“Mú Itu-kosuotubo Laa”

1. Jehovah tebara ka kị wó anịnabo wó tọrụyọmị yelaa-emi bara mịẹdịa ma o?

JEHOVAH anịnabo yelaa ụ pịrị-emi. Ómịnị wó tọbọụ yalịyalị asịịn ka kị á fẹị duonị, itu-kosuotubo tọrụtụa á dii bara gbaamị. (Acts 20:28) Ọkpọnanaowei, itu-kosuotubo ebibara tọrụtụa anịnabo dii kị dọụ wẹrịemi. Itu-kosuotubo Christ dimịẹdá, anịnabo kụrọmọ bá baratụa á pịrịwẹrị tẹmẹ-anga ma tịẹkụrọ kị Jehovah mọ dọụ wẹrịemi.—Isa. 32:​1, 2.

2. Jehovah tọrụtụa te kịmịama kị dii dẹịnmịnị a o? (Ezekiel 34:​15, 16)

² Jehovah olomu tarị akị wó anịnabosẹ a nana wẹrịemi, mọabịkpọ ómịnị tọrụtụa ụyafịmịnị kịmịbo kị dii dẹịnmịnị. Ómịnị itu-kosuotubo kọn, baratụa tẹmẹ-anga ma suusụọdẹ kịmịbo pịrịmịnị. (Ezekiel 34:​15, 16 goo.) Anịduonị, omịnị baratụa-pịrịye dọụ wẹrịemi ifiesẹ, ụ bii kị ómịnị mọ dọụ wẹrịemi. Tẹẹ ụ pịrịmịnị yọ bụọmọ kpọ, Ọkpọnanaowei wosẹ itu bọọ emi ebi “anịna gbalị bá kịmị tọlumọmịnị” itu-kosuotubo bara duo baratụa-pịrịye bii kị dọụ wẹrịemi.—Eph. 4:​11, 12.

3. Itu-kosuotubo wẹnịmịnị fịrịbo kẹrị iroromịnị yọbị te arereama kị emi a o?

³ Mị egberitịbịmị, omịnị tẹmẹ-anga baratụa-pịrịye dọụmịnịsẹ, Ọkpọnanaowei itu-kosuotubo mịẹpaamọ wo pịrị wẹrịemi bara wo mọ tolumọmịnị. Omịnị bei biibịbịbọ parụmịnị: Te ifie kị omịnị mú itu-kosuotubo laa bii agbẹị-emi a o? Tetuu kị duonị omịnị mú itu-kosuotubo laa agbẹị-emi a o? Ámịnị tebara ka kị baratụa wo pịrịmịnị a o? Bei tịẹkiribị omịnị naa kụrọ inyenrinbụọama sụọgha kị gbaa kpọ, bei biibịbịbo parụmịnị yọmị baratụa wo pịrị wẹrị Jehovah mịẹpaamọ wẹrịemi yebo tọrụkẹrịyọ nanamịnị bá wo ụndụbo kpọ zụọmịnị.

TE IFIE KỊ OMỊNỊ “ITU-KOSUOTUBO LAA” AGBẸỊ-EMI A O?

4. Omịnị tebara kị mịẹtimi James 5:​14-16, 19, 20 bọọ emi egberimị, tẹmẹ-anga dọọn kị gbaamịnị bara nimi ma o? (Fotobo kpọ dii.)

⁴ Tuuduo-owei James Jehovah itu-kosuotubo akị tẹmẹ-anga ma baratụa wo pịrịmịnị bara kị gbaa wẹrịemi. Ụ biimị: “Ánị ovurumị dọọnmịnị kịmị emi a? Ómịnị mú itu bọọ emi itu-kosuotubo laa.” (James 5:​14-16, 19, 20 goo.) Bei egberitịbịmị James tẹmẹ-anga dọọnmịnị kịmị kị gbaamịnị. Gbaamaba, dọọnmịnị ụbọmị mú dọọnzụọ owei laa bara gbaagha, anịa itu-kosuotubo kị tịịn bara kị gbaa wẹrịemi. Bịsẹ bara kị tẹmẹ-anga dọọn nana wẹrịemi kịmị wó seibo kọn ụ bụọmọdaba angọ ebimịnị bara kị James mọ gbaamịnị. Angọ dọọnmịnị kịmị yeama mịẹwẹrị angọ ebimịnị bara kị, tẹmẹ-anga dọọn nana wẹrịemi kịmị kpọ yeama mịẹdẹ kị angọ ebimịnị. Omịnị angọ dọọndaba, mú dọọnzụọ-owei ẹrịmịnị, omịnị dọọnbị wo mịẹmịnị bara gbaa dọọnzụọ-owei pịrịmịnị, bá dọọnzụọ-owei gbaa bara kị dii mịẹmịnị. Bịsẹ kpekẹnị bara kị, omịnị tẹmẹ-anga dọọn yọ nanadaba, omịnị mú itu-kosuotubo laa, yemị wo gbele-emi bara gbaa á pịrị, bá ámịnị Bible duo mịẹmụ bara gbaa wo pịrịdaba, bịsẹ bara kị dimịẹ.

