Solomon Israel a pẹrẹ sụọ ifiemị, Jehovah ụ biimị: ‘Ịmịnị te ka kị ị́ pịrị kị ị́mịnị mọ dọụwẹrịemi a o?’ Solomon, Jehovah parụmị: ‘Ịmịnị mọkpọ zaụ kị zaụemi, anịduonị, ịmịnị ine mịẹmịnị ye kpọ nimigha. Sisei kịlịkịlị-nimiye akị ị pịrịdá baratụa ị pịrịwẹrị ebibara iné kịmịbo daa.’ Jehovah gbaa Solomon pịrịmị: ‘Ị́mịnị kịlịkịlị-nimiye kị bii duonị, mị kiriogbosẹ ị́mịnị kị kịlịkịlị dẹịn kịmị a paamịnị. Ịmịnị ị́ mịẹ pẹrẹ kụrọmọmịnị. Ị́mịnị ine gbaaye peidaba, ị́mịnị inyenrintimi alaamịnị.’

Solomon koro karịwarị kẹrịmị. Ómịnị ebidẹịn gold, silver, tịn, bá okuta-ama ka kị karịwarị kẹrịmị. Fịrịwẹnị-dịịwẹrịemi ereama mọ oweiama mọ kị warị kẹrị fịrịwẹnịmị. Biin kịmịama kị warị kẹrị fịrịwẹnịmị. Sọnọma kụraị bụọmị, ámịnị warị kẹrịsinwẹrị dịẹpaamọ akị Jehovah pịrịmị. Tana kpọ karịwarị bọọ timi mị, akị ịkịan-kụn mụ yeama kpọ tana bọọ timimị. Solomon tana bọlọụ bọọ okorei anịghakpọ okoiwẹrị tẹẹmị: ‘O Jehovah, mị karịwarị mị ebi anịghakpọ dụba akị ị́ pịrị laagha, mọabịkpọ, sisei wo tẹẹbịbịbo mọ bá wo karị mọ kẹrịakị.’ Jehovah tebara ka kị karịwarị mọ bá Solomon tẹẹbịbị mọ diimọ ma o? Solomon wó tẹẹbịbị mịẹsin ifiebị, fẹnị agọnọ duo korobo tana bọọ gbanawẹrị ịkịan-kụn dọụtimi yebo ịyọụnmọmị. Jehovah karịwarị kẹrị-akịmị. Israel-otubo Jehovah karịwarị kẹrị-akị bara bị ẹrị ifiemị, ámịnị pọwẹịmị.

Israel-otubo mọ bá zịnị alaayọ emi amabo mọ Pẹrẹowei Solomon nanawẹrị kịlịkịlị-nimiye bị naamị. Biin kịmịama mú Solomon laawẹrị ánị bụụdọọnyebo gbaa ụ pịrịmị. Sheba ibe Queen kpọ Solomon daadimụ yọ duonị, mú Solomon laawẹrị kụrọ biibịbịama akị ụ biimị. Amịnị wó parụbịbị naa ifiemị, a gbaamị: ‘Kịmịotu ị́ gbelemọ yọ bọọ gbaa ị pịrị egberibo ịmịnị mọ peighawẹrịmị, anịa ị́mịnị kịlịkịlị akị á gbaa ị pịrị bara kpọ dẹịn-emi bara ị mọ ẹrịdẹ. Iné Ọkpọnanaowei Jehovah tarịama akị ị́ pịrịdẹ.’ Israel-otubo ebi akpọ kị inyenrintimi mị, anịduonị ámịnị pọwẹịmị. Anịa alaaghatimi yebo deimịnị.

Solomon, Jehovah karịtimi ifiemị, Israel ibemị dọọ kị timi mị. Anịa, Solomon zịnị ibe-ama duo biin ereama nanamị, wó nana erebo oruama kị karịtimi. Solomon kpọ dọlọdọlọ mịẹtimi oru karịmị. Jehovah boloukọnmị, anịduonị ómịnị gbaa Solomon pịrịmị: ‘Ịmịnị iné ziituu duo Israel kọnsinwẹrị akị maa anga dịẹmọmịnị. Ịmịnị dụbadẹịn anga bị akị iné odubo-otubo a kẹnị ụbọ pịrịmịnị, iné ziituumị zaụdẹịn anga kị daamịnị.’

Jehovah mọkpọ zịnị ụwọụ akị wó tọnpẹlẹdẹ ye mịẹ gaanmị. Solomon odubo-owei Jeroboam yọụpaatimi ifiemị, ómịnị bụrụ-owei Ahijah mọ gbeleimị. Ahijah wó bịdẹ bị akị 12 anga dịẹmọwẹrị gbaa Jeroboam pịrịmị: ‘Jehovah Solomon ziituu duo daabụọ kọnsinwẹrị akị maa anga dịẹmọ mịnị. Ị́mịnị bịdẹ bị akị, tuumị, ị́mịnị oia ziituu daamịnị.’ Pẹrẹowei Solomon paa ye naa duonị, Jeroboam baa dọụmị! Anịduonị Jeroboam baịn Egypt a múmị. Timi kẹnị ifie laamị, Solomon fịịmị, wó tọbọụ Rehoboam kị pẹrẹ a paamị. Bịsẹ bara paa ifiemị, waị Israel a mú laadẹ bara Jeroboam mọ iroromị.

Israel ibe bọọ emi okosu-otubo gbaa Rehoboam pịrịmị: ‘Ị́mịnị ebibara kịmịbo daa daba, ámịnị iné anga a timimịnị.’ Anịa Rehoboam asịyaịpesi ikie-otubo gbaa ụ pịrịmị: ‘Ị́mịnị á dienini kụmọ! Á mịẹ fịrịwẹnị kụrọmọ bọlọụdẹịn!’ Rehoboam wó asịyaịpesi-otubo akị ụ pịrị tolumọbịbị kị kẹrị-akịmị. Rehoboam kịmịbo ụyamọ kụrọmọmị, anịduonị ámịnị tịbịkụrọ ụ pịrịmị. Ámịnị Jeroboam akị oia ziituubo daamị, bịsẹ ye kị bo Israel ibe bọọ paamị. Kọọ maa ziituubo kị Judah ibe a paamị, ámịnị Rehoboam gbaa bara kị mịẹmị. Anịduonị Israel 12 ziituubo dịẹịmị.

Jerusalem Rehoboam daabụọ ka timi, Jeroboam wó kịmịbo bụọmọ Jerusalem karịwarị bọọ múgha. Tuubị ị́ mọ nimi ma? Jeroboam wó kịmịbo Rehoboam anga a sụọmụ mala kị fatimi mị. Anịduonị, ómịnị gold akị maa ivin-ama tẹmẹwẹrị gbaa wó kịmịbo pịrịmị: ‘Jerusalem alaa bụọmị. Ámịnị bei yọ a timi Ọkpọnanaowei karị a paaemi.’ Anịduonị kịmịbo gold ivinbo karịtimi waị Jehovah a barasinmị.