• Isaias 2:2-4
    Baro a Lubong a Patarus ti Nasantuan a Kasuratan

    •  2 Iti maudi a paset dagiti aldaw,*

      Sititibkerto a maipasdek

      Ti bantay ti balay ni Jehova iti ngatuen dagiti bantay,+

      Ket nangatngatonto ngem kadagiti turod,

      Ken agturongto iti dayta ti amin a nasion.+

       3 Mapanto sadiay ti adu a tattao ket ibagada:

      “Umaykayo, sumang-attayo iti bantay ni Jehova,

      Iti balay ti Dios ni Jacob.+

      Isuronatayto maipapan kadagiti dalanna,

      Ket magnatayto kadagiti danana.”+

      Ta rummuarto ti linteg* manipud Sion,

      Ken ti sao ni Jehova manipud Jerusalem.+

       4 Agtignayto ti Dios kas ukom kadagiti nasion

      Ket solbarenna dagiti problema* ti adu nga ili.

      Pitpitendanto ti espadada a pagbalinen a subsob ti arado

      Ken dagiti pikada a pagbalinen a kumpay.+

      Saanto a mangilayat ti nasion iti espada maibusor iti sabali a nasion,

      Ken saandanto metten a sursuruen ti makigubat.+