Deuteronomio

16 “Laglagipem ti bulan ti Abib,* ket selebraram ti Paskua ni Jehova a Diosmo,+ ta inruarnaka ni Jehova a Diosmo idiay Egipto iti rabii iti dayta a bulan.+ 2 Masapul nga ipanmo ken Jehova a Diosmo ti daton para iti Paskua+—karnero, kalding, ken baka+—iti disso a pilien ni Jehova a pakaidaydayawan ti naganna.+ 3 Saanmo nga ipangan iti dayta ti aniaman nga adda lebadurana;+ ta pito nga aldaw a manganka iti tinapay nga awan lebadurana, ti tinapay ti panagrigat, ta nagdardaraskayo a pimmanaw idiay Egipto.+ Aramidem daytoy tapno saanmo a malipatan ti aldaw nga ipapanawyo idiay Egipto bayat a sibibiagka.+ 4 Awan koma ti lebadura a masarakan iti intero a teritoriayo iti pito nga aldaw,+ ken saanmo met nga ipabigat ti aniaman a karne nga idatonmo iti rabii iti umuna nga aldaw.+ 5 Saanka a mapalubosan nga agdaton para iti Paskua iti uray sadino lattan kadagiti siudad nga ited kenka ni Jehova a Diosmo. 6 Masapul a maidaton dayta iti disso a pilien ni Jehova a Diosmo a pakaidaydayawan ti naganna. Idatagmo ti datonmo para iti Paskua iti rabii no limneken ti init,+ iti daydi naikeddeng a tiempo nga iruruaryo idiay Egipto. 7 Masapul a lutuen ken kanem dayta+ iti disso a pilien ni Jehova a Diosmo,+ ket mabalinmo ti agsubli kadagiti toldayo iti bigat. 8 Innem nga aldaw a manganka iti tinapay nga awan lebadurana, ket iti maikapito nga aldaw, mangaramidka iti nasantuan nga asamblea para ken Jehova a Diosmo. Saanka nga agtrabaho.+

9 “Mangbilangka iti pito a lawas. Rugiam ti agbilang iti pito a lawas manipud iti damo a panaggapasmo iti sebada.+ 10 Kalpasanna, selebraram ti Piesta Dagiti Lawas para ken Jehova a Diosmo,+ ken mangitugotka iti boluntario a daton maitunos iti bendision nga ited kenka ni Jehova a Diosmo.+ 11 Agragsakka iti sanguanan ni Jehova a Diosmo—sika, ti annakmo a lallaki ken babbai, ti adipenmo a lallaki ken babbai, dagiti Levita nga adda kadagiti siudadyo,* dagiti ganggannaet a residente, awanan ama nga ubbing,* ken balo a babbai—iti disso a pilien ni Jehova a Diosmo a pakaidaydayawan ti naganna.+ 12 Laglagipem a naadipenka idiay Egipto,+ ket masapul a tungpalem ken aramidem dagitoy a regulasion.

13 “Pito nga aldaw a selebraram ti Piesta ti Abong-abong*+ inton urnongem dagiti produkto a naggapu iti pagirikan ken iti pagpespesan iti lana ken arak. 14 Agragsakka bayat ti piestayo+—sika, ti annakmo a lallaki ken babbai, ti adipenmo a lallaki ken babbai, dagiti Levita, ganggannaet a residente, awanan ama nga ubing, ken balo a babai, nga adda kadagiti siudadyo. 15 Pito nga aldaw a selebraram ti piesta+ para ken Jehova a Diosmo iti lugar a pilien ni Jehova, ta bendisionanto ni Jehova a Diosmo ti amin nga apitmo ken amin nga aramidem,+ ket naragsakkanto.+

16 “Masapul a mamitlo iti makatawen a mapan ti amin a lallaki kadakayo iti sanguanan ni Jehova a Diosmo iti disso a pilienna: iti Piesta ti Tinapay nga Awan Lebadurana,+ Piesta Dagiti Lawas,+ ken iti Piesta ti Abong-abong,*+ ket awan kadakuada ti agparang ken Jehova nga ima-ima. 17 Ti sagut nga itugot ti tunggal maysa ket masapul a maitunos iti bendision nga inted kadakayo ni Jehova a Diosyo.+

18 “Mangdutokkayo kadagiti ukom+ ken opisial iti tunggal tribu iti amin a siudad* nga ited kadakayo ni Jehova a Diosyo, ket masapul a nalinteg ti panangukomda kadagiti tattao. 19 Saanyo a killuen ti hustisia,+ saankayo a mangidumduma,+ wenno umawat iti pasuksok, ta ti pasuksok bulsekenna dagiti masirib+ ken tiritirenna ti sasao dagiti nalinteg. 20 Ikagumaanyo nga ipakat ti hustisia,+ tapno agtultuloykayo nga agbiag ket matagikuayo ti daga nga ited ni Jehova a Diosyo.

21 “Dikay agmula iti aniaman a kayo kas sagrado a poste*+ iti asideg ti altar nga inaramidyo para ken Jehova a Diosyo.

22 “Dikay met mangibangon iti sagrado nga adigi,+ ta kagura dayta ni Jehova a Diosyo.