Jehovah gbaa Samuel pịrịmị: ‘Jesse warị bọọ mú. Jesse awọụbo kẹnị ụbọ kị bo Israel a pẹrẹ sụọmịnị.’ Anịduonị Samuel Jesse warị bọọ múmị. Ómịnị Jesse awọụbo kosu-owei bị ẹrị ifiemị, ómịnị iroromị: ‘Bei ómịnị ka paaemi.’ Anịa bei bịsẹ oweigha bara Jehovah mọ gbaa Samuel pịrịmị. Jehovah gbaa ụ pịrịmị: ‘Ịmịnị kịmịotu angọ emibara diigha, Ịmịnị adụdụ kị dimịnị.’

Jesse mọkpọ sondia owei-awọụama paamọ bomị. Anịa Samuel gbaamị: ‘Jehovah mị sondia kịmị bolou bọọ kẹnị ụbọ kpọ sẹlẹgha. Ị́mịnị mọkpọ zịnị owei-awọụama emi a?’ Jesse gbaa ụ pịrịmị: ‘Kẹnị owei kọọemi, tupẹlẹ oweimị, David kị wó ẹrẹ. Ómịnị ine anịnabo kị diiyọ a múemi.’ David bo ifiemị, Jehovah gbaa Samuel pịrịmị: ‘Bei kị sẹlẹwẹrịemi owei bị!’ David kị Israel pẹrẹ a paamịnị duonị, Samuel pulo akị David tịbị-dẹsịmọmị.

Timi kẹnị ifie laamị, Israel-otubo mọ Philistine-otubo mọ sụụmị, Goliath tịịnmịnị giant, sụụ Philistine-otubo pịrịtimimị. Erein duo mú erein laasẹ, Goliath Israel-otubo mịẹdẹrị timimị. Goliath wó okolo bị uwoumọ wẹrị gbaamị: ‘Ị mọ mọ́ sụụmụ kịmị paamọbo. Bịsẹ ụbọ bị ị dẹịnmọdaba, omịnị ánị omoni-ama a paamịnị. Anịa ịmịnị á dẹịnmọdaba ámịnị wo omoni-ama a paamịnị.’

David bịnaotu kpọ Israel sụụ-otu bolou bọọ timimị, anịduonị, David fịyaị akị bịsẹ yọ bọọ wó bịna-otubo pịrị yọ a múmị. Ómịnị Goliath gbaa egberi naawẹrị gbaamị: ‘Ịmịnị ụ mọ mọ́ sụụmịnị!’ Pẹrẹowei Saul gbaamị: ‘Ị́mịnị kala tọbọụ.’ David ụ parụmị: ‘Jehovah baratụa ị pịrịmịnị.’

Saul wó sụụ yebo akị David pịrịmị, anịa David gbaamị: ‘Ịmịnị laa mị sụụ bịdẹ tụawẹrị sụụgha fa.’ David wó catapult mị akịwẹrị ụba a múmị. Ómịnị sọnran okuta-ama akị wó akpa bọọ tụamị. David baịn Goliath dọụ múmị. Goliath wó okolo bị uwoumo wẹrị gbaa David pịrịmị: ‘Bei yọ a bo kala tọbọụ. Ịmịnị ị́ kọn agọnọ bọọ fiinmịnị ofonibo mọ bá kụrọ namabo mọ pịrị fịmịnị.’ David malafagha. Ómịnị kpọ wó okolomị uwoumọ wẹrị gbaa Goliath pịrịmị: ‘Ị́mịnị agbọdọ mọ bá dumoun mọ kị kọn ị mọ mọ́ sụụ yọ a boemi, anịa ịmịnị Jehovah ẹrẹ ka kị ị́ mọ mọ́ sụụ yọ a boemi. Ị́mịnị wo kẹrị sụụgha, ị́mịnị Ọkpọnanaowei kị kẹrị sụụmịnị. Bei yọ bọọ emi otubosẹ, Jehovah kụrọ nana akị agbọdọ mọ dumoun mọ dẹịn-emi bara bị ẹrịmịnị. Ómịnị asẹẹ akị wo bara bolou a tụa mịnị.’