5. Omịnị tebara kị mịẹtimi tẹmẹ-anga dọọn nanadẹ bara nimi-mịnị a o?

⁵ James chapter 5 mị omịnị tẹmẹ-anga ma suusụọmịnịse, mú itu-kosuotubo laa bara kọn wo kụrọmọ wẹrịemi. Omịnị naa wo mọ Jehovah mọ ikie seimọgha timi mú baratụa-pịrịye biimụ yọmị yelaaemi! Omịnị wo angọ lẹlẹmọ kụmọ. Bible mị omịnị wo tẹmẹ-anga gbelemọ yọbị, angọ lẹlẹmọ a paaemi berifaanye mịẹpaamọ wo pịrịmị. (Jas. 1:22) Sardis a timi Christtuuduo-otubo bei paa lẹlẹmọ ye a koro sụọmị, anịkịduonị Jesus ánị tẹmẹ-anga inyenrinbụọ gbelemọ yọmị berifaanye kọn á pịrịmị. (Rev. 3:​1, 2) Omịnị tẹmẹ-anga ma bọlọụ amúmịnị anịghakpọ suusụọmịnị bara ditụamụ kẹnị ụwọụ, anị wo bọlọụ ifie ma angọtụa Jehovah karịtimi bara mọ, ba mị tịẹkirimị wo akị Jehovah karịmịnị bara mọ ditụamịnị. (Rev. 2:​4, 5) Omịnị wo angọ bii a paaemi: ‘Ine Bible goo bá kẹrị iroromịnị yọ duo nanamịnị pọwẹịmị mọkpọ emi a? Ịmịnị bọlọụ ifiemị angọ tọlọmọ wẹrị yetolumọyọ amú timi baramị mọkpọ angọtọlọmọ wẹrị múmịnị a o? Ine egberigbaamịnị yọmị suusụọmịnị a? Ịmịnị ine ifiesẹ akị angọ mịẹ ganagana bá nanaye bẹtịbị kị kẹrị iroromịnị a?’ Bei biibịbịbo kẹnị kị iin bara ị́mọ parụ kpọ, ị́mịnị tẹmẹ-anga bọọ suusụọmịnị bara mịẹgaandẹ. Omịnị bẹtịbị laa mị suusụọyọ kẹrị tịẹmọgha ifiesẹ, anịghakpọ bịsẹ suusụọ yọmị dịnẹmọ wẹrị mịẹ Jehovah abụọdaba, omịnị mú itu-kosuotu baratụa-pịrịye bii.

6. Kụrọ sei mịẹdẹ otubo teeki mịẹ agbẹị-emi a o?

⁶ Kịmị kụrọ sei mịẹdaba, seimị ụbọ mịẹ itu duo kọnsiin a paaemi bara kị emisẹ, mú itu-kosuotubo laa. (1Cor. 5:​11-13) Kụrọ sei mịẹdẹ kịmịsẹ, ụbọmị waị Jehovah mọ kpẹkpẹrẹẹ ikie nanamụ yọbị baratụa-pịrịye dọụ wẹrịemi. Parụ ịkịan duonị Jehovah wo mịẹdẹ seibo kọn wo bụọmọ wo mọ dọụmịnịsẹ, omịnị “boloudeidẹ inyenrinbụọama mịẹdịa.” (Acts 26:20) Bịsẹ inyenrinbụọbo kẹnị, omịnị kụrọ sei mịẹdaba mú itu-kosuotubo laa.

