Ti Umuna a Cronicas
17 Idi nagnaeden ni David iti balayna,* kinunana ken Natan+ a propeta: “Agnanaedak iti balay a sedro+ idinto ta ti lakasa ti tulag ni Jehova ket adda iti tolda a lupot.”+ 2 Insungbat ni Natan ken ni David: “Aramidem ti aniaman a kayat ta pusom, ta adda kenka ti pudno a Dios.”
3 Iti dayta met la a rabii, kinuna ti Dios ken ni Natan: 4 “Inka ibaga ken adipenko a David, ‘Daytoy ti kinuna ni Jehova: “Saanto a sika ti mangibangon iti balay a pagnaedak.+ 5 Ta saanak pay a nagnaed iti balay manipud idi aldaw nga inruarko ti Israel agingga ita, no di ket nagakar-akarak kadagiti tolda ken tabernakulo.*+ 6 Iti amin a tiempo a nakipagnaak kadagiti Israelita, adda kadi imbagak iti asinoman nga ukom iti Israel a dinutokak a mangipastor iti ilik, ‘Apay a didak imbangonan iti balay a sedro?’”’
7 “Ibagam ken adipenko a David, ‘Daytoy ti kinuna ni Jehova a panguluen dagiti armada: “Innalaka iti pagpastoran, idi ay-aywanam ti arban, tapno agbalinka a lider ti ilik nga Israel.+ 8 Addaakto kenka iti sadinoman a papanam,+ ket papatayekto* ti amin a kabusormo.+ Pagbalinekto ti naganmo a kas iti nagan dagiti natan-ok a tattao ditoy daga.+ 9 Mangpiliak iti lugar a pagnaedanto ti ilik nga Israel. Agnaeddanto sadiay ken awanton ti mangriribuk kadakuada, ket saanto a parigaten* manen ida dagiti dakes a lallaki a kas iti inaramidda idi,+ 10 manipud idi aldaw a nangdutokak kadagiti ukom a mangituray iti ilik nga Israel.+ Parmekekto ti amin a kabusormo.+ Ibagak pay kenka, ‘Ibangonannakanto ni Jehova iti balaymo.’*
11 “‘“Inton matayka ket maitiponka kadagidi ammam, isaadkonto kas ari ti putotmo,* ti maysa kadagiti annakmo a lallaki,+ ket pagtalinaedekto ti panagturayna.+ 12 Ibangonnanto ti balayko,+ ket pagtalinaedekto ti tronona iti agnanayon.+ 13 Agbalinakto nga amana, ket agbalinto nga anakko.+ Dinto agkupas ti napudno nga ayatko kenkuana,+ saan a kas iti panagkupas ti ayatko iti daydiay immun-una ngem sika.+ 14 Pagturayekto iti agnanayon iti balayko ken iti pagariak,+ ket agnanayonto ti panagturayna.”’”+
15 Imbaga amin daytoy ni Natan ken ni David agraman ti intero a sirmata.
16 Nagtugaw ni Ari David iti sanguanan ni Jehova ket kinunana: “Asinoak, O Jehova a Dios? Ken asino koma ti pamiliak tapno aramidem amin dagitoy kaniak?+ 17 Ken saan la a dayta, O Dios, imbagam pay ti maipapan iti pamilia ti adipenmo agingga iti adayo a masanguanan,+ ken imbilangnak a kas natan-ok a tao,* O Jehova a Dios. 18 Ania pay koma ti maibaga kenka daytoy adipenmo a ni David maipapan iti dayaw nga intedmo kaniak ta am-ammonak unay?+ 19 O Jehova, inaramidmo amin dagitoy a naindaklan a banag ken impalgakmo a naindaklanka maigapu kaniak nga adipenmo ken maigapu iti pusom.*+ 20 O Jehova, awan ti kas kenka,+ ken awan ti Dios malaksid kenka.+ Mapaneknekanmi dayta gapu iti amin a nangngegmi. 21 Ken ania a nasion ditoy daga ti kas iti ilim nga Israel?+ Sika a pudno a Dios ti nangsubbot kadakuada kas ilim.+ Inyaramidam iti nagan ti bagim babaen ti naindaklan ken nakaskasdaaw nga aramid.+ Pinapanawmo dagiti nasion iti sanguanan ti ilim,+ a sinubbotmo idiay Egipto. 22 Pinagbalinmo ti Israel kas ilim iti agnanayon;+ ket sika, O Jehova, ti nagbalin a Diosda.+ 23 Ita, O Jehova, agnanayon koma a tungpalem ti karim maipapan iti adipenmo ken iti sangakabbalayanna, ken aramidem koma ti inkarim.+ 24 Agtalinaed* ken maitan-ok+ koma ti naganmo iti agnanayon, tapno ibaga dagiti tattao, ‘Ni Jehova a panguluen dagiti armada, ti Dios ti Israel, ket Dios para iti Israel,’ ken agtalinaed koma iti agnanayon ti sangakabbalayan daytoy adipenmo a ni David.+ 25 Ta sika, Diosko, impalgakmo iti adipenmo ti panggepmo a mangibangon iti balayko.* Dayta ti makagapu a sikokompiansa nga ikararag kenka daytoy ti adipenmo. 26 Ita, O Jehova, sika ti pudno a Dios, ket inkarim iti adipenmo dagitoy nasayaat a banag. 27 Pakaragsakam koma ngarud a bendisionan ti sangakabbalayan ti adipenmo, ken agtalinaed koma dayta iti agnanayon iti sanguanam, ta binendisionam, O Jehova, ket mabendisionan dayta iti agnanayon.”