Levitico

14 Ket intuloy ni Jehova ti agsao ken Moises, a kunkunana: 2 “Daytoy ti agbalinto a linteg ti agkukutel+ iti aldaw ti panangipasdek iti pannakagugorna, no masapul a maipan iti padi.+ 3 Ket ti padi masapul a mapan iti ruar ti pakarso, ket masapul a kitaen ti padi; ket no ti saplit a kukutel naagasanen+ iti daydiay agkukutel, 4 masapul ngarud nga agbilin ti padi; ket masapul a mangala maipaay iti panangdalus iti bagina iti dua a sibibiag a tumatayab a nadalus+ ken sedro a kayo+ ken cocus nga eskarlata a material+ ken hisopo.+ 5 Ket masapul nga agbilin ti padi, ket ti maysa a tumatayab masapul a mapapatay iti basehas a damili iti ngatuen ti agay-ayus a danum.+ 6 No maipapan iti sibibiag a tumatayab, masapul nga alaenna dayta ken ti sedro a kayo ken ti cocus nga eskarlata a material ken ti hisopo, ket masapul nga isawsawna ida ken ti sibibiag a tumatayab iti dara ti tumatayab a napapatay iti ngatuen ti agay-ayus a danum. 7 Kalpasanna masapul nga iparsiakna+ a mamimpito+ iti daydiay mangdaldalus iti bagina manipud kukutel ket masapul nga isu ibatadna a nadalus,+ ket masapul a bulosanna ti sibibiag a tumatayab iti nawayang a tay-ak.+

8 “Ket daydiay mangdaldalus iti bagina masapul a labaanna dagiti kawesna+ ken kiskisenna amin a buokna ken agdigus+ iti danum ket nadalusto, ket kalpasanna mabalinna ti umay iti pakarso. Ket masapul nga agnaed iti ruar ti toldana iti pito nga aldaw.+ 9 Ket mapasamakto iti maikapito nga aldaw a rebbeng a kiskisenna amin a buokna iti ulona+ ken timidna ken dagiti kidayna. Wen, rebbeng a kiskisenna amin a buokna, ket masapul a labaanna dagiti kawesna ken digusenna ti lasagna iti danum; ket isu nadalusto.

10 “Ket iti maikawalo nga aldaw+ mangalanto iti dua a nasalun-at nga urbon a kalakian a karnero ken maysa a nasalun-at a kabaian a kordero,+ a tumawenen, ken tallo nga apagkapullo ti maysa nga efa ti nasayaat nga arina kas daton a bukbukel+ a nababasa iti lana ken maysa a log a sukat ti lana;+ 11 ket ti padi a mangibatad kenkuana a nadalus masapul nga idatagna ti tao a mangdaldalus iti bagina, ken ti bambanag, iti sanguanan ni Jehova iti pagserkan ti tolda ti gimong. 12 Ket ti padi masapul nga alaenna ti maysa nga urbon a kalakian a karnero ket idatonna nga agpaay a daton gapu iti babak+ agraman ti log+ a sukat ti lana ket masapul nga ililina ida nga agsublisubli kas daton a mailili+ iti sanguanan ni Jehova. 13 Ket masapul a partienna ti urbon a kalakian a karnero iti disso+ a kankanayon a pamarpartian iti daton gapu iti basol ken iti daton a mapuoran, iti maysa a nasantuan a disso,+ agsipud ta, kas iti daton gapu iti basol, ti daton gapu iti babak kukua ti padi.+ Kasasantuan a banag dayta.

14 “Ket masapul nga alaen ti padi ti dadduma iti dara ti daton gapu iti babak, ket masapul nga ikabil dayta ti padi iti piditpidit ti makannawan a lapayag daydiay mangdaldalus iti bagina ken iti tangan ti makannawan nga imana ken iti tangan ti makannawan a sakana.+ 15 Ket masapul nga alaen ti padi ti dadduma a log+ a sukat ti lana ket ibukbokna iti makannigid a dakulap ti padi. 16 Ket masapul nga isawsaw ti padi ti makannawan a ramayna iti lana nga adda iti makannigid a dakulapna ket masapul nga iparsiakna a mamimpito ti dadduma iti lana babaen ti ramayna+ iti sanguanan ni Jehova. 17 Ket manipud iti natedda iti lana nga adda iti dakulapna ikabilto ti padi ti dadduma iti piditpidit ti makannawan a lapayag daydiay mangdaldalus iti bagina ken iti tangan ti makannawan nga imana ken iti tangan ti makannawan a sakana iti rabaw ti dara ti daton gapu iti babak.+ 18 Ket ti matedda iti lana nga adda iti dakulap ti padi ikabilnanto iti ulo daydiay mangdaldalus iti bagina, ket ti padi masapul a mangaramid iti panangabbong+ maipaay kenkuana iti sanguanan ni Jehova.

