Exodo

11 Ket ni Jehova kinunana ken Moises: “Maysa pay a saplit ti iyegko ken Faraon ken iti Egipto. Kalpasan dayta palubosannakayto manipud ditoy.+ Iti tiempo a panangpalubosna kadakayo a naan-anay, pudno a pagtalawennakayto ditoy.+ 2 Agsaoka, ita, kadagiti lapayag dagiti umili, nga agkiddawda koma tunggal lalaki iti kaduana ken tunggal babai iti kaduana iti ar-aruaten a pirak ken ar-aruaten a balitok.”+ 3 Iti kasta ni Jehova impaayanna dagiti umili iti pabor kadagiti mata dagiti Egipcio.+ Ti met lalaki a ni Moises naindaklan unay iti daga ti Egipto, kadagiti mata dagiti adipen ni Faraon ken kadagiti mata dagiti tattao.+

4 Ket kinuna ni Moises: “Daytoy ti kinuna ni Jehova, ‘Iti agarup tengnga ti rabii rummuarakto a mapan iti tengnga ti Egipto,+ 5 ket tunggal inauna+ iti daga ti Egipto matayto, manipud iti inauna ni Faraon nga agtugtugaw iti tronona agingga iti inauna ti adipen a babai nga adda iti paggilingan a pusiposen ti ima ken ti tunggal inauna ti animal.+ 6 Ket sigurado nga addanto mapasamak a dakkel nga ikkis iti intero a daga ti Egipto, a ti kaaspingna saan pay a pulos napasamak, ket ti kaaspingna saanton a pulos maipagteng manen.+ 7 Ngem maibusor iti asinoman iti annak ti Israel awanto ti aso a mangigaraw a sigagagar iti dilana, manipud iti tao agingga iti animal;+ tapno maammuanyo a ni Jehova mabalinna ti mangaramid ti pagdumaan dagiti Egipcio ken ti annak ti Israel.’+ 8 Ket amin dagitoy nga adipenmo sigurado a sumalogdanto nga umay kaniak ket iruknoyda kaniak ti bagbagida,+ a kunkunada, ‘Mapanka, sika ken amin dagiti umili a sumurot kadagiti addangmo.’ Ket kalpasan dayta pumanawakto.” Iti kasta pimmanaw ken Faraon a sibabara ti ungetna.

9 Kalpasanna ni Jehova kinunana ken Moises: “Saanto nga umimdeng kadakayo ni Faraon,+ tapno umadu dagiti milagrok iti daga ti Egipto.”+ 10 Ket da Moises ken Aaron inaramidda amin dagitoy a milagro iti sanguanan ni Faraon;+ ngem bay-an ni Jehova a sumubeg ti puso ni Faraon, iti kasta saanna a pinalubosan ti annak ti Israel manipud iti dagana.+