Deuteronomio

4 “Ket ita, O Israel, umimdengka kadagiti alagaden ken kadagiti hudisial a pangngeddeng nga isurok kadakayo nga aramidenyo, tapno agbiagkayo+ ken pudno a makastrekkayo ket tagikuaenyo ti daga nga ited kadakayo ni Jehova a Dios dagidi ammayo. 2 Dikay nayonan ti sao nga ibilbilinko kadakayo, dikay met kissayan dayta,+ tapno masalimetmetanyo dagiti bilin ni Jehova a Diosyo nga ibilbilinko kadakayo.

3 “Dagiti bukodyo a mata ti nakakita iti inaramid ni Jehova no maipapan ken Baal ti Peor,+ a tunggal tao a simmurot ken Baal ti Peor isu ti tinalipupos ni Jehova a Diosmo manipud tengngam.+ 4 Ngem dakayo a kumkumpet+ ken Jehova a Diosyo sibibiagkayo amin ita nga aldaw. 5 Kitaenyo, sinuruankayo kadagiti alagaden+ ken kadagiti hudisial a pangngeddeng,+ kas iti imbilin kaniak ni Jehova a Diosko, tapno aramidenyo ti kasta iti tengnga ti daga a mapanyo tagikuaen. 6 Ket masapul a salimetmetan ken aramidenyo ida, agsipud ta kinasirib daytoy+ iti biangyo ken pannakaawat+ iti biangyo iti imatang dagiti ili a makangngegto kadagitoy amin nga alagaden, ket sigurado a kunaendanto, ‘Daytoy dakkel a nasion di pagduaduaan a masirib ken mannakaawat nga ili.’+ 7 Ta ania a dakkel a nasion+ ti addaan didios nga asideg iti dayta a kas iti kaadda ni Jehova a Diostayo iti isuamin nga iyaawagtayo kenkuana?+ 8 Ket ania a dakkel a nasion ti addaan kadagiti nalinteg nga alagaden ken kadagiti hudisial a pangngeddeng a kas iti isuamin daytoy a linteg nga ikabilko iti sangoyo ita nga aldaw?+

9 “Isuna laeng ta agaluadka ken annadam a naimbag ta kararuam,+ tapno saanmo a malipatan ti bambanag a nakita dagita matam+ ken tapno saanda a sumina ita pusom iti amin nga al-aldaw ti panagbiagmo;+ ket masapul nga ipakaammom ida iti annakmo ken iti appokom,+ 10 ti aldaw a panagtakdermo iti sango ni Jehova a Diosmo idiay Horeb,+ idi a kinuna kaniak ni Jehova, ‘Ummongem a sangsangkamaysa kaniak dagiti umili tapno maipangngegko kadakuada ti sasaok,+ tapno masursuroda ti agbuteng+ kaniak iti amin nga al-aldaw a sibibiagda iti rabaw ti daga ken tapno maisuroda ti annakda.’+

11 “Gapuna immasidegkayo ket nagtakderkayo iti arisadsad ti bantay, ket ti bantay sumsumged idi iti apuy agingga iti nagtangatangan; adda kinasipnget, ulep ken napuskol a daguyemyem.+ 12 Ket nangrugi nga agsao kadakayo ni Jehova manipud tengnga ti apuy.+ Mangmangngegyo idi ti uni ti sasao, ngem awan makitkitayo a langa+—awan no di timek.+ 13 Ket insaona kadakayo ti tulagna,+ nga imbilinna kadakayo nga aramidenyo—ti Sangapulo a Sasao,+ a kalpasan dayta insuratna ida iti rabaw ti dua a tapi a bato.+ 14 Ket siak ti binilin ni Jehova iti daydi met laeng a tiempo a mangisuro kadakayo kadagiti alagaden ken kadagiti hudisial a pangngeddeng, tapno aramidenyo ida iti daga a bumallasiwanyo tapno tagikuaenyo.+

