Jeremias

43 Ita naaramid nga apaman a nalpasen a naisao ni Jeremias kadagiti amin nga umili ti amin a sasao ni Jehova a Diosda a buyogen iti dayta isu imbaon kadakuada ni Jehova a Diosda, mismo nga amin dagitoy a sasao,+ 2 ni Azarias nga anak ni Osaias+ ken ni Johanan+ nga anak ni Carea ken amin dagiti nadursok a lallaki+ kinunada ken Jeremias: “Maysa a kinaulbod ti sasawem.+ Ni Jehova a Diosmi saannaka nga imbaon, a kunaem, ‘Dikay sumrek iti Egipto tapno agtaengkayo sadiay kas ganggannaet.’+ 3 No di ket ni Baruc+ nga anak ni Nerias isungsungsongnaka maibusor kadakami iti panggep a panangyawat kadakami iti ima dagiti Caldeo, tapno papatayendakami wenno tapno idestierodakami idiay Babilonia.”+

4 Ket ni Johanan nga anak ni Carea ken ti amin a papanguluen dagiti puersa militar ken amin dagiti umili saanda a nagtulnog iti timek ni Jehova,+ nga agtultuloyda nga agnaed iti daga ti Juda.+ 5 Gapuna ni Johanan nga anak ni Carea ken ti amin a papanguluen dagiti puersa militar innalada ti isuamin a natda ti Juda a nagsubli manipud kadagiti amin a nasion a nakaiwarawaraanda, tapno agtaengda iti apagbiit iti daga ti Juda,+ 6 uray dagiti nabaneg a lallaki ken ti assawa a babbai ken ti babassit nga ubbing ken ti annak a babbai ti ari+ ken ti tunggal kararua a ni Nabuzaradan+ a panguluen ti para-guardia binay-anna nga agtalinaed ken Gedalias+ nga anak ni Ahicam+ nga anak ni Safan,+ ken ni Jeremias a mammadto ken ni Baruc+ nga anak ni Nerias. 7 Ket iti kamaudiananna dimtengda iti daga ti Egipto,+ ta saanda a nagtulnog iti timek ni Jehova; ket nagin-inut a dimtengda agingga idiay Tapanhes.+

8 Idin ti sao ni Jehova dimteng ken Jeremias idiay Tapanhes, a kunkunana: 9 “Mangitugotka ita imam kadagiti dadakkel a bato, ket masapul nga ilemmengmo ida iti argamasa iti terasa a ladrilio nga adda iti pagserkan ti balay ni Faraon iti Tapanhes iti imatang dagiti lallaki a Judio.+ 10 Ket masapul a kunaem kadakuada, ‘Daytoy ti kinuna ni Jehova ti buybuyot, ti Dios ti Israel: “Adtoy agbaonak ket alaekto ni Nabucodorosor nga ari ti Babilonia,+ ti adipenko,+ ket isaadkonto ti tronona iti ngatuen a mismo dagitoy a batbato nga inlemmengko, ket pudno unay nga isaknapnanto ti nadaeg a toldana iti rabawda. 11 Ket isu masapul a sumrek ket kabilenna ti daga ti Egipto.+ Siasinoman a maiparbeng iti makapapatay a saplit agpaayto iti makapapatay a saplit, ket siasinoman a maiparbeng iti pannakakautibo agpaayto iti pannakakautibo, ket siasinoman a maiparbeng iti kampilan agpaayto iti kampilan.+ 12 Ket paggayebgebekto ti apuy iti balbalay ti didios ti Egipto;+ ket pudno unay a puorannanto ida ken iturongna ida a kautibo ket bungonenna ti bagina iti daga ti Egipto, no kasano a ti maysa a pastor bungonenna ti bagina iti kawesna,+ ket pudno a rummuarto a sitatalna manipud sadiay. 13 Ket pudno unay a rumekrumekennanto dagiti adigi ti Bet-semes, nga adda iti daga ti Egipto; ket ti balbalay ti didios ti Egipto puorannanto iti apuy.”’”