7. Te zịnị ụbọ kị itu-kosuotubo baratụa-pịrịye dọụ wẹrịemi a o?

⁷ Itu-kosuotubo baratụa kụrọ sei mịẹdẹ-otu bẹtịbị pịrịgha; anịa tẹmẹ-anga bọọ suusụọdẹ otu kpọ pịrịmịnị. (Acts 20:35) Gbaamaba, sei mịẹ dịsẹ yọmị kẹrị-tịẹmọmụ yọ kụrọ ị́ pịrị emi, kaanghaba bọlọụ ifiemị ị́mịnị kụrọ diri-ama bou, paatuu foto anịghakpọ vidioama dii, bá lịkaịlịkaị zọzọ anga inyenrinbụọama nana wẹrị maba, dẹịnmọmụ yọbị kụrọ ị́ pịrimịnị. Ị́mịnị laa bẹtịbị mị bụụdọọnyebo dẹịnmọ a paagha. Anịduonị gbaa akị ebibara ị́ peimụ itu-kosu ụbọ pịrị, ómịnị Bible duo tolumọbịbị kọn ị́ pịrịmịnị, bá ị́mịnị bịsẹ sei yebo mịẹgha ifiesẹ, Jehovah mịẹ pọwẹịmọmịnị bara kọn iné ukiemọmịnị. (Eccl. 4:12) Bịsẹ sei mịẹ dịsẹmịnị yọmị ị́ mịẹ powẹịghaba, bịsẹ yọmị, ị́mịnị Jehovah tarị bá ụ mịẹ powẹị nanamụ yọ kị mịẹdịamịnị bara itu-kosuotubo mọ kọn iné ukiemọmịnị.—1Cor. 10:12.

8. Te bụụdọọn yeama kị omịnị mọ gbaa itu-kosuotubo pịrị agbẹịgha o?

⁸ Omịnị wo mịẹkiridẹ yesẹ kọn gbaa mú itu-kosuotubo pịrị bara gbaagha. Gbaamaba, ị́mịnị itumị bịna-ụbọ mọ zọzọ naaghayọ paadẹ, bịsẹ yemị ị́ mịẹ boloukọn kụrọmọ kpọ paaemi. Mú itu-kosu ụbọ laamụ bara dii a, ị́mịnị Jesus gbaa bara dimịẹ a paaemi anị mú iné bịna ụbọ mọ dọọ mịẹ. (Matt. 5:​23, 24) Ị́mịnị bọụbọụ inyenrinbụọ, etipou, bá angọ kẹrị gbelemọ egberitịbịama tuudọụ a paaemi. Anịa ị́mịnị mọkpọ laa bịsẹ bụụdọọnye kẹrị tịẹmọghaba, baratụa-pịrịye kọn itu-kosu ụbọ bara duo bii. Fịrịmọpaa-owei Paul kẹnị bịnaowei fịrịmọ mú Philippi itu bọọ Euodia mọ Syntyche mọ zọzọ naaghayọ kẹrị tịẹmọ baramị, iné itu bọọ emi itu-kosu ụbọ kpọ bịsẹ kpekẹnị bara mịẹ a paaemi.—Phil. 4:​2, 3.

TETUU KỊ DUONỊ ITU-KOSUOTUBO LAA AGBẸỊ-EMI A O?

9. Tetuu kị duonị omịnị bụze bụọmọ wẹrị mú itu-kosuotubo laamụ yọ tịẹmọgha fa o? (Proverbs 28:13)

⁹ Omịnị kụrọ sei mịẹdaba anịghakpọ wo suusụọ yọbo mọ andamịnị ifịẹmị gbaa itu-kosuotubo pịrịmụ yọbị, peibolou mọ boloukụrọ inyenrinbụọ mọ dọụ wẹrịemi. Omịnị bụze bụọmọ wẹrị wo mịẹkiri yọ gbaa itu-kosuotubo pịrịmụ yọ tịẹmọ kụmọ. Tetuu a o? Omịnị Jehovah gbaa bara dimịẹdaba, Jehovah kị kụrọ angọ, bá kụrọ peibolou nanamụ yeama gbaa wo pịrị a paaemi eti, wo mọ nana wẹrịemi bara kị mịẹdịamịnị. Pẹlẹgha bara wó dọụbara mịẹmụ yọbị, omịnị wó baratụa-pịrịye dọụ wẹrịemi bara wo mọ nimi wẹrịemi. (Ps. 94:18) Omịnị sei mịẹwẹrị wo mịẹ sei gbaa paamọ bá sei ma barasindaba, Jehovah dieneni akị wo a nanamịnị.—Proverbs 28:13 goo.

