Jeremias

10 Denggenyo ti sao a sinao ni Jehova maibusor kadakayo, O balay ti Israel. 2 Daytoy ti kinuna ni Jehova: “Dikay sursuruen a pulos ti dalan dagiti nasion,+ ket dikay agaligaget uray kadagiti pagilasinan iti langlangit, agsipud ta dagiti nasion agaligagetda kadakuada.+ 3 Ta dagiti kaugalian ti il-ili+ kaslada laeng iti sang-aw, agsipud ta kayo laeng dayta+ manipud iti bakir a pinukan ti maysa, ti aramid dagiti ima ti nasigo a trabahador babaen ti kimmawit a pandaras.+ 4 Palibnosen dayta ti maysa babaen ti pirak ken babaen ti balitok.+ Patibkerenda ida babaen kadagiti lansa ken babaen kadagiti martilio, tapno awan koma ti agibar-ibar.+ 5 Kaslada iti bambanti ti talon ti pipino, ket saanda a makasao.+ Di bumurong a maawit ida, ta saanda a makaaramid kadagiti aniaman a panagaddang.+ Dikay agbuteng gapu kadakuada, ta awan ti maaramidanda a makadidigra ket, kanayonanna, awan kadakuada ti panagaramid iti aniaman a naimbag.”+

6 Awan a pulos ti asinoman a kas kenka, O Jehova.+ Naindaklanka, ket ti naganmo naindaklan iti kinamannakabalin.+ 7 Siasino koma ti saan nga agbuteng kenka,+ O Ari ti nasnasion,+ ta mayanatup kenka dayta; agsipud ta kadagidiay amin a masirib iti nasnasion ken kadagiti amin a kinaarida awan a pulos ti asinoman a kas kenka.+ 8 Ket iti mamimpinsan agbalinda nga awan nakemna ken maag.+ Ti maysa a kayo ket pammagbaga laeng dagiti kinaubbaw.+ 9 Ti pirak a napitpit a napagbalin a platplata isu ti maiyeg manipud a mismo iti Tarsis,+ ken balitok manipud Ufaz,+ ti gapuanan ti nasigo a trabahador ken dagiti ima ti managobra iti metal; ti pagan-anayda ket asul a sinulid ken delana a natinaan iti lumabaga a purpura. Gapuanan amin ida ti nasigo a tattao.+

10 Ngem ni Jehova ket pudno a Dios.+ Isu ti sibibiag a Dios+ ken ti Ari agingga iti tiempo a di nakedngan.+ Gapu iti rurodna agyugayogto ti daga,+ ket awanto ti nasion a makaandur iti sidong ti panangkondenarna.+ 11 Daytoy ti kunaenyonto kadakuada: “Ti didios+ a saan a nangaramid iti mismo a langlangit ken ti daga isuda dagidiay mapukawto iti daga+ ken iti baba dagitoy a langlangit.” 12 Isu ti Nangaramid iti daga babaen iti pannakabalinna,+ Daydiay mangipaspasdek a sititibker iti nabunga a daga babaen iti siribna,+ ken Daydiay a babaen iti pannakaawatna inyunnatna ti langlangit.+ 13 Iti panagtimekna mangted panagbellaak ti dandanum iti langlangit,+ ket paulienna dagiti alibungubong manipud iti ungto ti daga.+ Nangaramid pay kadagiti aribengbeng maipaay iti tudo,+ ket paruarenna ti angin manipud kadagiti kamaligna.+

14 Tunggal tao nagtignay buyogen ti kasta unay a kaawan nakem iti kasta saan a makaammo.+ Tunggal managobra iti metal pudno unay a mabainanto gapu iti kinitikitan a ladawan;+ ta ti sinukog a ladawan a kukuana maysa a kinaulbod,+ ket awan espiritu kadakuada.+ 15 Kinaubbawda, aramid a panangrabrabak.+ Iti tiempo a pannakaasikasoda mapukawdanto.+

16 Ti Binglay ni Jacob+ saan a kas kadagitoy a banag, ta isu ti Nangporma iti isuamin,+ ket ti Israel isu ti sarukod ti tawidna.+ Jehova ti buybuyot ti naganna.+

17 Ti aw-awitmo urnongem manipud iti daga,+ O babai nga agnanaed iti sidong ti pakarigatan.+ 18 Ta daytoy ti kinuna ni Jehova: “Adtoy ipallatibongko dagiti agnanaed iti daga iti daytoy a gundaway,+ ket parigatekto ida tapno matakuatanda.”+

19 Asiak pay maigapu iti dunorko!+ Ti saplitko immut-ot. Ket siak kinunak: “Sigurado a daytoy ti sakitko, ket awitekto dayta.+ 20 Ti bukodko a tolda naagawan, ket dagiti bukodko a singdan ti tolda napugsat amin a nagudua.+ Dagiti bukodko nga annak pinanawandak, ket awandan.+ Awanen a pulos ti mangyun-unnat iti toldak wenno mangibangbangon kadagiti lupot ti toldak. 21 Ta dagiti pastor nagtignayda buyogen ti kaawan nakem,+ ket saanda a sinapul ni Jehova a mismo.+ Dayta ti makagapu a saanda a nagtignay buyogen ti pannakatarus, ket amin dagiti maipaspastor nga animalda naiwarawara.”+

22 Imdenganyo! Maysa a damag! Adtoy dimtengen, kasta met maysa a dakkel a panagbanegbeg manipud iti daga ti amianan,+ tapno pagbalinen dagiti siudad ti Juda a langalang a rebbek, ti taeng dagiti chacal.+

23 Pagaammok unay, O Jehova, a saan a kukua ti naindagaan a tao ti dalanna. Saan a kukua ti tao a magmagna uray ti panangiturong iti addangna.+ 24 Lintegennak, O Jehova, nupay kasta buyogen ti panangukom;+ saan nga iti ungetmo,+ tapno saannak a paawanen.+ 25 Ibuyatmo ti pungtotmo kadagiti nasion+ a di nangikankano kenka,+ ken kadagiti pamilia a saan nga immawag uray iti naganmo.+ Ta inibusda ni Jacob.+ Wen, isu inibusda, ket itultuloyda ti panangtalipupos kenkuana;+ ket ti disso a pagyananna pinaglangalangda.+