Israel-otubo waị Jehovah a barasiin wẹrị oruama karịmị. Ammon-otubo Israel-otubo kẹrịsụụ ifiemị, bịsẹ orubo baratụa á pịrịgha. Israel-otubo biin kụraịama ka kị ụyafịmị. Ụyamị á dẹịndẹ duonị, ámịnị gbaa Jehovah pịrịmị: ‘Omịnị mịẹkiridẹ. Sisei wo igiren-otu bara duo wo zụọbụọmọ.’ Israel-otubo a karịtimi orubosẹ gbeingọgọlọ wẹrị waị Jehovah karịmị. Israel-otubo ụyafịtimi fa bara Jehovah mọ dọụgha.

Ammon-otubo kẹrịsụụmụ yọ duonị, sụụ-olotu Jephthah kị Jehovah mọ sẹlẹwẹrị Israel-otu sụụ-bọlọụ daamị. Ómịnị gbaa Jehovah pịrịmị: ‘Ị́mịnị wo barị sụụ dẹịnmọwẹrị waịbo daba, bọlọụ warị duo paa baịnbo ị gbeinmọ mịnị ụbọmị ịmịnị mọ kọn ị́ pịrịmịnị.’ Jehovah Jephthah tẹẹbịbị naawẹrị ụ barị sụụ dẹịnmọmị.

Jephthah waịbo ifiemị, wó kpékẹnị ịyọrọ-tọbọụma kị paabo ụ laamị. Amịnị pọwẹị duma tuun tambourine kị farịtimimị. Jephthah teeki mịẹ mịnị a o? Ómịnị wó kikoromọ akị Jehovah pịrịwẹrị yemị ukie wẹrị gbaamị: ‘Apo, embaụ! Kụrọye ị́mịnị mọ kọn ị mịẹdẹ. Ịmịnị ye mịẹmụ bara gbaa Jehovah pịrịwẹrịmị. Bịsẹ ye laa mịẹbeinmọmịnị yọmị, ị́mịnị Shiloh bọọ emi tapolin-karịwarị ka timi Jehovah karị mịnị.’ Wó ere-tọbọụma gbaa ụ pịrịmị: ‘Ị daụ, ị́mịnị ye kikoromọ akị Jehovah pịrịwẹrịemi aba, iné gbaa wẹrịemi bara mịẹbeinmọ. Sisei ị bụọmọ ine ikie-otubo mọ maa agọnọwei kọn mú ogun-agọnọ bọọ timi. Bịsẹ yọ bụọdaba ịmịnị múmịnị.’ Bịsẹ ifie duo músẹ Jephthah-baụma anị ụndụsẹ akị tapolin-karịwarị ka Jehovah karịmị. Kụraịbosẹ Jephthah tọbọụ ikie-otubo Shiloh bọọ mú a diitimimị.

Tịbị-ịkịan Kụn-owei Eli maa owei-awọụama tapolin-karịwarị bọọ ịkịan-kụn fịrịwẹnịtimimị. Anị ẹrẹbo Hophni mọ Phinehas mọ. Ámịnị Jehovah olokobo kokogha bá sei bara ka kị kịmịotu mọ inyenrintimimị. Israel-otubo ịkịan-kụn Jehovah pịrị yọ a bodaba Hophini mọ Phinehas mọ nama bọọ ebidẹịn anga kị sẹlẹ angọ pịrịtimimị. Eli wó owei-awọụbo mịẹmịnị yebo naamị, anịa ómịnị kẹnịye kpọ mịẹgha. Jehovah mị ye bụọmọ paatimi alaa ifie laamịnị a?

Hophni mọ Phinehas mọ Samuel a kosu kị gbaa kpọ Samuel ánị sei inyenrinbụọbo dimịẹgha. Samuel Jehovah mịẹ pọwẹịmọmị. Kẹnị dein Samuel bụnụmịnị bị, kẹnị okolo wó ẹrẹ tịịntimi bara Samuel mọ naamị. Samuel wó bụnụtimi yọ duo serii mú Eli laawẹrị gbaamị: ‘Bei ịmịnị!’ Anịa Eli gbaamị: ‘Ịmịnị ị́ tịịngha o. Waị mú korobụnụ.’ Samuel waị mú korobụnụmị. Okolo mị waị Samuel tịịnmị. Samuel tarụ-karamọ ifie bọọ bịsẹ okolo naa ifiemị, Jehovah kị Samuel tịịnmịnị bara Eli mọ nimi mị. Anịduonị, Eli gbaa Samuel pịrịmị, ị́mịnị waị bịsẹ okolo naadaba, mị bara gbaa: ‘Jehovah sisei ẹrẹ, iné odubo-owei ị́ peimịnị.’

Samuel waị mú korobụnụmị. Bịsẹ okolo bị waị Samuel tịịnmị: ‘Samuel! Samuel!’ Samuel parụmị: ‘Sisei ẹrẹ iné odubo-owei ị́ peimịnị.’ Jehovah gbaa ụ pịrịmị: ‘Ịmịnị Eli mọ wó warịotubo mọ zezemọmịnị bara gbaa Eli pịrị. Wó awọụbo ine tapolin-karịwarị bọọ timi seiyeama mịẹmịnị bara ómịnị mọ nimiwẹrịemi, anịa ómịnị kẹnịye kpọ mịẹgha.’ Samuel pekeibosẹ karịwarị bọọ emi ogigabo fini-timimị, barịị pekei bị Samuel ogigabosẹ finimị. Jehovah gbaa ụ pịrịye gbaa akị Eli pịrịmụ yọmị, Samuel mọ esiinmị. Eli ụ tịịnwẹrị ụ biimị: ‘Ine tọbọụ, Jehovah teeki gbaa ị́ pịrị ma o? Kẹnịye kpọ kọọmọgha bara asẹẹ gbaa ị pịrị.’ Anịduonị Samuel Jehovah gbaa ụ pịrị yebosẹ gbaa Eli pịrịmị.

Jehovah Samuel mọ timi Samuel pịrị sọụdụbamị. Jehovah Samuel sẹlẹ akị bụrụ-owei mọ bá ụgụlapẹlẹ-owei mọ tụadẹ bara Israel-otubosẹ mọ nimimị.