19 “Ket masapul nga idatag ti padi ti daton gapu iti basol+ ket mangaramid iti panangabbong maipaay iti daydiay mangdaldalus iti bagina manipud kinarugitna, ket kalpasanna partiennanto ti daton a mapuoran. 20 Ket masapul nga idaton ti padi ti daton a mapuoran ken ti daton a bukbukel+ iti rabaw ti altar, ket ti padi+ masapul a mangaramid iti panangabbong maipaay kenkuana;+ ket isu nadalusto.+

21 “Nupay kasta, no isu nanumo+ ken awanan umdas a kabalinan,+ mangala ngarud iti maysa nga urbon a kalakian a karnero kas daton gapu iti babak nga agpaay a daton a mailili tapno mangaramid iti panangabbong maipaay kenkuana ken apagkapullo ti maysa nga efa ti nasayaat nga arina a nababasa iti lana kas daton a bukbukel ken maysa a log a sukat ti lana, 22 ken dua a pagaw+ wenno dua nga urbon nga atap a kalapati, kas iti adda a kabalinanna, ket ti maysa masapul nga agserbi a kas daton gapu iti basol ket ti sabali kas daton a mapuoran. 23 Ket iti maikawalo nga aldaw+ masapul nga iyegna ida iti padi iti pagserkan ti tolda ti gimong+ iti sanguanan ni Jehova maipaay iti panangipasdek iti pannakagugorna.+

24 “Ket masapul nga alaen ti padi ti urbon a kalakian a karnero ti daton gapu iti babak+ ken ti log a sukat ti lana, ket ti padi masapul nga ililina ida nga agsublisubli kas daton a mailili iti sanguanan ni Jehova.+ 25 Ket masapul a partienna ti urbon a kalakian a karnero ti daton gapu iti babak, ket masapul nga alaen ti padi ti dadduma iti dara ti daton gapu iti babak ket ikabilna iti piditpidit ti makannawan a lapayag daydiay mangdaldalus iti bagina ken iti tangan ti makannawan nga imana ken iti tangan ti makannawan a sakana.+ 26 Ket ibukbokto ti padi ti dadduma iti lana iti makannigid a dakulap ti padi.+ 27 Ket masapul nga iparsiak ti padi+ babaen ti makannawan a ramayna ti dadduma iti lana nga adda iti makannigid a dakulapna iti mamimpito iti sanguanan ni Jehova. 28 Ket masapul nga ikabil ti padi ti dadduma iti lana nga adda iti dakulapna iti piditpidit ti makannawan a lapayag daydiay mangdaldalus iti bagina ken iti tangan ti makannawan nga imana ken iti tangan ti makannawan a sakana iti rabaw ti disso ti dara ti daton gapu iti babak.+ 29 Ket ti matedda iti lana nga adda iti dakulap ti padi ikabilnanto iti ulo+ daydiay mangdaldalus iti bagina tapno mangaramid iti panangabbong maipaay kenkuana iti sanguanan ni Jehova.

30 “Ket masapul nga idatagna ti maysa kadagiti pagaw wenno kadagiti atap nga urbon a kalapati a kabalinanna,+ 31 ti maysa kadakuada a kabalinanna kas daton gapu iti basol+ ken ti sabali kas daton a mapuoran+ agraman ti daton a bukbukel; ket ti padi masapul a mangaramid iti panangabbong+ maipaay iti daydiay mangdaldalus iti bagina iti sanguanan ni Jehova.

32 “Daytoy ti linteg maipaay iti daydiay ayan ti saplit a kukutel nga awanan kabalinan no ipaspasdek ti pannakagugorna.”

