Deuteronomio

2 “Kalpasanna nagbaw-ingtayo ket nagluastayo a napan iti let-ang a dumalan iti Nalabaga a Baybay, kas iti sinao kaniak ni Jehova;+ ket linikmuttayo ti Bantay Seir iti adu nga aldaw. 2 Kamaudiananna kinuna ni Jehova daytoy kaniak, 3 ‘Umdasen ti kabayag ti pananglikmutyo itoy a bantay.+ Baliwanyo ti turongyo nga agpaamianan. 4 Ket bilinem dagiti umili, a kunaem: “Lumasatkayo iti ketegan ti kakabsatyo,+ ti annak ni Esau,+ nga agnanaed iti Seir;+ ket agbutengdanto gapu kadakayo,+ ket masapul nga agannadkayo unay. 5 Dikay makiringgor kadakuada, agsipud ta saanakto a mangted kadakayo iti dagada uray laeng koma kaakaba ti dapan ti saka; agsipud ta intedko ken Esau ti Bantay Seir kas pannakasanikua.+ 6 Ti taraon a magatangyo kadakuada iti kuarta, kanenyonto; ken kasta met a ti danum a magatangyo kadakuada iti kuarta, inumenyonto.+ 7 Ta binendisionannaka ni Jehova a Diosmo iti tunggal aramid ta imam.+ Pagaammona unay ti ilalasatmo itoy dakkel a let-ang. Kadagitoy uppat a pulo+ a tawen adda kenka ni Jehova a Diosmo. Saanka a nagkurang iti aniaman a banag.”’+ 8 Gapuna limmasattayo nga adayo iti kakabsattayo, ti annak ni Esau,+ nga agnanaed idiay Seir, manipud iti dalan ti Araba,+ manipud Elat ken manipud Ezion-geber.+

“Sumaganad nagbaw-ingtayo ket limmasattayo a dumalan iti let-ang ti Moab.+ 9 Idin kinuna kaniak ni Jehova, ‘Dika semsemen ti Moab wenno makigubat kadakuada, agsipud ta saanakto a mangted kenka iti aniaman iti dagana kas pannakasanikua, ta iti annak ni Lot+ intedko ti Ar+ kas pannakasanikua. 10 (Ti Emim+ nagnaed iti dayta kadagidi nagkauna a tiempo, maysa nga ili a dakkel ken nakaad-adu ken natayag a kas iti Anakim.+ 11 No maipapan iti Refaim,+ naibilangda met a kas iti Anakim,+ ket aw-awagan idi ida dagiti Moabita iti Emim. 12 Ket dagiti Horeo+ nagnaedda idiay Seir kadagidi nagkauna a tiempo, ket ti annak ni Esau+ inikkatanda ida iti sanikua ket tinalipuposda ida iti sanguananda ket nagnaedda iti lugarda,+ kas met laeng iti masapul nga aramiden ti Israel iti daga a pannakasanikuana, a sigurado nga itedto kadakuada ni Jehova.) 13 Iti daytoy a tiempo tumakderkayo ket ballasiwenyo ti naapres a ginget ti Zered.’ Iti kasta binallasiwtayo ti naapres a ginget ti Zered.+ 14 Ket ti al-aldaw a pannagnatayo manipud Cades-barnea agingga a naballasiwtayo ti naapres a ginget ti Zered tallopulo ket walo a tawen, agingga a ti intero a kaputotan dagiti lallaki ti gubat nagngudoda manipud tengnga ti pakarso, kas iti insapata kadakuada ni Jehova.+ 15 Ket adda met idi kadakuada ti ima+ ni Jehova tapno riribukenna ida iti tengnga ti pakarso, agingga a nagngudoda.+