10. Omịnị wo mịẹ seibo sọwẹị daba teeki paamịnị a o?

¹⁰ Omịnị wo bụụdọọnyebo gbaa itu-kosuotubo pịrịwẹrị baratụa-pịrịye nanamịnị bara kị, omịnị wo seibo sọwẹịdaba akpotu wo laamịnị. Ibe-daaowei David wó mịẹ sei sọwẹị dọụtimi ifiemị, ómịnị tẹmẹ-anga, iroroye, bá angọmẹnị kpọ akpotu a sụọmị. (Ps. 32:​3-5) Omịnị angọ dọọnyọ nana anịghakpọ enọụ sụọdaba dọọn nanamịnị bara kị, omịnị tẹmẹ-anga bụụdọọnye kẹrị tịẹmọgha ifiesẹ wo mịẹ akpotu a sụọmịnị. Jehovah omịnị bịsẹ akpotu bolouma sụọmụ yọ dọụgha, anịkịduonị ómịnị itu-kosuotubo mịẹpaamọ wẹrị “wo bụụdọọnmịnị yebo kẹrị tịẹmọ,” bá waị wó ikie-otuama paamụ fomuun mịẹpaamọmị.—Isa. 1:​5, 6, 18.

11. Omịnị kụrọ sei sọwẹịdaba, tebara ka kị zịnị otu gbele a paaemi a o?

¹¹ Omịnị wo seibo sọwẹịdaba, zịnịotu gbele a paaemi. Jehovah yalịyalị tẹmẹbị itu duo serii kpọ paaemi, bá bịnaotubo nana wẹrịemi dọọ kpọ seimọ a paaemi. (Eph. 4:30) Kịmị itu bọọ kụrọ sei mịẹdẹ bara wo mọ nimidaba, ụbọ mú gbaa itu-kosuotubo pịrị bara akị ụ kụrọmọ.a Omịnị zịnịotu mịẹmịnị seiama sọwẹịdaba wo kpọ gbelemịnị. (Lev. 5:1) Ụbọmị mú gbaa bọụghaba, wo akị Jehovah a nana wẹrịemi tarịbị wo dinẹmọ wẹrị mú gesii gbaa itu-kosuotubo pịrịmịnị. Bịsẹ bara wo mọ mịẹdaba, omịnị itu bọọ emi bịnaotubo kị kekeremịnị bá baratụa sei mịẹ ụbọ pịrịwẹrị wó mịẹ seibị a barasin wẹrị waịbo Jehovah mọ ebi ikie nanamịnị.

ITU-KOSUOTUBO TEBARA KA KỊ BARATỤA WO PỊRỊMỊNỊ A O?

12. Itu-kosuotubo tebara ka kị baratụa tẹmẹ-anga bọọ suusụọdẹ-otubo pịrịmịnị a o?

¹² Bible gbaa amọ, itu-kosuotubo baratụa suusụọdẹ-otubo pịrị. (1Thess. 5:14) Ị́mịnị kụrọ sei mịẹdaba, ámịnị biibịbịama akị ị́ bii wẹrị iné ịkịọụ bọọ emi yebo ‘a sụọtuu nimimịnị.’ (Prov. 20:5) Iné mịẹ sei gbaa itu-kosuotubo pịrịmụ yọbị bọụbọụgha. Kaanghaba ị́mịnị bụze inyenrinbụọ nana wẹrịemi, bịsẹ bara kị gbaa kpọ ị́ dinẹmọ wẹrị bịsẹ sei mịẹ yebo gbaa á pịrịdaba ámịnị baratụa ị́ pịrịmịnị. Ị́mịnị agbẹịgha egberi gbaamụ malafa kụmọ. (Job 6:3) Ámịnị ifie famọgha bara ụgụlapẹlẹ ị́ pịrịmụ yọ dii a, ámịnị ebibara ị́ pei, bá egberima ebibara sụọtuu nimi dẹkị Bible duo tolumọbịbị kọn ị́ pịrịmịnị. (Prov. 18:13) Anịnabo gbalịmụ yọbị ifie akịmụ bara ámịnị mọ nimi wẹrịemi, anịduonị, ámịnị kẹnị ifie bẹtịbị ka kị ị́ mọ mọ́ ẹrẹtei wẹrị bụụdọọnye kẹrị tịẹmọgha fa.

