Ezekiel

48 “Dagitoy ti nagan dagiti tribu, manipud iti ungto iti amianan: Ti bingay ti Dan+ ket manipud iti dalan nga agpa-Hetlon agingga iti Lebo-hamat*+ nga agpa-Hazar-enan, iti pagpatinggaan ti Damasco nga agpaamianan, iti abay ti Hamat;+ manipud iti pagpatinggaan iti daya agingga iti pagpatinggaan iti laud. 2 Ti bingay ti Aser+ ket iti abay ti teritoria ti Dan, manipud iti pagpatinggaan iti daya agingga iti pagpatinggaan iti laud. 3 Ti bingay ti Neftali+ ket iti abay ti teritoria ti Aser, manipud iti pagpatinggaan iti daya agingga iti pagpatinggaan iti laud. 4 Ti bingay ti Manases+ ket iti abay ti teritoria ti Neftali, manipud iti pagpatinggaan iti daya agingga iti pagpatinggaan iti laud. 5 Ti bingay ti Efraim ket iti abay ti teritoria ti Manases,+ manipud iti pagpatinggaan iti daya agingga iti pagpatinggaan iti laud. 6 Ti bingay ti Ruben ket iti abay ti teritoria ti Efraim,+ manipud iti pagpatinggaan iti daya agingga iti pagpatinggaan iti laud. 7 Ti bingay ti Juda ket iti abay ti teritoria ti Ruben,+ manipud iti pagpatinggaan iti daya agingga iti pagpatinggaan iti laud. 8 Iti abay ti teritoria ti Juda, manipud iti pagpatinggaan iti daya agingga iti pagpatinggaan iti laud, ti kontribusion nga ilasinyo ket 25,000 a kasiko* ti kaakabana+ ken ti kaatiddogna ket kapada ti dadduma a bingay dagiti tribu manipud iti pagpatinggaan iti daya agingga iti pagpatinggaan iti laud. Addanto ti santuario iti tengnga dayta.

9 “Ti kontribusion nga ilasinyo para ken Jehova ket 25,000 a kasiko ti kaatiddogna ken 10,000 a kasiko ti kaakabana. 10 Daytoyto ti nasantuan a kontribusion para kadagiti papadi.+ Agrukod iti 25,000 a kasiko iti amianan, 10,000 a kasiko iti laud, 10,000 a kasiko iti daya, ken 25,000 a kasiko iti abagatan. Addanto ti santuario ni Jehova iti tengnga dayta. 11 Kukuanto dayta dagiti papadi a napagbalin a nasantuan, nga annak ni Zadok,+ dagidiay nangasikaso iti responsabilidadda kaniak ken saan nga immadayo idi immadayo dagiti Israelita ken Levita.+ 12 Addanto bingayda iti naikontribusion a daga a nailasin kas kasasantuan a banag, iti abay ti teritoria dagiti Levita.

13 “Iti abay ti teritoria dagiti papadi, addanto bingay dagiti Levita a 25,000 a kasiko ti kaatiddogna ken 10,000 a kasiko ti kaakabana. (Ti intero a kaatiddogna ket 25,000 ken 10,000 ti kaakabana.) 14 Masapul a saanda nga ilako, isukat, wenno ipasa ti aniaman a paset daytoy a kasayaatan a bingay iti daga, ta nasantuan a banag dayta ken Jehova.

15 “Ti nabatbati a disso a 5,000 a kasiko ti kaakabana iti abay ti 25,000 a kasiko a pagpatinggaan ket usarento ti siudad+ a pagbalayan ken pagpastoran. Addanto ti siudad iti tengnga dayta.+ 16 Dagitoy ti rukod ti siudad: 4,500 a kasiko ti pagpatinggaan iti amianan, 4,500 a kasiko iti abagatan, 4,500 a kasiko iti daya, ken 4,500 a kasiko iti laud. 17 Ti pagpastoran ti siudad ket 250 a kasiko iti amianan, 250 a kasiko iti abagatan, 250 a kasiko iti daya, ken 250 a kasiko iti laud.

