Marcos

8 Kadagidi nga aldaw, idi adda manen maysa a dakkel a bunggoy ket awan ti makanda, inayabanna dagiti adalan ket kinunana kadakuada:+ 2 “Maasianak+ iti bunggoy, agsipud ta tallo nga aldawen a nagtalinaedda iti dennak ket awan makanda; 3 ket no pagawidek ida kadagiti pagtaenganda a mabisbisin, agkapuydanto iti dalan. Ta pudno unay, ti dadduma kadakuada ket naggapu iti adayo.” 4 Ngem simmungbat kenkuana dagiti adalanna: “Manipud iti sadino ditoy naiputputong a lugar a ti asinoman mabalinnanto a penneken dagitoy a tattao kadagiti tinapay?”+ 5 Kaskasdi inimtuodna kadakuada: “Mano a tinapay ti adda kadakayo?” Kinunada: “Pito.”+ 6 Ket binilinna ti bunggoy nga agdalupisakda iti daga, ket innalana ti pito a tinapay, nagyaman,+ pinispisina ida, ket rinugianna nga ited kadagiti adalanna tapno iserbida, ket inserbida ida iti bunggoy.+ 7 Addaanda met iti sumagmamano a babassit nga ikan; ket, idi nabendisionanna dagitoy, imbagana met kadakuada nga iserbida dagitoy.+ 8 Iti kasta nanganda ket napnekda, ket nakaurnongda ti tedda a pispisi, pito a labba ti taraon a napno.+ 9 Nupay adda idi agarup uppat a ribu a lallaki. Kamaudiananna pinagawidna ida.+

10 Ket dagus a limmugan iti barangay agraman dagiti adalanna ket dimteng kadagiti paset ti Dalmanuta.+ 11 Ditoy rimmuar dagiti Fariseo ket rinugianda ti makisupiat kenkuana, nga agsapsapulda kenkuana iti pagilasinan manipud langit, tapno isu subokenda.+ 12 Gapuna immasug iti nauneg+ iti espirituna, ket kinunana: “Apay a daytoy a kaputotan agsapul iti pagilasinan? Pudno kunak, Awanto ti pagilasinan a maited iti daytoy a kaputotan.”+ 13 Gapuna pinanawanna ida, limmugan manen, ket napan idiay ballasiw nga igid ti baybay.

14 Ket napasamak, nalipatanda ti mangitugot kadagiti tinapay, ket malaksid iti maymaysa a tinapay awanen ti aniaman kadakuada iti barangay.+ 15 Ket rinugianna a bilinen ida a silalawag ket kunana: “Pagtalinaedenyo a silulukat dagiti matayo, siputanyo ti lebadura dagiti Fariseo ken ti lebadura ni Herodes.”+ 16 Gapuna nagririkiarda iti maysa ken maysa gapu ta awananda kadagiti tinapay.+ 17 Idi madlawna daytoy, kinunana kadakuada: “Apay nga agririkiarkayo maipapan iti kaawan ti tintinapayyo?+ Dikay pay aya maawatan ken matarusan ti kaipapananna? Ngimmelngel aya dagiti pusoyo iti pannakaawat?+ 18 ‘Nupay addaankay kadagiti mata, dikay kadi makakita; ket nupay addaankay kadagiti lapayag, dikay kadi makangngeg?’+ Ket dikay kadi malagip, 19 idi pinispisik ti lima a tinapay+ maipaay iti lima ribu a lallaki, mano a labba a napno kadagiti pispisi ti naurnongyo?” Kinunada kenkuana: “Sangapulo ket dua.”+ 20 “Idi pinispisik ti pito maipaay iti uppat a ribu a lallaki, mano a labba ti taraon a napno kadagiti pispisi ti naurnongyo?” Ket kinunada kenkuana: “Pito.”+ 21 Gapuna kinunana kadakuada: “Dikay pay kadi matarusan ti kaipapananna?”+

22 Itan dimtengda idiay Betsaida. Ditoy dagiti tattao nangyegda kenkuana iti bulsek a tao, ket nagpakaasida kenkuana a sagidenna.+ 23 Ket kinibinna ti bulsek a tao, impanna iti ruar ti purok, ket, idi natupraanna+ dagiti matana, impatayna kenkuana dagiti imana ket rinugianna nga imtuoden kenkuana: “Adda kadi aniaman a makitam?” 24 Ket ti lalaki timmangwa ket rinugianna a kunaen: “Adda makitkitak a tattao, agsipud ta adda maim-imatangak a kasla kaykayo, ngem agpagnapagnada.” 25 Idin impatayna manen dagiti imana kadagiti mata ti lalaki, ket ti lalaki nakakita a silalawag, ket immimbag, ket silalawag a makitkitanan ti isuamin. 26 Gapuna pinagawidna, a kunkunana: “Ngem dika sumrek idiay purok.”+

27 Ni Jesus ken dagiti adalanna pimmanawda itan nga agturong kadagiti purok ti Cesarea Filipos, ket iti dalan rinugianna a nagsaludsodan dagiti adalanna, a kunkunana kadakuada: “Siasinoak sigun iti panagkuna dagiti tattao?”+ 28 Kinunada kenkuana: “Ni Juan a Mammautisar,+ ket ti dadduma, ni Elias,+ kaskasdi a ti sabsabali, Maysa kadagiti mammadto.”+ 29 Ket insangona kadakuada ti saludsod: “Dakayo, nupay kasta, siasinoak iti panagkunayo?” Kas sungbat kinuna kenkuana ni Pedro: “Sika ti Kristo.”+ 30 Iti kasta siiinget a binilinna ida a saanda nga ibagbaga iti asinoman ti maipapan kenkuana.+ 31 Kasta met, rinugianna nga insuro ida a ti Anak ti tao masapul nga agpasar iti adu a panagsagaba ket ilaksid dagiti lallakay ken ti panguluen a papadi ken dagiti eskriba ket mapapatay,+ ket bumangon tallo nga aldaw kalpasanna.+ 32 Pudno unay, buyogen ti kinaprangka isasaona idi dayta. Ngem isu impakni ni Pedro ket rinugianna a binabalaw.+ 33 Isu timmaliaw, kimmita kadagiti adalanna ket binabalawna ni Pedro, ket kinunana: “Inka iti likudak, Satanas, agsipud ta pampanunotem, saan a ti pampanunot ti Dios, no di ket ti pampanunot ti tattao.”+

34 Inayabanna ita ti bunggoy agraman dagiti adalanna ket kinunana kadakuada: “No ti asinoman kayatna ti sumurot kaniak, paglikudanna koma ti bagina ket bagkatenna ti kayona a pagtutuokan ket agtultuloy a surotennak.+ 35 Ta siasinoman nga agtarigagay a mangisalakan iti kararuana mapukawnanto dayta; ngem siasinoman a makapukaw iti kararuana maigapu kaniak ken iti naimbag a damag maisalakannanto dayta.+ 36 Pudno unay, ania ti magunggona ti maysa a tao a magun-odna ti intero a lubong ket mapukawna ti kararuana?+ 37 Ania, a pudpudno, ti ited ti maysa a tao a kasukat ti kararuana?+ 38 Ta siasinoman a mangibain kaniak ken iti sasaok iti daytoy mannakikamalala ken managbasol a kaputotan, ibainto met ti Anak ti tao+ inton dumteng iti dayag ni Amana agraman dagiti nasantuan nga anghel.”+