13. Itu-kosuotubo tebara ka kị ánị tẹẹbịbịbo mọ bá Bible mọ duo baratụa wo pịrịmịnị a o? (Fotobo kpọ dii.)

¹³ Iné mịẹ seimị ị́ mịẹ pọwẹịgha duonị ị́mịnị mú itu-kosuotubo laadaba, ámịnị ị́ mịẹ eneni-kẹrị dẹịngha fa. Anịa, ámịnị tẹẹ ị́ pịrịmịnị. Ánị tẹẹbịbịbo nana wẹrịemi kụrọmị ị́ mịẹ tamamamịnị. Ámịnị mọkpọ “Jehovah ẹrẹ ma pulou kọn [ị́] sirimịnị.” (Jas. 5:​14-16) Bei “puloubị” Ọkpọnanaowei gesii egberi ka tịbị tịẹmọ wẹrịemi. Ámịnị kịlịkịlị bara Bible kọn ị́ kụrọmọ bá baratụa ị́ pịrịwẹrị ị́ mọ Jehovah mọ ikie waịmụ mịẹ kụrọmọmịnị. (Isa. 57:18) Ámịnị Bible duo ị́ pịrịmịnị tolumọbịbịbo baratụa ị́ pịrịwẹrị ifiebosẹ kịrịịye kị mịẹmịnị. Ị́mịnị á duo Jehovah okolo naamịnị, Jehovah gbaa ị́ pịrịmịnị: “Bei kị ụwọụmị. Bei ụwọụ kị duo wẹnị.”—Isa. 30:21.

14. Galatians 6:1 gbaa bara diidaba, itu-kosuotu tebara ka kị baratụa “kịrịịghaye” mịẹdẹ ụbọ pịrịmịnị a o? (Fotobo kpọ dii.)

¹⁴ Galatians 6:1 goo. Christtuuduo-kịmị “kịrịịghaye” mịẹdaba ómịnị ba Jehovah kịrịị ụwọụbo dii wẹnịgha. Kịrịịghaye gbaadaba anị ụbọmị kịrịịgha iroro tọn angọ pịrị anịghakpọ kụrọ sei mịẹdẹ. Itu-kosuotu tarị mịẹ ụbọ dịamụ yọ duonị, “bọụbọụ bara waị ụbọ kẹrị-tịẹmọ” a paaemi. Greek bẹẹlịmị “waị kẹrị-tịẹmọ” egberi ungbọụmị akị dọọnzụọ owei waị yaịn-emi engbou mịẹ tịẹmọ wẹrị ụbọmị waị wẹnị a paaemi bara kị gbaamọ wẹrịemi. Ebi dọọnzụọ owei engbou kẹrị-tụamịnị ifiemị, ụbọmị dọọn naa bọlọụ ifie dẹịngha fa bara kị, omịnị tẹmẹ-anga bọọ suusụọdaba, itu-kosuotubo baratụa wo pịrịmịnị ifiemị wo mịẹ suusụọ dẹịngha fa. Ámịnị baratụa wo pịrịmịnị ifiemị “ámịnị tọrụtụa [ánị angọbo] kpọ dii” bara ka kị á tolumọ wẹrịemi. Ámịnị Bible duo tolumọbịbị akị wo pịrịmịnịmị, ámịnị kpọ yalịgha bara ukie agbẹị-emi. Ámịnị ifiebosẹ kịrịịye mịẹmịnị, bá yelaa akị ánị baratụa pịrịmịnị otubo dẹịn-emi bara mịẹkụmọ, anịa ámịnị angọ-iyerimọ, dieneni nana bara ka kị baratụa anịnabo pịrị.—1Pet. 3:8.