16 “Ket naaramid nga apaman nga amin dagiti lallaki ti gubat nalpasdan a natay iti tengnga dagiti umili,+ 17 nagsao pay kaniak ni Jehova, a kunkunana, 18 ‘Lumasatka ita nga aldaw iti teritoria ti Moab, awan sabali, ti Ar,+ 19 ket masapul nga umasidegka iti sanguanan ti annak ni Ammon. Dika semsemen ida wenno makiringgor kadakuada, agsipud ta saanakto a mangted kenka iti aniaman iti daga ti annak ni Ammon kas pannakasanikua, ta iti annak ni Lot ti nangitedak iti dayta kas pannakasanikua.+ 20 Maibilbilang met idi a kas daga ti Refaim.+ (Ti Refaim nagnaed iti dayta kadagidi nagkauna a tiempo, ket aw-awagan idi ida dagiti Ammonita iti Zamzummim. 21 Dadakkel ken nakaad-adu ken natatayagda a tattao a kas iti Anakim;+ ket tinalipupos ida ni Jehova+ iti sanguananda, tapno maikkatanda ida iti sanikua ket agnaedda iti lugarda; 22 kas met laeng iti inaramidna maipaay iti annak ni Esau, nga agnanaed idiay Seir,+ idi tinalipuposna dagiti Horeo+ iti sanguananda, tapno maikkatanda ida iti sanikua ket makapagnaedda iti lugarda agingga itoy nga aldaw. 23 No maipapan iti Avim,+ a nagnanaed kadagiti purok agingga iti Gaza,+ ti Caftorim,+ a nagtaud iti Caftor,+ tinalipuposda ida, tapno makapagnaedda iti lugarda.)

24 “‘Tumakderkayo, agluaskayo ket ballasiwenyo ti naapres a ginget ti Arnon.+ Kitaem, inyawatko ita imam ni Sihon+ nga ari ti Hesbon, ti Amoreo. Gapuna rugiam a tagikuaen ti dagana, ket makigubatka kenkuana. 25 Itoy nga aldaw rugiakto nga ikabil ti panagalinggaget kenka ken ti panagbuteng kenka iti sanguanan dagiti ili nga adda iti baba ti amin a langlangit, a makangngegto iti damag maipapan kenka; ket pudno nga aglagawdanto ken agpaut-otdanto a kas ti panagpaut-ot iti panagpasngay gapu kenka.’+

26 “Kalpasanna nangibaonak kadagiti mensahero manipud let-ang ti Kedemot+ a mapan ken Sihon+ nga ari ti Hesbon nga addaanda iti sasao ti talna,+ a kunana, 27 ‘Palubosannak a lumasat iti dagam. Iti laeng dalan ti pagnaakto. Saanakto nga agbaw-ing iti makannawan wenno iti makannigid.+ 28 Ti taraon nga ilakomto kaniak maipaay iti kuarta, kanekto; ket ti danum nga itedmonto kaniak maipaay iti kuarta, inumekto. Palubosannak laeng a lumasat babaen kadagiti sakak,+ 29 kas met laeng iti inaramid kaniak ti annak ni Esau nga agnanaed idiay Seir+ ken dagiti Moabita+ nga agnanaed idiay Ar, agingga a maballasiwkonto ti Jordan nga agturong iti daga nga ited kadakami ni Jehova a Diosmi.’+ 30 Ket ni Sihon nga ari ti Hesbon saannatayo a pinalubosan a lumasat kenkuana, agsipud ta binay-an ni Jehova a Diosmo a sumubeg ti espirituna+ ken tumangken ti pusona, tapno isu iyawatna ita imam kas itoy nga aldaw.+

31 “Gapu itoy kinuna kaniak ni Jehova, ‘Kitaem, rinugiak a baybay-an kenka ni Sihon ken ti dagana. Rugiam a tagikuaen ti dagana.’+ 32 Idi rimmuar ni Sihon, isu ken dagiti amin a tattaona, a sumabet kadatayo iti bakal idiay Jahaz,+ 33 idin isu binaybay-an kadatayo ni Jehova a Diostayo,+ iti kasta pinarmektayo+ ken ti annakna ken ti amin a tattaona. 34 Ket kinautibotayo dagiti amin a siudadna iti daydi met laeng a tiempo ket ti tunggal siudad impaaytayo iti pannakadadael,+ lallaki ken babbai ken babassit nga annak. Awan inteddatayo a nakalasat. 35 Dagiti laeng naamo nga animal ti innalatayo a kas samsam maipaay iti bagbagitayo, agraman ti ginam-ud dagiti siudad a nakautibotayo.+ 36 Manipud Aroer,+ nga adda iti sibay ti naapres a ginget ti Arnon, ken ti siudad nga adda iti naapres a ginget, agingga idiay Galaad, awan idi ti ili a nangato unay kadatayo.+ Binaybay-an ida amin kadatayo ni Jehova a Diostayo. 37 Isuna laeng ta saankayo nga immasideg iti daga ti annak ni Ammon,+ ti intero nga igid ti naapres a ginget ti Jaboc,+ wenno uray kadagiti siudad ti nakabambantay a rehion, wenno uray iti aniaman a banag a maipapan iti dayta nangted ni Jehova a Diostayo iti bilin.