sụụmụ ifie laadẹ!’ Gideon egbelegbele-ama akị sụụ-otubo pịrịmị. Tụkpa-ama kpọ akị opu unguama a tụawẹrị ungubo akị á pịrịmị. Ómịnị gbaa á pịrịmị: ‘Ine mịẹmịnị bara dimịẹ.’ Gideon wó egbelegbele biné anịghakpọ ofuro, wó ungu famụ-pẹị, bá wó tụkpa fọụnwẹrị luloumị: ‘Jehovah agbọdọ mọ Gideon agbọdọ mọ!’ Wó 300 kịmịbosẹ Gideon mịẹbara dimịẹmị. Paaye bi Midian-otubo mịẹ malafamị, anịduonị ámịnị baịnmị. Ámịnị bá mịẹmụ bara nimigha duonị, ámịnị zọzọ kị kẹrị sụụmị. Jehovah baratụa Israel-otubo pịrịwẹrị ánị igiren-otubo dẹịnmọmị.

Elkanah Israel-owei, ómịnị maa ere kị nana wẹrịmị, Hannah mọ Peninnah mọ, anịa ómịnị Hannah tarị akị Peninah dẹịnmị. Peninnah biin awọụama kị ziimị, Hannah tọbọụ ziigha duonị, Peninah ifiebosẹ Hannah mịẹdẹrị timimị. Kụraịbosẹ Elkanah mọ wó ziituu mọ mú Shiloh bọọ emi tapolin-karịwarị bọọ Jehovah karịtimimị. Kẹnị kụraị ámịnị bịsẹ yọ bọọ emi ifiemị, Hannah bolouịmbẹlẹgha bara Elkanah mọ ẹrịmị. Anịduonị ómịnị gbaamị: ‘Hannah, sisei youkụmọ. Ịmịnị ị́ mọ mọ́ emi. Ịmịnị ị́ tarịwẹrịemi!’

Bịsẹ ifie bụọmị, Hannah tẹẹ yọ a múmị. Amịnị Jehovah tẹẹmịnị ifiemị, you kpọ youmịnị. Amịnị gbaa Jehovah pịrịmị: ‘Jehovah, ị́mịnị owei-tọbọụ akị ị pịrịdaba, ịmịnị tọbọụ kọn ị́ pịrịmịnị, ómịnị wó ụndụsẹ akị ị́ karịmịnị.’

Tịbị-ịkịan kụn-owei Eli, Hannah youmịnị bara ẹrị ifiemị, Hannah wuru boukẹrịdẹ bara kị omịnị mọ iroromị. Hannah ụ parụmị: ‘Aịn-aịn, ịmịnị wuru boukẹrịgha, ine nanaowei. Ịmịnị kụrọ bụụdọọnye kị nanawẹrịemi, ịmịnị bịsẹ bụụdọọnye kị gbaa Jehovah pịrịmịnị.’ Eli mịẹkiridẹ bara nimimị, anịduonị ómịnị gbaa a pịrịmị: ‘Pebidá Ọkpọnanaowei iné dọụmịnị ye mịẹ ị́ pịrị.’ Eli bịsẹ bara gbaadẹmị Hannah gbeintimi waị warị a múmị. Kẹnị kụraị kpọ laaghatimi, Hannah owei-tọbọụ ziimị, amịnị Samuel ka kị tọbọụ bị tịịnmị. Bịsẹ paaye mị Hannah mịẹ pọwẹị bara ị́ mọ tọn a?

Hannah gbaa Jehovah pịrịwẹrị yebị baragha. Hannah Samuel a indou kịlẹmọdẹmị, amịnị Samuel kọn tapolin-karịwarị bọọ Jehovah karịyọ a múmị. Hannah gbaa Eli pịrịmị: ‘Bei ịmịnị kọn Jehovah bara bọọ bii tọbọụ bị. Ómịnị wó ụndụsẹ akị Jehovah kị karị mịnị.’ Elkanah mọ Hannah mọ kụraịbosẹ Samuel diiyọ a mú wẹrị aya coat kọn ụ pịrịtimimị. Jehovah waị tara owei-awọụ mọ bá maa ịyọrọ awọụama mọ kọn Hannah pịrị ziimị.