Biin sei pẹrẹama kị Israel ibe oia-ziituu daabụọ bọọ timi mị, anịa Ahab sei asẹẹ dẹịnmị. Ómịnị kẹnị bolousei kụrọmọ ere kị nanamị. Amịnị Baal kị karịtimi mị. Jezebel kị bịsẹ erema ẹrẹ. Ahab mọ Jezebel mọ kịmịotu mịẹwẹrị Baal karịmị bá Jehovah bụrụ-otubo kpọ baamị. Teeki Jehovah mọ mịẹ ma o? Ómịnị bụrụ-owei Elijah fịrịmọ mú ịsọmụ egberi gbaa Ahab pịrịmị.

Pẹrẹowei Ahab bolousei bụọ duonị, osuo Israel ibe bọọ korogha fa bara Elijah mọ gbaa ụ pịrịmị. Gboroye ibema sọụgha bá mọụnkorotimi tara kụraị dẹịnmị. Jehovah waị Elijah fịrịmọ mú Ahab laamị. Ahab gbaa Elijah pịrịmị: ‘Ị́mịnị akpotu kị dọụmịnị kịmị! Ị́mịnị kị duonị, mị yemị paamịnị.’ Elijah ụ parụmị: ‘Ịmịnị kị duonị, osuo korogha bara fa. Ị́mịnị Baal karịmịnị kị duonị osuo korogha. Wo maa kịmị kẹnịye mịẹmịnị. Carmel Ogun-agọnọ bọọ Israel-otubo mọ bá Baal bụrụ-otubo mọ bẹnịmọ.’

Kịmịbo Carmel Ogun-agọnọ bọọ bẹnịmị. Elijah gbaamị: ‘Ánị ịkịọụbo a tọnpẹlẹ. Jehovah kị gesii Ọkpọnanaowei aba wó a tuuduo. Anịa Baal aba, wó a tuuduo. Ịmịnị agbobu-titiwẹrị gbaa á pịrịmịnị, Baal 450 bụrụ-otubosẹ, akị ịkịan-kụn Baal pịrịmụ yeama bẹnịmọ, ịmịnị bá ịkịan-kụn Jehovah pịrịmụ yeama bẹnịmọmịnị. Fẹnị akị ịkịan kẹrịakịmụ ụbọ kị gesii Ọkpọnanaowei mị.’ Ámịnị wó gbaa bara mịẹmụ bara gbaamị.

Baal bụrụ-otubo ámịnị akị ịkịan-kụnmụ yebo bẹnịmọmị. Ámịnị ereinsẹ akị tẹẹ ánị oru pịrịmị: ‘O Baal, wo parụ!’ Baal á parụgha duonị, Elijah á dẹrịmị. Ómịnị gbaa á pịrịmị: ‘Ánị okolobosẹ uwoumọ sindá ụ tịịn. Kaanghaba ómịnị bụnụ kị bụnụ-emi, anịduọnị kịmị ụ tịịnseri kị dọụwẹrịemi.’ Baal bụrụ-otubo Baal tịịntimi buboru koromị, anịa Baal mọkpọ á parụgha.

Elijah wó ịkịan-kụnmụ yebo akị tanama gbanawẹrị bá beni kọn dẹsịmọmị. Ómịnị tẹẹmị: ‘O Jehovah, sisei ị́mịnị kị gesii Ọkpọnanaowei bara mịẹ akị mị kịmịbosẹ dịa.’ Jehovah kirimọkirimọ agọnọ duo fẹnị koromọbo ịkịan ịyọụnmọmị. Kịmịbo gbaamị: ‘Jehovah kị gesii Ọkpọnanaowei mị!’ Elijah gbaamị: ‘Baal bụrụ-otubo bụọmọ baịntẹị kụmọ!’ Bịsẹ ereinmị, Baal 450 bụrụ-otubosẹ baasinmị.

