Levitico

21 Ket ni Jehova kinunana ken Moises: “Agsaoka iti papadi, annak ni Aaron, ket masapul a kunaem kadakuada, ‘Maigapu iti kararua a pimmusay awan koma ti asinoman a mangtulaw iti bagina iti tengnga dagiti kailianna.+ 2 Ngem maigapu iti nainaig kenkuana iti dara a nasinged kenkuana, maigapu iti inana ken maigapu iti amana ken maigapu iti anakna a lalaki ken maigapu iti anakna a babai ken maigapu iti kabsatna a lalaki 3 ken maigapu iti kabsatna a babai, maysa a birhen a nasinged kenkuana, a saan a nagbalin a kukua ti maysa a lalaki, maigapu kenkuana matulawanna ti bagina. 4 Saanna koma a tulawan ti bagina [maigapu iti babai nga inikutan] ti maysa a makinkukua iti tengnga dagiti kailianna tapno tabbaawanna ti bagina. 5 Saanda a rebbeng a pagkalbuen dagiti uloda,+ ket ti pingir ti barbasda saanda a rebbeng a kiskisan,+ ket iti lasagda saanda a rebbeng nga iwaen.+ 6 Rebbeng nga agbalinda a nasantuan iti Diosda,+ ket rebbeng a saanda a tabbaawan ti nagan ti Diosda,+ agsipud ta isuda dagidiay mangidatag kadagiti naipuor a daton ni Jehova, ti tinapay ti Diosda;+ ket masapul a paneknekanda ti bagbagida a nasantuan.+ 7 Rebbeng a saanda a mangala iti balangkantis+ wenno iti pinilit a babai; ket ti babai a naidiborsio+ ken asawana rebbeng a saanda nga alaen,+ agsipud ta isu nasantuan iti Diosna. 8 Gapuna masapul nga isu santipikarem,+ agsipud ta isu daydiay mangidatag iti tinapay ti Diosmo. Rebbeng nga isu agbalin a nasantuan kenka,+ agsipud ta siak ni Jehova, a mangsansantipikar kadakayo, nasantuanak.+

9 “‘Ita no kas pagarigan ti anak a babai ti maysa a padi tabbaawanna ti bagina babaen ti panagbalangkantis, ni amana ti tabtabbaawanna. Rebbeng a mapuoran iti apuy.+

10 “‘Ket no maipapan iti nangato a padi ti kakabsatna a ti ulona ti pakaibukbokan ti pangpulot a lana+ ken makin-ima iti napno iti pannakabalin a mangikawes kadagiti pagan-anay,+ rebbeng a saanna a bay-an nga agsugsugabba ti ulona,+ ket rebbeng a saanna a pigisen dagiti pagan-anayna.+ 11 Ket rebbeng a di umasideg iti aniaman a natay a kararua.+ Saanna a tulawan ti bagina maigapu iti amana ken iti inana. 12 Rebbeng a saan met a rummuar manipud iti santuario ken saanna a tabbaawan ti santuario ti Diosna,+ agsipud ta ti pagilasinan ti dedikasion, ti pangpulot a lana ti Diosna,+ adda kenkuana. Siak ni Jehova.

13 “‘Ket iti biangna, rebbeng a mangala iti maysa a babai a birhen pay laeng.+ 14 No maipapan iti balo wenno naidiborsio a babai ken daydiay pinilit, maysa a balangkantis, awan koma kadagitoy ti alaenna, no di ket rebbeng a mangala iti maysa a birhen manipud kadagiti kailianna kas asawa. 15 Ket rebbeng a saanna a tabbaawan ti bin-ina iti tengnga dagiti kailianna,+ agsipud ta siak ni Jehova a mangsansantipikar kenkuana.’”+

16 Ket intuloy ni Jehova ti agsao ken Moises, a kunkunana: 17 “Agsaoka ken Aaron, a kunaem, ‘Awan koma ti umasideg a lalaki iti bin-im iti intero a kapkaputotanda nga addaan pilaw+ tapno idatagna ti tinapay ti Diosna.+ 18 No kas pagarigan adda asinoman a lalaki nga addaan pilaw, saan koma nga umasideg: ti maysa a lalaki a bulsek wenno pilay wenno nagisgis ti agongna wenno addaan maysa a kameng nga atiddog unay,+ 19 wenno maysa a lalaki a nablo ti sakana wenno nablo ti imana, 20 wenno kubbo wenno nakuttong wenno adda sakit kadagiti matana wenno ginaddil wenno addaan kadagiti kurad wenno narumek ti ukel-ukelna.+ 21 Asinoman a lalaki iti bin-i ni Aaron a padi nga addaan iti pilaw saan koma nga umadani tapno idatagna ti naipuor a datdaton ni Jehova.+ Isu addaan iti pilaw. Saan koma nga umadani a mangidatag iti tinapay ti Diosna.+ 22 Mabalinna a kanen ti tinapay ti Diosna manipud iti kasasantuan a bambanag+ ken manipud iti nasantuan a bambanag.+ 23 Nupay kasta, saan koma a sumrek iti asideg ti kortina,+ ket saan koma nga umadani iti altar,+ agsipud ta isu addaan pilaw;+ ket rebbeng a saanna a tabbaawan ti santuariok,+ ta siak ni Jehova a mangsansantipikar kadakuada.’”+

24 Iti kasta ni Moises nagsao ken Aaron ken iti annakna ken iti amin nga annak ti Israel.