33 Ket nagsao ni Jehova kada Moises ken Aaron, a kunkunana: 34 “Inton makagtengkayo iti daga ti Canaan,+ nga itdek kadakayo kas sanikua,+ ket ikabilko ti saplit a kukutel iti maysa a balay iti daga a sanikuayo,+ 35 daydiay makinkukua iti balay masapul ngarud nga umay ket ibagana iti padi, a kunkunana, ‘Maysa a banag a kasla saplit ti nagparang kaniak iti balay.’ 36 Ket ti padi masapul a mangted kadagiti bilin, ket masapul nga ikkatenda ti nagyan iti balay sakbay a makastrek ti padi a mangkita iti saplit, tapno saanna a maideklara a narugit ti isuamin nga adda iti balay; ket kalpasan dayta sumrekto ti padi a mangkita iti balay. 37 Inton nakitanan ti saplit, ngarud no ti saplit adda kadagiti diding ti balay, nga addaan kadagiti alintungogan a dumuyaw a berde wenno lumabaga, ket ti langada nalenlennek ngem iti makinruar ti diding, 38 masapul ngarud a rummuar ti padi manipud iti balay agingga iti pagserkan ti balay ket masapul a kuarentinasenna+ ti balay iti pito nga aldaw.

39 “Ket masapul nga agsubli ti padi iti maikapito nga aldaw ket masapul a kitaenna;+ ket no ti saplit nagsaknap kadagiti diding ti balay, 40 masapul ngarud a ti padi mangted kadagiti bilin, ket masapul a lekkabenda+ dagiti bato nga ayan ti saplit, ket masapul nga ibellengda ida iti ruar ti siudad iti maysa a disso a narugit. 41 Ket pakarusannanto ti balay iti intero nga aglawlaw iti uneg, ket ti argamasa a pila a liniksabda masapul nga ibukbokda iti ruar ti siudad iti maysa a disso a narugit. 42 Ket masapul a mangalada iti sabali a batbato ket iseksekda ida iti lugar ti immun-una a batbato; ket agpaalanto iti naiduma nga argamasa a pila, ket masapul a papalitadaanna ti balay.

43 “Nupay kasta, no ti saplit agsubli ket tumanor iti balay kalpasan a nalekkab ti batbato ken kalpasan a naliksaban ti balay ken napalitadaan dayta, 44 masapul ngarud a sumrek ti padi+ ket kitaenna; ket no ti saplit nagsaknap iti balay, makapapatay a kukutel+ dayta iti balay. Narugit dayta. 45 Ket masapul nga iparugpona ti balay agraman dagiti batona ken dagiti kayona ken isuamin nga argamasa a pila ti balay ket masapul nga ipaibunagna dayta iti ruar ti siudad iti maysa a narugit a disso.+ 46 Ngem siasinoman a sumrek iti balay iti aniaman kadagiti aldaw ti panangkuarentinas+ iti dayta narugitto agingga iti rabii;+ 47 ket asinoman nga agidda iti balay rebbeng a labaanna dagiti kawesna,+ ket siasinoman a mangan iti balay rebbeng a labaanna dagiti kawesna.

48 “Nupay kasta, no umayto latta ti padi ket kitaenna, ket, sadiay ita, ti saplit saan a nagsaknap iti balay kalpasan a napalitadaan ti balay, masapul ngarud nga ibatad ti padi a nadalus ti balay, agsipud ta ti saplit immimbagen.+ 49 Ket tapno gugoran ti balay manipud basol masapul a mangala iti dua a tumatayab+ ken sedro a kayo+ ken cocus nga eskarlata a material+ ken hisopo. 50 Ket masapul a papatayenna ti maysa a tumatayab iti basehas a damili iti ngatuen ti agay-ayus a danum.+ 51 Ket masapul nga alaenna ti sedro a kayo ken ti hisopo+ ken ti cocus nga eskarlata a material ken ti sibibiag a tumatayab ket isawsawna ida iti dara ti tumatayab a napapatay ken iti agay-ayus a danum, ket masapul nga iparsiakna+ iti balay a mamimpito.+ 52 Ket masapul a gugoranna ti balay manipud basol babaen ti dara ti tumatayab ken ti agay-ayus a danum ken ti sibibiag a tumatayab ken ti sedro a kayo ken ti hisopo ken ti cocus nga eskarlata a material. 53 Ket masapul a bulosanna ti sibibiag a tumatayab iti ruar ti siudad nga agturong iti nawayang a tay-ak ket masapul a mangaramid iti panangabbong+ maipaay iti balay; ket nadalusto.

54 “Daytoy ti linteg maipapan iti aniaman a saplit a kukutel+ ken maipapan iti di gagangay a panagpamarut ti buok+ 55 ken maipapan iti kukutel ti kawes+ ken iti balay, 56 ken maipapan iti rettab ken iti gaddil ken iti ratunok,+ 57 tapno mangipaay kadagiti pammilin+ no ti maysa a banag narugit ken no ti maysa a banag nadalus. Daytoy ti linteg maipapan ti kukutel.”+