15 “Ket masapul nga annadanyo a naimbag dagiti kararuayo,+ agsipud ta saankayo a nakakita iti aniaman a langa+ iti aldaw a panagsao kadakayo ni Jehova idiay Horeb manipud tengnga ti apuy, 16 tapno saankayo nga agtignay iti makadadael+ ken pudno a saanyo nga iyaramidan ti bagbagiyo iti kinitikitan a ladawan, ti langa ti aniaman a simbolo, ti ladawan ti lalaki wenno babai,+ 17 ti ladawan ti aniaman nga animal nga adda iti daga,+ ti ladawan ti aniaman a nagpayak a tumatayab nga agtayab iti langlangit,+ 18 ti ladawan ti aniaman a banag nga aggargaraw iti daga, ti ladawan ti aniaman nga ikan+ nga adda iti dandanum iti uneg ti daga; 19 ken tapno saanmo nga itangad dagiti matam iti langlangit ket pudno a makitam ti init ken ti bulan ken dagiti bituen, ti isuamin a buyot ti langlangit, ket pudno a masulisogka ket agruknoyka kadakuada ken agserbika kadakuada,+ isuda a biningaybingay ni Jehova a Diosmo kadagiti amin nga ili iti sirok ti intero a langlangit.+ 20 Ngem dakayo ti innala ni Jehova tapno mairuarnakayo manipud urno a landok,+ manipud Egipto, tapno agbalin nga ili a kabukbukodanna a kukua+ a kas itoy nga aldaw.

21 “Ket ni Jehova nagpungtot unay kaniak maigapu kadakayo,+ iti kasta insapatana a saanak a bumallasiw iti Jordan wenno sumrek iti nasayaat a daga nga ited kenka ni Jehova a Diosmo kas tawid.+ 22 Ta matayak itoy a daga.+ Saanak a bumallasiw iti Jordan, ngem bumallasiwkayo, ket masapul a tagikuaenyo daytoy nasayaat a daga. 23 Agaluadkayo tapno saanyo a malipatan ti tulag ni Jehova a Diosyo a pinatalgedanna kadakayo+ ken tapno saanyo nga iyaramidan ti bagbagiyo iti kinitikitan a ladawan, ti langa ti aniaman a banag a maipapan iti dayta binilinnaka ni Jehova a Diosmo.+ 24 Ta ni Jehova a Diosmo maysa a mangibus nga apuy,+ maysa a Dios a mangalkalikagum iti naipamaysa a debosion.+

25 “No kas pagarigan agbalinka nga ama iti annak ken appoko ket nagtaengkayon iti nabayag a tiempo iti daga ket agtignaykayo iti makadadael+ ket agaramidkayo iti kinitikitan a ladawan,+ a langa ti aniaman a banag, ket aramidenyo ti dakes kadagiti mata ni Jehova a Diosmo+ tapno pagrurodenyo, 26 alaek kas saksi maibusor kadakayo ita nga aldaw ti langlangit ken ti daga,+ a di bumurong a mapukawkayto a sidadaras iti daga a bumallasiwanyo iti Jordan tapno tagikuaenyo. Saanyonto a mapaatiddog ti al-aldawyo iti dayta, agsipud ta di bumurong a matalipuposkayto.+ 27 Ket sigurado nga iwarawaranakayto ni Jehova iti tengnga dagiti ili,+ ket pudno nga agtalinaedkayto a bassit+ ti bilangna iti tengnga dagiti nasion a pangyabuganto kadakayo ni Jehova. 28 Ket sadiay masapul nga agserbikayto iti didios,+ ti aramid dagiti ima ti tao, kayo ken bato,+ a di makakita wenno makangngeg wenno makapangan wenno makaangot.+

29 “No sapulenyo ni Jehova a Diosmo sadiay, sigurado a masarakamto met,+ agsipud ta agimtuodkanto maipapan kenkuana buyogen ti isuamin a pusom ken buyogen ti isuamin a kararuam.+ 30 Inton agpaspasarka kadagiti nakaro a pakarigatan ket amin dagitoy a sasao napagtengda kenka iti panagpatingga ti al-aldaw, iti kasta masapul nga agsublikanto ken Jehova a Diosmo+ ken agimdengka iti timekna.+ 31 Ta ni Jehova a Diosmo naasi a Dios.+ Saannakanto a baybay-an wenno dadaelen wenno lipaten ti tulag+ dagidi ammam nga insapatana kadakuada.

