Deuteronomio
17 “Dika mangisakripisio ken Jehova a Diosmo iti toro wenno iti karnero nga addaan pilaw, aniaman a dakes; agsipud ta nakarimrimon a banag dayta ken Jehova a Diosmo.+
2 “No kas pagarigan iti tengngam iti maysa kadagiti siudadmo nga ited kenka ni Jehova a Diosmo adda masarakan a lalaki wenno babai a mangyugali ti dakes kadagiti mata ni Jehova a Diosmo tapno salungasingenna ti tulagna,+ 3 ket mapan ken agdayaw kadagiti sabali a didios ket agruknoy kadakuada wenno iti init wenno iti bulan wenno iti isuamin a buyot ti langlangit,+ banag a saanko nga imbilin,+ 4 ket naibaga kenka ken nangngegmo ket sinukimatmo a naan-anay, ket, adtoy! maipasdek ti banag a kas kinapudno,+ naaramid iti Israel daytoy nakarimrimon a banag! 5 masapul met a dayta a lalaki wenno dayta a babai a nangaramid itoy dakes a banag iruarmo kadagiti ruanganmo, wen, ti lalaki wenno ti babai, ket uboremto ti kasta a tao iti batbato, ket masapul a matay ti kasta a tao.+ 6 Iti ngiwat ti dua a saksi wenno ti tallo a saksi+ rebbeng a mapapatay daydiay matay. Saanto a mapapatay iti ngiwat ti maymaysa a saksi.+ 7 Ti ima dagiti saksi ti umuna iti amin nga agdisso kenkuana tapno papatayenda, ket ti ima dagiti amin nga umili kalpasanna;+ ket masapul nga ikkatem ti dakes iti tengngam.+
8 “No kas pagarigan narikut unay kenka ti maysa a banag nga agpaay iti hudisial a pangngeddeng,+ maysa nga adda dara a naibukbok,+ nga iti dayta adda timmanor a legal a dawat,+ wenno adda naaramidan a naranggas nga aramid, bambanag a pagsusupiatan,+ iti uneg dagiti ruanganmo, masapul met a tumakderka ket sumang-atka iti disso a piliento ni Jehova a Diosmo,+ 9 ket masapul a mapanka iti papadi,+ dagiti Levita, ken iti ukom+ nga agan-annongto kadagidiay nga aldaw, ket masapul nga agimtuodka, ket iyawatdanto kenka ti sao ti hudisial a pangngeddeng.+ 10 Kalpasanna masapul nga aramidem ti maitunos iti sao nga iyawatdanto kenka manipud iti dayta a disso a piliento ni Jehova; ket masapul nga annadam nga aramiden ti maitunos ti isuamin nga isuroda kenka. 11 Maitunos iti linteg nga ipatuldodanto kenka, ken maitunos iti hudisial a pangngeddeng a sawendanto kenka, rebbeng nga aramidem.+ Dika sumiasi iti sao nga iyawatdanto kenka, iti makannawan wenno iti makannigid.+ 12 Ket ti tao nga agtignayto buyogen ti kinadursok iti saanna nga iyiimdeng iti padi a sitatakder tapno agserbi sadiay ken Jehova a Diosmo wenno iti ukom,+ dayta a tao masapul a matay;+ ket masapul nga ikkatem ti dakes iti Israel.+ 13 Ket mangngegto dagiti amin nga umili ket agbutengda,+ ket saandanton a pulos agtignay a sidudursok.
14 “Inton sumrekka kamaudiananna iti daga nga ited kenka ni Jehova a Diosmo, ket tinagikuam ken nagnaedka iti dayta,+ ket kinunam, ‘Mangisaadak iti ari a mangituray kaniak kas iti amin a nasnasion nga adda iti aglikmutko’;+ 15 di bumurong nga isaadmo a mangituray kenka ti ari a piliento ni Jehova a Diosmo.+ Mangisaadkanto iti ari a mangituray kenka manipud iti kakabsatmo. Saanto a maipalubos nga ikabilmo a mangituray kenka ti ganggannaet a saanmo a kabsat. 16 Isuna laeng ta rebbeng a saan a mangpaadu kadagiti kabalio maipaay iti bagina,+ wenno mamagsubli kadagiti umili idiay Egipto tapno mangpaadu kadagiti kabalio;+ yantangay kinuna kadakayo ni Jehova, ‘Dikay pulos agsublin babaen itoy a dalan.’ 17 Saan met a mangpaadu iti assawa maipaay iti bagina, tapno saan a sumiasi ti pusona;+ wenno uray mangpaadu iti pirak ken balitok maipaay iti bagina iti kasta unay.+ 18 Ket mapasamakto a no agtugaw iti trono ti pagarianna, masapul nga isuratna iti libro maipaay iti bagina ti maysa a kopia daytoy a linteg manipud iti daydiay adda iti aywan ti papadi, dagiti Levita.+
19 “Ket agtalinaedto dayta kenkuana, ket masapul nga agbasa iti dayta iti amin nga al-aldaw ti panagbiagna,+ tapno masursurona ti agbuteng ken Jehova a Diosna iti kasta salimetmetanna amin dagiti sao daytoy a linteg ken dagitoy nga alagaden babaen ti panangaramid kadakuada;+ 20 tapno saan a tuman-ok ti pusona iti ngatuen ti kakabsatna+ ken tapno saan a sumiasi iti bilin a mapan iti makannawan wenno iti makannigid,+ tapno iti kasta mapaatiddogna ti al-aldawna iti pagarianna,+ isu ken ti annakna iti tengnga ti Israel.