Kala obudou agọnọ bọọ paa ifiemị, Elijah gbaa Ahab pịrịmị: ‘Opu kimé kị bomịnị, iné ikpiritụa-arụ mị akịdá warị a mú.’ Erein-tọrụmị sei kụrọmọmị, afọrụ fọụn bá opu osuo koromị. Osuo waị ibe bọọ korodẹ. Ahab wó kụrọsẹ akị ikpiritụa-arụ yọụ saramọmị. Jehovah baratụa Elijah pịrịwẹrị baịn saramọ ikpiritụa-arụ dẹịnmị! Elijah bụụdọọnyebosẹ fadẹ a? Wo ẹrịmịnị.

Baal bụrụ-otubo paamọyemị Jezebel mọ naa ifiemị, amịnị boloukọn kụrọmọmị. Jezebel ịsọmụ fịrịmọ Elijah yarịmị: ‘Baal bụrụ-otubo fịịdẹ baramị, ị́mịnị kpọ deinbaị fịịmịnị.’ Elijah malafa baịn ogbo-abadị ka múmị. Elijah tẹẹ Jehovah yarịmị: ‘Jehovah, ịmịnị bá nimi inegha. Sisei ị baa.’ Elijah angọmị ụ dẹịn kụrọmọdẹ duonị, ómịnị tịn kirikonu a bụnụfamị.

Kẹnị angel-owei ụ tịịn seriwẹrị gbaa ụ pịrịmị: ‘Seriidá fịyaị fị.’ Elijah breadị ẹrịmị, breadị mị akị afẹrẹ-emi okuta-ama kọọ gbana wẹrịmị, bá beni tụabeinmọ-wẹrịemi jug kpọ ẹrịmị. Elijah fịyaị fị bá beni-bouwẹrị waị koro-bụnụmị. Angel-owei mị waị ụ tịịn seriwẹrị gbaamị: ‘Fịyaị fị. Ị́mịnị kụrọ nanadaba kịrị laa mị wẹnị wẹnịmịnị.’ Anịduonị, Elijah waị fịyaị fịmị. Bịsẹ yọ bụọmị, Elijah 40 erein-ama mọ bá 40 dein-ama mọ akị wẹnị mú Horeb Ogun laamị. Elijah bịsẹ yọ bọọ ogun-opolo duo sụọwẹrị koro-bụnụmị. Jehovah, Elijah mọ ẹrẹmị. Ómịnị gbaa ụ pịrịmị: ‘Elijah ị́mịnị mị yọma teeki mịẹmịnị a o?’ Elijah, Jehovah parụmị: ‘Israel-otubo bá iné dọụbara mịẹgha. Ámịnị iné tanabo seimọsin bá iné bụrụ-otubo kpọ baadẹ. Bei tịẹkiri bị, ámịnị ịmịnị kị baa dọụmịnị.’

Jehovah gbaa Elijah pịrịmị: ‘Mú ogun bọọ tịẹ.’ Elijah mú ogun bọọ tịẹ ifiemị, kẹnị kụrọ afọrụ kị bọlọụ ogun-opolo duo fọụn bụọmị. Barịị yemị, kirizigei mọ bá kẹrịịmịnị fẹnị mọ Elijah mọ ẹrịmị. Kunumọmị, Elijah kẹnị bọụbọụ okolo naamị. Elijah wó bịdẹmị akị wó andẹ teriwẹrị ogun-opolo duo paabo tirianga bọọ tịẹmị. Jehovah Elijah baịn tuubị akị ụ bii ifiemị. Elijah gbaa Jehovah pịrịmị: ‘Ị́ bẹtịbị kị kọọ-emi.’ Anịa Jehovah gbaa ụ pịrịmị: ‘Ị́mịnị bẹtịbị fa. Mọkpọ, 7,000 kịmịama Israel ibe bọọ timi ị karịmịnị. Mú Elisha akị bụrụ-owei a tụadá ụ kọn ị́ dei.’ Elijah kirimọkirimọ mú Jehovah gbaa ụ pịrị bara bị mịẹmị. Ị́mịnị kpọ Jehovah gbaa bara dimịẹ daba Jehovah baratụa ị́ kpọ pịrịmịnị bara ị́ mọ tọnmị? Iin, Jehovah ị́ barịmịnị. Wo wẹrị osuo korogha timi ifie bọọ paaye dọụ ẹrị.