32 “Ita imtuodem, pangngaasim, ti maipapan kadagidi immun-una nga aldaw+ a dimteng iti kasakbayam, manipud iti aldaw a panangparsua ti Dios iti tao iti rabaw ti daga+ ken manipud maysa nga ungto ti langlangit agingga iti sabali nga ungto ti langlangit, Napataud kadi ti aniaman a naindaklan a banag a kas itoy wenno nangngeg kadi ti aniaman a banag a kas iti dayta?+ 33 Nangngeg kadi ti aniaman a sabali nga ili ti timek ti Dios nga agsasao manipud tengnga ti apuy kas iti pannakangngegmo a mismo iti dayta, ket nagtultuloy a sibibiag?+ 34 Wenno ginandat kadi ti Dios ti umay tapno mangala iti nasion maipaay kenkuana manipud tengnga ti sabali a nasion babaen kadagiti panangpaneknek,+ babaen kadagiti pagilasinan+ ken babaen kadagiti milagro+ ken babaen ti gubat+ ken babaen ti napigsa nga ima+ ken babaen ti siuunnat a takiag+ ken babaen ti dakkel a pagbutbutngan+ kas iti amin nga inaramid ni Jehova a Diosyo maipaay kadakayo idiay Egipto iti imatangmo? 35 Sika—naipakita kenka, tapno maammuam a ni Jehova ti pudno a Dios;+ awanen ti sabali malaksid kenkuana.+ 36 Manipud iti langlangit impangngegna kenka ti timekna tapno lintegennaka; ket iti rabaw ti daga impakitana kenka ti naindaklan nga apuyna, ket nangngegmo ti sasaona manipud tengnga ti apuy.+

37 “Ket [kaskasdi agtultuloyka nga agbiag], agsipud ta inayatna dagidi ammam iti kasta pinilina ti bin-ida a simmaruno kadakuada+ ket inruarnaka manipud Egipto iti imatangna babaen ti dakkel a pannakabalinna,+ 38 tapno pagtalawenna iti sanguanam dagiti nasion a daddadakkel ken nabilbileg ngem sika, iti kasta iserreknaka, tapno itedna kenka ti dagada a kas tawid kas itoy nga aldaw.+ 39 Ket pagaammom unay ita nga aldaw, ken masapul a lagipem ita pusom a ni Jehova ti pudno a Dios iti langlangit sadi ngato ken iti daga ditoy baba.+ Awanen ti sabali.+ 40 Ket masapul a salimetmetam dagiti alagadenna+ ken dagiti bilinna nga ibilbilinko kenka ita nga aldaw, tapno naimbag ti lak-ammo+ ken ti annakmo a sumaruno kenka, ken tapno mapaatiddogmo ti al-aldawmo iti daga nga ited kenka ni Jehova a Diosmo,+ a kanayon.”

41 Iti dayta a tiempo nangilasin ni Moises iti tallo a siudad iti deppaar ti Jordan nga agpaleleggakan ti init,+ 42 tapno agkamang sadiay ti nakapapatay a saanna a pagaammo a napapatayna ti padana a tao,+ idinto ta saanna a sigud a gurguraen;+ ket masapul nga agkamang iti maysa kadagitoy a siudad ket agbiag,+ 43 awan sabali, ti Bezer+ iti let-ang iti tanap maipaay kadagiti Rubenita, ken ti Ramot+ idiay Galaad maipaay kadagiti Gadita, ken ti Golan+ idiay Basan maipaay kadagiti Manasesita.+

44 Ita daytoy ti linteg+ nga impasdek ni Moises iti sanguanan ti annak ti Israel. 45 Dagitoy ti pammaneknek+ ken dagiti alagaden+ ken dagiti hudisial a pangngeddeng+ a sinao ni Moises iti annak ti Israel iti iruruarda manipud Egipto, 46 iti rehion ti Jordan idiay ginget iti sanguanan ti Bet-peor,+ iti daga ni Sihon nga ari dagiti Amoreo, nga agnanaed idi idiay Hesbon,+ a pinarmek ni Moises ken ti annak ti Israel iti iruruarda manipud Egipto.+ 47 Ket tinagikuada ti dagana ken ti daga ni Og+ nga ari ti Basan, ti dua nga ari dagiti Amoreo nga adda idi iti rehion ti Jordan nga agpaleleggakan ti init, 48 manipud Aroer,+ nga adda iti igid ti naapres a ginget ti Arnon, agingga iti Bantay Siyon, kayatna a sawen, Hermon,+ 49 ken ti intero nga Araba+ iti rehion ti Jordan nga agpadaya, ken agingga iti baybay ti Araba+ iti arisadsad dagiti darisdis ti Pisga.+