David okuta akị wó catapult bọọ tụawẹrị wó kụrọsẹ akị catapult teinmị. Jehovah baratụa David pịrị duonị, okuta mị Goliath okodo duo sụọmị. Anịduonị Goliath fịịmị. Philistine-otubo malafa baịnmị. David eti akị Jehovah a tụa bara mị, ị́mịnị kpọ eti akị Jehovah a tụawẹrịemi?

David, Goliath baa ifiemị, Pẹrẹowei Saul, David akị wó sụụ-bọlọụ daaowei mịẹmị. David biin sụụama dẹịnmọ duonị, biin kịmịama kị David nimimị. David mú sụụwẹrị sụụ dẹịnmọ wẹrị bodẹ ifiesẹ, erebo paabo duma tuun sẹịtimi mị. Bei á tuuntimi duma bị: ‘Saul ọgịzị dẹịn-emi kịmịama baadẹ, anịa David oia ọgịzị dẹịn-emi kịmịama kị baadẹ!’ Saul, David a fịọnkẹrị anịghakpọ tọrụdọọn duonị, David baa dọụmị.

David ebibara ka kị ẹkpẹtẹ (harp) farịtimi mị. David kẹnịbaị ẹkpẹtẹ farị Saul pịrịtimi ifiemị, Saul dumoun akị David gbeinmị. David dumoun kịlẹ bụọmọ wẹrị dumoun mị warị-akpakpa kị temitụamị. Bịsẹ ifie bụọmị, Saul mọkpọ biin ifieama David baa dọụmị. Timi kẹnị ifie laamị, David baịn mú ogbo-abadị ka sọwẹịmị.

Saul 3,000 sụụ-otuama akị mú David dọụmị. Ómịnị mú David mọ bá wó kịmịbo mọ sọwẹị-emi ogun-opolo ka sụọmị. David kịmịbo gbaa David pịrịmị: ‘Bei wo akị Saul baamụ fomuun.’ David okiri mú Saul laawẹrị, Saul bịdẹ bọọ dọlọ pẹlẹ akịmị. Saul, David mịẹ ye nimigha. Bịsẹ yọ bụọdẹmị, David, wó mịẹ yemị kịrịịgha bara iroromị. Ómịnị Jehovah sẹlẹwẹrịemi pẹrẹ bị didụbamọgha bara kị David mọ iroromị. Anịduonị, ómịnị bolouịmbẹlẹgha. David wó kịmịbo bụọmọwẹrị Saul baagha. Ómịnị fomuun nana ifiemị, ómịnị ụ baa a paatimi mị bara gbaa Saul pịrịmị. Anịa Saul bá David baa dọụgha fa bara ị́ mọ tọnmị?

Bịsẹ baragha. Saul mọkpọ David baa dọụmị. Kẹnị dein David mọ wó bịna-araụ tọbọụ Abishai mọ, Saul emi yọ bọọ múmị. Abner, Saul letimi owei kpọ, bụnụ kị bụnụtimi mị. Abishai gbaamị: ‘Bei, omịnị akị ụ baamụ fomuun! Ị bụọmọdá ụ baa.’ David gbaa ụ pịrịmị: ‘Jehovah kị Saul mọ sụụmịnị. Bo dá wo Saul dumoun mọ bá wó beni-ololo mọ akịdá mú.’

David, kẹnị ogun-agọnọ uwoumị, ómịnị bịsẹ yọ duo Saul emi yọbị ẹrịmị. David bịsẹ yọ duo gịamị: ‘Abner, tetuu kị duonị, ị́mịnị ebibara iné pẹrẹ lee a o? Saul beni-ololo mọ bá dumoun mọ teyọ k’emi nị?’ Saul, David okolo leleiwẹrị gbaamị: ‘Ị́mịnị ị baa a paatimi mị, anịa ị́mịnị ị baagha. Ị́mịnị kị Israel ibe pẹrẹ a sụọmịnị bara ị mọ nimiwẹrịemi.’ Bịsẹ bara paadẹ ifiemị, Saul waị wó warị a múmị. Wó warị-otubosẹ David golugha.