18 “Ti kaatiddog ti nabatbati a bingay ket kapadanto ti nasantuan a kontribusion,+ 10,000 a kasiko iti daya ken 10,000 a kasiko iti laud. Kapadanto dayta ti nasantuan a kontribusion, ket ti apitna ti pagtaraonto dagidiay agserserbi iti siudad. 19 Talonento dayta dagidiay agserserbi iti siudad manipud iti amin a tribu ti Israel.+

20 “Ti intero a kontribusion ket 25,000 a kasiko a kuadrado. Masapul nga ilasinyo dayta kas nasantuan a kontribusion agraman ti sanikua ti siudad.

21 “Kukuanto ti panguluen ti matedda iti agsumbangir a sikigan ti nasantuan a kontribusion ken ti sanikua ti siudad.+ Addanto dayta iti abay ti 25,000 a kasiko a pagpatinggaan iti daya ken laud ti kontribusion. Kapadanto dayta dagiti bingay iti abayna, ken agpaay iti panguluen. Addanto iti tengnga dayta ti nasantuan a kontribusion ken ti santuario ti templo.

22 “Ti sanikua dagiti Levita ken ti sanikua ti siudad ket addanto iti nagbaetan ti kukua ti panguluen. Ti teritoria ti panguluen ket addanto iti nagbaetan ti teritoria ti Juda+ ken ti teritoria ti Benjamin.

23 “No maipapan iti dadduma pay a tribu, ti bingay ti Benjamin ket manipud iti pagpatinggaan iti daya agingga iti pagpatinggaan iti laud.+ 24 Ti bingay ti Simeon ket iti abay ti teritoria ti Benjamin,+ manipud iti pagpatinggaan iti daya agingga iti pagpatinggaan iti laud. 25 Ti bingay ti Isacar+ ket iti abay ti teritoria ti Simeon, manipud iti pagpatinggaan iti daya agingga iti pagpatinggaan iti laud. 26 Ti bingay ti Zabulon ket iti abay ti teritoria ti Isacar,+ manipud iti pagpatinggaan iti daya agingga iti pagpatinggaan iti laud.+ 27 Ti bingay ti Gad ket iti abay ti teritoria ti Zabulon,+ manipud iti pagpatinggaan iti daya agingga iti pagpatinggaan iti laud. 28 Ti pagpatinggaan iti abagatan iti abay ti teritoria ti Gad ket manipud Tamar+ nga agturong iti dandanum ti Meribat-kades,+ ken aglayon iti Karayan* ken agingga iti Dakkel a Baybay.*+

29 “Daytoy ti daga a bingaybingayenyo kas tawid dagiti tribu ti Israel,+ ket dagitoyto ti bingayda,”+ kuna ti Kangatuan* nga Apo Jehova.

30 “Dagitoy ti pagruaran ti siudad: Iti amianan a sikigan, agrukodto iti 4,500 a kasiko.+

31 “Mapanagananto dagiti ruangan ti siudad iti nagan dagiti tribu ti Israel. Iti tallo a ruangan iti amianan, maysa ti para ken Ruben, maysa ti para ken Juda, ken maysa ti para ken Levi.

32 “Iti daya a sikigan, 4,500 a kasiko ti kaatiddogna ken addaan iti tallo a ruangan: maysa ti para ken Jose, maysa ti para ken Benjamin, ken maysa ti para ken Dan.

33 “Iti abagatan a sikigan, agrukodto iti 4,500 a kasiko ken addaan iti tallo a ruangan: maysa ti para ken Simeon, maysa ti para ken Isacar, ken maysa ti para ken Zabulon.

34 “Iti laud a sikigan, 4,500 a kasiko ti kaatiddogna ken addaan iti tallo a ruangan: maysa ti para ken Gad, maysa ti para ken Aser, ken maysa ti para ken Neftali.

35 “Ti rukod ti aglawlaw ti siudad ket 18,000 a kasiko. Ti nagan ti siudad manipud iti dayta nga aldaw ket Adda Dita ni Jehova.”+