Maysa nga Apocalipsis ken Juan
7 Kalpasan daytoy, nakakitaak iti uppat nga anghel a nakatakder iti uppat a suli ti daga, a mangtengtengngel a siiirut iti uppat nga angin ti daga, tapno awan ti angin nga agpuyupoy iti daga wenno iti baybay wenno iti aniaman a kayo. 2 Ket nakakitaak iti sabali pay nga anghel nga umul-uli manipud iti pagsingisingan ti init,* a nakaiggem iti selio ti sibibiag a Dios; ket impukkawna iti uppat nga anghel a nakaitedan iti autoridad a mangdangran iti daga ken iti baybay, 3 nga ibagbagana: “Saanyo a dangran ti daga wenno ti baybay wenno dagiti kayo, agingga a malpasmi a selioan+ ti muging dagiti adipen ti Diostayo.”+
4 Ket nangngegko ti bilang dagidiay naselioan, 144,000,+ a naselioan manipud iti tunggal tribu ti annak ti Israel:+
5 Manipud iti tribu ni Juda, 12,000 ti naselioan;
manipud iti tribu ni Ruben, 12,000;
manipud iti tribu ni Gad, 12,000;
6 manipud iti tribu ni Aser, 12,000;
manipud iti tribu ni Neftali, 12,000;
manipud iti tribu ni Manases,+ 12,000;
7 manipud iti tribu ni Simeon, 12,000;
manipud iti tribu ni Levi, 12,000;
manipud iti tribu ni Isacar, 12,000;
8 manipud iti tribu ni Zabulon, 12,000;
manipud iti tribu ni Jose, 12,000;
manipud iti tribu ni Benjamin, 12,000 ti naselioan.
9 Kalpasan daytoy, nakitak ket adtoy! adda dakkel a bunggoy, nga awan ti tao a makabael a mangbilang, manipud iti amin a nasion, tribu, puli, ken lengguahe,+ nga agtaktakder iti sanguanan ti trono ken iti sanguanan ti Kordero. Nakabadoda iti puraw+ ken nakaiggemda iti bulbulong ti palma.+ 10 Ket agtultuloy nga ipukpukkawda: “Utangmi ti pannakaisalakan iti Diostayo, a situtugaw iti trono,+ ken iti Kordero.”+
11 Amin nga anghel ket nakatakder iti aglawlaw ti trono ken dagiti panglakayen+ ken ti uppat a sibibiag a parsua, ket nagruknoyda iti sango ti trono ken indaydayawda ti Dios, 12 nga ibagbagada: “Amen! Maited koma iti Dios ti kinatan-ok, dayag, sirib, panagyaman, dayaw, pannakabalin, ken bileg iti agnanayon nga awan inggana.+ Amen.”
13 Kas sungbat, imbaga kaniak ti maysa kadagiti panglakayen: “Siasino dagitoy a nakabado iti puraw+ ken naggapuanda?” 14 Isu nga imbagak a dagus: “Apo, sika ti makaammo.” Ket kinunana kaniak: “Isuda dagidiay nakalasat iti dakkel a rigat,+ ken linabaanda dagiti badoda ken pinapudawda iti dara ti Kordero.+ 15 Dayta ti makagapu nga addada iti sanguanan ti trono ti Dios, ken mangipapaayda kenkuana iti sagrado a panagserbi iti aldaw ken rabii idiay templona; ken Daydiay situtugaw iti trono+ iyukradnanto kadakuada ti toldana.+ 16 Pulos a saandanton nga agbisin wenno mawaw, saandanton a mapudotan iti init wenno aniaman a makasinit,+ 17 ta ti Kordero,+ nga adda iti tengnga* ti trono, ti mangipastor+ ken mangiturong kadakuada kadagiti ubbog* ti dandanum ti biag.+ Ket punasento ti Dios ti amin a lua kadagiti matada.”+