15. Omịnị bụụdọọnye nana wẹrịemisẹ teeki mịẹ a paaemi a o?

¹⁵ Omịnị eti akị itu-kosuotubo atụa a paaemi. Kịmịotu naa wo mọ dọụgha egberibo ámịnị mọ kọn gbaa kịmịotu pịrị kụmọ bara ka kị á tolumọ wẹrịemi, bá ámịnị ánị bẹtịbị nimiye kọn tolumọbịbị pịrịmụ yọ dii a, Bible kị duo tolumọbịbị pịrịmụ bara kpọ tolumọdẹ. Mọkpọ ámịnị pẹlẹgha bara baratụa wo pịrịwẹrị wo bụụdọọnyebo inemụ bara kpọ tolumọdẹ. (Prov. 11:13; Gal. 6:2) Ámịnị bẹbẹ bẹbẹ inyenrinbụọ-ama kị nana wẹrịemi, bá bẹbẹ yeama kị ẹrịdẹ, mọabịkpọ omịnị fomuun bara wo bụụdọọnyebo kọn wo dịsẹdẹ itu-kosu ubọ mọ ẹrẹtei a paaemi. Ukie, omịnị wo dịsẹ-emi tolumọbịbị akị wo pịrịmịnị itu-kosu kịmị dọụ wẹnị kụmọ. Omịnị bịsẹ bara mịẹdaba, omịnị dịsẹ-emiye bẹtịbị kị naamịnị kịmịama ka paadẹ “Ọkpọnanaowei duo bomịnị tolumọyebo” kẹrịakịgha bara kị mịẹdịamịnị. (2Tim. 4:3) Omịnị wo a bụụdọọnmịnị ye gbaa itu-kosu ụbọ pịrịdaba, bịsẹ itu-kosuoweimị omịnị egberi gbaa zịnị itu-kosu kịmị pịrịdẹ wẹrịma bara kọn wo biimịnị, bá ómịnị te tolumọbịbị kị kọn ị́ pịrị ma bara itu-kosuoweimị mọ kọn wo biimịnị. Angọ-iyerimọ yọ kị ụ dinẹmọ wẹrị mú zịnị itu-kosu kịmị bara duo mịẹmụbara biimịnị.—Prov. 13:10.

WO BẸTỊBỊ WẸNỊMỤ FỊRỊ

16. Wosẹ te wẹnị fịrị kị nana wẹrịemi a o?

¹⁶ Itu-kosuotubo omịnị Ọkpọnanaowei anịna duonị tọrụtụa wo diimịnị kị gbaa kpọ, ámịnị wo mịẹmụye gbaa wo pịrịgha fa. Wo kịmịsẹ wo ẹrẹmịnị egberi, bá wo erein duo mú erein laa inyenrinbụọmị, Jehovah tarị wẹrịemi, bá ụ mịẹ bolouịmbẹlẹmịnị bara mịẹdịamụ fomuun nana wẹrịemi. Jehovah baratụa wo pịrị wẹrịemisẹ, omịnị laa ebi iroroama tọn angọ pịrị bá wo peibolou kpọ mịẹ kụrọmọmịnị. (Rom. 14:12) Anịkịduonị itu-kosuotubo wo mịẹmụye gbaa wo pịrịgha, ámịnị Bible kị duo Jehovah akị ye-iroromịnị bara mịẹ wo a sụọtuu nimi wẹrị, omịnị ebi iroro tọn angọ pịrịmịnị. Omịnị kọkọ ámịnị Bible duo gbaa wo pịrịmịnị yebo kẹrị wẹnịdaba, omịnị kpọ “wo ye leleipẹlẹ kụrọ tolumo” ebimọwẹrị Jehovah kọn ye-iroromịnị bara dii ebi iroroama tọn angọ pịrịmịnị.—Heb. 5:14.

17. Omịnị teeki gbini-pẹlẹ agbẹị-emi a o?

¹⁷ Omịnị Jehovah anịna-ama paaemi yọbị opu fomuun kị wo laaemi! Jehovah “ebi anịna gbalịowei,” Jesus, fịrịmọ bo fịị wo pịrị yọmị, omịnị laa inyenrintimi bẹseri bẹseri laamụ fomuun nanadẹ. (John 10:11) Jehovah mị kikoromọ egberi mịẹ beinmọmụ yọ duonị, itu bọọ emi itu-kosuotubo kpọ kọn baratụa wo pịrịmịnị: “Ịmịnị ine adụdụ duo anịna gbalị-otuama kọn á pịrịmịnị, ámịnị ye asụọtuu nimi kịlịkịlị nimiye kọn á tolumọmịnị.” (Jer. 3:15) Omịnị tẹmẹ-anga ma suusụọmịnị anịghakpọ dọọnmịnịaba, itu-kosuotu baratụa-pịrịye biimụ yọbị malafa kụmọ. Pebidá wosẹ beinmọ beinmọ bara Jehovah mịẹpaamọ wẹrịemi itu-kosuotubo duo arerenana.